Ezekiel 18:1-32

  • Mɔ fɛɛ mɔ baatere lɛ diɛŋtsɛ ehe eshai (1-32)

    • Susuma ni feɔ esha lɛ nɔŋŋ baagbo (4)

    • Binuu tereŋ sɔ̃ yɛ etsɛ tɔmɔ hewɔ (19, 20)

    • Enáaa efɔŋfeelɔ gbele he miishɛɛ (23)

    • Tsuitsakemɔ hãa anáa wala (27, 28)

18  Ni Yehowa kɛɛ mi ekoŋŋ akɛ:  “Te tɛŋŋ ni nyɛbuɔ abɛ yɛ Israel shikpɔŋ lɛ nɔ akɛ, ‘Tsɛmɛi lɛ yeɔ wain yibii ŋmilikitii lɛ, shi bihii lɛ moŋ anyanyɔji shwãa’ lɛ?+  “‘Gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘nyɛyaŋ nɔ nyɛbuŋ abɛ nɛɛ yɛ Israel dɔŋŋ.  Naa! Susuma fɛɛ susuma* lɛ, minɔ ni. Bɔ ni tsɛ susuma ji minɔ lɛ, nakai nɔŋŋ binuu hu susuma ji minɔ. Susuma* ni feɔ esha lɛ, nakai susuma* lɛ nɔŋŋ baagbo.  “‘Ŋɔɔ lɛ akɛ nuu ko ji jalɔ, ni eyeɔ jalɛ sane, ni efeɔ nɔ ni ja.  Eyeee nii ni akɛshã afɔlei ahã amagai yɛ gɔji lɛ anɔ;+ ekɛ ehiɛ efɔ̃ɔɔ amagai ni yɔɔ nyaŋemɔ* ni yɔɔ Israel shĩa lɛ anɔ; ekɛ enyɛmi gbɔmɔ ŋa náaa bɔlɛ*+ ni ekɛ yoo ni miifee yei anii hu náaa bɔlɛ;+  ewaaa mɔ ko yi,+ shi ekuɔ sɛɛ ekɛ nyɔmɔtsɛ awabatoo nii* lɛ hãa lɛ;+ ejuuu mɔ ko mɔ ko,+ shi ekɛ lɛ diɛŋtsɛ eniyenii hãa mɔ ni hɔmɔ yeɔ lɛ lɛ,+ ni ekɛ mama haa mɔ ni hiɛ ehe folo lɛ he;+  ekɛ nii efaaa kɛ he kpa loo koni ená sɛɛ,+ shi ekwɛɔ jogbaŋŋ koni ekaye mɔ ko sane fɔŋ;+ kɛ́ mɔ ko kɛ mɔ ko ná sane lɛ, ekojoɔ amɛteŋ yɛ jalɛ naa;+  ni eyaa nɔ enyiɛɔ yɛ mimlai lɛ amli ni eyeɔ miyiŋkpɛi* lɛ anɔ bɔ ni afee ni eye anɔkwa. Nuu ni tamɔ nɛkɛ lɛ, jalɔ ni, ni bɔ fɛɛ bɔ ni fee lɛ, ebaaya nɔ ehi shi,’+ Nuŋtsɔ Ofe Yehowa kɛɛ. 10  “‘Shi ŋɔɔ lɛ akɛ eyɛ binuu ni ji julɔ+ loo gbɔmɔgbelɔ*+ loo efeɔ nibii nɛɛ ateŋ eko 11  (eyɛ mli akɛ etsɛ efeee nibii nɛɛ ateŋ eko moŋ)—eyeɔ nii ni akɛshã afɔlei ahã amagai yɛ gɔji lɛ anɔ, ekɛ enyɛmi gbɔmɔ ŋa náa bɔlɛ,* 12  ewaa mɔ ni efi lɛ kɛ ohiafo yi,+ ejuɔ, ekɛ nyɔmɔtsɛ awabatoo nii* lɛ ekuuu sɛɛ ehãaa lɛ, ekɛ ehiɛ fɔ̃ɔ amagai ni yɔɔ nyaŋemɔ lɛ anɔ,+ ekɛ ehe woɔ nifeemɔi ni yɔɔ nyaŋemɔ amli,+ 13  ekɛ nii faa koni ená he sɛɛ loo eheɔ he kpa+—no lɛ, ebinuu lɛ eyaŋ nɔ ehiŋ shi. Nibii ni yɔɔ nyaŋemɔ nɛɛ fɛɛ ni efeɔ lɛ hewɔ lɛ, bɔ fɛɛ bɔ ni fee lɛ, abaagbe lɛ. Lɛ diɛŋtsɛ elá baabua eyiteŋ. 