Jeova i Wajem Yumi Blong Mekem i Gud Long Yumi
Jeova i Wajem Yumi Blong Mekem i Gud Long Yumi
“Jeova i stap lukluk i go long olgeta ples long wol, nao hem i yusum paoa blong hem blong givhan long olgeta we oli ona long hem long ful hat blong olgeta.”—2 KRON. 16:9, NW.
1. ?From wanem Jeova i stap lukluk yumi?
JEOVA i wan Papa we i stretgud olgeta. Hem i savegud yumi, antap moa “olgeta tingting blong yumi.” (1 Kron. 28:9) Be hem i no lukluk yumi blong traem faenem ol mastik blong yumi. (Sam 11:4; 130:3) Defren olgeta, Hem i wantem tumas blong protektem yumi long enikaen samting we maet i save spolem fasin fren blong yumi wetem hem, mo janis we yumi gat blong kasem laef we i no save finis.—Sam 25:8-10, 12, 13.
2. ?Jeova i yusum paoa blong hem blong givhan long hu?
2 Jeova i gat olgeta paoa mo hem i save luk olgeta man. From samting ya, hem i stap halpem ol man blong hem taem oli singaot i go long hem, mo hem i save givhan long olgeta taem oli kasem traem. Seken Kronikel 16:9 (NW) i talem se: “Jeova i stap lukluk i go long olgeta ples long wol, nao hem i yusum paoa blong hem blong givhan long olgeta we oli ona long hem long ful hat blong olgeta.” Makem se Jeova i yusum paoa blong hem blong givhan long olgeta we oli wosip long hem wetem ful hat, wan hat we i klin mo i tru. Hem i no yusum paoa blong hem blong givhan long olgeta we oli man blong giaman mo oli gat tu fes.—Jos. 7:1, 20, 21, 25; Prov. 1:23-33.
Wokbaot Wetem God
3, 4. ?I minim wanem blong ‘wokbaot wetem God’? ?Mo wanem ol eksampol long Baebol we i halpem yumi blong kasem save samting ya?
3 Plante man oli ting se God we i Wokem olgeta samting we oli stap long heven mo wol, i no save letem ol man oli wokbaot wetem hem. Be hemia nao samting we Jeova i wantem yumi blong mekem. Long taem blong Baebol bifo, Inok mo Noa tufala i ‘wokbaot wetem God.’ (Jen. 5:24, NW; 6:9, NW) Moses i “stap gohed olwe nomo, olsem we i stap luk God ya we man i no save luk long ae blong hem.” (Hib. 11:27) King Deved i haremgud taem hem i wokbaot wetem Papa blong hem long heven. Hem i talem se: “Oltaem . . . [Jeova] i stap wetem mi, i stap klosap long mi, nao i no gat wan samting i save muvum mi.”—Sam 16:8.
4 I tru se yumi no save holem han blong Jeova stret mo wokbaot wetem hem. Be yumi save mekem olsem long sam fasin. ?Olsem wanem yumi save holem han blong God? Man blong raetem Sam hemia Asaf i talem se: “Oltaem mi mi stap klosap long yu, mo yu stap holem mi long han blong mi. Yu yu stap lidim mi long ol toktok blong yu.” (Sam 73:23, 24) Blong talem stret, yumi wokbaot wetem Jeova taem yumi folemgud ol advaes blong hem we yumi kasem long Baebol mo long “slef ya we i stret mo waes.”—Mat. 24:45, NW; 2 Tim. 3:16.
5. ?Olsem wanem Jeova i wajem ol man blong hem olsem wan papa we i gat lav? ?Mo yumi mas harem olsem wanem taem yumi tingbaot Jeova?
