Ezekiel 16:1-63

  • Suɔmɔ ni Nyɔŋmɔ yɔɔ kɛhã Yerusalem (1-63)

    • Ana lɛ akɛ abifao ni ashi lɛ (1-7)

    • Nyɔŋmɔ wula lɛ ni ekɛ lɛ fee gbalashihilɛ he kpaŋmɔ (8-14)

    • Eyeee Nyɔŋmɔ anɔkwa (15-34)

    • Agbala etoi akɛ gbalafitelɔ (35-43)

    • Akɛ lɛ to Samaria kɛ Sodom he (44-58)

    • Nyɔŋmɔ kai ekpaŋmɔ lɛ (59-63)

16  Yehowa kɛɛ mi ekoŋŋ akɛ:  “Gbɔmɔ bi,* hã Yerusalem ale enifeemɔi ni yɔɔ nyaŋemɔ lɛ.+  Kɛɛmɔ akɛ, ‘Nɔ ni Nuŋtsɔ Ofe Yehowa kɛɔ Yerusalem nɛ: “He ni ojɛ kɛ he ni afɔ bo yɛ ji Kanaannyo lɛ shikpɔŋ lɛ nɔ. Otsɛ lɛ, Amornyo+ ni, ni onyɛ lɛ, Hitnyo+ ni.  Ni ofɔmɔ mli, yɛ gbi ni afɔ bo lɛ nɔ lɛ, afooo olaŋmɔ, ni akɛ nu juuu ohe koni ohe atse, ni akpaaa bo ŋoo, ni akɛ mamai hu ebalaaa bo.  Onii efeee mɔ ko mɔ ko mɔbɔ ni ebaafee nibii nɛɛ ateŋ eko ehã bo. Mɔ ko mɔ ko musuŋ etsɔɔɔ lɛ yɛ ohe. Shi moŋ, ashɛ bo afɔ̃ ŋa nɔ, ejaakɛ anyɛ bo* yɛ gbi ni afɔ bo lɛ nɔ.  “‘“Be ni mitsɔ ohe kɛho lɛ, mina bo ni ooshilɛ onaji yɛ bo diɛŋtsɛ olá mli be ni okã olá lɛ mli lɛ, ni mikɛɛ akɛ: ‘Oyi aná wala!’ Hɛɛ, be ni okã olá lɛ mli lɛ, mikɛɛ bo akɛ: ‘Oyi aná wala!’  Mihã oyi fa babaoo, tamɔ tsei ni ekwɛ̃ yɛ ŋa nɔ, ni oda ni ofee agbo ni owo hewulamɔnii fɛfɛji. Oje fufɔ, ni oyitsɔi tsa; shi loloolo lɛ ohiɛ ohe folo ni owooo nɔ ko nɔ ko.”’  “‘Be ni mihoɔ ni mina bo lɛ, mina akɛ oda bɔ ni abaanyɛ asumɔ bo. No hewɔ lɛ, milɛɛ mitade lɛ mli yɛ onɔ,+ ni mikɛha ohe ni kã folo lɛ nɔ, ni mikã bo kitã ni mi kɛ bo kpaŋ, ni obatsɔ minɔ,’ Nuŋtsɔ Ofe Yehowa kɛɛ.  Agbɛnɛ hu, mikɛ nu ju ohe ni mifɔ ohe lá lɛ mishwie ni mikpa bo mu.+ 10  Kɛkɛ ni miwo bo atade ni alo nii awo mli, ni miwo bo tokota ni akɛ kooloo hewolo kpakpa* fee, ni mikɛ klala kpakpa bala bo, ni miwo bo atadei ni jara wa. 11  Mikɛ hewulamɔnii srɔtoi wula bo, ni mikɛ nineshinii wo oniji ni mikɛ kuɛnii wo okuɛ. 12  Mikɛ ga wo ogugɔŋ, ni mikɛ toiiaŋnii wo otoii, ni mikɛ akekere fɛfɛo bu oyitso. 13  Otee nɔ okɛ shika tsuru kɛ jwiɛtɛi nibii wula ohe, ni otadei ji klala kpakpai, mamai ni jara wa, kɛ atadei ni alo nii awo mli. Niyenii ni oyeɔ ji ashikishaŋ kpakpa, kɛ wo, kɛ mu, ni oda ni ohe fee fɛo waa,+ ni obatsɔ mɔ ni sa akɛ awóɔ lɛ maŋnyɛ.’” 14  “‘Ohe gbɛ́i yɛ jeŋmaji lɛ ateŋ+ yɛ ohefɛo lɛ hewɔ, ejaakɛ ohe yɛ fɛo waa yɛ mi diɛŋtsɛ minunyam lɛ ni mikɛfɔ̃ onɔ lɛ hewɔ,’+ Nuŋtsɔ Ofe Yehowa kɛɛ.” 15  “‘Shi okɛ ohiɛ fɔ̃ ohefɛo lɛ nɔ,+ ni otsɔ ashawo yɛ gbɛ́i ni ohe lɛ hewɔ.