14  “‘Shi ŋɔɔ lɛ akɛ tsɛ ko yɛ binuu ko ni naa eshai fɛɛ ni etsɛ feɔ lɛ, ni eyɛ mli akɛ enaa moŋ, shi lɛ lɛ, efeee nakai nibii lɛ eko. 15  Eyeee nii ni akɛshã afɔlei ahã amagai yɛ gɔji lɛ anɔ; ekɛ ehiɛ efɔ̃ɔɔ amagai ni yɔɔ nyaŋemɔ ni yɔɔ Israel shĩa lɛ anɔ; ekɛ enyɛmi gbɔmɔ ŋa náaa bɔlɛ;* 16  ewaaa mɔ ko yi; eŋɔɔɔ awabatoo nii* ehãaa ehe; ejuuu; ekɛ lɛ diɛŋtsɛ eniyenii hãa mɔ ni hɔmɔ yeɔ lɛ lɛ, ni ekɛ mama haa mɔ ni hiɛ ehe folo lɛ he; 17  ekwɛɔ jogbaŋŋ koni ekawa ohiafo yi; ekɛ nii efaaa koni ená he sɛɛ loo ehe he kpa; ni eyeɔ miyiŋkpɛi* lɛ anɔ ni enyiɛɔ yɛ mimlai lɛ amli. Nuu ni tamɔ nɛkɛ lɛ gboŋ yɛ etsɛ tɔmɔ lɛ hewɔ. Bɔ fɛɛ bɔ ni fee lɛ, ebaaya nɔ ehi shi. 18  Shi etsɛ lɛ, akɛni eshishiuɔ* mɛi, ejuɔ enyɛmi, ni efeɔ efɔŋ yɛ emaŋbii lɛ ateŋ hewɔ lɛ, ebaagbo yɛ etɔmɔ lɛ hewɔ. 19  “‘Shi nyɛbaakɛɛ akɛ: “Mɛni hewɔ binuu tereee sɔ̃ yɛ etsɛ tɔmɔ hewɔ lɛ?” Akɛni binuu lɛ yeɔ jalɛ sane ni efeɔ nɔ ni ja, ni ekɛ mimlai lɛ fɛɛ toɔ emasɛi ni eyeɔ nɔ hewɔ lɛ, bɔ fɛɛ bɔ ni fee lɛ, ebaaya nɔ ehi shi.+ 20  Susuma* ni feɔ esha lɛ, nakai susuma* lɛ nɔŋŋ baagbo.+ Binuu tereŋ sɔ̃ yɛ etsɛ tɔmɔ hewɔ, ni tsɛ hu tereŋ sɔ̃ yɛ ebinuu tɔmɔ hewɔ. Jalɔ lɛ, abaakojo lɛ yɛ ejalɛ nifeemɔi lɛ anaa, ni efɔŋfeelɔ lɛ, abaakojo lɛ yɛ nibii fɔji ni efeɔ lɛ anaa.+ 21  “‘Ni kɛ́ efɔŋfeelɔ kpa eshai fɛɛ ni efeɔ lɛ, ni eye mimlai lɛ anɔ ni eye jalɛ sane ni efee nɔ ni ja lɛ, bɔ fɛɛ bɔ ni fee lɛ, ebaaya nɔ ehi shi. Egboŋ.+ 22  Agbalaŋ etoi yɛ etɔmɔi lɛ eko eko hewɔ.*+ Ebaaya nɔ ehi shi yɛ nɔ ni ja ni efeɔ lɛ hewɔ.’+ 23  “‘Kɛ́ efɔŋfeelɔ gbo lɛ, ani mináa he miishɛɛ?’+ Nuŋtsɔ Ofe Yehowa kɛɛ. ‘Ani jeee nɔ ni misumɔɔ moŋ ji, ni etsi ehe kɛje egbɛi lɛ anɔ ni eya nɔ ehi shi?’