Ezekiel 44:1-31

  • Agbeleŋ agbó ni hiɛ kwɛɔ bokãgbɛ lɛ (1-3)

  • Taomɔ nii kɛhã gbɔi (4-9)

  • Taomɔ nii kɛhã Levibii lɛ kɛ osɔfoi lɛ (10-31)

44  Ekɛ mi ku sɛɛ kɛtsɔ gbɛ ni yaa jamɔhe lɛ kponɔgbɛ agbó lɛ ni hiɛ kwɛɔ bokãgbɛ lɛ naa+ lɛ nɔ kɛba, shi aŋa.+  Kɛkɛ ni Yehowa kɛɛ mi akɛ: “Aŋa agbó nɛɛ daa. Akagbele, ni gbɔmɔ ko akatsɔ mli kɛba; ejaakɛ, Yehowa, Israel Nyɔŋmɔ lɛ etsɔ mli kɛba,+ no hewɔ lɛ, aŋa daa.  Shi lumɔ lɛ baata agbó lɛ mli koni eye blodo yɛ Yehowa hiɛ,+ ejaakɛ lumɔ ji lɛ. Ebaatsɔ agbó lɛ ablanaa lɛ nɔ kɛba mli, ni ebaatsɔ jɛmɛ nɔŋŋ kɛje kpo.”+  Kɛkɛ ni ekɛ mi tsɔ kooyigbɛ agbó lɛ mli kɛba sɔlemɔ shĩa lɛ hiɛ. Mikwɛ, ni mina akɛ Yehowa anunyam lɛ eyi Yehowa sɔlemɔ shĩa lɛ obɔ.+ No hewɔ lɛ, mikɛ mihiɛ bu shi.+  Kɛkɛ ni Yehowa kɛɛ mi akɛ: “Gbɔmɔ bi,* okɛ ojwɛŋmɔ aba* nɔ fɛɛ nɔ ni makɛɛ bo yɛ Yehowa shĩa lɛ he gbɛtsɔɔmɔi lɛ kɛ mlai lɛ ahe lɛ nɔ, ni okwɛ, ni obo mi toi jogbaŋŋ. Hã ojwɛŋmɔ ahi gbɛ ni yaa sɔlemɔ shĩa lɛ mli lɛ kɛ hei fɛɛ ni atsɔɔ kɛjeɔ kpo yɛ jamɔhe lɛ mli lɛ nɔ jogbaŋŋ.+  Kɛɛmɔ nɛkɛ atuatselɔi, ni ji Israel shĩa lɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Nyɛ Israel shĩa, nyaŋemɔ nibii ni nyɛfeɔ lɛ efa.  Kɛ́ nyɛkɛ gbɔi ni afoko amɛ ketia yɛ amɛtsui kɛ amɛheloo mli lɛ ba mijamɔhe lɛ, amɛbuleɔ misɔlemɔ shĩa lɛ. Nyɛkɛ miniyenii* lɛ, ni ji fɔ kɛ lá lɛ baa, shi nakai beiaŋ nɔŋŋ lɛ, aaku mikpaŋmɔ lɛ mli yɛ nyaŋemɔ nibii fɛɛ ni nyɛfeɔ lɛ hewɔ.  Nyɛkwɛɛɛ mikrɔŋkrɔŋ nibii lɛ anɔ.+ Nyɛshi mijamɔhe lɛ nitsumɔi lɛ nyɛhã mɛi krokomɛi moŋ.”’  “‘Nɔ ni Nuŋtsɔ Ofe Yehowa kɛɛ nɛ: “Gbɔ ko gbɔ ko ni yɔɔ Israel ni afoko lɛ ketia yɛ etsui kɛ eheloo mli akabote mijamɔhe lɛ.”’ 10  “‘Shi Levibii ni je misɛɛ kɛtee shɔŋŋ+ be ni Israelbii lɛ je misɛɛ amɛyanyiɛ amagai ni yɔɔ nyaŋemɔ* asɛɛ lɛ baatere nɔ ni baajɛ amɛtɔmɔ lɛ mli kɛba lɛ. 