Ezekiel 20:1-49

  • Israel atuatsemɔ lɛ he sane (1-32)

  • Awo shi akɛ Israel baaku sɛɛ aba (33-44)

  • Agba ashi wuoyigbɛ lɛ (45-49)

20  Agbɛnɛ yɛ afi ni ji kpawo lɛ mli, yɛ nyɔɔŋ ni ji enumɔ lɛ mli, yɛ gbi ni ji nyɔŋma lɛ nɔ yɛ nyɔɔŋ lɛ mli lɛ, Israel onukpai lɛ ekomɛi ba ni amɛbatara mihiɛ koni amɛbi Yehowa nii.  Kɛkɛ ni Yehowa kɛɛ mi akɛ:  “Gbɔmɔ bi,* okɛ Israel onukpai lɛ awie ni okɛɛ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Ani nyɛba ni nyɛbabi mi nii? ‘Gbii abɔ ni mihiɛ kã nɛɛ, mihãŋ nyɛnibimɔ lɛ hetoo,’+ Nuŋtsɔ Ofe Yehowa kɛɛ.”’  “Ani ofee klalo akɛ obaakojo amɛ lo?* Gbɔmɔ bi,* ani ofee klalo akɛ obaakojo amɛ lo? Hã amɛle nyaŋemɔ nibii ni amɛtsɛmɛi lɛ fee lɛ.+  Kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Yɛ gbi ni mihala Israel lɛ nɔ lɛ,+ mikã Yakob seshi* lɛ kitã* hu, ni mihã amɛle mi yɛ Ejipt shikpɔŋ lɛ nɔ.+ Hɛɛ, mikã amɛ kitã ni mikɛɛ, ‘Miji Yehowa, nyɛ-Nyɔŋmɔ lɛ.’  Yɛ nakai gbi lɛ nɔ lɛ, mikã kitã akɛ majie amɛ kɛje Ejipt shikpɔŋ lɛ nɔ kɛya shikpɔŋ ko ni miyatao mihã amɛ lɛ nɔ, shikpɔŋ ni mliki kɛ wo hoɔ yɛ nɔ.+ Shikpɔji lɛ ateŋ nɔ ni yɔɔ fɛo fe fɛɛ.  Kɛkɛ ni mikɛɛ amɛ akɛ, ‘Nyɛteŋ mɔ fɛɛ mɔ ashɛrɛ nibii ni yɔɔ nyaŋemɔ ni jwere nyɛhiɛ lɛ eshwie; nyɛkɛ Ejipt amagai ni yɔɔ nyaŋemɔ* lɛ akabulea nyɛhe.+ Miji Yehowa, nyɛ-Nyɔŋmɔ lɛ.’+  “‘“Shi amɛtse mihiɛ atua, ni amɛsumɔɔɔ ni amɛboɔ mi toi. Amɛshɛrɛɛɛ nibii ni yɔɔ nyaŋemɔ ni jwere amɛhiɛ lɛ amɛshwieee, ni amɛkpaaa Ejipt amagai ni yɔɔ nyaŋemɔ lɛ ajamɔ.+ No hewɔ lɛ, miwo shi akɛ mafɔse mimlila lɛ mashwie amɛnɔ ni maŋmɛɛ mimlifu lɛ fɛɛ he mashwie amɛnɔ yɛ Ejipt shikpɔŋ lɛ nɔ.  Shi mitsu saji ahe nii yɛ migbɛ́i lɛ hewɔ koni akawo he muji yɛ jeŋmaji ni amɛyɔɔ amɛteŋ lɛ ahiɛ.+ Ejaakɛ mihã amɛle mi yɛ jeŋmaji nɛɛ ahiɛ be ni mijie amɛ* kɛje Ejipt shikpɔŋ lɛ nɔ lɛ.+ 10  No hewɔ lɛ, mijie amɛ kɛje Ejipt shikpɔŋ lɛ nɔ, ni minyiɛ amɛhiɛ kɛtee ŋa lɛ nɔ.