Ezekiel 26:1-21

  • Agba ashi Tiro (1-21)

    • “He ko ni akaa yaa yɛ” (5, 14)

    • Abaashɛrɛ tɛi kɛ sũ awo nu lɛ mli (12)

26  Yɛ afi ni ji 11 lɛ mli, nyɔɔŋ lɛ mli klɛŋklɛŋ gbi lɛ nɔ lɛ, Yehowa kɛɛ mi akɛ:  “Gbɔmɔ bi,* akɛni Tiro wie yɛ Yerusalem he akɛ,+ ‘Ahãa! Akumɔ majimaji lɛ agbó lɛ!+ Nɔ fɛɛ nɔ baaba miŋɔɔ, ni amrɔ nɛɛ ni akpãtã ehiɛ lɛ, matsɔ niiatsɛ’ lɛ hewɔ lɛ;  nɔ ni Nuŋtsɔ Ofe Yehowa kɛɛ nɛ: ‘Bo Tiro, mikɛ bo ená, ni mahã jeŋmaji babaoo ate shi kɛba onɔ tamɔ bɔ ni ŋshɔ hãa emli ŋshɔkei teɔ shi lɛ.  Amɛbaakpãtã Tiro gbogboi lɛ ahiɛ ni amɛbaakumɔ emɔji lɛ,+ ni majie enɔ sũ lɛ ni mahã etsɔ tɛsaa kpataa ni nɔ kpɛlɛɔ.  Ebaatsɔ he ko ni akaa yaa* yɛ, yɛ ŋshɔ lɛ teŋ.’+ “‘Ejaakɛ mi diɛŋtsɛ miwie,’ Nuŋtsɔ Ofe Yehowa kɛɛ, ‘ni ebaatsɔ ta mli nii ni aloɔ kɛyaa ehã jeŋmaji lɛ.  Ni akɛ klante baagbe mɛi ni yɔɔ eshihilɛhei* ni yɔɔ kosɛɛ lɛ amli lɛ, ni abaaná ale akɛ miji Yehowa.’  “Ejaakɛ nɔ ni Nuŋtsɔ Ofe Yehowa kɛɛ nɛ: ‘Naa, mahã Babilon maŋtsɛ Nebukadnezar* ajɛ kooyi aba Tiro nɔ;+ eji maŋtsɛmɛi amaŋtsɛ+ ni yɔɔ okpɔŋɔi,+ kɛ ta shwiilii,+ kɛ okpɔŋɔnɔtaralɔi, kɛ asraafoi akuu kɛ emli asraafoi* babaoo.  Ekɛ klante baakpãtã oshihilɛhei ni yɔɔ kosɛɛ lɛ ahiɛ, ni ebaatswa kawoo gbogbo ewo ohe, ni ebaatswa kpoku hu ewo ohe, ni ebaawó tsɛŋ wulu nɔ ewo bo.  Ekɛ tsei ni akɛkumɔɔ gbogboi* baashimɔ ogbogboi lɛ, ni ekɛ elemai* lɛ baakumɔ omɔji lɛ eshwie shi. 10  Ekpɔŋɔi lɛ ayi baafa aahu akɛ, amɛnajiashi mulu baaha onɔ, ni kɛ́ ebote ogbói lɛ amli tamɔ hii ni miibote maŋ ni egbogboi ekumɔ mli lɛ, okpɔŋɔi ni atara amɛnɔ lɛ, kɛ shwiilii lɛ ataii* lɛ, kɛ shwiilii lɛ agbɛɛmɔ lɛ baahã ogbogboi lɛ ahoso. 11  Ekpɔŋɔi lɛ anane tokotai lɛ baanaanaa ogbɛjegbɛi lɛ fɛɛ anɔ;+ ekɛ klante baagbe omaŋbii lɛ, ni ohewalɛ akulashiŋi lɛ baakumɔ ashwie shi. 12  Amɛbaaloo onii ni oyɔɔ lɛ, kɛ nibii ni ohɔ̃ɔ lɛ kɛya,+ amɛbaakumɔ ogbogboi lɛ amɛshwie shi, ni amɛbaakumɔ oshĩai fɛfɛji lɛ amɛshwie shi; ni amɛbaashɛrɛ otɛi lɛ kɛ nibii ni okɛ tso fee lɛ kɛ osũ lɛ amɛwo nu lɛ mli.’ 13  “‘Mafo olalai ni tsimɔɔ toi lɛ asɛɛ, ni anuŋ osaŋkui lɛ agbɛɛmɔ dɔŋŋ.