Ezekiel 8:1-18

  • Akɛ Ezekiel tee Yerusalem yɛ ninaa mli (1-4)

  • Ana nyaŋemɔ nibii yɛ sɔlemɔ shĩa (5-18)

    • Yei miifó Tamuz (14)

    • Hii miisɔmɔ hulu lɛ (16)

8  Yɛ afi ni ji ekpaa lɛ mli, yɛ nyɔɔŋ ni ji ekpaa lɛ mli, yɛ gbi ni ji enumɔ lɛ nɔ, be ni mita mishĩa lɛ ni Yuda onukpai lɛ hu tara mihiɛ lɛ, Nuŋtsɔ Ofe Yehowa nine ba minɔ yɛ jɛmɛ.  Be ni miyakwɛ lɛ, naa nɔ ko ni su tamɔ la; la yɛ nɔ ni efee tamɔ ehɛ lɛ shishi,+ ni kɛjɛ ehɛ kɛyaa ŋwɛigbɛ lɛ eekpɛ waa tamɔ bɔ ni shika tsuru kɛ jwiɛtɛi ni afutu kpɛɔ lɛ.*+  Kɛkɛ ni ekpã nɔ ko ni tamɔ nine mli, ni emɔ miyiteŋ tsɔi lɛ mli, ni mumɔ ko wó mi kɛtee shikpɔŋ lɛ kɛ ŋwɛi teŋ ni etsɔ Nyɔŋmɔ ninai lɛ anɔ ekɛ mi ba Yerusalem yɛ he ni atsɔɔ kɛboteɔ mligbɛ agbó+ lɛ ni kwɛɔ kooyigbɛ lɛ mli lɛ, he ni awuŋayeli amaga ni hãa mɔ yeɔ awuŋa lɛ ma lɛ.+  Ni naa! Israel Nyɔŋmɔ lɛ anunyam lɛ yɛ jɛmɛ,+ ni etamɔ nɔ ni mina yɛ jɔɔ lɛ mli lɛ.+  Kɛkɛ ni ekɛɛ mi akɛ: “Gbɔmɔ bi,* ofainɛ holemɔ ohiŋmɛii anɔ kɛya kooyigbɛ.” No hewɔ lɛ, mihole mihiŋmɛii anɔ kɛtee kooyigbɛ, ni naa, nakai awuŋayeli amaga lɛ ma jɛmɛ yɛ he ni atsɔɔ kɛboteɔ afɔleshaa latɛ lɛ agbó lɛ mli lɛ kooyigbɛ.  Ni ekɛɛ mi akɛ: “Gbɔmɔ bi,* oona nyaŋemɔ nibii ni yɔɔ taŋ ni Israel shĩa lɛ feɔ yɛ biɛ lɛ,+ nibii ni hãa mijeɔ mijamɔhe lɛ he kɛyaa sɛɛ shɔŋŋ lɛ?+ Shi obaana nyaŋemɔ nibii krokomɛi ni yɔɔ taŋ po fe enɛɛmɛi.”  Kɛkɛ ni ekɛ mi ba he ni atsɔɔ kɛboteɔ kpo lɛ nɔ lɛ, ni be ni mikwɛ lɛ, mina fɔlɔ ko yɛ gbogbo lɛ mli.  Ekɛɛ mi akɛ: “Gbɔmɔ bi,* ofainɛ gbuu gbogbo lɛ mli.” No hewɔ lɛ, migbu gbogbo lɛ mli, ni mina he ko ni atsɔɔ kɛboteɔ mli.  Ekɛɛ mi akɛ: “Botemɔ mli ni oyakwɛ nibii fɔji ni yɔɔ nyaŋemɔ ni amɛfeɔ yɛ biɛ lɛ.” 10  No hewɔ lɛ, mibote mli, ni mikwɛ, ni mina nibii ni wamɔɔ kɛ kooloi ni anyaŋeɔ ahe mfonirii srɔtoi fɛɛ+ kɛ Israel shĩa lɛ mli amagai ni yɔɔ nyaŋemɔ* lɛ fɛɛ;+ akpɛ́ amɛ yɛ gbogbo lɛ he fɛɛ kɛbɔle. 