Ezekiel 35:1-15

  • Agba ashi Seir gɔji lɛ (1-15)

35  Yehowa kɛɛ mi ekoŋŋ akɛ:  “Gbɔmɔ bi,* tsɔ ohiɛ ohã Seir+ gɔji lɛ ni ogba oshi amɛ.+  Kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Nyɛ Seir gɔji, naa, mikɛ nyɛ ená, ni makpã minine mli mawo nyɛ ni mahã nyɛtsɔ amaŋfɔ kɛ shikpɔŋ ni akɛfeee nɔ ko.+  Mahã nyɛmaji lɛ atsɔmɔ koikoi, ni nyɛbaatsɔ amaŋfɔ kɛ shikpɔŋ ni akɛfeee nɔ ko;+ ni nyɛbaaná nyɛle akɛ miji Yehowa.  Ejaakɛ nyɛnyɛ Israelbii lɛ waa,+ ni nyɛkɛ amɛ wo klante lɛ dɛŋ yɛ amɛmanehulu be lɛ nɔ, yɛ amɛnaagbee toigbalamɔ be lɛ mli.”’+  “‘No hewɔ lɛ, gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘masaa nyɛ mato lashishwiemɔ, ni lashishwiemɔ baanyiɛ nyɛsɛɛ.+ Akɛni nyɛnyɛɔ lá hewɔ lɛ, lashishwiemɔ baanyiɛ nyɛsɛɛ.+  Mahã Seir gɔji lɛ atsɔmɔ amaŋfɔ kɛ shikpɔŋ ni akɛfeee nɔ ko,+ ni mafo mɔ fɛɛ mɔ ni tsɔɔ nɔ kɛhoɔ kɛ mɔ fɛɛ mɔ ni kuɔ esɛɛ lɛ mashɛ mafɔ̃ kɛje nɔ.  Mahã Seir gɔji lɛ anɔ ayimɔ obɔbɔ kɛ gbohii; ni mɛi ni akɛ klante egbe lɛ baanyɔnyɔi yɛ nyɛgɔŋkpɔi lɛ anɔ, kɛ nyɛjɔi lɛ amli, kɛ nyɛfai lɛ fɛɛ amli.  Mahã nyɛtsɔ amaŋfɔ kɛya naanɔ, ni mɔ ko mɔ ko ehiŋ nyɛmaji lɛ amli;+ ni nyɛbaaná nyɛle akɛ miji Yehowa.’ 10  “Akɛni nyɛkɛɛ akɛ, ‘Jeŋmaji enyɔ nɛɛ kɛ shikpɔji enyɔ nɛɛ baatsɔ minɔ, ni maŋɔ fɛɛ akɛ minii,’+ eyɛ mli akɛ Yehowa diɛŋtsɛ yɛ jɛmɛ moŋ hewɔ lɛ, 11  ‘gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘bɔ ni nyɛjie mlifu kpo, ni nyɛye awuŋa yɛ nyɛ ni nyɛnyɛɔ amɛ lɛ hewɔ lɛ, nakai pɛpɛɛpɛ mikɛ nyɛ baaye;+ ni kɛ́ mikojo nyɛ lɛ, mahã ale mi yɛ amɛteŋ. 12  Kɛkɛ lɛ, nyɛbaaná nyɛle akɛ, mi, Yehowa, mi diɛŋtsɛ minu buului awiemɔi fɛɛ ni nyɛwie nyɛshi Israel gɔji lɛ be ni nyɛkɛɛ akɛ, “Amɛtsɔ amaŋfɔ ni akɛ amɛ ehã wɔ koni wɔye amɛ akɛ niyenii” lɛ. 13  Ni nyɛwie wiemɔi wuji nyɛshi mi, ni nyɛwie wiemɔi babaoo nyɛshi mi.+ Minu fɛɛ.’ 14  “Nɔ ni Nuŋtsɔ Ofe Yehowa kɛɛ nɛ: ‘Kɛ́ mihã nyɛtsɔ amaŋfɔ kɛ shikpɔŋ ni akɛfeee nɔ ko lɛ, shikpɔŋ muu lɛ fɛɛ baanya. 15  Bɔ ni nyɛnya be ni ahã Israel shĩa lɛ gboshinii lɛ tsɔ amaŋfɔ lɛ, nakai nɔŋŋ mikɛ nyɛ baaye.+ Nyɛ Seir gɔji, hɛɛ, nyɛ Edom+ fɛɛ, nyɛbaatsɔ amaŋfɔ kɛ he ko ni etsɔ koikoi; ni amɛbaaná amɛle akɛ miji Yehowa.’”

Shishigbɛ Niŋmaa

Hebri sht. ŋm., “binuu.”