+ 11  “‘“Kɛkɛ ni mikɛ mimlai lɛ hã amɛ, ni mihã amɛle miyiŋkpɛi* lɛ,+ koni gbɔmɔ ni kɛbaatsu nii lɛ aná wala yɛ nomɛi ahewɔ.+ 12  Agbɛnɛ hu, mikɛ mihejɔɔmɔ gbii lɛ hã amɛ+ akɛ mi kɛ amɛ teŋ okadi,+ koni amɛná amɛle akɛ mi, Yehowa, miji mɔ ni feɔ amɛ krɔŋkrɔŋ. 13  “‘“Shi Israel shĩa lɛ tse mihiɛ atua yɛ ŋa lɛ nɔ.+ Amɛnyiɛɛɛ yɛ mimlai lɛ amli, ni amɛkpoo miyiŋkpɛi* lɛ ni kɛ́ gbɔmɔ kɛtsu nii lɛ ebaaná wala yɛ nomɛi ahewɔ lɛ. Amɛwo mihejɔɔmɔ gbii lɛ ahe muji waa. No hewɔ lɛ, miwo shi akɛ mafɔse mimlila lɛ mashwie amɛnɔ yɛ ŋa lɛ nɔ kɛkpãtã amɛhiɛ.+ 14  Mitsu saji ahe nii yɛ migbɛ́i lɛ hewɔ koni akawo he muji yɛ jeŋmaji ni mijie amɛ* kɛje kpo yɛ amɛhiɛ lɛ ahiɛ.+ 15  Agbɛnɛ hu, mikã amɛ kitã yɛ ŋa lɛ nɔ akɛ mikɛ amɛ eyaŋ shikpɔŋ ni mikɛhã amɛ lɛ nɔ+—shikpɔŋ ni mliki kɛ wo hoɔ yɛ nɔ lɛ,+ shikpɔji lɛ ateŋ nɔ ni yɔɔ fɛo fe fɛɛ lɛ— 16  ejaakɛ amɛkpoo miyiŋkpɛi* lɛ, amɛnyiɛɛɛ yɛ mimlai lɛ amli, ni amɛwo mihejɔɔmɔ gbii lɛ ahe muji, ejaakɛ amɛtsui nyiɛ amɛmagai ni yɔɔ nyaŋemɔ lɛ asɛɛ.+ 17  “‘“Shi amɛnii fee mi* mɔbɔ, ni mikpãtãaa amɛhiɛ; mikpãtãaa amɛhiɛ yɛ ŋa lɛ nɔ. 18  Mikɛɛ amɛbii* lɛ yɛ ŋa lɛ nɔ akɛ,+ ‘Nyɛkanyiɛa yɛ nyɛtsɛmɛi lɛ ataomɔ nii lɛ anaa,+ ni nyɛkayea amɛyiŋkpɛi* lɛ anɔ, ni nyɛkɛ amɛmagai ni yɔɔ nyaŋemɔ lɛ akabulea nyɛhe. 19  Miji Yehowa, nyɛ-Nyɔŋmɔ lɛ. Nyɛnyiɛa yɛ mimlai lɛ amli, ni nyɛkɛ miyiŋkpɛi* lɛ atoa ni nyɛkɛtsua nii.+ 20  Ni nyɛfea mihejɔɔmɔ gbii lɛ krɔŋkrɔŋ,+ ni amɛbaafee mi kɛ nyɛ teŋ okadi koni nyɛná nyɛle akɛ miji Yehowa, nyɛ-Nyɔŋmɔ lɛ.’+ 21  “‘“Shi bii* lɛ hu tse mihiɛ atua.+ Amɛnyiɛɛɛ yɛ mimlai lɛ amli, ni amɛyeee miyiŋkpɛi* lɛ anɔ ni amɛkɛtsuuu nii hu, nii ni kɛ́ gbɔmɔ kɛtsu nii lɛ ebaaná wala yɛ nomɛi ahewɔ lɛ. Amɛwo mihejɔɔmɔ gbii lɛ ahe muji. No hewɔ lɛ, miwo shi akɛ mafɔse mimlila lɛ mashwie amɛnɔ ni maŋmɛɛ mimlifu lɛ fɛɛ he mashwie amɛnɔ yɛ ŋa lɛ nɔ.