+ Okɛ mɔ fɛɛ mɔ ni hoɔ lɛ bɔɔ ajwamaŋ,+ ni ohefɛo lɛ tsɔɔ enɔ. 16  Okɔlɔ otadei lɛ ekomɛi ni okɛfee hei grɔŋŋi ni hiɛ kɔlai srɔtoi ni ofee oshawo lɛ yɛ jɛmɛ+—nibii ni esaaa akɛ afeɔ, loo eyaa nɔ po. 17  Agbɛnɛ hu, okɔlɔ ojwinei* fɛfɛji ni akɛ shika tsuru kɛ jwiɛtɛi ni mikɛhã bo lɛ eko fee lɛ, ni okɛfee hii ahe amagai ohã ohe, ni okɛ amɛ bɔ ajwamaŋ.+ 18  Ni okɔlɔ otadei ni alo nii awo mli lɛ ni okɛha amɛhe,* ni okɛ mimu lɛ kɛ mitsofa-kɛ-ŋma lɛ mamɔ amɛhiɛ.+ 19  Ni blodo ni mikɛhã bo—ni akɛ ashikishaŋ kpakpa, kɛ mu, kɛ wo fee ni mikɛhã bo ni oye lɛ—okɛ nomɛi hu hã amɛ ni eje ŋma jogbaŋŋ ewo amɛ.*+ Nɛkɛ pɛpɛɛpɛ ji nɔ ni tee nɔ,’ Nuŋtsɔ Ofe Yehowa kɛɛ.” 20  “‘Omɔ obihii kɛ obiyei ni ofɔ ohã mi lɛ,+ ni okɛ amɛ shã afɔle ohã amagai koni amɛye+—ani no mli lɛ, oshawo nifeemɔi nɛɛ faaa hãaa bo hewɔ ni ofee nakai? 21  Ogbe mibihii lɛ ni ohã amɛtsɔ la mli akɛ afɔlei.+ 22  Be ni ofeɔ nyaŋemɔ nibii nɛɛ kɛ oshawo nifeemɔi lɛ fɛɛ lɛ, okaiii ogbekɛbiiashi* be ni ohiɛ ohe folo ni owooo nɔ ko nɔ ko lɛ, be ni oshilɛɔ onaji yɛ bo diɛŋtsɛ olá mli lɛ. 23  Kpoo, kpoo hã bo yɛ onifɔjianii lɛ ni ofee lɛ fɛɛ sɛɛ,’+ Nuŋtsɔ Ofe Yehowa kɛɛ. 24  ‘Otswa kpoku ohã ohe, ni ofee he grɔŋŋ ohã ohe yɛ henaabuamɔhe fɛɛ henaabuamɔhe. 25  Omamɔ hei grɔŋŋi yɛ gbɛjegbɛ fɛɛ gbɛjegbɛ nɔ hei ni afɔɔ tsɔmɔ lɛ, ni okɛ ohe hã* mɔ fɛɛ mɔ ni hoɔ lɛ ni ohã ohefɛo lɛ tsɔ nɔ ko ni anyaŋeɔ,+ ni ohã oshawo nifeemɔi lɛ fa pii.+ 26  Okɛ Ejipt bihii lɛ, ohe gbɔmɛi ni amɛkɔnɔ fa lɛ* bɔ ajwamaŋ,+ ni okɛ oshawo nifeemɔi babaoo lɛ wo mimli la. 27  Agbɛnɛ makpã minine mli mashi bo ni matse oniyenii lɛ nɔ,+ ni mikɛ bo baahã Filistibii lɛ abiyei lɛ, yei ni nyɛɔ bo lɛ koni amɛfee bo nɔ ni amɛsumɔɔ,*+ mɛi ni ojeŋba sha lɛ hã amɛhe jɔ̃ amɛhe lɛ.+ 28  “‘Kɛkɛ ni okɛ Asiria bihii lɛ hu yabɔ ajwamaŋ ejaakɛ otɔɔɔ,+ ni ajwamaŋ ni okɛ amɛ yabɔ lɛ fɛɛ sɛɛ lɛ, eshɛɛɛ onaa lolo. 29  No hewɔ lɛ, okpã oshawofeemɔ lɛ mli kɛtee jarayelɔi ashikpɔŋ* lɛ nɔ kɛ Kaldeabii lɛ aŋɔɔ,+ shi no hu po shɛɛɛ onaa. 30  Kwɛ bɔ ni hela mɔ otsui,’ Nuŋtsɔ Ofe Yehowa kɛɛ, ‘be ni ofee nibii nɛɛ fɛɛ ni ofee onii tamɔ ashawo yoo ni hiɛ gbooo nɔ lɛ!+ 31  Shi be ni otswa okpoku lɛ yɛ gbɛjegbɛ fɛɛ gbɛjegbɛ nɔ hei ni mɛi fɔɔ tsɔmɔ ni oma ohe grɔŋŋ lɛ yɛ henaabuamɔhe fɛɛ henaabuamɔhe lɛ, no mli lɛ otamɔɔɔ ashawo yoo, ejaakɛ bo lɛ, ohãaa awo bo nyɔmɔ ko kwraa. 32  Oji ŋa ni fiteɔ gbãla ni hãa gbɔi moŋ kɛ lɛ náa bɔlɛ yɛ lɛ diɛŋtsɛ ewu najiaŋ!