5 From we Jeova i laekem tumas olgeta we oli wokbaot wetem hem, hem i stap wajem olgeta, i kea long olgeta, i protektem olgeta mo i tijim olgeta olsem we wan papa i mekem long ol pikinini blong hem. God i talem se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” (Sam 32:8) I gud yumi askem se: ‘?Mi mi save tingbaot mi wan olsem we mi stap holem han blong Jeova, mi wokbaot wetem hem mo mi stap lesin long waes blong hem mo mi save we hem i stap wajem mi? ?From we mi save se hem i stap wajem mi, samting ya i gat paoa long ol tingting, toktok mo wok blong mi? ?Mo taem mi mekem mastik, mi mi luk Jeova olsem wan strenja we fasin blong hem i strong, no mi tingbaot hem olsem wan Papa we i gat lav, i kea mo we i wantem halpem olgeta we oli tanem tingting blong olgeta blong oli frengud wetem Hem?’—Sam 51:17.
6. ?Wanem samting we Jeova i save mekem we i defren olgeta long wan papa long wol ya?
6 Samtaem, Jeova i save givhan long yumi bifo we yumi mekem wan rong samting. Olsem nao, maet hem i luk we hat blong yumi, we i save giaman, i stap wantem wan samting we i no stret. (Jer. 17:9) Long ol taem olsem, hem i save tekem aksen kwiktaem i bitim wan papa long wol ya from we hem i save ‘lukluk’ dip insaed long yumi blong faenemaot ol tingting blong yumi. (Sam 11:4; 139:4; Jer. 17:10) Tingbaot wanem we Jeova i mekem taem hem i luk wan nogud samting i stap gru long tingting blong Baruk we i sekretari mo i gud fren blong Jeremaea.
Wan Gudfala Papa Blong Baruk
7, 8. (a) ?Hu ya Baruk, mo wanem nogud tingting i stap gru long hat blong hem? (b) ?Olsem wanem Jeova i soemaot se hem i tingbaot Baruk olsem wan papa we i tingbaot pikinini blong hem?
7 Baruk i wan nambawan sekretari we i holemstrong long wok blong hem wetem Jeremaea. Wok ya, hemia blong talemaot jajmen blong Jeova long ol man Juda. (Jer. 1:18, 19) Maet Baruk i gruap long wan famle we i gat haenem. Ale, long taem ya we hem i stap wok wetem Jeremaea, i gat wan taem we hem i stat blong lukaot “gudfala laef.” Maet hem i stat wantem kasem haenem no plante gudgudfala samting long laef. Nating se i olsem wanem, Jeova i luk nogud tingting ya we i stap gru long hat blong Baruk. Jeova i yusum Jeremaea blong toktok long Baruk long saed blong denja ya. Hem i talem se: “Yu yu stap talem se, ‘!O, sore tumas long mi! Mi mi stap harem nogud tumas, mo Hae God i mekem mi mi trabol moa. Mi mi krae we mi krae, gogo mi slak olgeta. Mi no save harem gud nating.’” Mo God i talem se: “?Olsem wanem? ?Yu ting se bambae yu kasem gudfala laef, i winim we ol narafala man bambae oli kasem? I nogud yu mekem olsem.”—Jer. 45:1-5.
8 Jeova i no kros taem hem i tok stret long Baruk, be hem i soem se hem i wari long Baruk olsem wan papa. Jeova i luksave we nating se Baruk i wantem tumas wan samting we i save putum laef blong hem long denja, be hemia i no minim we hat blong Baruk tu i nogud. Jeova i save tu we i no longtaem, bambae Jerusalem mo Juda oli lus, taswe hem i no wantem we tingting blong Baruk i foldaon long taem ya. Ale, blong mekem Baruk i no drim blong gat gudfala laef, God i talem bakegen long hem se bambae Hem i “letem bigfala trabol i kam kasem olgeta man,” mo i gohed i talem long Baruk se sipos Baruk i tekem waes desisen, bambae hem i save stap laef. (Jer. 45:5) I olsem we, God i talem se: ‘!Yu tingting gud Baruk! Tingbaot wanem bambae i hapen i no longtaem long Juda mo Jerusalem. Tufala taon ya i fulap long sin. !Yu mas gohed blong obei sipos yu wantem stap laef! Bambae mi mi protektem yu.’ Tok blong Jeova i kasem hat blong Baruk from we Baruk i stretem tingting blong hem mo hem i laef taem oli spolem Jerusalem. Hemia 17 yia biaen.