11  No sɛɛ lɛ, amɛbaatsɔmɔ sɔɔlɔi yɛ mijamɔhe lɛ koni amɛbu misɔlemɔ shĩa lɛ agbói lɛ anaa,+ ni amɛsɔmɔ yɛ sɔlemɔ shĩa lɛ. Amɛbaagbe kooloi ni akɛbaashã shãa afɔlei lɛ kɛ afɔlei krokomɛi lɛ amɛhã maŋbii lɛ, ni amɛbaadamɔ maŋbii lɛ ahiɛ amɛsɔmɔ amɛ. 12  Akɛni amɛsɔmɔ amɛ yɛ amɛmagai ni yɔɔ nyaŋemɔ lɛ ahiɛ ni amɛtsɔ nanetɔ̃tɔmɔnii ni hã Israel shĩa lɛ fee esha lɛ hewɔ lɛ,+ no hewɔ ni mi hu miwó minine nɔ kɛkã kitã mishi amɛ lɛ,’ Nuŋtsɔ Ofe Yehowa kɛɛ, ‘ni amɛbaatere nɔ ni baajɛ amɛtɔmɔ lɛ mli kɛba lɛ. 13  Amɛbaŋ mihiɛ ni amɛbasɔmɔ akɛ misɔfoi, ni amɛbaŋ minibii krɔŋkrɔŋi lɛ loo minibii krɔŋkrɔŋi fe fɛɛ lɛ eko eko he, ni amɛbaatere amɛhiɛgbele lɛ yɛ nyaŋemɔ nibii ni amɛfee lɛ hewɔ. 14  Shi mahã amɛtsɔmɔ sɔlemɔ shĩa lɛ nitsumɔi lɛ anɔkwɛlɔi, koni amɛkwɛ nibii ni atsuɔ yɛ mli lɛ kɛ nibii fɛɛ ni esa akɛ afee yɛ mli lɛ anɔ.’+ 15  “‘Shi Levi osɔfoi lɛ, ni ji Zadok+ bihii lɛ ni kwɛ mijamɔhe lɛ nitsumɔi lɛ anɔ be ni Israelbii lɛ je misɛɛ lɛ,+ amɛbaaba mihiɛ amɛbasɔmɔ mi, ni amɛbaadamɔ mihiɛ koni amɛkɛ fɔ+ kɛ lá+ abahã mi,’ Nuŋtsɔ Ofe Yehowa kɛɛ. 16  ‘Amɛ amɛbaabote mijamɔhe lɛ, ni amɛbaabɛŋkɛ mikpɔlɔ lɛ kɛsɔmɔ mi,+ ni amɛtsu nitsumɔi ni mikɛwo amɛdɛŋ lɛ.+ 17  “‘Kɛ́ amɛba mligbɛ kpo lɛ agbói lɛ amli lɛ, amɛwo klala atadei.+ Amɛkawo kooloo hetsɔi atade ko kɛ́ amɛmiisɔmɔ yɛ mligbɛ kpo lɛ agbói lɛ amli loo yɛ shĩa lɛ mli. 18  Amɛbu klala fai yɛ amɛyitsei, ni amɛwo klala nikai hu yɛ amɛhɛi.+ Amɛkawo nɔ ko ni baahã latsa atsa amɛ. 19  Dani amɛbaaje kpo kɛya kponɔgbɛ kpo lɛ​—⁠kponɔgbɛ kpo ni ji he ni maŋbii lɛ nyiɛɔ lɛ⁠—​nɔ lɛ, amɛjie atadei ni amɛwo kɛsɔmɔ lɛ,+ ni amɛkɛshwie niyelihei krɔŋkrɔŋi lɛ.+ No sɛɛ lɛ, amɛwo atadei krokomɛi koni amɛkɛ amɛtadei lɛ akafee maŋbii lɛ krɔŋkrɔŋ. 20  Amɛkashɛ amɛyi,+ ni amɛkahã amɛyiteŋ tsɔi tsa kakadaŋŋ. Amɛku amɛyiteŋ tsɔi lɛ nɔ. 21  Osɔfoi lɛ akanu wain kɛ́ amɛbaabote mligbɛ kpo lɛ nɔ.