+ 22  Shi migbala mihe sɛɛ+ ni mitsu saji ahe nii yɛ migbɛ́i lɛ hewɔ+ koni akawo he muji yɛ jeŋmaji ni mijie amɛ* kɛje kpo yɛ amɛhiɛ lɛ ahiɛ. 23  Agbɛnɛ hu, mikã amɛ kitã yɛ ŋa lɛ nɔ akɛ magbɛ amɛ mashwã jeŋmaji lɛ amli ni mashwie amɛ kɛya shikpɔji lɛ anɔ,+ 24  ejaakɛ amɛkɛ miyiŋkpɛi* lɛ tsuuu nii ni amɛkpoo mimlai lɛ,+ amɛwo mihejɔɔmɔ gbii lɛ ahe muji, ni amɛnyiɛ* amɛtsɛmɛi lɛ amagai ni yɔɔ nyaŋemɔ lɛ asɛɛ.+ 25  Agbɛnɛ hu, miŋmɛ amɛ gbɛ ni amɛyanyiɛ taomɔ nii ni ehiii kɛ yiŋkpɛi* ni hãŋ amɛná wala lɛ asɛɛ.+ 26  Mihã amɛkɛ amɛ diɛŋtsɛ amɛfɔlei lɛ bule amɛhe—be ni amɛhã kromɔbi fɛɛ kromɔbi tsɔ la lɛ mli lɛ+—koni mikɛhã amɛtã ni amɛná amɛle akɛ miji Yehowa.”’ 27  “No hewɔ lɛ, gbɔmɔ bi, okɛ Israel shĩa lɛ awie ni okɛɛ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Yɛ nɛkɛ gbɛ nɔ nɔŋŋ nyɛtsɛmɛi lɛ yeee mi anɔkwa ni amɛwie mihe efɔŋ. 28  Mikɛ amɛ ba shikpɔŋ ni mikã kitã akɛ mikɛbaahã amɛ lɛ nɔ.+ Be ni amɛna gɔji ni kwɔlɔ lɛ kɛ tsei ni ebu kusuu lɛ fɛɛ lɛ,+ amɛkɛ amɛfɔlei lɛ kɛ amɛnikeenii ni yɔɔ mlila lɛ hã. Amɛkɛ amɛfɔlei lɛ aŋma ni ŋɔɔ* lɛ hãa yɛ jɛmɛ ni amɛfɔseɔ amɛdãa afɔlei lɛ yɛ jɛmɛ. 29  No hewɔ lɛ, mibi amɛ akɛ, ‘He grɔŋŋ nɛɛ ni nyɛyaa lɛ, te eshishi lɛ? (Atsɛɔ lɛ He Grɔŋŋ kɛbashi ŋmɛnɛ gbi nɛɛ.)’”’+ 30  “Agbɛnɛ, kɛɛmɔ Israel shĩa lɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Ani nyɛmiinyiɛ amɛmagai ni yɔɔ nyaŋemɔ lɛ asɛɛ ni nyɛmiijá amɛ* kɛmiibule nyɛhe tamɔ bɔ ni nyɛtsɛmɛi lɛ fee lɛ?+ 31  Ni ani nyɛkɛ afɔlei miihã nyɛmagai ni yɔɔ nyaŋemɔ lɛ fɛɛ, ni nyɛmiihã nyɛbii* lɛ miitsɔ la mli lolo kɛmiibule nyɛhe kɛbashi ŋmɛnɛ gbi nɛɛ?+ Israel shĩa, ani esa akɛ mihã nyɛnibimɔ lɛ hetoo be ni nyɛfeɔ enɛɛmɛi lɛ lo?”’+ “‘Gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘Mihãŋ nyɛnibimɔ lɛ hetoo.+ 32  Ni nɔ ni yɔɔ nyɛjwɛŋmɔ* mli kɛ́ nyɛkɛɛ akɛ, “Wɔbaatsɔmɔ tamɔ jeŋmaji lɛ, tamɔ shikpɔji krokomɛi lɛ awekui ni jáa* tsei kɛ tɛi” lɛ,+ ebaŋ mli kɔkɔɔkɔ.’” 