1. Ano an makalilipay nga paglaom han daku nga panon?

NAHUHUNAHUNA mo ba an ngatanan nga kaopayan nga maihahatag ha katawohan ha sulod hin 1,000 ka tuig han usa nga gamhanan nga gobyerno nga an magmarando makatadunganon ngan buotan? An daku nga panon makakaeksperyensya hin makalilipay nga mga hitabo ha tidaraon. Hira an maluluwas ha “daku nga kagol-anan” nga magbubungkag han maraot nga sistema yana.—Pah. 7:9, 14.

2. Ano an naeksperyensyahan han katawohan durante han naglabay nga 6,000 ka tuig?

² Durante han 6,000 ka tuig nga kasaysayan han tawo, an pagin independente ngan pagmando ha kalugaringon nagresulta hin duro nga kasakit ngan pag-antos ha katawohan. Maiha na nga an Biblia nagsiring: “An usa ka tawo may gahum labaw han iba ha iya karaotan.” (Ekles. 8:9) Ano an nahitatabo yana? Labot han mga girra ngan pagrebelde, aada liwat an dagku nga problema sugad han kapobrehan, sakit, kadaot han palibot, pagbag-o han klima, ngan iba pa. An mga opisyal han gobyerno nagpapahamangno nga kon diri kita maghihimo hin dagku nga pagbag-o, maraot gud an magigin resulta.

3. Ano an mahitatabo durante han Usa ka Yukot ka Tuig nga Pagmando?

³ Ha pagmando han Mesianiko nga Hadi nga hi Jesu-Kristo ngan han 144,000 nga iya igkasi-magmarando, hinay-hinay nga ibabalik han Ginhadian han Dios ha maopay nga kahimtang an ngatanan nga kadaot nga ginhimo ha mga tawo ngan ha ira urukyan, an planeta nga Tuna. Durante han Usa ka Yukot ka Tuig nga Pagmando, matutuman na an nakakaliaw nga saad ni Jehova nga Dios: “Ako nagbuhat hin bag-o nga langit ngan hin bag-o nga tuna; ngan an una nga mga butang diri na hinunumdoman, o diri na maabot ha panumdoman.” (Isa. 65:17) Ano an makalilipay nga mga  mahitatabo ha tidaraon? Ha bulig han mga tagna ha Biblia, aton usisahon an urusahon nga mga butang nga “diri nakikita,” o waray pa mahitabo.—2 Kor. 4:18.

4. Ano an kahimtang han mga urukyan han damu nga tawo yana?

⁴ Hin-o an diri naruruyag magkaada kalugaringon nga balay, usa nga lugar diin hiya ngan an iya pamilya maabat nga talwas ngan may kasigurohan? Kondi ha kalibotan yana, makuri an pagkaada kalugaringon nga balay. An mga tawo naghuhuruot ha mga syudad. Damu an nag-iilob pag-ukoy ha mga eskwater o ha daan ngan mahugaw nga mga building. Para ha ira, an pagkaada kalugaringon nga balay tubtob la ha inop.

5, 6. (a) Paonan-o matutuman an Isaias 65:21 ngan Mika 4:4? (b) Ano an sadang naton buhaton basi makarawat ito nga bendisyon?

⁵ Kon an Ginhadian magmamando na ha tuna, an hingyap han ngatanan nga magkaada kalugaringon nga balay matutuman na, kay ini an igintagna ni Isaias: “Hira magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini.” (Isa. 65:21) Kondi an pagkaada kalugaringon nga balay diri la amo an malalaoman. Aw, an pipira yana naukoy ha ira kalugaringon nga balay, an iba ha dagku nga balay o ha mansyon pa ngani. Kondi diri nawawara an ira kabaraka nga mawad-an hin balay tungod han krisis ha ekonomiya o nga sudlon hira hin mga kawatan o iba pa nga kriminal. Mababag-o an ngatanan kon an Ginhadian han Dios na an magmamando! Hi propeta Mika nagsurat: “An tagsa-tagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira.”—Mika 4:4.