11  Ni Israel shĩa lɛ onukpai 70 damɔ amɛhiɛ, ni Yaazania, Shafan+ binuu lɛ hu damɔ amɛteŋ. Amɛteŋ mɔ fɛɛ mɔ hiɛ etsofa-kɛ-ŋma shãanɔ yɛ edɛŋ, ni tsofa-kɛ-ŋma lasu* ni miije ŋma lɛ miikwɔ kɛmiiya ŋwɛi.+ 12  Ekɛɛ mi akɛ: “Gbɔmɔ bi,* oona nɔ ni Israel shĩa lɛ onukpai lɛ feɔ yɛ dujiaŋ, mɔ fɛɛ mɔ yɛ sɛɛtsui ni emagai lɛ mamɔ mli lɛ amli?* Ejaakɛ amɛkɛɔ akɛ, ‘Yehowa enaaa wɔ. Yehowa eshi shikpɔŋ lɛ.’”+ 13  Ni esaa ekɛɛ mi akɛ: “Obaana nyaŋemɔ nibii krokomɛi ni yɔɔ taŋ fe enɛɛmɛi ni amɛfeɔ lɛ.” 14  No hewɔ lɛ, ekɛ mi ba he ni atsɔɔ kɛboteɔ Yehowa shĩa lɛ kooyigbɛ agbó lɛ mli lɛ naa, ni mina yei tara shi yɛ jɛmɛ ni amɛmiifó nyɔŋmɔ ni ji Tamuz lɛ. 15  Ni esaa ekɛɛ mi akɛ: “Gbɔmɔ bi,* oona enɛ? Obaana nyaŋemɔ nibii krokomɛi ni yɔɔ taŋ kwraa po fe enɛɛmɛi.”+ 16  No hewɔ lɛ, ekɛ mi ba Yehowa shĩa lɛ mligbɛ kpo lɛ nɔ.+ Mina hii 25 yɛ he ni atsɔɔ kɛboteɔ Yehowa sɔlemɔ shĩa lɛ mli lɛ yɛ ablanaa lɛ kɛ afɔleshaa latɛ lɛ teŋ, ni amɛtsɔmɔ amɛsɛɛ amɛhã Yehowa sɔlemɔ shĩa lɛ ni amɛhiɛ miikwɛ bokãgbɛ yɛ jɛmɛ; amɛmiikoto hulu lɛ yɛ bokãgbɛ.+ 17  Ekɛɛ mi akɛ: “Gbɔmɔ bi,* oona enɛ? Ani eji nɔ ko bibioo akɛ Yuda shĩa lɛ baafee nyaŋemɔ nibii nɛɛ, ni amɛkɛ yiwalɛ awo shikpɔŋ lɛ nɔ obɔ+ ni amɛya nɔ amɛwo mimli la? Ni naa, amɛmiikpã tso nine* lɛ mli kɛmiiba migugɔ naa. 18  No hewɔ lɛ, mi hu mikɛ amɛ baaye yɛ mlifu naa. Mihiŋmɛi enaŋ mɔbɔ;+ ni mimusuŋ eshãŋ mi. Eyɛ mli akɛ amɛbaabolɔ waa amɛwo mitoiiaŋ moŋ, shi miboŋ amɛ toi.”+

Shishigbɛ Niŋmaa

Loo “tamɔ bɔ ni ilɛktrɔm kpɛɔ lɛ.”
Hebri sht. ŋm., “binuu.”
Hebri sht. ŋm., “binuu.”
Hebri sht. ŋm., “binuu.”
Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
Loo “atatu.”
Hebri sht. ŋm., “binuu.”
Loo “mɔ fɛɛ mɔ yɛ emaga lɛ sɛɛtsui lɛ amli?”
Hebri sht. ŋm., “binuu.”
Hebri sht. ŋm., “binuu.”
Eeenyɛ efee akɛ, eji tso nine ni akɛtsuɔ nii yɛ amagajamɔ mli.