33  “‘Gbii abɔ ni mihiɛ kã nɛɛ,’ Nuŋtsɔ Ofe Yehowa kɛɛ, ‘Mikɛ nineshiwalɛ, kɛ nine ni akpã mli, kɛ mlifu ni aafɔse aashwie shi baaye nyɛnɔ maŋtsɛ.+ 34  Mikɛ nineshiwalɛ, kɛ nine ni akpã mli, kɛ mlifu ni aafɔse aashwie shi baajie nyɛ kɛje majimaji lɛ ateŋ, ni mabua nyɛnaa kɛbaajɛ shikpɔji ni migbɛ nyɛ mishwã nɔ lɛ anɔ.+ 35  Mikɛ nyɛ baaya majimaji lɛ aŋa lɛ nɔ, ni mikɛ nyɛ baaye sane yɛ jɛmɛ hiɛ kɛ hiɛ.+ 36  “‘Bɔ ni mikɛ nyɛtsɛmɛi lɛ ye sane yɛ ŋa ni yɔɔ Ejipt shikpɔŋ lɛ nɔ lɛ nɔ lɛ, nakai nɔŋŋ mikɛ nyɛ baaye sane,’ Nuŋtsɔ Ofe Yehowa kɛɛ. 37  ‘Mahã nyɛtsɔ tookwɛlɔ tso lɛ shishi+ ni mafimɔ nyɛ mawo kpaŋmɔ lɛ mli. 38  Shi majie atuatselɔi lɛ kɛ mɛi ni tɔ̃ɔ minɔ lɛ kɛje nyɛteŋ.+ Ejaakɛ majie amɛ kɛje shikpɔŋ ni amɛyato gbɔ yɛ nɔ lɛ nɔ, shi amɛyaŋ Israel shikpɔŋ lɛ nɔ;+ ni nyɛbaaná nyɛle akɛ miji Yehowa.’ 39  “Shi nyɛ, Israel shĩa, nɔ ni Nuŋtsɔ Ofe Yehowa kɛɛ nɛ: ‘Nyɛteŋ mɔ fɛɛ mɔ aya ni eyasɔmɔ emagai ni yɔɔ nyaŋemɔ lɛ.+ Shi no sɛɛ lɛ, kɛ́ nyɛbooo mi toi lɛ, nyɛnyɛŋ nyɛkɛ nyɛfɔlei lɛ kɛ nyɛmagai ni yɔɔ nyaŋemɔ lɛ abule migbɛ́i krɔŋkrɔŋ lɛ.’+ 40  “‘Ejaakɛ migɔŋ krɔŋkrɔŋ lɛ nɔ, gɔŋ ni kwɔ ni yɔɔ Israel lɛ nɔ,+ ji he ni Israel shĩa muu lɛ fɛɛ, amɛ fɛɛ kwa amɛbaasɔmɔ mi yɛ, yɛ shikpɔŋ lɛ nɔ,’+ Nuŋtsɔ Ofe Yehowa kɛɛ. ‘Maná amɛhe miishɛɛ yɛ jɛmɛ, ni mabi oniai ni nyɛtsuɔ lɛ kɛ afɔlei ni nyɛkɛhãa lɛ amli klɛŋklɛŋ yibii lɛ, nyɛnibii krɔŋkrɔŋi lɛ fɛɛ ashi yɛ jɛmɛ.+ 41  Ŋma ni jeɔ ŋma jogbaŋŋ* lɛ hewɔ lɛ, maná nyɛhe miishɛɛ kɛ́ mijie nyɛ kɛje majimaji lɛ amli ni mibua nyɛnaa kɛjɛ shikpɔji ni agbɛ nyɛ ashwã nɔ lɛ anɔ lɛ;+ ni abaafee mi krɔŋkrɔŋ yɛ nyɛteŋ yɛ jeŋmaji lɛ ahiɛ.’+ 42  “‘Ni kɛ́ mikɛ nyɛ ba Israel shikpɔŋ lɛ nɔ,+ shikpɔŋ ni mikã nyɛtsɛmɛi lɛ kitã akɛ mikɛbaahã amɛ lɛ nɔ lɛ, nyɛbaaná nyɛle akɛ miji Yehowa.