Ezekiel 4:1-17

  • Afee Yerusalem kawoo lɛ he mfoniri (1-17)

    • Ebaatere esha gbii 390 kɛ gbii 40 (4-7)

4  “Ni bo gbɔmɔ bi,* kɔ brik* ko ni okɛfɔ̃ ohiɛ. Tɛŋmɔ* maŋ ko—Yerusalem—yɛ nɔ.  Wo he ka,+ ni otswa kawoo gbogbo owo he,+ ni otswa kpoku owo he,+ ni okɛ nsarai abɔle he, ni okɛ tsei ni akɛkumɔɔ gbogboi abɔle he.+  Kɔ dade tɛtrɛɛ ko ni okɛma bo kɛ maŋ lɛ teŋ akɛ dade gbogbo. Ni okɛ ohiɛ ama nɔ, ni abaawo lɛ ka; ni owo lɛ ka. Enɛ ji okadi kɛhã Israel shĩa lɛ.+  “No sɛɛ lɛ, yaakã shi yɛ obɛku nɔ ni okɛ Israel shĩa lɛ esha lɛ afɔ̃ onɔ.*+ Gbii abɔ ni obaakã obɛku nɔ lɛ, okɛ nakai gbii lɛ baatere amɛhe esha lɛ.  Mikɛ gbii 390 baafɔ̃ onɔ, yɛ afii abɔ ni amɛkɛfee esha lɛ naa,+ ni obaatere Israel shĩa lɛ esha lɛ.  Ni obaagbe naa. “Kɛkɛ lɛ okã shi nɔ ni ji shii enyɔ nɔ, shi agbɛnɛ lɛ yɛ oninejurɔ nɔ, ni obaatere Yuda shĩa lɛ esha+ lɛ gbii 40. Gbi kome lɛ afi kome ni, gbi kome lɛ afi kome ni, nakai ji bɔ ni mito mihã bo.  Ni obaatsɔ ohiɛ ohã Yerusalem kawoo+ lɛ kɛ odɛ̃ folo, ni ogba oshi lɛ.  “Naa! mikɛ kpãi baafimɔ bo koni okanyɛ otsɔ ohe kɛjɛ afã kome kɛtee afã kroko kɛyashi obaagbe okawoo gbii lɛ anaa.  “Ni okɛ wiiti, kɛ barle,* kɛ akpatramɔi, kɛ akwɛ̃ii, kɛ ŋmaa, kɛ spɛlt* lɛ awo tsɛnsi kome mli ni okɛfee blodo ohã ohe. Ejaakɛ enɛ ji nɔ ni obaaye yɛ gbii ni okɛbaakã obɛku nɔ lɛ mli, gbii 390.+ 10  Daa gbi lɛ, obaasusu niyenii tsiimɔ shekeli 20* ni oye. Obaaye yɛ bei pɔtɛi amli. 11  “Ni obaasusu nu hu ni obaanu lɛ, hin susumɔnɔ mlijai ekpaa mli ekome.* Obaanu yɛ bei pɔtɛi amli. 12  “Obaaye lɛ tamɔ barle* blodo kokloo; obaashã yɛ amɛhiɛ, ni okɛ gbɔmɔ fei ni egbi baashã.” 13  Yehowa tee nɔ ekɛɛ akɛ: “Nɛkɛ ji bɔ ni Israelbii lɛ baaye amɛblodo—akɛ nɔ ko ni he tseee—yɛ jeŋmaji ni mashwie amɛ kɛya amɛteŋ lɛ amli.”+ 14  Kɛkɛ ni mikɛɛ akɛ: “Ekaba lɛ nakai, Nuŋtsɔ Ofe Yehowa! Kɛjɛ migbekɛbiiashi aahu kɛbashi bianɛ lɛ, miyeko kooloo ko ni egbo, loo kooloo ko ni atserɛ emli+ loo kɛbuleko mihe* pɛŋ, ni loo ni he tseee* eyako midaaŋ pɛŋ.”+ 15  No hewɔ lɛ, ekɛɛ mi akɛ: “Yoo, mahã okɛ tsina fei ashã yɛ gbɔmɔ fei najiaŋ, ni obaashã oblodo lɛ yɛ nɔ.” 16  Kɛkɛ ni ekɛɛ mi akɛ: “Gbɔmɔ bi,* naa, miifo niyenii sɛɛ* yɛ Yerusalem,+ ni amɛbaaye amɛblodo ni asusuɔ etsiimɔ dani akɛhãa amɛ lɛ kɛ tsuiyeli babaoo,+ ni amɛbaanu amɛnu ni abaasusu ahã amɛ lɛ kɛ gbeyeishemɔ.+ 17  Enɛ baaba koni kɛ́ amɛnáaa blodo kɛ nu lɛ, amɛkwɛkwɛɛ amɛhiɛiaŋ ni amɛnaa akpɛ amɛhe ni amɛtãra loo yɛ amɛtɔmɔ lɛ hewɔ.

Shishigbɛ Niŋmaa

Hebri sht. ŋm., “binuu.”
Loo “ntayaa.”
Eeenyɛ efee akɛ, Ezekiel tɛŋ maŋ lɛ yɛ brik ko ni gbiko nɔ.
Hebri sht. ŋm., “afɔ̃ nɔ,” ni ji Ezekiel abɛku nɔ.
Eji wiiti henɔ ko.
Spɛlt ji wiiti henɔ ko ni jeee ekpakpa ní aduɔ yɛ blema Ejipt.
Aaafee gram 230 (oz t 7.3). Kwɛmɔ Saji Krokomɛi B14 lɛ.
Aaafee litai 0.6 (pint 1.3). Kwɛmɔ Saji Krokomɛi B14 lɛ.
Eji wiiti henɔ ko.
Loo “misusuma.”
Loo “loo ni ahiɔ.”
Hebri sht. ŋm., “binuu.”
Hebri sht. ŋm., “mibakumɔ blodo tsei lɛ.” Eeenyɛ efee akɛ, ekɔɔ tsei ni akɛ blodo tsotsoroɔ nɔ lɛ ahe.