Ezekiel 7:1-27

  • Naagbee lɛ eba (1-27)

    • Sane fɔŋ ni yɔɔ srɔto (5)

    • Amɛbaashɛrɛ amɛshika ashwie gbɛjegbɛi lɛ anɔ (19)

    • Abaabule sɔlemɔ shĩa lɛ (22)

7  Yehowa kɛɛ mi ekoŋŋ akɛ:  “Bo gbɔmɔ bi,* nɔ ni Nuŋtsɔ Ofe Yehowa kɛɔ Israel shikpɔŋ lɛ nɛ: ‘Naagbee! Shikpɔŋ lɛ koji ejwɛ lɛ anaagbee eshɛ.  Agbɛnɛ naagbee lɛ eba onɔ, ni maŋmɛɛ mimlifu lɛ he mashwie onɔ, ni makojo bo yɛ ogbɛi lɛ anaa ni magbala otoi yɛ onifeemɔi fɛɛ ni yɔɔ nyaŋemɔ lɛ ahewɔ.  Mihiŋmɛi enaŋ bo mɔbɔ; ni mimusuŋ hu eshãŋ mi yɛ ohe,+ ejaakɛ mikɛ nɔ ni baajɛ ogbɛi lɛ amli kɛba lɛ baaba onɔ, ni obaana nɔ yɛ nyaŋemɔ nii ni ofee lɛ hewɔ.+ Ni obaaná ole akɛ miji Yehowa.’+  “Nɔ ni Nuŋtsɔ Ofe Yehowa kɛɛ nɛ: ‘Naa! Sane fɔŋ ko, sane fɔŋ ko ni yɔɔ srɔto miiba.+  Naagbee ko miiba; naagbee lɛ baaba; ebaawó ehe nɔ* ewo bo. Naa! Eeba.  Bo mɔ ni oyɔɔ shikpɔŋ lɛ nɔ, eshɛ onɔ.* Be lɛ miiba, gbi lɛ ebɛŋkɛ.+ Aanu hoofeemɔ he yɛ gɔji lɛ anɔ, shi jeee nyamɔ.  “‘Etsɛŋ kwraa ni mafɔse mimlila lɛ mashwie onɔ,+ ni maŋmɛɛ mimlifu lɛ he mashwie onɔ,+ ni makojo bo yɛ ogbɛi lɛ anaa ni magbala otoi yɛ onifeemɔi fɛɛ ni yɔɔ nyaŋemɔ lɛ ahewɔ.  Mihiŋmɛi enaŋ bo mɔbɔ; ni mimusuŋ hu eshãŋ mi yɛ ohe,+ ejaakɛ mikɛ nɔ ni baajɛ ogbɛi lɛ amli kɛba lɛ baaba onɔ, ni obaana nɔ yɛ nyaŋemɔ nii ni ofee lɛ hewɔ. Ni obaaná ole akɛ mi, Yehowa, mi mitswaa bo nɔ lɛ.+ 10  “‘Naa, gbi lɛ! Naa, eeba!+ Eshɛ onɔ;* tso lɛ egba fɔfɔi ni tsuinaa saneyeli hu ekwɛ̃. 11  Yiwalɛ eda ni etsɔ efɔŋfeemɔ tso.+ Amɛ jio, nii ni amɛná lɛ jio, amɛsafoi lɛ jio, loo amɛnunyam lɛ jio, eko eko eshwɛŋ. 12  Be lɛ baashɛ, gbi lɛ baaba. Mɔ ni héɔ nii lɛ akanya, ni mɔ ni hɔ̃ɔ nii lɛ hu akaye awerɛho, ejaakɛ mlifu miiba asafo muu lɛ fɛɛ nɔ.*+ 13  Ejaakɛ mɔ ni hɔ̃ɔ nii lɛ, kɛ́ eyi ná wala po lɛ, ekuŋ esɛɛ kɛyaŋ nɔ ni ehɔ̃ɔ lɛ he, ejaakɛ ninaa lɛ kɔɔ mɛi lɛ fɛɛ ahe. Mɔ ko mɔ ko ekuŋ esɛɛ, ni etɔmɔ lɛ hewɔ lɛ, mɔ ko mɔ ko ebaŋ ewala yi. 14  “‘Amɛkpã tɛtɛrɛmantɛrɛ lɛ,+ ni mɔ fɛɛ mɔ efee klalo, shi mɔ ko mɔ ko eyaaa ta lɛ, ejaakɛ mimlifu lɛ baaba mɛi lɛ fɛɛ anɔ.+ 15  Klante yɛ agbó lɛ naa,+ ni tsɛŋemɔ hela ni gbeɔ mɔ kɛ hɔmɔ hu yɛ maŋ lɛ mli. Mɔ fɛɛ mɔ ni yɔɔ ŋa lɛ nɔ lɛ baagbo yɛ klante naa, ni hɔmɔ kɛ tsɛŋemɔ hela ni gbeɔ mɔ baagbe mɛi ni yɔɔ maŋ lɛ mli lɛ.+ 16  Mɛi ni yi baaná wala lɛ ateŋ mɛi komɛi baajo foi kɛya gɔji lɛ anɔ, ni amɛteŋ mɔ fɛɛ mɔ baafó yɛ etɔmɔ lɛ hewɔ tamɔ jɔi amli okpoi.+ 17  Amɛ fɛɛ amɛnijiaŋ baajɔ, ni nu baatsere kɛjɛ amɛ fɛɛ amɛnakutsei amli.*+ 18  Amɛbumɔ kpekpe,+ ni gbeyei emɔmɔ amɛ waa ni amɛmiikpokpo.* Mɔ fɛɛ mɔ hiɛ baagbo, ni yiteŋ fɛɛ yiteŋ baakpa.*+ 19  “‘Amɛbaashɛrɛ amɛjwiɛtɛi lɛ amɛshwie gbɛjegbɛi lɛ anɔ, ni amɛbaanyaŋe amɛshika tsuru lɛ. Amɛjwiɛtɛi kɛ amɛshika tsuru lɛ nyɛŋ ahere amɛ yɛ Yehowa mlifu gbi lɛ nɔ.+ Ehãŋ amɛtɔrɔ,* ni eyiŋ amɛmusuŋ hu obɔ, ejaakɛ etsɔ* tɛmɔtɛ ni hãa amɛtɔ̃ɔ. 20  Amɛhewulamɔnii ni yɔɔ fɛo lɛ hãa amɛyitsoŋ fuɔ, ni nomɛi* amɛkɛfeɔ amɛnibii ni yɔɔ nyaŋemɔ lɛ, ni ji amɛmagai ni yɔɔ nyaŋemɔ lɛ.+ No hewɔ ni mahã etsɔ nyaŋemɔ nii ehã amɛ lɛ. 21  Mikɛbaawo* mɛikpɔji adɛŋ koni amɛloo kɛya, kɛ efɔŋfeelɔi ni yɔɔ shikpɔŋ lɛ nɔ lɛ adɛŋ akɛ nii ni aloɔ yɛ ta mli, ni amɛbaabule lɛ. 22  “‘Majie mihiɛ yɛ amɛnɔ,+ ni amɛbaabule miteemɔhe lɛ,* ni ojotswalɔi baabote mli ni amɛbaabule lɛ.+ 23  “‘Feemɔ tsein* lɛ,+ ejaakɛ kojomɔ he lá eyi shikpɔŋ lɛ fɛɛ nɔ obɔ,+ ni maŋ lɛ mli eyi obɔ kɛ yiwalɛ.+ 24  Mikɛ jeŋmaji lɛ ateŋ mɛi ni ehiii fe fɛɛ lɛ baaba maŋ lɛ mli,+ ni amɛbaaŋɔ amɛshĩai lɛ,+ ni mafo hewalɔi lɛ ashwãa lɛ sɛɛ, ni abaabule amɛjamɔhei lɛ.+ 25  Kɛ́ amɛhaomɔ lɛ ba lɛ, amɛbaatao toiŋjɔlɛ sɛɛ gbɛ, shi amɛnáŋ eko.+ 26  Amanehulu baanyiɛ amanehulu sɛɛ, ni amaniɛbɔɔ baanyiɛ amaniɛbɔɔ sɛɛ, ni mɛi baatao ninaa yɛ gbalɔ ŋɔɔ,+ shi mla* lɛ baalaaje osɔfo, ni ŋaawoo hu baalaaje onukpai lɛ.+ 27  Maŋtsɛ lɛ baaye awerɛho,+ ni lumɔ lɛ hu baabu nijiaŋwujee* tamɔ mama, ni shikpɔŋ lɛ nɔ bii lɛ aniji baakpokpo kɛ gbeyeishemɔ. Ni mikɛ amɛ baaye yɛ amɛgbɛi lɛ anaa, ni makojo amɛ tamɔ bɔ ni amɛkojo lɛ nɔŋŋ. Ni amɛbaaná amɛle akɛ miji Yehowa.’”+

