Ezekiel 1:1-28

  • Be ni Ezekiel yɔɔ Babilon lɛ ena Nyɔŋmɔ ninai (1-3)

  • Yehowa ŋwɛi shwiili lɛ he ninaa (4-28)

    • Kɔɔyɔɔ wulu, atatu, kɛ la (4)

    • Bɔɔ nii ejwɛ ni hiɛ kamɔ (5-14)

    • Dade taii ejwɛ (15-21)

    • Atatu tɛtrɛɛ ko ni kpɛlɛɔ tamɔ aisi (22-24)

    • Yehowa maŋtsɛ sɛi (25-28)

1  Yɛ afi ni ji 30 lɛ mli, yɛ nyɔɔŋ ni ji ejwɛ lɛ mli gbi ni ji enumɔ lɛ nɔ, be ni miyɔɔ mɛi ni aŋɔ amɛ nom lɛ ateŋ+ yɛ Kebar faa lɛ naa lɛ,+ agbele ŋwɛii anaa ni mina Nyɔŋmɔ ninai.  Yɛ nyɔɔŋ lɛ mli gbi ni ji enumɔ lɛ nɔ—ni ji, afi ni ji enumɔ lɛ mli, kɛjɛ be ni aŋɔ Maŋtsɛ Yehoiakin+ nom lɛ—  Yehowa kɛ Ezekiel,* osɔfo Buzi binuu lɛ wie yɛ Kebar faa lɛ naa yɛ Kaldeabii lɛ ashikpɔŋ lɛ nɔ.+ Yehowa nine ba enɔ yɛ jɛmɛ.+  Ni be ni miyakwɛ lɛ, kɔɔyɔɔ wulu+ ko miitswa kɛmiijɛ kooyigbɛ kɛmiiba, ni naa atatu wulu ko kɛ la ni suɔ kɛkɛ lɛ egbo*+ ni la ni kpɛɔ waa ebɔle he, ni nɔ ko ni kɔla tamɔ shika tsuru kɛ jwiɛtɛi ni afutu* miije kpo yɛ la lɛ teŋ.+  Nɔ ko tamɔ bɔɔ nii ejwɛ ni hiɛ kamɔ yɛ mli,+ ni amɛteŋ mɔ fɛɛ mɔ hiɛ gbɔmɔ su.  Amɛteŋ mɔ fɛɛ mɔ yɛ hiɛi ejwɛ kɛ fiji ejwɛ.+  Amɛnanetokotai miikwɛ shikpɔŋ,* ni amɛnaneshishi tamɔ tsinabi naneshishi, ni amɛkpɛlɛɔ* tamɔ bɔ ni akɔɔble ni asha he kpɛlɛɔ kaŋkaŋ lɛ.+  Gbɔmɔ nine yɛ amɛfiji ejwɛ lɛ eko fɛɛ eko shishi,* ni amɛyi ejwɛ lɛ fɛɛ lɛ, amɛyɛ hiɛi kɛ fiji.  Amɛfiji lɛ eko fɛɛ eko saa ekroko he. Kɛ́ amɛmiiya lɛ amɛteŋ mɔ ko mɔ ko tsɔɔɔ ehe; amɛteŋ mɔ fɛɛ mɔ yaa ehiɛ tɛ̃ɛ.+ 10  Nɛkɛ amɛhiɛi lɛ yɔɔ: Amɛyi ejwɛ lɛ ateŋ mɔ fɛɛ mɔ yɛ gbɔmɔ hiɛ, ni amɛyɛ jata+ hiɛ yɛ ninejurɔgbɛ, ni amɛyɛ tsina+ hiɛ yɛ abɛkugbɛ, ni amɛyi ejwɛ lɛ ateŋ mɔ fɛɛ mɔ yɛ okropɔŋ+ hiɛ.