+ 24  “‘Shi kɛ́ jalɔ kpa ejalɛ nifeemɔi lɛ ni efee efɔŋ,* efee nibii fɛɛ ni yɔɔ nyaŋemɔ ni efɔŋfeelɔi feɔ lɛ, ani ebaaya nɔ ehi shi? Akaiŋ jalɛ nifeemɔi ni efee lɛ eko eko.+ Ebaagbo yɛ anɔkwa ni eyeee lɛ kɛ esha ni efee lɛ hewɔ.+ 25  “‘Shi nyɛbaakɛɛ akɛ: “Yehowa gbɛ lɛ ejaaa.”+ Nyɛ Israel shĩa, nyɛfainɛ nyɛboa toi! Ani mi migbɛ lɛ ni ejaaa?+ Ani jeee nyɛ moŋ nyɛgbɛi lɛ ni ejaaa?+ 26  “‘Kɛ́ jalɔ kpa ejalɛ nifeemɔi lɛ ni efee efɔŋ, ni egbo yɛ no hewɔ lɛ, ebaagbo yɛ lɛ diɛŋtsɛ etɔmɔ hewɔ. 27  “‘Ni kɛ́ efɔŋfeelɔ kpa efɔŋ ni efeɔ lɛ, ni eye jalɛ sane ni efee nɔ ni ja lɛ, ebaabaa lɛ diɛŋtsɛ ewala* yi.+ 28  Kɛ́ ehiɛ ba ehe nɔ ni etsi ehe kɛje tɔmɔi ni etɔ̃ɔ lɛ fɛɛ ahe lɛ, bɔ fɛɛ bɔ ni fee lɛ, ebaaya nɔ ehi shi. Egboŋ. 29  “‘Shi Israel shĩa lɛ baakɛɛ akɛ: “Yehowa gbɛ lɛ ejaaa.” Nyɛ Israel shĩa, ani mi migbɛi lɛ ni ejaaa?+ Ani jeee nyɛ moŋ nyɛgbɛi lɛ ni ejaaa?’ 30  “‘No hewɔ lɛ, nyɛ Israel shĩa, makojo nyɛteŋ mɔ fɛɛ mɔ yɛ egbɛi lɛ anaa,’+ Nuŋtsɔ Ofe Yehowa kɛɛ. ‘Nyɛtsia nyɛhe, hɛɛ, nyɛtsia nyɛhe kwraa kɛjea nyɛtɔmɔi lɛ fɛɛ ahe, koni amɛkafee tɛmɔtɛ ni baahã nyɛtere sɔ̃. 31  Nyɛjiea tɔmɔi fɛɛ ni nyɛtɔ̃ lɛ yɛ nyɛhe nyɛshwiea+ ni nyɛŋɔa* tsui hee kɛ mumɔ hee nyɛhãa nyɛhe,+ Ao Israel shĩa, mɛni hewɔ esa akɛ nyɛgboi?’+ 32  “‘Mináaa mɔ ko mɔ ko gbele he miishɛɛ,’+ Nuŋtsɔ Ofe Yehowa kɛɛ. ‘No hewɔ lɛ, nyɛkua nyɛsɛɛ ni nyɛná wala.’”+

Shishigbɛ Niŋmaa

Loo “Wala fɛɛ wala.”
Loo “Gbɔmɔ.”
Loo “gbɔmɔ.”
Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
Hebri sht. ŋm., “ebuleee enyɛmi gbɔmɔ ŋa.”
Eji nii ni akɛhãa kɛ́ ayaafa shika loo nɔ kroko.
Loo “mikojomɔi.”
Hebri sht. ŋm., “lashishwielɔ.”
Hebri sht. ŋm., “ebuleɔ enyɛmi gbɔmɔ ŋa.”
Eji nii ni akɛhãa kɛ́ ayaafa shika loo nɔ kroko.
Hebri sht. ŋm., “ebuleee enyɛmi gbɔmɔ ŋa.”
Eji nii ni akɛhãa kɛ́ ayaafa shika loo nɔ kroko.
Loo “mikojomɔi.”
Loo “elakaa.”
Loo “Gbɔmɔ.”
Loo “gbɔmɔ.”
Hebri sht. ŋm., “Akaiŋ etɔmɔi fɛɛ ni etɔ̃ lɛ ashiŋ lɛ.”
Loo “eye mɔ ko sane fɔŋ.”
Loo “esusuma.”
Hebri sht. ŋm., “nyɛfea.”