Ezekiel 31:1-18

  • Ejipt, tseneduru tso ni kwɔ lɛ shigbeemɔ (1-18)

31  Yɛ afi ni ji 11 lɛ mli, yɛ nyɔɔŋ ni ji etɛ lɛ mli, yɛ klɛŋklɛŋ gbi yɛ nyɔɔŋ lɛ mli lɛ nɔ lɛ, Yehowa kɛɛ mi ekoŋŋ akɛ:  “Gbɔmɔ bi,* kɛɛmɔ Ejipt maŋtsɛ Farao kɛ esafo babaoo lɛ akɛ,+‘Namɔ otamɔ yɛ ogbojee lɛ mli?   Naa, otamɔ Asirianyo ko, Lebanon tseneduru tso ko,Eniji yɛ fɛo tamɔ koo ni ebu kusuu ni hãa hɔɔŋ, ni ekwɔ;Eyiteŋ shɛɔ atatui lɛ amli.   Nui lɛ hã eda agbo, nuhiŋmɛii kwɔŋkwɔŋ lɛ amli nu lɛ hã ekwɔ waa. Fai ebɔle ehe fɛɛ yɛ he ni adu yɛ lɛ;Amɛnujɔi lɛ hãa ŋa nɔ tsei lɛ fɛɛ náa nu.   No hewɔ ni ekwɔ waa fe ŋa nɔ tsei krokomɛi fɛɛ lɛ. Egbala niji wuji babaoo kɛ niji bibii kakadajiYɛ nui babaoo ni yɔɔ efai lɛ amli lɛ hewɔ.   Ŋwɛi loofɔji lɛ fɛɛ feɔ amɛtsũi yɛ eniji wuji lɛ amli,Ni ŋa mli kooloi lɛ fɛɛ fɔɔ yɛ eniji bibii lɛ ashishi,Ni jeŋmaji wuji lɛ fɛɛ hiɔ ehɔɔŋ lɛ shishi.   Ehe fee fɛo waa ni eniji bibii lɛ hu kɛlɛ waa,Ejaakɛ eshishifãi lɛ tee shikpɔŋ kɛtee nui babaoo amli tɔ̃ɔ.   Tseneduru tsei krokomɛi ni yɔɔ Nyɔŋmɔ abɔɔ+ lɛ mli lɛ eko eko tamɔɔɔ lɛ. Junipa tsei lɛ eko eko bɛ niji wuji tamɔ enɔ lɛ,Ni harmon tsei* lɛ eko eko bɛ ni niji tamɔ eniji lɛ. Tso ko tso ko bɛ Nyɔŋmɔ abɔɔ lɛ mli ni he yɛ fɛo tamɔ lɛ.   Mihã ebu kusuu ni ehe fee fɛo,Ni tsei krokomɛi fɛɛ ni yɔɔ Eden, anɔkwa Nyɔŋmɔ lɛ abɔɔ lɛ mli lɛ yeɔ ehe awuŋa.’ 10  “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Akɛni ebatsɔ* tso ni kwɔ waa, ni eyiteŋ yɛ atatui lɛ amli, ni etsui wó ehe nɔ yɛ ekwɔlɛ lɛ he hewɔ lɛ, 11  mikɛ lɛ baawo jeŋmaji lɛ anɔyelɔ ni he wa lɛ dɛŋ.+ Bɔ fɛɛ bɔ ni fee lɛ ekɛ lɛ baaye, ni makpoo lɛ yɛ enɔfɔŋfeemɔ lɛ hewɔ. 12  Ni gbɔi, jeŋmaji lɛ ateŋ mɛi ni yitseiaŋ wala waa lɛ baafo lɛ afɔ̃ shi, ni amɛbaashi lɛ amɛfɔ̃ gɔji lɛ anɔ, ni enɔ bai lɛ fɛɛ baakpala ashwie jɔi lɛ amli, ni eniji bibii lɛ baakumɔ ashwie shikpɔŋ lɛ nɔ fai lɛ fɛɛ amli.+ Shikpɔŋ lɛ nɔ majimaji lɛ fɛɛ baashi ehɔɔŋ lɛ shishi ni amɛbaashi lɛ amɛya. 13  Ŋwɛi loofɔji fɛɛ baahi etso ni egbee shi lɛ nɔ, ni ŋa mli kooloi fɛɛ baahi eniji bibii lɛ anɔ.+ 14  Ebaaba lɛ nakai koni tsei ni yɔɔ nui lɛ ahe lɛ eko eko akakwɔ waa loo akawó ehe nɔ kɛtee atatui lɛ amli, koni tsei ni náa nui babaoo lɛ eko eko akaya ŋwɛi kɛyanina amɛ. Ejaakɛ akɛ amɛ fɛɛ kɛ gbɔmɛi abii ni kpelekeɔ shi kɛyaa bu* lɛ mli lɛ baawo gbele, shikpɔŋ ni yɔɔ shishi tɔ̃ɔ lɛ dɛŋ.’ 15  “Nɔ ni Nuŋtsɔ Ofe Yehowa kɛɛ nɛ: ‘Yɛ gbi ni ebaakpeleke shi kɛya Gbonyobu* lɛ mli lɛ nɔ lɛ, mahã aye awerɛho. No hewɔ lɛ, maha nui ni mli kwɔlɔ lɛ anɔ, ni masa efai lɛ anaa koni nui babaoo lɛ akaho. Mahã Lebanon awo duŋ yɛ ehewɔ, ni ŋa nɔ tsei lɛ fɛɛ baagbi. 16  Kɛ́ anu eshigbeemɔ lɛ gbɛɛmɔ lɛ, be ni mihã lɛ kɛ mɛi fɛɛ ni kpelekeɔ shi kɛyaa bu* lɛ mli lɛ ekpeleke shi kɛtee Gbonyobu* lɛ mli lɛ, mahã jeŋmaji lɛ akpokpo, ni tsei fɛɛ ni yɔɔ Eden,+ Lebanon tsei kpakpai kɛ tsei ni hi fe fɛɛ, tsei fɛɛ ni náa nu babaoo lɛ atsui baanyɔ amɛmli yɛ shikpɔŋ ni yɔɔ shishi tɔ̃ɔ lɛ nɔ. 17  Amɛkɛ lɛ ekpeleke shi kɛtee Gbonyobu* lɛ mli, kɛtee mɛi ni akɛ klante gbe amɛ lɛ aŋɔɔ,+ amɛyafata mɛi ni yeɔ amɛbuaa* lɛ ni hi ehɔɔŋ lɛ shishi yɛ jeŋmaji lɛ ateŋ lɛ ahe.’+ 18  “‘Te Eden tsei lɛ ateŋ nɔ ni hiɛ yɔɔ nyam ni eje agbo tamɔ bo?+ Shi bɔ fɛɛ bɔ ni fee lɛ, abaahã bo kɛ Eden tsei lɛ akpeleke shi kɛya shikpɔŋ ni yɔɔ shishi tɔ̃ɔ lɛ nɔ. Obaakã mɛi ni afoko amɛ ketia lɛ ateŋ, bo kɛ mɛi ni akɛ klante egbe amɛ lɛ. Enɛ baaba Farao kɛ esafo babaoo lɛ anɔ,’ Nuŋtsɔ Ofe Yehowa kɛɛ.”

Shishigbɛ Niŋmaa

Hebri sht. ŋm., “binuu.”
Tso ko ni yɔɔ niji kakadaji ni ehe kpɔlɔɔ.
Hebri sht. ŋm., “obatsɔ.”
Loo “gbonyobu.”
Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
Loo “gbonyobu.”
Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
Hebri sht. ŋm., “enine.”