Ezekiel 42:1-20

  • Niyelihei lɛ (1-14)

  • Asusu sɔlemɔ shĩa lɛ koji ejwɛ lɛ (15-20)

42  Kɛkɛ ni ekɛ mi tee kponɔgbɛ kpo lɛ nɔ yɛ kooyigbɛ.+ Ni ekɛ mi tee niyelihei ni yɔɔ gbɛ ni kã sɔlemɔ shĩa lɛ he lɛ masɛi lɛ,+ yɛ tsũ* ni kpɛtɛ amɛ* lɛ kooyigbɛ.+  Ekɛlɛ yɛ he ni atsɔɔ kɛboteɔ mli yɛ ekooyigbɛ lɛ ji ninetalɔi* 100, ni elɛɛmɔ ji ninetalɔi 50.  Eyɛ mligbɛ kpo lɛ ni lɛɛmɔ ji ninetalɔi 20 lɛ,+ kɛ kponɔgbɛ kpo lɛ he ni akɛ tɛi ekala shikpɔŋ lɛ, teŋ. Ekpokui lɛ eko hiɛ miikwɛ ekroko lɛ hiɛ, ni amɛji ŋwɛitsu nsɔɔdoi etɛ.  Gbɛ ko ni anyiɛɔ nɔ yɛ niyelihei lɛ ahiɛ yɛ mligbɛ,+ ni elɛɛmɔ ji ninetalɔi 10 ni ekɛlɛ hu ji ninetalɔi 100,* ni amɛnaa yɛ kooyigbɛ.  Niyelihei ni yɔɔ ŋwɛigbɛ lɛ yɛ bibioo fe nɔ ni yɔɔ shishigbɛ kɛ teŋgbɛ lɛ, ejaakɛ kpokui lɛ ehe gbɛ babaoo yɛ ŋwɛigbɛ.  Amɛji ŋwɛitsu nsɔɔdoi etɛ, shi amɛbɛ akulashiŋi tamɔ kpoi lɛ yɔɔ lɛ. No hewɔ ni kpokui lɛ he gbɛ babaoo yɛ ŋwɛigbɛ fe shishigbɛ kɛ teŋgbɛ lɛ.  Kponɔgbɛ tɛ gbogbo ni yɔɔ niyelihei lɛ amasɛi yɛ kponɔgbɛ kpo lɛ he ni hiɛ kwɛɔ niyelihei krokomɛi lɛ kɛlɛ ji ninetalɔi 50.  Ejaakɛ niyelihei ni yɔɔ kponɔgbɛ kpo lɛ he lɛ kɛlɛ ji ninetalɔi 50, shi niyelihei ni yɔɔ jamɔhe lɛ masɛi lɛ kɛlɛ ji ninetalɔi 100.  Gbɛ ko yɛ niyelihei lɛ abokãgbɛ ni akwɔɔ kɛboteɔ niyelihei lɛ amli kɛ́ ajɛ kponɔgbɛ kpo lɛ nɔ. 10  Niyelihei hu yɛ tɛ gbogbo ni yɔɔ kpo lɛ he yɛ bokãgbɛ lɛ mli,* yɛ gbɛ ni yɔɔ jamɔhe lɛ he kɛ tsũ lɛ he lɛ masɛi.+ 11  Gbɛ ko ni anyiɛɔ nɔ kã amɛhiɛ tamɔ bɔ ni eji yɛ kooyigbɛ niyelihei lɛ ahiɛ lɛ.+ Amɛ fɛɛ amɛhiɛ lɛɛmɔ kɛ kɛlɛ kome, hei ni atsɔɔ kɛboteɔ mli kɛ bɔ ni ato amɛ ahã lɛ tamɔ ekroko lɛ nɔ lɛ nɔŋŋ. Hei ni atsɔɔ kɛboteɔ mli lɛ 12  tamɔ hei ni atsɔɔ kɛboteɔ niyelihei ni yɔɔ wuoyigbɛ lɛ nɔŋŋ. Gbɛ ni anyiɛɔ nɔ lɛ shishijee gbɛ lɛ, he ko yɛ ni atsɔɔ kɛboteɔ mli yɛ tɛ gbogbo ni kwɛɔ bokãgbɛ lɛ masɛi, bɔ ni mɔ ko baanyɛ atsɔ jɛmɛ kɛbote mli.