9. ?Bambae yu yu ansa olsem wanem long ol kwestin we oli stap long paragraf ya?
9 Taem yu stap tingbaot stori blong Baruk, i gud yu tingbaot ol kwestin mo ol vas ya: ?Fasin we God i mekem long Baruk i soemaot wanem long saed blong Jeova mo ol filing we Hem i gat long wan man blong hem? (Ridim Hibrus 12:9.) From we yumi laef long ol las dei, ?yumi save lanem wanem long advaes we God i givim long Baruk mo tingting we Baruk i gat afta we hem i kasem advaes? (Ridim Luk 21:34-36.) Blong folem fasin blong Jeremaea, ?olsem wanem ol Kristin elda oli save soemaot fasin blong Jeova blong tingbaot ol man blong Hem?—Ridim Galesia 6:1.
Pikinini i Soemaot Lav Olsem Papa Blong Hem
10. ?Olsem wanem Jisas i naf blong stap olsem Hed blong Kristin kongregesen?
10 Long ol taem bifo we Jisas i kam long wol, Jeova i yusum ol profet blong hem mo ol narafala man blong hem blong soemaot lav long ol man blong hem. Long taem blong yumi, i klia we Jisas Kraes we i olsem Hed blong Kristin kongregesen, hem nao i soemaot lav ya. (Efes. 1:22, 23) Taswe buk blong Revelesen i tokbaot Jisas olsem wan smol sipsip we i gat “seven hon blong hem mo seven ae blong hem, we ol ae ya blong hem, hemia ol seven spirit ya we God i sanemaot olgeta oli go olbaot long wol.” (Rev. 5:6) Yes, Jisas i fulap wetem tabu spirit blong God, taswe fasin luksave blong hem i stretgud olgeta. Hem tu i save luk wanem i stap long hat blong yumi mo i no gat wan samting we hem i no save luk.
11. ?Wanem wok blong Jisas, mo olsem wanem fasin we hem i mekem long yumi i soemaot fasin blong Papa blong hem?
11 Olsem Jeova, Jisas i no wan polisman we i stap long heven mo i stap wajem yumi. Hem i stap lukluk yumi wetem lav. Wan long ol taetel we Jisas i gat hemia “Papa we bambae i Stap Oltaem.” Taetel ya i mekem yumi tingbaot bakegen wok we Jisas bambae i mekem blong givim laef we i no save finis long ol man we oli soemaot bilif long hem. (Aes. 9:6) Antap moa, from we hem i Hed blong Kristin kongregesen, Kraes i save pulum olgeta we oli bigman long saed blong spirit, speseli ol elda, blong oli leftemap tingting mo givim advaes long olgeta we oli gat nid.—1 Tes. 5:14; 2 Tim. 4:1, 2.
12. (a) ?Ol leta we i go long ol seven kongregesen blong Esia Maena oli soemaot wanem long saed blong Jisas? (b) ?Olsem wanem ol elda oli soemaot fasin blong Jisas long ol sipsip blong God?
12 Long leta we Jisas i sanem i go long ol seven kongregesen blong Esia Maena, hem i soemaot bigfala intres we hem i gat long ol sipsip blong God. (Rev. 2:1–3:22) Long ol leta ya, Jisas i soem we hem i save ol samting we oli stap hapen long ol wanwan kongregesen ya mo hem i tingbaot bigwan ol man blong hem. Ol tok ya blong Jisas oli stret moa long taem blong yumi from we ol vison long Revelesen oli kamtru long “dei ya blong Masta.” * (Rev. 1:10) Plante taem, ol elda long kongregesen we oli mekem wok ya blong lukaot long ol sipsip blong God, oli soemaot lav blong Jisas. Jisas i save pulum ol ‘man ya we oli olsem presen’ blong givhan long ol sipsip long kongregesen, leftemap tingting mo givim advaes long olgeta taem oli nidim. (Efes. 4:8, NW; Wok 20:28; ridim Aesea 32:1, 2.) ?Yu yu tingbaot we traehad ya blong olgeta i soemaot intres we Jisas i gat long yu wan?
