Ezekiel 45:1-25

  • Shikpɔŋ krɔŋkrɔŋ lɛ kɛ maŋ lɛ (1-6)

  • Lumɔ lɛ gbɛfaŋnɔ lɛ (7, 8)

  • Lumɛi lɛ baaye anɔkwa (9-12)

  • Maŋbii lɛ anikeenii lɛ kɛ lumɔ lɛ (13-25)

45  “‘Kɛ́ nyɛmiija shikpɔŋ lɛ akɛ gboshinii lɛ,+ nyɛfoa shikpɔŋ lɛ fã ko akɛ shikpɔŋ krɔŋkrɔŋ nyɛhãa Yehowa.+ Ekɛlɛ afee ninetalɔi* 25,000 ni elɛɛmɔ afee ninetalɔi 10,000.+ Nakai shikpɔŋkuku muu lɛ fɛɛ* baatsɔ shikpɔŋ krɔŋkrɔŋ.  Ajɛ enɛ mli afo he ko ni hiɛ koji ejwɛ ni kɛlɛ ji ninetalɔi 500 ni lɛɛmɔ ji ninetalɔi 500 kɛhã he krɔŋkrɔŋ* lɛ,+ ni abaajie ninetalɔi 50 afɔ̃ ekoŋ fɛɛ koŋ nɔ akɛ kooloi alɛɛhei.+  Ajɛ nɔ ni asusu nɛɛ mli asusu shikpɔŋ ni kɛlɛ ji ninetalɔi 25,000 ni lɛɛmɔ ji 10,000 lɛ, ni no mli abaama jamɔhe lɛ, ni ji nɔ ko krɔŋkrɔŋ fe fɛɛ lɛ yɛ.  Ebaatsɔ shikpɔŋ krɔŋkrɔŋ kɛhã osɔfoi lɛ,+ mɛi ni sɔmɔɔ yɛ jamɔhe lɛ ni amɛbaa Yehowa hiɛ amɛbasɔmɔɔ lɛ lɛ.+ Ebaatsɔ he ko ni amɛbaamamɔ amɛshĩai yɛ kɛ he ko krɔŋkrɔŋ kɛhã jamɔhe lɛ.  “‘Levibii lɛ, mɛi ni sɔmɔɔ yɛ sɔlemɔ shĩa lɛ agbɛfaŋnɔ ji shikpɔŋ ni kɛlɛ ji ninetalɔi 25,000 ni elɛɛmɔ ji ninetalɔi 10,000,+ ni amɛbaaná niyelihei 20+ akɛ amɛgbɛfaŋnɔ.  “‘Nyɛfoa he ko ni kɛlɛ ji ninetalɔi 25,000 (yɛ shikpɔŋ krɔŋkrɔŋ lɛ masɛi) ni lɛɛmɔ ji ninetalɔi 5,000 akɛ maŋ lɛ gbɛfaŋnɔ.+ Ebaatsɔ Israel shĩa lɛ fɛɛ nɔ.  “‘Ni abaahã lumɔ lɛ shikpɔŋ lɛ eko yɛ shikpɔŋ krɔŋkrɔŋ lɛ kɛ he ni afo akɛ maŋ lɛ gbɛfaŋnɔ lɛ biɛ kɛ biɛ. Ebaakã shikpɔŋ krɔŋkrɔŋ lɛ kɛ maŋ lɛ gbɛfaŋnɔ lɛ masɛi. Ebaakã anaigbɛ kɛ bokãgbɛ. Ekɛlɛ kɛjɛ anai husu lɛ naa kɛba bokã husu lɛ naa lɛ kɛ weku shĩai lɛ ateŋ ekome shikpɔŋ kɛlɛ baafee pɛpɛɛpɛ.+  Shikpɔŋ nɛɛ baatsɔ enɔ yɛ Israel. Milumɛi lɛ waŋ mimaŋbii lɛ ayi dɔŋŋ+ ni amɛbaajara shikpɔŋ lɛ amɛhã Israel shĩa lɛ yɛ amɛwekui lɛ anaa.’+  “Nɔ ni Nuŋtsɔ Ofe Yehowa kɛɛ nɛ: ‘Nyɛ Israel lumɛi, nyɛfee tsɔ!’ “‘Nyɛfoa awui ni nyɛyeɔ kɛ mɛi ayi ni nyɛwaa lɛ sɛɛ, ni nyɛyea sane ni ja ni nyɛfea nɔ ni ja.+ Nyɛkpaa mimaŋbii lɛ anii ni nyɛshɔ̃ɔ yɛ amɛdɛŋ lɛ,’+ Nuŋtsɔ Ofe Yehowa kɛɛ. 10  ‘Nyɛhiɛa nsɛnii ni ja, kɛ efa susumɔnɔ* ni ja kɛ bat susumɔnɔ* ni ja.+ 11  Esa akɛ aná susumɔnɔ kome ahã efa susumɔnɔ lɛ kɛ bat susumɔnɔ lɛ fɛɛ. Esa akɛ bat susumɔnɔ lɛ aye homer* mlijai nyɔŋma mli ekome, ni efa susumɔnɔ lɛ hu aye homer mlijai nyɔŋma mli ekome. Homer lɛ afee nɔ ni ato kɛhã nisusumɔ. 12  Shekel*+ lɛ afee gerai* 20. Ni shekeli 20 kɛ shekeli 25 kɛ shekeli 15 baafee mane* kome ahã nyɛ.’ 13  “‘Nɔ ni nyɛkɛbaahã akɛ nikeenii nɛ: wiiti homer kome fɛɛ homer kome lɛ, nyɛkɛ emli efa mlijai ekpaa mli ekome abaa, ni barle* homer kome fɛɛ homer kome lɛ, nyɛkɛ efa mlijai ekpaa mli ekome abaa. 14  Akɛ bat susumɔnɔ asusu mu ni akɛbaaba lɛ. Bat ji kor* mlijai nyɔŋma mli ekome, ni bat nyɔŋma feɔ homer kome, ejaakɛ bat nyɔŋma kɛ homer kome lɛ, fɛɛ pɛpɛɛpɛ. 