Ang mga Milagro ni Jesus—Unsay Imong Makat-onan?

LAGMIT matingala ka sa pagkasayod nga ang mga asoy sa Bibliya bahin sa kinabuhi ni Jesus dinhi sa yuta wala gayod mogamit sa orihinal nga pulong alang sa “milagro.” Ang Gregong pulong (dyʹna·mis) nga usahay gihubad nga “milagro” sa literal nagkahulogang “gahom.” (Lucas 8:46) Mahimo usab kining hubaron nga “katakos” o “gamhanang mga buhat.” (Mateo 11:20; 25:15) Sumala sa usa ka eskolar, kining maong Gregong termino “nagpasiugda sa gamhanang buhat nga nahimo, ug ilabina, sa gahom nga tungod niana kini milampos. Ang hitabo gihubit ingong pagpahayag sa gahom sa Diyos.”

Ang laing Gregong termino (teʹras) sagad gihubad nga “tilimad-on” o “katingalahan.” (Juan 4:48; Buhat 2:19) Kining ekspresyona nagpasiugda sa epekto diha sa mga maniniid. Kasagaran, ang mga panon sa katawhan ug ang mga tinun-an nahibulong ug nahingangha sa gamhanang mga buhat ni Jesus.—Marcos 2:12; 4:41; 6:51; Lucas 9:43.

 Ang ikatulong Gregong termino (se·meiʹon) nga nagtumong sa mga milagro ni Jesus nagpasabot ug usa ka “ilhanan.” Kini “nagtumong sa mas lalom nga kahulogan sa milagro,” matod pa sa eskolar nga si Robert Deffinbaugh. Siya midugang: “Ang usa ka ilhanan maoy usa ka milagro nga nagpasabot ug usa ka kamatuoran bahin sa atong Ginoong Jesus.”

Mugna sa Handurawan o Hinatag-sa-Diyos nga Gahom?

Ang Bibliya wala maghubit sa mga milagro ni Jesus ingong mga lipatlipat o mga mugna sa handurawan nga gilaraw aron sa paglingaw sa mga tawo. Kini nagpahayag sa “halangdong gahom sa Diyos,” sama sa paghingilin ni Jesus sa demonyo gikan sa usa ka batang lalaki. (Lucas 9:37-43) Imposible ba ang maong gamhanang mga buhat alang sa Labing Gamhanan nga Diyos—ang Usa nga gihubit ingong adunay ‘dagaya nga dinamikong kusog’? (Isaias 40:26) Siyempre dili!

Ang mga asoy sa Ebanghelyo naghisgot ug mga 35 ka milagro ni Jesus. Apan ang katibuk-ang gidaghanon sa iyang mga milagro wala ibutyag. Pananglitan, ang Mateo 14:14 nag-ingon: “Iyang [Jesus] nakita ang usa ka dakong panon sa katawhan; ug siya naluoy kanila, ug siya nag-ayo sa ilang mga masakiton.” Wala kita sultihi kon pila ka masakitong tawo ang iyang giayo nianang higayona.

Ang maong gamhanang mga buhat hinungdanon sa pangangkon ni Jesus nga siya mao ang Anak sa Diyos, ang gisaad nga Mesiyas. Gipakita gayod sa Kasulatan nga tungod sa hinatag-sa-Diyos nga gahom si Jesus nakahimog mga milagro. Si apostol Pedro nagtumong kang Jesus ingong “usa ka tawo nga dayag nga gipakita sa Diyos kaninyo pinaagi sa gamhanang mga buhat ug mga tilimad-on ug mga ilhanan nga gibuhat sa Diyos pinaagi kaniya sa inyong taliwala, sumala gayod sa inyong nahibaloan.” (Buhat 2:22) Sa laing higayon, gipunting ni Pedro nga ang ‘Diyos nagdihog kang Jesus ug balaang espiritu ug gahom, ug gilibot niya ang kayutaan nga nagbuhat ug maayo ug nag-ayo nilang tanan nga gisakit sa Yawa; tungod kay ang Diyos uban man kaniya.’—Buhat 10:37, 38.