⁶ Tungod kay may-ada kita sugad kamakalilipay nga paglaom, ano an sadang naton buhaton? Syempre, kita ngatanan nagkikinahanglan hin balay nga mauukyan. Bisan pa hito, imbes nga mangalimbasog nga magkaada yana han aton ginhihingyap nga balay—bangin mangutang pa ngani hin daku nga kantidad para hito—diri ba maaramon nga magpokus ha saad ni Jehova? Hinumdumi an ginsiring ni Jesus mahitungod ha iya kalugaringon: “An mga garong may-ada mga buho ngan an mga katamsihan ha langit may-ada mga haponan; kondi an Anak han Tawo waray inuulnan han iya ulo.” (Luk. 9:58) Hi Jesus may abilidad ngan gahum ha pagtukod o pagkaada han gimaopayi nga balay. Kay ano nga waray niya ito buhata? Matin-aw nga karuyag ni Jesus likyan an bisan ano nga makakaulang ha iya ha pag-una han Ginhadian ha iya kinabuhi. Mahimo ba naton sundon an iya susbaranan ngan tipigan nga simple an aton mata—ginlilikyan an pagin materyalistiko ngan sobra nga kabaraka ha materyal nga mga butang?—Mat. 6:33, 34.

7. Ano an orihinal nga iginsugo ni Jehova may kalabotan ha relasyon han mga tawo ngan mga hayop?

⁷ Ha mga linarang ni Jehova dinhi ha tuna, an mga tawo an urhi nga iya ginhimo. Iginsumat ni Jehova ha iya Maabtik nga Magburuhat, an iya suhag nga Anak, kon ano an iya katuyoan ha paglarang han mga tawo: “Paghimoon naton an tawo ha aton ladawan, ngan ha aton panagway: ngan hira mamay kagamhanan ha bawbaw han mga isda han dagat, ngan ha bawbaw han katamsihan han mga langit, ngan ha bawbaw han kabakahan, ngan ha bawbaw han bug-os nga tuna, ngan ha bawbaw han ngatanan nga nag-uusoy ha bawbaw han tuna.” (Gen. 1:26) Kon sugad, hira Adan ngan Eva—ngan ha urhi an ngatanan nga tawo—ginsugo nga mangnoan ngan mandoan an ngatanan nga hayop.

8. Ano nga kinaiya han mga hayop an nakikita yana?

⁸ Posible gud ba mamandoan han mga tawo an ngatanan nga hayop ngan murayaw nga makaupod hira? Damu an duok gud ha ira inataman nga mga hayop, sugad han ayam o misay.  Kondi kumusta man an ihalas nga mga hayop? An usa nga report nagsiring: “An mga syentista nga nagkinabuhi nga duok ha ihalas nga mga hayop ngan nag-aram mahitungod ha ira nakaobserbar nga may mga pagbati an ngatanan nga mammal.” Syempre, nakikita naton nga an mga hayop nahahadlok o nagigin mapintas kon gintatarhog, pero may kapas ba hira nga magpakita hin malumo nga pagbati? An report nagsiring liwat: “Ha pagpadaku han ira mga anak iginpapakita han mga mammal an ira pinakamaopay nga kinaiya—an ira daku nga kapas ha pagpakita hin malumo nga pagbati.”

9. Ano nga mga pagbag-o an aton malalaoman ha mga hayop?

⁹ Salit diri kita sadang mahipausa kon nababasa naton ha Biblia nga magkakaada kamurayawan an mga tawo ngan mga hayop. (Basaha an Isaias 11:6-9; 65:25.) Kay ano? Hinumdumi nga han hi Noe ngan an iya pamilya ginawas ha arka katapos han Baha, hi Jehova nagsiring ha ira: “An kahadlok ha iyo ngan an kakulba tungod ha iyo magmaada ha tagsa ka mananap han tuna.” Damu nga hayop an napalagiw ha mga tawo basi panalipdan an ira kalugaringon. (Gen. 9:2, 3) Diri ba maiibanan ni Jehova ito nga kahadlok ha tawo basi matuman an iya iginsugo ha tinikangan? (Hos. 2:18) Makalilipay gud an magigin tidaraon han ngatanan nga matatalwas basi magkinabuhi dinhi ha tuna hito nga panahon!