+ 22  Amɛkɛ yoo okulafo loo yoo ni ewu eshwie lɛ akabote gbalashihilɛ mli;+ shi amɛbaanyɛ amɛkɛ oblayoo fro ni jɛ Israel seshibii lɛ ateŋ loo yoo okulafo ni no mli lɛ ewu ji osɔfo lɛ abote gbalashihilɛ mli.’+ 23  “‘Amɛtsɔɔ mimaŋbii lɛ srɔto ni yɔɔ nii ni yɔɔ krɔŋkrɔŋ kɛ nii ni bɛ krɔŋkrɔŋ teŋ; ni amɛbaatsɔɔ amɛ srɔto ni yɔɔ nii ni he tseee kɛ nii ni he tse teŋ.+ 24  Amɛsɔmɔ akɛ kojolɔi ni amɛye saji;+ amɛkojo yɛ miyiŋkpɛi lɛ anaa.+ Amɛye mimlai kɛ migbɛtsɔɔmɔi ni kɔɔ migbii juji lɛ fɛɛ ahe lɛ anɔ,+ ni amɛfee mihejɔɔmɔ gbii lɛ krɔŋkrɔŋ. 25  Amɛkaya gbɔmɔ ko ni egbo he, kɛjeee nakai lɛ amɛhe tseŋ. Shi kɛ́ amɛtsɛ, loo amɛnyɛ, loo amɛbinuu, loo amɛbiyoo, loo amɛnyɛmi nuu, loo amɛnyɛmi yoo ni boteko gbalashihilɛ mli ni lɛ, no lɛ, amɛbaanyɛ amɛbule amɛhe.+ 26  Ni kɛ́ afee osɔfo lɛ krɔŋkrɔŋ sɛɛ lɛ, amɛkane gbii kpawo amɛhã lɛ. 27  Gbi nɔ ni ebaabote he krɔŋkrɔŋ lɛ yɛ mligbɛ kpo lɛ nɔ koni eyasɔmɔ yɛ he krɔŋkrɔŋ lɛ, ekɛ esha afɔle kɛhã ehe aba,’+ Nuŋtsɔ Ofe Yehowa kɛɛ. 28  “‘Ni nɔ ni baatsɔ amɛgboshinii nɛ: mi, miji amɛgboshinii.+ Nyɛkahãa amɛ gbɛfaŋnɔ ko yɛ Israel, miji amɛgbɛfaŋnɔ. 29  Amɛ amɛbaaye ŋmaa* afɔle lɛ,+ kɛ esha afɔle lɛ, kɛ sɔ̃ afɔle lɛ,+ ni nɔ fɛɛ nɔ ni ajɔɔ nɔ yɛ Israel lɛ baatsɔ amɛnɔ.+ 30  Klɛŋklɛŋ yibii lɛ fɛɛ ateŋ nɔ ni hi fe fɛɛ lɛ, kɛ oniai srɔtoi fɛɛ ni nyɛbaatsu lɛ, ebaatsɔ osɔfoi lɛ anɔ.+ Ni nyɛkɛ klɛŋklɛŋ ŋmaa ni awiɛ ni boko lɛ ahãa osɔfo lɛ.+ Enɛ baahã jɔɔmɔ ahi nyɛshĩai lɛ anɔ.+ 31  Osɔfoi lɛ akaye nɔ ko ni egbo momo, loo nɔ ko ni atserɛ emli, loofɔlɔ jio, kooloo jio.’+

Shishigbɛ Niŋmaa

Hebri sht. ŋm., “binuu.”
Hebri sht. ŋm., “okɛ otsui ama.”
Hebri sht. ŋm., “miblodo.” Kwɛmɔ Wiemɔi Titrii Amligbalamɔ lɛ.
Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.