+ 43  Ni jɛmɛ nyɛbaakai bɔ ni nyɛba nyɛjeŋ nyɛhã kɛ nibii fɛɛ ni nyɛfee kɛbule nyɛhe lɛ,+ ni nyɛbaanyaŋe nyɛhe* yɛ nibii fɔji fɛɛ ni nyɛfee lɛ ahewɔ.+ 44  Ni nyɛ Israel shĩa, kɛ́ mikɛ nyɛ ye yɛ migbɛ́i lɛ hewɔ shi jeee yɛ nyɛjeŋba gbonyo lɛ naa loo yɛ nyɛnifeemɔi gbohii lɛ anaa lɛ, no dani nyɛbaaná nyɛle akɛ miji Yehowa,’+ Nuŋtsɔ Ofe Yehowa kɛɛ.” 45  Ni Yehowa kɛɛ mi ekoŋŋ akɛ: 46  “Gbɔmɔ bi,* tsɔ ohiɛ owo wuoyigbɛ kpokpaa lɛ nɔ, ni ojaje otsɔɔ wuoyi, ni ogba otsɔɔ wuoyi ŋa lɛ nɔ koo lɛ. 47  Kɛɛmɔ wuoyi koo lɛ akɛ, ‘Bo Yehowa wiemɔ toi. Nɔ ni Nuŋtsɔ Ofe Yehowa kɛɛ nɛ: “Naa miishɛre la ko miiwo bo,+ ni ebaashã tso ŋmɔŋ fɛɛ tso ŋmɔŋ kɛ tso gbiŋ fɛɛ tso gbiŋ ni yɔɔ omli lɛ. Agbeŋ elalilɛi ni tsoɔ lɛ,+ ni ebaashã hiɛ fɛɛ hiɛ, kɛjɛ wuoyi aahu kɛyashi kooyi. 48  Ni heloo* fɛɛ baana akɛ, mi Yehowa diɛŋtsɛ ji mɔ ni wo mli la koni akagbe.”’”+ 49  Ni mikɛɛ akɛ: “Ao Nuŋtsɔ Ofe Yehowa! Amɛmiikɛɛ yɛ mihe akɛ, ‘Ani jeee ajenui kɛkɛ egbáa lɛ?’”*

Shishigbɛ Niŋmaa

Hebri sht. ŋm., “binuu.”
Loo “Ani ofee klalo akɛ obaabu amɛ bem loo fɔ lo?”
Hebri sht. ŋm., “binuu.”
Hebri sht. ŋm., “dumɔwu.”
Hebri sht. ŋm., “miwó minine nɔ mitsɔɔ Yakob dumɔwu lɛ.”
Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
Ni ji, Israel.
Loo “mikojomɔi.”
Loo “mikojomɔi.”
Ni ji, Israel.
Loo “mikojomɔi.”
Hebri sht. ŋm., “mihiŋmɛi.”
Hebri sht. ŋm., “amɛbihii.”
Loo “amɛkojomɔi.”
Loo “mikojomɔi.”
Hebri sht. ŋm., “bihii.”
Loo “mikojomɔi.”
Ni ji, Israel.
Loo “mikojomɔi.”
Hebri sht. ŋm., “amɛhiŋmɛii nyiɛ.”
Loo “kojomɔi.”
Loo “aŋma ni akɛkpãtãa mɔ; aŋma ni jɔɔ mɔ tsui he.” Hebri sht. ŋm., “aŋma ni hãa mɔ he jɔɔ lɛ.”
Loo “nyɛkɛ amɛ miibɔ ajwamaŋ.”
Hebri sht. ŋm., “nyɛbihii.”
Hebri sht. ŋm., “nyɛmumɔ.”
Loo “sɔmɔɔ.”
Loo “Ŋma ni akɛkpãtãa mɔ; Ŋma ni jɔɔ mɔ tsui he.” Hebri sht. ŋm., “Ŋma ni hãa mɔ he jɔɔ lɛ.”
Hebri sht. ŋm., “nyɛhiɛi.”
Hebri sht. ŋm., “binuu.”
Loo “gbɔmɛi.”
Loo “abɛi kɛkɛ ebuɔ lɛ?”