Ezekiel 30:1-26

  • Agba ashi Ejipt (1-19)

    • Agba tutuamɔ ni Nebukadnezar kɛbaaba lɛ (10)

  • Aku Farao hewalɛ lɛ mli (20-26)

30  Ni Yehowa kɛɛ mi ekoŋŋ akɛ:  “Gbɔmɔ bi,* gbaa ni okɛɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Nyɛfóa, ‘Ao, gbi lɛ miiba!’   Ejaakɛ gbi lɛ ebɛŋkɛ, Yehowa gbi lɛ ebɛŋkɛ lɛɛlɛŋ.+ Ebaafee atatui agbi,+ be ni ato ahã jeŋmaji lɛ.+   Klante baaba Ejipt nɔ, ni kɛ́ mɛi nyɔ yɛ Ejipt lɛ, Etiopia tsui baafã;Nii babaoo ni eyɔɔ lɛ, aloo kɛtee, ni akumɔ efaneshii lɛ ashwie shi.+   Etiopia,+ kɛ Put,+ kɛ Lud, kɛ futufutu gbɔmɛi lɛ fɛɛ,*Kɛ Kub, kɛ kpaŋmɔ shikpɔŋ lɛ bii* lɛ,*Amɛ fɛɛ amɛbaanyɔ yɛ klante naa.”’   Nɔ ni Yehowa kɛɛ nɛ: ‘Mɛi ni yeɔ amɛbuaa Ejipt lɛ hu baanyɔ,Ni abaaba ehewalɛ ni ekɛwóɔ ehe nɔ lɛ shi.’+ “‘Amɛbaanyɔ yɛ klante naa yɛ shikpɔŋ lɛ nɔ kɛjɛ Migdol+ kɛyashi Sewene,’+ Nuŋtsɔ Ofe Yehowa kɛɛ.  ‘Amɛbaatsɔ amaŋfɔ fe shikpɔji ni etsɔmɔ amaŋfɔi lɛ fɛɛ, ni abaakpãtã lɛ diɛŋtsɛ emaji lɛ ahiɛ fe maji ni akpãtã amɛhiɛ lɛ fɛɛ.+  Ni kɛ́ miwo la yɛ Ejipt ni akpãtã eyelikɛbualɔi lɛ fɛɛ ahiɛ lɛ, amɛbaaná amɛle akɛ miji Yehowa.  Nakai gbi lɛ nɔ lɛ, matsu mɛi yɛ meelei amli kɛya Etiopia ni heɔ ehe eyeɔ waa lɛ ŋɔɔ, ni Etiopia he baakpokpo; amɛbaakpokpo yɛ gbi ni miiba Ejipt nɔ lɛ nɔ, ejaakɛ bɔ fɛɛ bɔ ni fee lɛ, ebaaba.’ 10  “Nɔ ni Nuŋtsɔ Ofe Yehowa kɛɛ nɛ: ‘Matsɔ Babilon maŋtsɛ Nebukadnezar* nine nɔ mahã Ejipt asafo babaoo lɛ atã.+ 11  Abaahã lɛ kɛ esraafoi lɛ, ni ji jeŋmaji lɛ ateŋ mɛi ni yitseiaŋ wala waa+ lɛ aba ni amɛbakpãtã shikpɔŋ lɛ hiɛ. Amɛbaagbala amɛklantei amɛwo Ejipt ni amɛbaagbe mɛi amɛwo shikpɔŋ lɛ nɔ obɔ.+ 12  Mahã Nilo+ lɛ nujɔi lɛ atsɔ shikpɔŋ gbiŋ, ni mahɔ̃ɔ shikpɔŋ lɛ mahã gbɔmɛi fɔji. Matsɔ gbɔi anine nɔ mafee shikpɔŋ lɛ kɛ nɔ fɛɛ nɔ ni yɔɔ nɔ lɛ amaŋfɔ.+ Mi Yehowa, mi diɛŋtsɛ miwie.’ 13  “Nɔ ni Nuŋtsɔ Ofe Yehowa kɛɛ nɛ: ‘Makpãtã amagai ni yɔɔ nyaŋemɔ* lɛ ahiɛ, ni mahã nyɔŋmɔi ni he bɛ sɛɛnamɔ lɛ atã yɛ Nof.*+ Anaŋ lumɔ ko yɛ Ejipt shikpɔŋ lɛ nɔ dɔŋŋ, ni mahã gbeyei aba Ejipt shikpɔŋ lɛ nɔ.