 Ang mga milagro ni Jesus nalambigit pag-ayo sa iyang mensahe. Gibutyag sa Marcos 1:21-27 ang reaksiyon sa panon sa katawhan sa pagpanudlo ni Jesus ug sa usa sa iyang mga milagro. Ang Marcos 1:22 nag-ingon nga ang mga panon sa katawhan “nahingangha sa iyang paagi sa pagpanudlo,” ug ang bersikulo 27 nagpunting nga ang mga tawo “nahingangha” sa dihang iyang gihinginlan ang demonyo. Ang gamhanang mga buhat ni Jesus ug ang iyang mensahe nagpamatuod nga siya mao ang gisaad nga Mesiyas.

Si Jesus wala lang moangkon nga siya mao ang Mesiyas; pinaagi sa iyang mga pulong ug uban pang mga buhat, ang hinatag-sa-Diyos nga gahom nga gipasundayag diha sa iyang mga milagro nagpamatuod sa iyang pagka-Mesiyas. Sa dihang mitungha ang mga pangutana bahin sa iyang papel ug awtoridad, si Jesus maisogong mitubag: “Ako adunay pamatuod nga labaw pa nianang kang Juan [Bawtista], kay ang mga buhat nga gitudlo kanako sa akong Amahan nga buhaton, ang mga buhat nga akong ginabuhat, magpamatuod bahin kanako nga ang Amahan nagpadala kanako.”—Juan 5:36.

Mga Pamatuod sa Pagkatinuod Niini

Nganong makatino kita nga tinuod gayod ang mga milagro ni Jesus? Tagda ang pipila ka mga pamatuod sa pagkatinuod niini.

Sa paghimo sa iyang gamhanang mga buhat, wala gayod ipasiugda ni Jesus ang iyang kaugalingon. Gipaneguro niya nga ang Diyos maoy mapasidunggan ug mahimaya sa bisan unsang milagro nga iyang himoon. Pananglitan, sa wala pa ayoha ang usa ka tawong buta, gipasiugda ni Jesus nga mahitabo ang pag-ayo “aron ang mga buhat sa Diyos ikapadayag diha sa iyang kahimtang.”—Juan 9:1-3; 11:1-4.

Dili sama sa propesyonal nga mga tiglipatlipat, madyikero, ug mga mananambal pinaagig pagtuo, si Jesus wala gayod mogamit ug hipnotismo, panglingla, mapagawalong mga pasundayag, mga pangyamyam sa salamangka, o emosyonal nga mga rituwal. Wala siya mogamit ug patuotuo o mga relikyas. Matikdi ang makasaranganong paagi sa pag-ayo ni Jesus sa duha ka tawong buta. “Kay giabot ug kaluoy,” matod pa sa asoy, “gihikap ni Jesus ang ilang mga mata, ug dihadiha sila nakakita na, ug sila misunod kaniya.” (Mateo 20:29-34) Walay rituwal, seremonyas, o mapagawalong pasundayag nga nalangkit. Si Jesus mihimog milagrosong mga buhat diha sa publiko, kasagaran atubangan sa daghang tumatan-aw. Wala siya mogamit ug espesyal nga mga suga, pasundayag sa entablado, o mga galamiton. Sa kasukwahi, ang giingong modernong-adlaw nga mga milagro sagad dili gayod mapamatud-an.—Marcos 5:24-29; Lucas 7:11-15.

Usahay, si Jesus miila sa pagtuo niadtong nakapahimulos sa iyang mga milagro. Apan ang kawalay-pagtuo sa usa ka tawo wala makapugong kang Jesus sa paghimog milagro. Samtang didto siya sa Capernaum sa Galilea, “ang mga tawo nagdala kaniyag daghang tawong gigamhan-sa-demonyo; ug gihinginlan niya ang mga espiritu pinaagi sa usa ka pulong, ug giayo niya ang tanang masakiton.”—Mateo 8:16.

Ang mga milagro ni Jesus gihimo aron matagbaw ang aktuwal nga pisikal nga mga panginahanglan sa mga tawo, dili aron tagbawon ang pagkamaukiton sa usa. (Marcos 10:46-52; Lucas 23:8) Ug si Jesus wala gayod mohimog mga milagro aron makabaton ug bisan unsang personal nga kaayohan.—Mateo 4:2-4; 10:8.

Kasaligan ba ang mga Asoy sa Ebanghelyo?

Ang mga kamatuoran bahin sa mga milagro ni Jesus gipasa kanato pinaagi sa mga asoy sa upat ka Ebanghelyo. Samtang atong susihon ang pagkatinuod sa mga milagro nga giisip nga iya ni Jesus, aduna ba kitay mga katarongan nga mosalig niining maong mga asoy? Oo, aduna.