+ 33  Mɛi keɔ ashawoi fɛɛ nii,+ shi bo lɛ, bo moŋ okeɔ mɛi fɛɛ ni sumɔɔ bo lɛ nii,+ ni ohãa amɛ nyɔɔŋ nii koni amɛjɛ he fɛɛ he amɛba ni amɛkɛ bo ababɔ ajwamaŋ.+ 34  Oyɛ srɔto kwraa yɛ ashawo yei fɛɛ ateŋ. Mɔ ko efeee ashawo yɛ gbɛ ni ofeɔ lɛ nɛɛ nɔ! Bo moŋ owoɔ mɛi nyɔmɔ, ni amɛwooo bo nyɔmɔ. Ogbɛ lɛ yɛ srɔto kwraa.’ 35  “No hewɔ lɛ, bo ashawo yoo,+ bo Yehowa wiemɔ lɛ toi. 36  Nɔ ni Nuŋtsɔ Ofe Yehowa kɛɛ nɛ: ‘Akɛni afɔse okɔnɔ lɛ ashwie shi ni ajie ohe folo be ni okɛ osuɔlɔi lɛ kɛ onyaŋemɔ nii, omagai ni yɔɔ nyaŋemɔ* lɛ,+ nibii ni okɛ obihii alá po shã afɔle ohã lɛ bɔɔ ajwamaŋ lɛ hewɔ lɛ,+ 37  miibua osuɔlɔi lɛ fɛɛ ni ohã amɛmii shɛ amɛhe lɛ, mɛi fɛɛ ni osumɔ kɛ mɛi fɛɛ ni onyɛ amɛ lɛ anaa. Mabua amɛ fɛɛ amɛnaa kɛbaajɛ he fɛɛ he kɛwo bo, ni majie ohe folo yɛ amɛhiɛ ni amɛbaana bo ni ohe kã saplapaa.+ 38  “‘Ni magbala otoi tamɔ agbalaa yei ni fiteɔ gbãla+ kɛ yei ni shwieɔ lá shi+ lɛ atoi lɛ, ni abaashwie olá shi yɛ mlifu kɛ awuŋayeli mli.+ 39  Mikɛ bo baawo amɛdɛŋ ni amɛbaakumɔ okpokui lɛ amɛshwie shi, ni amɛbaakumɔ ohei grɔŋŋi lɛ hu amɛshwie shi;+ ni amɛbaajie otadei+ lɛ kɛ ojwinei* fɛfɛji lɛ yɛ ohe,+ ni amɛbaahã ohe akã ni owooo nɔ ko nɔ ko. 40  Amɛkɛ asafo babaoo baaba onɔ+ ni amɛbaatswia bo tɛi,+ ni amɛkɛ amɛklantei lɛ baagbe bo.+ 41  Amɛkɛ la baashã oshĩai+ lɛ ni amɛbaagbala otoi yɛ yei babaoo ahiɛ; ni mafo oshawofeemɔ lɛ sɛɛ,+ ni obaakpa mɛi anyɔmɔwoo. 42  Majɔɔ mimli ni efu bo lɛ he,+ ni majie mimlila lɛ kɛje onɔ;+ ni mafee diŋŋ, ni mimli fuŋ dɔŋŋ.’ 43  “‘Akɛni okaiii ogbekɛbiiashi* gbii+ lɛ ni ofee nibii nɛɛ fɛɛ kɛwo mimli la hewɔ lɛ, agbɛnɛ mi hu mikɛ nɔ ni baajɛ ogbɛi lɛ amli kɛba lɛ baaba bo diɛŋtsɛ onɔ,’ Nuŋtsɔ Ofe Yehowa kɛɛ, ‘ni obaakpa ojeŋba sha lɛ kɛ onifeemɔi ni yɔɔ nyaŋemɔ lɛ fɛɛ. 44  “‘Naa! Mɔ fɛɛ mɔ ni buɔ abɛ lɛ baabu bo abɛ nɛɛ akɛ: “Bɔ ni nyɛ lɛ yɔɔ lɛ, nakai nɔŋŋ biyoo lɛ hu yɔɔ!”+ 45  Onyɛ, mɔ ni ebuuu ewu kɛ ebii lɛ ehãaa nɔ ko lɛ biyoo ji bo. Ni onyɛmimɛi yei ni ebuuu amɛwumɛi kɛ amɛbii lɛ amɛhãaa nɔ ko lɛ anyɛmi yoo ji bo. Onyɛ lɛ, Hitnyo ni, ni otsɛ lɛ, Amornyo ni.’”+ 46  “‘Onyɛmi yoo onukpa ji Samaria,+ mɔ ni kɛ ebiyei* yɔɔ okooyigbɛ* lɛ,+ ni onyɛmi yoo fioo ji Sodom,+ mɔ ni kɛ ebiyei yɔɔ owuoyigbɛ* lɛ.+ 47  Jeee amɛgbɛi lɛ anɔ pɛ kɛkɛ onyiɛ, ni jeee amɛnifeemɔi ni yɔɔ nyaŋemɔ lɛ pɛ kɛkɛ ofee, shi yɛ be kukuoo mli lɛ, ofite po fe amɛ yɛ ogbɛi fɛɛ amli.