+ 11  Nɛkɛ ji bɔ ni amɛhiɛi lɛ yɔɔ. Amɛgbɛ amɛfiji amli kɛtee ŋwɛi. Amɛteŋ mɔ fɛɛ mɔ yɛ fiji enyɔ ni eko fɛɛ eko saa ekroko lɛ he, ni amɛyɛ fiji enyɔ ni haa amɛgbɔmɔtsei lɛ ahe.+ 12  Amɛteŋ mɔ fɛɛ mɔ yaa ehiɛ tɛ̃ɛ, amɛyaa he fɛɛ he ni mumɔ lɛ tsirɛɔ amɛ akɛ amɛya lɛ.+ Kɛ́ amɛmiiya lɛ, amɛteŋ mɔ ko mɔ ko tsɔɔɔ ehe. 13  Ni bɔɔ nii ejwɛ ni hiɛ kamɔ lɛ asu tamɔ ŋai ni miitso, ni nɔ ko ni tamɔ tso ni la ni miikpɛ waa miitso yɛ naa miiya kɛmiiba yɛ bɔɔ nii ni hiɛ kamɔ lɛ ateŋ, ni sarawa miigbala kɛmiijɛ la lɛ mli.+ 14  Ni kɛ́ bɔɔ nii ni hiɛ kamɔ lɛ miiya amɛmiiba lɛ, amɛyaa kɛbaa lɛ tamɔ sarawa ni miigbala. 15  Be ni mikwɛɔ bɔɔ nii ni hiɛ kamɔ lɛ lolo lɛ, mina dade tai* komekomei yɛ shikpɔŋ lɛ nɔ yɛ bɔɔ nii ni hiɛ kamɔ ni yɔɔ hiɛi ejwɛ lɛ eko fɛɛ eko masɛi.+ 16  Dade taii* lɛ kɛ bɔ ni afee amɛ ahã lɛ kpɛlɛɔ tamɔ krisolito tɛ, ni ejwɛ lɛ fɛɛ hiɛ henɔ kome. Eko fɛɛ eko lɛ, esu kɛ bɔ ni afee lɛ ahã lɛ tamɔ dade tai* kome ni hɔ dade tai kroko mli.* 17  Kɛ́ amɛmiiya lɛ, amɛbaanyɛ amɛgba kɛya amɛkoji ejwɛ lɛ eko fɛɛ eko nɔ bɔ ni amɛteŋ mɔ ko mɔ ko tsɔɔɔ ehe. 18  Dade taii lɛ kwɔlɔ aahu akɛ amɛhãa mɔ he jɔ̃ɔ ehe, ni hiŋmɛii ebɔle dade taii ejwɛ lɛ eko fɛɛ eko he kɛkpe.+ 19  Kɛ́ bɔɔ nii ni hiɛ kamɔ lɛ miiya lɛ, dade taii lɛ hu kɛ amɛ yaa, ni kɛ́ bɔɔ nii ni hiɛ kamɔ lɛ hole amɛhe nɔ yɛ shikpɔŋ lɛ nɔ lɛ, dade taii lɛ hu holeɔ amɛhe nɔ.+ 20  Amɛyaa he ni mumɔ lɛ tsirɛɔ amɛ akɛ amɛya lɛ, he fɛɛ he ni mumɔ lɛ yaa lɛ. Dade taii lɛ kɛ amɛ fɛɛ holeɔ amɛhe nɔ shi kome, ejaakɛ mumɔ ni tsuɔ nii yɛ bɔɔ nii ni hiɛ kamɔ lɛ anɔ* lɛ nɔŋŋ yɔɔ dade taii lɛ hu amli. 21  Kɛ́ amɛmiiya lɛ, enɛɛmɛi hu yaa; ni kɛ́ amɛwa amɛdamɔ shi lɛ, enɛɛmɛi hu waa amɛdamɔɔ shi; ni kɛ́ amɛhole amɛhe nɔ yɛ shikpɔŋ lɛ nɔ lɛ, dade taii lɛ kɛ amɛ fɛɛ holeɔ amɛhe nɔ shi kome, ejaakɛ mumɔ ni tsuɔ nii yɛ bɔɔ nii ni hiɛ kamɔ lɛ anɔ lɛ nɔŋŋ yɔɔ dade taii lɛ hu amli. 22  Nɔ ko yɛ bɔɔ nii ni hiɛ kamɔ lɛ ayiteŋ tamɔ atatu tɛtrɛɛ, ni ekpɛlɛɔ tamɔ aisi ni mli tse keŋkeŋ, ni alɛɛ mli kɛha amɛyiteŋ.