+ 13  Kɛkɛ ni ekɛɛ mi akɛ: “Niyelihei ni yɔɔ kooyigbɛ kɛ niyelihei ni yɔɔ wuoyigbɛ ni yɔɔ gbɛ ni kã jamɔhe lɛ masɛi+ lɛ ji niyelihei krɔŋkrɔŋi ni osɔfoi ni yaa Yehowa hiɛ lɛ yeɔ afɔlei krɔŋkrɔŋi fe fɛɛ lɛ yɛ.+ Jɛmɛ amɛkɛ afɔlei ni yɔɔ krɔŋkrɔŋ fe fɛɛ lɛ, ŋmaa* afɔle lɛ, kɛ esha afɔle lɛ, kɛ sɔ̃ afɔle lɛ shwieɔ, ejaakɛ jɛmɛ yɛ krɔŋkrɔŋ.+ 14  Kɛ́ osɔfoi lɛ bote mli lɛ, esaaa akɛ amɛjeɔ kpo kɛjeɔ he krɔŋkrɔŋ lɛ kɛbaa kponɔgbɛ kpo lɛ nɔ be mli ni amɛjieko atadei ni amɛwo kɛsɔmɔ lɛ,+ ejaakɛ atadei nɛɛ yɛ krɔŋkrɔŋ. Amɛbaawo atadei krokomɛi dani amɛbaanyɛ amɛya hei ni maŋbii lɛ nyiɛɔ lɛ.” 15  Be ni esusu sɔlemɔ shĩa lɛ mligbɛ* lɛ egbe naa lɛ, ekɛ mi tsɔ agbó ni hiɛ kwɛɔ bokãgbɛ lɛ mli kɛje kpo,+ ni esusu jɛmɛ fɛɛ. 16  Ekɛ gãlã susumɔ tso lɛ susu bokãgbɛ lɛ. Be ni ekɛ gãlã susumɔ tso* lɛ susu lɛ, ekɛlɛ ji gãlã tsei 500, kɛjɛ afã kome kɛtee afã kroko. 17  Esusu kooyigbɛ lɛ, ni be ni ekɛ gãlã susumɔ tso lɛ susu lɛ, ekɛlɛ ji gãlã tsei 500. 18  Esusu wuoyigbɛ lɛ, ni be ni ekɛ gãlã susumɔ tso lɛ susu lɛ, ekɛlɛ ji gãlã tsei 500. 19  Elɔgɔ kɛtee anaigbɛ. Ekɛ gãlã susumɔ tso lɛ susu ekɛlɛ ni ená gãlã tsei 500. 20  Esusu ekoji ejwɛ lɛ. Atswa gbogbo kɛbɔle he+ ni ekɛlɛ ji gãlã susumɔ tsei 500, ni elɛɛmɔ hu ji gãlã susumɔ tsei 500,+ koni akɛfo he ni yɔɔ krɔŋkrɔŋ kɛ he ni bɛ krɔŋkrɔŋ lɛ teŋ.+

Shishigbɛ Niŋmaa

Ni ji, tsũ ni yɔɔ anaigbɛ lɛ.
Ni ji, niyelihei lɛ.
Eji ninetalɔ kakadaŋŋ. Kwɛmɔ Saji Krokomɛi B14 lɛ.
Greek Septuajint lɛ kɛɔ akɛ, “ekɛlɛ ji ninetalɔi 100.” Shi Hebri ŋmalɛ lɛ kɛɔ akɛ: “Gbɛ ko ni ji ninetalɔ kome.” Kwɛmɔ Saji Krokomɛi B14 lɛ.
Hebri sht. ŋm., “yɛ bokãgbɛ lɛ lɛɛmɔ nɔ lɛ mli.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Hebri sht. ŋm., “esusu mligbɛ shĩa.”