+ 14  Ni mahã otsɔ tɛsaa kpataa ni nɔ kpɛlɛɔ, ni obaatsɔ he ko ni akaa yaa* yɛ.+ Atswaŋ bo amaŋ shi dɔŋŋ, ejaakɛ mi, Yehowa, mi diɛŋtsɛ miwie,’ Nuŋtsɔ Ofe Yehowa kɛɛ. 15  “Nɔ ni Nuŋtsɔ Ofe Yehowa kɛɔ Tiro nɛ: ‘Kɛ́ anu oshigbeemɔ lɛ gbɛɛmɔ, be ni mɛi ni miigbo* lɛ miikɛ̃mɔ, ni aagbe mɛi yɛ omli lɛ, ani ŋshɔkpɔi lɛ ahe kpokpoŋ?+ 16  Ŋshɔ lɛ nɔ lumɛi lɛ fɛɛ baakpeleke shi kɛjɛ amɛmaŋtsɛ sɛii lɛ anɔ ni amɛbaajie amɛtadei kakadaji* lɛ ni amɛbaakpɔlɔ amɛtadei ni alo nii awo mli lɛ yɛ amɛhe, ni amɛbaakpokpo.* Amɛbaatara shikpɔŋ ni amɛbaakpokpo aahu ni amɛbaakwɛ bo ni amɛhe baajɔ̃ amɛhe.+ 17  Ni amɛbaalá yaafo lala*+ amɛwo bo ni amɛkɛɛ bo akɛ: “Bo mɔ ni mɛi jɛɔ ŋshɔi anɔ bahiɔ omli, maŋ ni ajieɔ oyi, kwɛ bɔ ni ohiɛ ekpãtã;+Bo kɛ mɛi ni yɔɔ omli* lɛ ahe wala yɛ ŋshɔ hiɛ,+Ni ohãa gbeyei mɔmɔɔ mɛi ni yɔɔ shikpɔŋ lɛ nɔ lɛ fɛɛ! 18  Gbi ni obaagbee shi lɛ, ŋshɔkpɔi lɛ baahoso,Kɛ́ otee lɛ, ŋshɔkpɔi ni yɔɔ ŋshɔ lɛ mli lɛ baahao.”’+ 19  “Ejaakɛ nɔ ni Nuŋtsɔ Ofe Yehowa kɛɛ nɛ: ‘Kɛ́ mikpãtã ohiɛ tamɔ maji ni mɔ ko mɔ ko bɛ amɛmli, kɛ́ mihã nui ni efee hamahama lɛ ha onɔ, ni nui ni yɔɔ hewalɛ lɛ ha onɔ lɛ,+ 20  mikɛ bo baafata mɛi ni kpelekeɔ shi kɛyaa bu* lɛ mli lɛ ahe kɛya blemabii lɛ aŋɔɔ; mahã ohi shi yɛ shikpɔŋ lɛ shishi, tamɔ blema hei ni akpãtã hiɛ lɛ, bo kɛ mɛi ni kpelekeɔ shi kɛyaa bu lɛ mli lɛ,+ koni mɔ ko akahi omli dɔŋŋ. Kɛkɛ lɛ, mawo hiɛkãalɔi ashikpɔŋ lɛ hiɛ nyam.* 21  “‘Mikɛ gbeyei nii baaba onɔ trukaa ni ohiŋ shi dɔŋŋ.+ Amɛbaatao bo, shi amɛnaŋ bo dɔŋŋ,’ Nuŋtsɔ Ofe Yehowa kɛɛ.”

Shishigbɛ Niŋmaa

Hebri sht. ŋm., “binuu.”
Loo “tsãani; adrã.”
Hebri sht. ŋm., “ebiyei.”
Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
Hebri sht. ŋm., “mɛi.”
Loo “Ekɛ etsɔne ni ekɛtutuaa mɔ lɛ.”
Loo “eklantei.”
Loo “akoklolontoi.”
Loo “tsãani; adrã.”
Hebri sht. ŋm., “be ni mɛi ni agbeɔ.”
Loo “amɛtadei ni nine bɛ he.”
Hebri sht. ŋm., “kpokpomɔ baaha amɛhe.”
Loo “awerɛhoyeli lala.”
Hebri sht. ŋm., “Yoo lɛ kɛ emɛi ni yɔɔ emli.”
Loo “gbonyobu.”
Loo “mawula hiɛkãalɔi ashikpɔŋ lɛ.”