Kasem Help Long Stret Taem
13-15. ?Maet God i yusum wanem rod blong ansa long ol prea blong yumi? Givim sam eksampol.
13 ?Yu yu bin prea strong long God blong kasem help mo biaen Hem i ansa long yu, taem hem i sanem wan elda i kam visitim yu? (Jem. 5:14-16) Maet Jeova i yusum wan tok long wan Kristin miting no wan save we yu ridim long wan long ol buk blong yumi blong ansa long prea blong yu. Rod ya nao we Jeova i yusum plante taem blong ansarem ol prea. Wan dei, taem wan elda i finisim tok blong hem, wan sista i kam luk hem. Sam wik bifo long tok, sista ya i bin harem nogud from fasin we narafala i mekem long hem we i no stret. Sista ya i no kam komplen long brata ya from problem blong hem. Defren olgeta, hem i talemaot filing blong hem se hem i laekem tumas ol poen we i kamaot long sam vas we brata i yusum long tok blong hem. Ol poen ya oli stretgud long problem blong hem mo oli leftemap tingting blong hem bigwan. !Hem i glad bigwan from we hem i kam long miting ya!
14 Long saed blong help we yumi kasem tru long prea, tingbaot eksampol blong tri man we oli kasem trutok blong Baebol taem oli stap long kalabus mo biaen oli kam ol pablisa we oli no baptaes. Wan trabol i kamaot we i mekem se oli putum sam rul we i blokem ol presina blong mekem sam samting. Ale, ol presina oli no glad nao oli tok aot agensem ol rul ya. Ol presina oli plan se long nekis dei, afta we oli kakae long moning, bambae oli no givimbak plet blong olgeta. Hemia blong soem se oli agensem ol rul ya. Trifala pablisa ya we oli no baptaes yet, oli stap long wan problem nao. Sipos oli joen wetem ol narafala presina blong agensem ol rul, bambae i olsem we oli no obei long advaes blong Jeova long Rom 13:1. Mo sipos oli no joen, bambae ol narafala presina oli kros mo oli save mekem i strong long trifala.
15 From we trifala i no save toktok stret long trifala, ale, trifala i prea long Jeova blong kasem waes. Long nekis moning, trifala i faenemaot we trifala evriwan i mekem semfala desisen, hemia se trifala bambae i no kakae long moning. Taem gad i kam blong pikimap ol plet, trifala ya i no gat plet blong givim from we trifala i no kakae. !Trifala i glad tumas from we Man blong “harem prea” i stap klosap nomo long trifala!—Sam 65:2, NW.
Tingbaot Fiuja Wetem Fasin No Fraet
16. ?Olsem wanem wok blong prij i soemaot se Jeova i tingbaot ol man we oli olsem sipsip?
16 Wok blong prij long fulwol i wan narafala rod we i soemaot se Jeova i tingbaot ol wanwan man blong hem we oli laef long ol defdefren ples. (Jen. 18:25) Plante taem, Jeova i yusum ol enjel blong hem blong lidim ol man blong hem oli go faenem ol man we oli olsem sipsip, nating se ol man ya oli laef long ol ples we gud nius i no kasem olgeta yet. (Rev. 14:6, 7) Tingbaot Filip, wan man blong talemaot gud nius long faswan handred yia. God i yusum enjel blong lidim Filip i go faenem wan haeman blong Itiopia mo i eksplenem tok blong God long hem. ?Wanem frut i kamaot? Man ya i lesin long gud nius mo i baptaes, i kam wan man blong Jisas. *—Jon 10:14; Wok 8:26-39.
17. ?From wanem yumi no mas wari tumas long saed blong fiuja?