Sama sa nahisgotan na, ang mga milagro ni Jesus gihimo diha sa publiko, atubangan sa daghang tumatan-aw. Ang labing una sa mga Ebanghelyo gisulat sa dihang buhi pa ang kadaghanan niadtong mga nakasaksi. Mahitungod sa pagkamatinud-anon sa mga magsusulat sa Ebanghelyo, ang librong The Miracles and the Resurrection nag-ingon: “Dili gayod makataronganon ang pag-akusar sa mga magwawali sa ebanghelyo nga sila tinuyong naglimod sa makasaysayanhong mga kamatuoran diha sa daghang sugilanon sa mga milagro kono aron maanunsiyo ang relihiyosong mga pagtuo. . . . Sila maoy matinud-anon gayod nga mga magsusulat.”

Wala gayod supaka sa mga kaaway sa Kristiyanidad ang gamhanang mga buhat nga gihubit diha sa mga Ebanghelyo. Ila lang gikuwestiyon ang gahom nga pinaagi niana kini nahimo. (Marcos  3:22-26) Wala usab magmalamposon ang ulahing mga tigsaway sa pagpanghimakak sa mga milagro ni Jesus. Sa kasukwahi, panahon sa una ug ikaduha nga mga siglo K.P., dihay makasaysayanhong mga reperensiya sa milagrosong mga buhat nga gihimo ni Jesus. Tin-aw nga kita adunay lig-ong katarongan nga motuo nga ang mga asoy sa Ebanghelyo tinuod gayod.

Ang Tawo Luyo sa mga Milagro

Ang pagsusi sa mga milagro ni Jesus mahimong dili-bug-os kon himoon lamang kini diha sa lohikal nga mga argumento bahin sa pagkatinuod niini. Sa paghubit sa gamhanang mga buhat ni Jesus, ang mga Ebanghelyo nagbutyag sa usa ka tawo nga mabination ug maluluy-on kaayo, nga may dulot nga kaikag sa kaayohan sa mga isigkatawo.

Tagda ang kahimtang sa usa ka sanlahon nga miduol kang Jesus nga nangaliyupo: “Kon buot mo lamang, ikaw makahinlo kanako.” Kay “giabot ug kaluoy,” gituy-od ni Jesus ang iyang kamot ug gihikap ang sanlahon, nga miingon: “Buot ko. Mamahinlo ka.” Dihadiha naayo ang maong tawo. (Marcos 1:40-42) Busa gipakita ni Jesus ang empatiya nga maoy nagtukmod kaniya sa paggamit sa iyang hinatag-sa-Diyos nga gahom sa paghimog mga milagro.

Unsay nahitabo sa dihang nasugatan ni Jesus ang usa ka prosesyon sa paglubong gikan sa siyudad sa Nain? Ang namatay nga batan-ong lalaki mao ang bugtong anak sa babayeng balo. Kay “giabot ug kaluoy” sa babaye, giduol siya ni Jesus ug giingnan: “Ayaw na paghilak.” Dayon iyang gibanhaw ang iyang anak nga lalaki.—Lucas 7:11-15.

Ang makapahupay nga leksiyon nga makat-onan gikan sa mga milagro ni Jesus mao nga siya “giabot ug kaluoy” ug mihimog mga butang sa pagtabang sa mga tawo. Apan ang maong mga milagro dili lang kasaysayan. “Si Jesu-Kristo mao sa gihapon kagahapon ug karon, ug hangtod sa kahangtoran,” nag-ingon ang Hebreohanon 13:8. Siya nagmando na karon ingong langitnong Hari, nga andam ug makaarang sa paggamit sa iyang hinatag-sa-Diyos nga milagrosong mga gahom sa mas masangkarong paagi kay sa iyang nahimo dinhi sa yuta ingong tawo. Sa dili madugay, gamiton ni Jesus ang maong gahom sa pag-ayo sa masinugtanong katawhan. Ang mga Saksi ni Jehova malipayng motabang kanimo sa pagkakat-on ug dugang bahin niining masanag nga palaaboton.

[Mga hulagway sa panid 4, 5]

Ang mga milagro ni Jesus nagpahayag sa “halangdong gahom sa Diyos”

[Hulagway sa panid 7]

Si Jesus maoy usa ka tawo nga mabination kaayo