Shishigbɛ Niŋmaa

Hebri sht. ŋm., “binuu.”
Hebri sht. ŋm., “ehiɛ baatsɛ̃.”
Shishitsɔɔmɔi komɛi kɛɔ akɛ, “fɔfɔi akekere lɛ eba.”
Shishitsɔɔmɔi komɛi kɛɔ akɛ, “Fɔfɔi akekere lɛ eba.”
Ni tsɔɔ akɛ, mɛi ni hɔ̃ɔ nii lɛ kɛ mɛi ni heɔ nii lɛ fɛɛ náŋ he sɛɛ ejaakɛ abaakpãtã mɔ fɛɛ mɔ hiɛ.
Ni tsɔɔ akɛ, gbeyei baamɔmɔ amɛ ni amɛbaashamɔ amɛwo amɛhe.
Hebri sht. ŋm., “ni hekpokpomɔ baaha amɛhe.”
Ni tsɔɔ akɛ, abaashɛ amɛyiteŋ akɛ awerɛhoyeli he okadi.
Loo “amɛsusumai atɔrɔ.”
Ni ji, amɛjwiɛtɛi kɛ amɛshika tsuru lɛ.
Ni ji, amɛjwiɛtɛi kɛ amɛshika tsuru lɛ.
Ni ji, jwiɛtɛi kɛ shika tsuru ni amɛkɛfeɔ amagai lɛ.
Eeenyɛ efee akɛ, eewie Yehowa jamɔhe lɛ sɛɛtsu lɛ he.
Loo “kɔsɔŋkɔsɔ.” Ni ji, kɔsɔŋkɔsɔi ni akɛŋɔɔ mɛi nom kɛyaa.
Loo “gbɛtsɔɔmɔ.”
Loo “hiɛkpatamɔ.”