17 Fasin blong laef blong wol ya i stap kam klosap moa long taem we bambae hem i mas lus, taswe ol trabol bambae oli gohed blong kam bigwan moa olsem taem ‘bak blong woman i soa blong i bonem pikinini.’ (Mat. 24:8) Ol trabol ya maet hemia se praes blong kakae i go antap bigwan from we namba blong man i stap kam antap, ol trabol we oli kamaot long weta mo from we ekonomi i godaon. Maet bambae i had blong faenem wok, mo ol wokman oli harem nogud moa from we oli mas wok plante aoa. Nomata wanem samting i hapen, olgeta we oli putum ol wok blong Kingdom fastaem mo oli gat wan ‘ae we i kliagud,’ oli no nid blong wari tumas. Oli save se Jeova i lavem olgeta mo se bambae hem i lukaotgud long olgeta. (Mat. 6:22-34, Nyutesteman wetem Ol Sam long Bislama) Tingbaot samting we Jeova i mekem blong givhan long Jeremaea long taem we Jerusalem i lus long 607 B.K.T. *
18. ?Olsem wanem Jeova i pruvum lav blong hem long Jeremaea long taem we ol ami blong Babilon oli raonem Jerusalem?
18 Long laswan haf blong taem ya we ol ami blong Babilon oli raonem Jerusalem, Jeremaea i stap kalabus long yad blong haos blong king. ?Bambae hem i kasem kakae olsem wanem? Sipos hem i fri, bambae hem i save lukaotem kakae blong hem. Be from we hem i kalabus, hem i dipen bigwan long olgeta we oli stap raonabaot long hem we plante long olgeta oli ol enemi blong hem. Nating se i olsem, Jeremaea i trastem Jeova se bambae Hem i lukaot long hem. ?Olsem wanem? ?Jeova i holem promes we hem i mekem long Jeremaea? !Yes, hem i holem! Jeova i meksua se evridei Jeremaea i kasem “bred . . . gogo i no moa gat bred long taon ya.” (Jer. 37:21) Jeremaea, Baruk, Ebedmelek mo sam narafala, oli laef, nating se oli stap long wan taem we kakae i sot, i gat ol sik mo ol man oli ded tu.—Jer. 38:2; 39:15-18.
19. ?Taem yumi stap tingbaot fiuja wetem fasin no fraet, tingting blong yumi i mas strong blong mekem wanem?
19 Yes, Jeova “i stap lukluk long ol stret man, mo i stap lesin blong harem ol prea blong olgeta.” (1 Pita 3:12) ?Yu yu haremgud we Papa blong yumi long heven i stap wajem yu? ?Yu yu harem sef taem yu save se Jeova i stap lukluk yu blong mekem i gud long yu? Ale, yu mas gat strong tingting blong gohed blong wokbaot wetem God, nomata wanem samting i hapen long fiuja. Yumi save sua se oltaem Jeova bambae i wajem ol man blong hem we oli stap tru long hem, olsem wan papa we i lukaotgud long pikinini blong hem.—Sam 32:8; ridim Aesea 41:13.
[Ol futnot]
^ par. 12 Nating se ol leta ya oli go fastaem long ol tabu brata blong Kraes, be tingting we i stap long ol leta ya i stret tu long ol narafala man blong God.
^ par. 16 Wan narafala eksampol long Ol Wok 16:6-10 i soemaot olsem wanem God i stap lidim yumi. Long vas ya, yumi ridim se ‘tabu spirit i no letem’ Pol mo ol fren blong hem blong oli prij long Esia mo Bitinia. Defren olgeta, hem i lidim olgeta oli go prij long Masedonia, ples we plante man oli lesin long gud nius.
^ par. 17 B.K.T. i minim Bifo Kristin Taem.
?Yu Yu Save Eksplenem?
• ?Olsem wanem yumi soemaot se yumi stap ‘wokbaot wetem God’?
• ?Olsem wanem Jeova i soemaot se hem i lavem Baruk?
• ?Olsem wanem Jisas, we i Hed blong Kristin kongregesen, i soemaot ol fasin olsem Papa blong hem?
• ?Long wanem rod yumi save soemaot se yumi trastem God long taem blong ol las dei ya?
[Kwestin]
[Tok blong pija long pej 13]
Olsem Jeremaea i mekem long Baruk, ol Kristin elda tede oli mas soemaot sem fasin olsem Jeova we i tingbaot ol man blong hem
[Tok blong pija long pej 15]
?Olsem wanem Jeova i halpem yumi long stret taem?