+ 23  Amɛfiji lɛ ja trɔmɔɔ* yɛ atatu tɛtrɛɛ lɛ shishi, ni eko saa ekroko he. Amɛteŋ mɔ fɛɛ mɔ yɛ fiji enyɔ ni ekɛhaa egbɔmɔtso lɛ afã kome kɛ fiji enyɔ ni ekɛhaa afã kroko lɛ. 24  Be ni minu amɛfiji lɛ agbɛɛmɔ lɛ, etamɔ nui babaoo ni miiba gbɛɛmɔ, tamɔ Ofe lɛ gbɛɛmɔ.+ Kɛ́ amɛmiiya lɛ, egbɛɔ tamɔ asraafoi ni miiya ta. Ni kɛ́ amɛwa amɛdamɔ shi lɛ, amɛkɛ amɛfiji lɛ baa shi. 25  Gbee ko jije kɛjɛ atatu tɛtrɛɛ lɛ ni yɔɔ amɛyiteŋ lɛ nɔ. (Kɛ́ amɛwa amɛdamɔ shi lɛ, amɛkɛ amɛfiji lɛ baa shi.) 26  Nɔ ko ni tamɔ safiro tɛ,+ ni efee tamɔ maŋtsɛ sɛi+ yɛ atatu tɛtrɛɛ ni yɔɔ amɛyiteŋ lɛ nɔ. Ni mɔ ko ni hiɛ gbɔmɔ su ta maŋtsɛ sɛi ni yɔɔ nɔ lɛ nɔ.+ 27  Ni mina nɔ ko ni kpɛlɛɔ tamɔ shika tsuru kɛ jwiɛtɛi ni afutu,*+ etamɔ la, ni eekpɛlɛ kɛmiijɛ he ni efee tamɔ ehɛ lɛ mli kɛmiiya ŋwɛigbɛ; ni kɛjɛ ehɛ kɛmiiba shikpɔŋ gbɛ lɛ, mina nɔ ko tamɔ la.+ Ehewɔ fɛɛ miikpɛlɛ 28  tamɔ kwaabuɛtɛ+ yɛ atatu mli yɛ nugbɔnɛmɔ gbi nɔ. Nakai ji bɔ ni la ni kpɛlɛɔ waa yɛ ehe lɛ yɔɔ. Etamɔ Yehowa anunyam lɛ.+ Be ni mina lɛ, mikɛ mihiɛ bu shi ni minu mɔ ko ni miiwie gbee.

Shishigbɛ Niŋmaa

Eshishi ji, “Nyɔŋmɔ Wajeɔ Mɔ.”
Loo “atatu wulu ko kɛ sarawa.”
Loo “tamɔ ilɛktrɔm.”
Loo “Amɛnanetokotai yɛ trɔmɔɔ.”
Ni ji, amɛnanetokotai lɛ.
Loo “Amɛyɛ gbɔmɔ niji yɛ amɛfiji ejwɛ lɛ ashishi yɛ amɛkoji ejwɛ lɛ fɛɛ anɔ.”
Loo “koklolonto.”
Loo “koklolontoi.”
Loo “koklolonto.”
Eeenyɛ efee akɛ, dade tai kome lɛ hɔ ekroko lɛ teŋ tuuntu.
Hebri sht. ŋm., “ejaakɛ bɔɔ nii ni hiɛ kamɔ lɛ amumɔ.”
Shishitsɔɔmɔi komɛi kɛɔ akɛ, “Amɛkpã amɛfiji lɛ amli trɔmɔɔ.”
Loo “tamɔ ilɛktrɔm.”