+ 48  Gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘onyɛmi yoo Sodom kɛ ebiyei lɛ efeee tamɔ bɔ ni bo kɛ obiyei lɛ fee lɛ. 49  Naa! onyɛmi yoo Sodom tɔmɔ lɛ nɛ: Lɛ kɛ ebiyei+ lɛ naa amɛhe tsɔ,+ amɛná niyenii babaoo,+ ni amɛhe jɔ amɛ jogbaŋŋ diɛŋtsɛ;+ shi amɛyeee amɛbuaaa nɔnalɔi kɛ ohiafoi.+ 50  Amɛtee nɔ amɛwó amɛhe nɔ+ ni amɛfee nibii ni yɔɔ nyaŋemɔ yɛ mihiɛ,+ no hewɔ lɛ, mina akɛ esa akɛ majie amɛ kɛje jɛmɛ.+ 51  “‘Samaria+ efeee eshai ni ofee lɛ amli fã po. Otee nɔ ohã onifeemɔi ni yɔɔ nyaŋemɔ lɛ fa kwraa fe amɛnɔ lɛ aahu akɛ ana onyɛmimɛi yei lɛ tamɔ jalɔi yɛ onifeemɔi ni yɔɔ nyaŋemɔ lɛ fɛɛ ahewɔ.+ 52  Esa akɛ otere bo diɛŋtsɛ ohiɛshishwiemɔ lɛ ejaakɛ ohã onyɛmimɛi yei lɛ ená naajiemɔ kɛhã amɛnifeemɔi lɛ.* Akɛni ofee esha ni yɔɔ nyaŋemɔ fe amɛnɔ lɛ hewɔ lɛ, amɛja fe bo. No hewɔ lɛ, agbɛnɛ, hiɛgbele amɔ bo ni otere ohiɛshishwiemɔ lɛ ejaakɛ ohã ana onyɛmimɛi yei lɛ tamɔ jalɔi.’ 53  “‘Ni mabua amɛmɛi ni aŋɔ amɛ nom lɛ anaa, Sodom kɛ ebiyei lɛ abii ni aŋɔ amɛ nom lɛ, kɛ Samaria kɛ ebiyei lɛ abii ni aŋɔ amɛ nom lɛ; mabua obii ni aŋɔ amɛ nom lɛ hu anaa mafata amɛhe,+ 54  koni otere ohiɛshishwiemɔ lɛ; ni nɔ ni ofee kɛshɛje amɛmii lɛ hewɔ lɛ, ohiɛ baashwie shi. 55  Bo diɛŋtsɛ onyɛmimɛi yei lɛ, Sodom kɛ ebiyei lɛ baaku amɛsɛɛ kɛba amɛtsutsu shihilɛ lɛ mli, ni Samaria kɛ ebiyei lɛ hu baaku amɛsɛɛ kɛba amɛtsutsu shihilɛ lɛ mli, ni bo kɛ bo diɛŋtsɛ obiyei lɛ baaku nyɛsɛɛ kɛba nyɛtsutsu shihilɛ lɛ mli.+ 56  Yɛ gbi ni ona ohe tsɔ lɛ nɔ lɛ, owieee onyɛmi yoo Sodom he ekpakpa, 57  dani ana efɔŋ ni bo diɛŋtsɛ ofee lɛ faŋŋ.+ Ni Siria biyei lɛ kɛ mɛi ni bɛŋkɛ lɛ wieɔ amɛshiɔ bo, ni Filistibii+ lɛ abiyei lɛ, mɛi ni bɔle bo lɛ fɛɛ, yeɔ ohe fɛo. 58  Bo diɛŋtsɛ obaatere nɔ ni ejɛ ojeŋba sha lɛ kɛ onifeemɔi ni yɔɔ nyaŋemɔ lɛ mli kɛba lɛ,’ Yehowa kɛɛ.” 59  “Ejaakɛ nɔ ni Nuŋtsɔ Ofe Yehowa kɛɛ nɛ: ‘Agbɛnɛ, mafee bo tamɔ bɔ ni ofee lɛ pɛpɛɛpɛ,+ ejaakɛ oku mikpaŋmɔ lɛ mli kɛtsɔɔ akɛ obuuu kitã lɛ.+ 60  Shi mi diɛŋtsɛ makai kpaŋmɔ ni mi kɛ bo fee yɛ ogbekɛbiiashi* gbii lɛ amli lɛ, ni mi kɛ bo baafee naanɔ kpaŋmɔ.+ 61  Obaakai onifeemɔ lɛ ni ohiɛ baashwie shi+ kɛ́ ohere onyɛmimɛi yei lɛ atuu, mɛi ni ye bo onukpa kɛ mɛi ni oye amɛ onukpa lɛ fɛɛ, ni mikɛ amɛ baahã bo akɛ biyei, shi jeee yɛ okpaŋmɔ lɛ hewɔ.’ 62  “‘Ni mi diɛŋtsɛ mikɛ bo baafee mikpaŋmɔ lɛ; ni obaaná ole akɛ miji Yehowa. 63  Ni obaakai ni ohiɛ baagbo waa akɛ obaagbɛ odaaŋ yɛ ohiɛshishwiemɔ lɛ hewɔ,+ kɛ́ mikɛ ohe esha lɛ ke bo* yɛ nɔ ni ofee lɛ fɛɛ sɛɛ,’+ Nuŋtsɔ Ofe Yehowa kɛɛ.”