15  Ni Israel tooku lɛ ateŋ lɛ, yɛ gwantɛŋi 200 fɛɛ 200 mli lɛ, akɛ ekome ahã. Akɛ enɛɛmɛi baahã kɛhã ŋmaa* afɔle+ lɛ, kɛ shãa afɔle+ lɛ, kɛ naanyobɔɔ afɔle+ lɛ, koni akɛkpãtã ahã maŋbii lɛ,’+ Nuŋtsɔ Ofe Yehowa kɛɛ. 16  “‘Shikpɔŋ lɛ nɔ bii lɛ fɛɛ kɛ nikeenii nɛɛ baaba+ abahã lumɔ lɛ yɛ Israel. 17  Shi lumɔ lɛ ji mɔ ni kɛ shãa afɔle lɛ,+ kɛ ŋmaa afɔle lɛ,+ kɛ dãa afɔle lɛ baahã kɛ́ aaye gbii juji lɛ,+ kɛ nyɔɔŋtsere hei lɛ, kɛ Hejɔɔmɔ Gbii lɛ,+ kɛ gbii juji fɛɛ ni ato ahã Israel shĩa lɛ.+ Lɛ ekɛ esha afɔle lɛ, kɛ ŋmaa afɔle lɛ, kɛ shãa afɔle lɛ, kɛ naanyobɔɔ afɔlei lɛ baahã koni akɛkpãtã ahã Israel shĩa lɛ.’ 18  “Nɔ ni Nuŋtsɔ Ofe Yehowa kɛɛ nɛ: ‘Klɛŋklɛŋ nyɔɔŋ lɛ nɔ klɛŋklɛŋ gbi lɛ nɔ lɛ, ŋɔɔ tsinai lɛ ateŋ tsinanuu* ni kpa ko bɛ ehe, ni okɛjie jamɔhe lɛ he esha lɛ.+ 19  Osɔfo lɛ baaŋɔ esha afɔle lɛ lá lɛ eko ni ekɛkpa sɔlemɔ shĩa lɛ shinaatso lɛ,+ kɛ kpoku ni bɔle afɔleshaa latɛ lɛ he koji ejwɛ lɛ, kɛ mligbɛ kpo lɛ agbó lɛ shinaatso lɛ he. 20  Nakai nɔŋŋ obaafee yɛ gbi ni ji kpawo yɛ nyɔɔŋ lɛ nɔ kɛ́ mɔ ko ejeee gbɛ loo eleee ni efee esha;+ ni nyɛkpãtã nyɛhã sɔlemɔ shĩa lɛ.+ 21  “‘Klɛŋklɛŋ nyɔɔŋ lɛ nɔ, yɛ gbi ni ji 14 yɛ nyɔɔŋ lɛ nɔ lɛ, nyɛbaaye Hehoo gbi jurɔ lɛ.+ Nyɛkɛ gbii kpawo ayea blodo ni ashikishaŋ-sha bɛ mli.+ 22  Nakai gbi lɛ nɔ lɛ, lumɔ lɛ baahã tsinanuu* koni akɛshã esha afɔle ahã lɛ diɛŋtsɛ kɛ shikpɔŋ lɛ nɔ bii lɛ fɛɛ.+ 23  Yɛ gbi jurɔ lɛ mli gbii kpawo lɛ fɛɛ anɔ lɛ, ekɛ tsinahii* kpawo ni kpa ko bɛ amɛhe kɛ gwantɛŋhii kpawo ni kpa ko bɛ amɛhe baahã akɛ shãa afɔle kɛhã Yehowa yɛ gbii kpawo lɛ eko fɛɛ eko nɔ,+ ni ekɛ abotianuu hu baahã daa gbi akɛ esha afɔle. 24  Agbɛnɛ hu, ekɛ ŋmaa afɔle efa kome baahã kɛhã tsinanuu* fɛɛ tsinanuu, kɛ efa kome kɛhã gwantɛŋnuu fɛɛ gwantɛŋnuu, kɛ agbɛnɛ hu, mu hin* kome kɛhã efa fɛɛ efa. 25  “Yɛ nyɔɔŋ ni ji kpawo lɛ nɔ, yɛ gbi ni ji 15 yɛ nyɔɔŋ lɛ nɔ lɛ, ekɛ nakai esha afɔle lɛ, kɛ shãa afɔle lɛ, kɛ ŋmaa afɔle lɛ, kɛ mu lɛ nɔŋŋ baahã gbii kpawo be ni ayeɔ gbi jurɔ lɛ.’”+

Shishigbɛ Niŋmaa

Eji ninetalɔ kakadaŋŋ. Kwɛmɔ Saji Krokomɛi B14 lɛ.
Loo “Ehusui lɛ fɛɛ mli kɛkpe lɛ.”
Ni ji, sɔlemɔ shĩa lɛ.
Loo “mina.” Kwɛmɔ Saji Krokomɛi B14 lɛ.
Eji wiiti henɔ ko.
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Loo “tsina oblanyo.”
Loo “tsina oblanyo.”
Loo “tsina oblahii.”
Loo “tsina oblanyo.”