+ 14  Mahã Patros+ atsɔ amaŋfɔ ni mawo la yɛ Zoan ni magbala Noh*+ toi. 15  Mafɔse mimlila lɛ mashwie Sin, ni ji Ejipt teemɔhe lɛ nɔ, ni makpãtã mɛi ni yɔɔ Noh lɛ ahiɛ. 16  Mawo la yɛ Ejipt; ni gbeyei baamɔ Sin, ni abaajwa Noh gbogbo lɛ awo mli, ni abaatutua Nof* shwane fintiŋŋ! 17  On* kɛ Pibiset oblahii lɛ baanyɔnyɔi yɛ klante naa, ni abaaŋɔ maji lɛ amli bii lɛ nom kɛya. 18  Kɛ́ mikumɔ Ejipt kɔɔŋtsei lɛ yɛ Tehafnehes lɛ, duŋ baawo shwane yɛ Tehafnehes.+ Ehewalɛ ni ekɛshwãa lɛ sɛɛ baafo,+ atatui baaha enɔ, ni abaaŋɔ emaji lɛ amli bii lɛ nom kɛya.+ 19  Magbala Ejipt toi ni amɛbaaná amɛle akɛ miji Yehowa.’” 20  Ni yɛ afi ni ji 11 lɛ mli, yɛ klɛŋklɛŋ nyɔɔŋ lɛ mli, yɛ gbi ni ji kpawo lɛ nɔ yɛ nyɔɔŋ lɛ mli lɛ nɔ lɛ, Yehowa kɛɛ mi akɛ: 21  “Gbɔmɔ bi,* miku Ejipt maŋtsɛ Farao nine; afiŋ koni etsa, ni akɛ mama hu ebalaŋ koni nine lɛ aná hewalɛ ni ewó klante nɔ.” 22  “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Naa, mikɛ Ejipt maŋtsɛ Farao ená,+ ni makumɔ eniji, nɔ ni yɔɔ hewalɛ lɛ kɛ nɔ ni eku lɛ fɛɛ,+ ni mahã klante lɛ aje edɛŋ agbee shi.+ 23  Kɛkɛ lɛ, magbɛ Ejiptbii lɛ mashwã jeŋmaji lɛ ateŋ ni mashwie amɛ kɛya shikpɔji lɛ anɔ.+ 24  Mawaje Babilon maŋtsɛ lɛ niji*+ ni mikɛ miklante lɛ baawo edɛŋ,+ ni makumɔ Farao niji, ni ebaakɛ̃mɔ waa yɛ ehiɛ* tamɔ mɔ ko ni miigbo. 25  Mawaje Babilon maŋtsɛ lɛ niji, shi Farao nijiaŋ baajɔ; ni kɛ́ mikɛ miklante lɛ wo Babilon maŋtsɛ lɛ dɛŋ ni ewó nɔ yɛ Ejipt shikpɔŋ lɛ nɔ lɛ, amɛbaaná amɛle akɛ miji Yehowa.+ 26  Ni magbɛ Ejiptbii lɛ mashwã jeŋmaji lɛ ateŋ, ni mashwie amɛ kɛya shikpɔji lɛ anɔ,+ ni amɛbaaná amɛle akɛ miji Yehowa.’”

Shishigbɛ Niŋmaa

Hebri sht. ŋm., “binuu.”
Loo “mɛi fɛɛ ni jɛ jeŋmaji krokomɛi amli.”
Hebri sht. ŋm., “bihii.”
Eeenyɛ efee akɛ, ekɔɔ Israelbii ni kɛ Ejipt bɔɔ lɛ ahe.
Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
Loo “Mɛmfis.”
Ni ji, Tibis.
Loo “Mɛmfis.”
Ni ji, Hiliopolis.
Hebri sht. ŋm., “binuu.”
Loo “Mahã Babilon maŋtsɛ lɛ hewalɛ afa.”
Ni ji, yɛ Babilon maŋtsɛ lɛ hiɛ.