Shishigbɛ Niŋmaa

Hebri sht. ŋm., “binuu.”
Loo “osusuma.”
Loo “nu mli gbee hewolo.”
Loo “ohewulamɔnii.”
Ni ji, hii ahe amagai lɛ.
Loo “akɛ ŋma ni akɛkpãtãa mɔ; akɛ ŋma ni jɔɔ mɔ tsui he.” Hebri sht. ŋm., “akɛ ŋma ni hãa mɔ he jɔɔ lɛ.”
Loo “oblayeiaŋ.”
Hebri sht. ŋm., “ogbɛ onajiaŋ ohã.”
Hebri sht. ŋm., “ohe gbɔmɛi ni amɛloo dara lɛ.”
Loo “yei ni nyɛɔ bo lɛ asusuma.”
Hebri sht. ŋm., “Kanaan shikpɔŋ.”
Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
Loo “ohewulamɔnii.”
Loo “oblayeiaŋ.”
Eeenyɛ efee akɛ, ekɔɔ maji ni baa lɛ abo lɛ ahe.
Hebri sht. ŋm., “obɛkugbɛ.”
Hebri sht. ŋm., “oninejurɔgbɛ.”
Loo “ejaakɛ owie ohã onyɛmimɛi yei lɛ.”
Loo “oblayeiaŋ.”
Loo “kɛ́ mikpãtã mihã bo.”