Ezekiel 25:1-17

  • Agba ashi Amon (1-7)

  • Agba ashi Moab (8-11)

  • Agba ashi Edom (12-14)

  • Agba ashi Filistia (15-17)

25  Yehowa kɛɛ mi ekoŋŋ akɛ:  “Gbɔmɔ bi,* tsɔ ohiɛ ohã Amonbii+ lɛ, ni ogba oshi amɛ.+  Kɛɛmɔ Amonbii lɛ akɛ, ‘Nyɛboa nɔ ni Nuŋtsɔ Ofe Yehowa kɛɛ lɛ toi. Nɔ ni Nuŋtsɔ Ofe Yehowa kɛɛ nɛ: “Akɛni nyɛkɛɛ ‘Ahãa!’ be ni abule mijamɔhe lɛ, ni ahã Israel shikpɔŋ lɛ tsɔ amaŋfɔ, ni aŋɔ Yuda shĩa lɛ nom kɛtee lɛ hewɔ lɛ,  mikɛ nyɛ baawo Bokãgbɛbii lɛ adɛŋ ni nyɛtsɔ amɛnii. Amɛbaafee shitoohei* yɛ nyɛteŋ ni amɛbaafee amɛmama tsũi yɛ nyɛteŋ. Amɛbaaye nyɛyibii lɛ ni amɛbaanu nyɛmliki lɛ.  Mahã Raba+ atsɔ he ni afukpɔŋɔi yeɔ nii yɛ, ni Amonbii lɛ ashikpɔŋ lɛ hu baatsɔ he ni toi bumɔɔ shi yɛ; ni nyɛbaaná nyɛle akɛ miji Yehowa.”’”  “Ejaakɛ nɔ ni Nuŋtsɔ Ofe Yehowa kɛɛ nɛ: ‘Akɛni otswa odɛ̃+ ni okɛ onaji shimɔ shi ni onya* kɛye Israel shikpɔŋ lɛ he fɛo waa hewɔ lɛ,+  makpã minine mli mashi bo koni mikɛ bo awo jeŋmaji lɛ adɛŋ akɛ ta mli nii ni aloɔ kɛyaa. Mafo nyɛ mashɛ mafɔ̃ kɛje majimaji lɛ ateŋ ni makpãtã nyɛhiɛ kɛje shikpɔji lɛ anɔ.+ Makpãtã nyɛhiɛ kwraa, ni nyɛbaaná nyɛle akɛ miji Yehowa.’  “Nɔ ni Nuŋtsɔ Ofe Yehowa kɛɛ nɛ: ‘Akɛni Moab,+ kɛ Seir+ kɛɛ akɛ, “Naa! Yuda shĩa lɛ tamɔ jeŋmaji krokomɛi lɛ fɛɛ nɔŋŋ hewɔ lɛ,”  mahã Moab koŋ nɔ* akã yɛ maji ni yɔɔ ehusu lɛ naa lɛ amli, Bet-yeshimot, kɛ Baal-meon, aahu kɛyashi Kiriataim,+ ni ji eshikpɔŋ lɛ nɔ hei ni yɔɔ fɛo lɛ. 10  Mikɛ amɛ baafata Amonbii lɛ ahe ni mikɛ amɛ ahã Bokãgbɛbii lɛ ni etsɔ amɛnii,+ koni akakai Amonbii lɛ dɔŋŋ yɛ jeŋmaji lɛ ateŋ.+ 11  Ni magbala mɛi atoi yɛ Moab,+ ni amɛbaaná amɛle akɛ miji Yehowa.’ 12  “Nɔ ni Nuŋtsɔ Ofe Yehowa kɛɛ nɛ: ‘Edom etɔ ehe owele yɛ Yuda shĩa lɛ nɔ, ni eye sɔ̃ kpele yɛ ehe owele ni etɔ yɛ amɛnɔ lɛ hewɔ;+ 13  enɛ hewɔ lɛ, nɔ ni Nuŋtsɔ Ofe Yehowa kɛɛ nɛ: “Mi hu makpã minine mli mashi Edom ni mafo gbɔmɔ kɛ kooloo fɛɛ mashɛ mafɔ̃ kɛje emli, ni mahã etsɔ amaŋfɔ.+ Amɛbaanyɔnyɔi yɛ klante naa kɛjɛ Teman aahu kɛyashi Dedan.+ 14  ‘Matsɔ mimaŋ Israel nine nɔ matɔ mihe owele yɛ Edom nɔ.+ Amɛkɛ mimlifu kɛ mimlila lɛ baaba Edom nɔ, koni amɛna akɛ mi diɛŋtsɛ miitɔ amɛnɔ owele,’+ Nuŋtsɔ Ofe Yehowa kɛɛ.”’ 15  “Nɔ ni Nuŋtsɔ Ofe Yehowa kɛɛ nɛ: ‘Filistibii lɛ anyɛɛ ni naa wa lɛ hewɔ lɛ, amɛmiitao amɛkɛ jwɛŋmɔ fɔŋ* atɔ owele ni amɛkpãtã nii ahiɛ.+ 16  No hewɔ lɛ, nɔ ni Nuŋtsɔ Ofe Yehowa kɛɛ nɛ: “Naa, miikpã minine mli miishi Filistibii+ lɛ, ni mafo Keretifoi+ lɛ mashɛ mafɔ̃ ni makpãtã mɛi ni eshwɛ ni yɔɔ ŋshɔnaa lɛ ahiɛ.+ 17  Mikɛ oweletɔɔ kpelei kɛ toigbalamɔi ni naa wa baaba amɛnɔ, ni kɛ́ mitɔ mihe owele yɛ amɛnɔ lɛ, amɛbaaná amɛle akɛ miji Yehowa.”’”

Shishigbɛ Niŋmaa

Hebri sht. ŋm., “binuu.”
Loo “Amɛbaafee nsarai ni afo he afabaŋ.”
Loo “ni osusuma nya.”
Loo “Moab gɔji lɛ ahe.”
Loo “amɛmiitao amɛkɛ susuma mli heguɔgbee.”