10. Kay ano nga nagtatangis an mga tawo?

¹⁰ Han nakita ni Salomon an ‘ngatanan nga pagtalumpigos nga ginbuhat ha sirong han adlaw,’ hiya masurub-on nga nagsiring: “Kitaa, an mga luha hito nga gintatalumpigos, ngan hira waray maglilipay.” (Ekles. 4:1) Sugad hito an kahimtang yana, o mas maraot pa ngani. Hin-o ha aton an waray pa magtangis ha anoman nga hinungdan? Oo, may mga panahon nga bangin nagtatangis kita tungod han kalipay. Kondi kasagaran na nga nagtatangis kita tungod han duro nga kasubo.

11. Ano nga asoy ha Biblia an nakakabantad gud ha imo?

¹¹ Hunahunaa an damu nga makapabantad ngan makatarangis nga mga hitabo nga aton nababasa ha Biblia. Han namatay hi Sara ha edad nga 127 anyos, “hi Abraham inabot basi makapanhayhay, ngan makagtinuok kan Sara.” (Gen. 23:1, 2) Han nagsarit hi Noemi ha iya duha nga umagad nga balo, “ira inalsa an ira tingog, ngan nanuok.” Ngan han nakiistorya pa hi Noemi ha ira, “inalsa nira an ira tingog, ngan nanuok [na] liwat.” (Rut 1:9, 14) Han hi Hadi Hesekia nagkaada grabe nga sakit ngan baga hin mamamatay na, nag-ampo hiya ha Dios ngan “nagtuok hinduro,” ngan nalooy ha iya hi Jehova. (2 Hadi 20:1-5) Ngan hin-o an diri nababantad han asoy mahitungod han paglirong ni apostol Pedro kan Jesus? Han nabatian ni Pedro an tugaok han manok, hiya “ginawas, ngan nagtinuok hin mapait.”—Mat. 26:75.

12. Paonan-o an Usa ka Yukot ka Tuig nga Pagmando magriresulta hin tinuod nga katalwasan ha katawohan?

¹² Tungod han makasurubo nga mga nahitatabo ha mga tawo, gudtiay man ito o dagku, an katawohan nagkikinahanglan gud hin pagliaw ngan katalwasan. Durante han Usa ka Yukot ka Tuig nga Pagmando, ini an mahitatabo ha katawohan: “Pagpapahiron [han Dios] an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasákit pa gud.” (Pah. 21:4) Makalilipay hunahunaon nga mawawara na an kabidoan, pagtangis, ngan kasákit, kondi mas makalilipay an saad han Dios nga wawad-on niya an ultimo nga kaaway han katawohan—an kamatayon. Paonan-o ito mahitatabo?

13. Tikang nga nakasala hi Adan, paonan-o an mga tawo naapektohan han kamatayon?

¹³ Tikang nga nakasala hi Adan, an kamatayon nagmando ha katawohan sugad hin hadi. Usa ito nga kaaway nga waray nakakapirde. Waray makasasala nga tawo nga nakakalikay hito,  ngan nagigin hinungdan ito han duro nga kasubo ngan kabidoan. (Roma 5:12, 14) Ha pagkamatuod, “tungod ha kahadlok ha kamatayon,” minilyon an ‘nagpasakop ha pagkabihag ha bug-os nira nga kinabuhi.’—Heb. 2:15.

14. Ano an magigin resulta kon waray na kamatayon?

¹⁴ Gin-uunabi han Biblia an panahon nga ‘pagwawad-on na an kataposan nga kaaway, an kamatayon.’ (1 Kor. 15:26) Duha nga grupo an magkakaada paglaom nga makapahimulos hito. An daku nga panon nga buhi yana posible nga makatalwas ngadto ha bag-o nga kalibotan ngan may paglaom nga mabuhi ha waray kataposan. Ngan an binilyon nga nagkamatay na posible liwat nga banhawon. Nahuhunahuna mo ba an duro nga kalipay kon tapoon na han daku nga panon an mga binanhaw? An pag-usisa hin maopay han pipira nga asoy han pagkabanhaw nga nakarekord ha Biblia naghahatag ha aton hin ideya kon ano an mahimo mahitabo kon banhawon na an mga patay.—Basaha an Markos 5:38-42; Lukas 7:11-17.

15. Ano an bangin magin reaksyon mo kon makita mo an usa nga imo hinigugma nga nabanhaw na?

¹⁵ Hunahunaa an mga pulong nga “nanhipausa hira ha daku nga paghipausa” ngan “ira ginhimaya an Dios.” Kon nakadto ka hito nga mga higayon, bangin ito liwat an imo gin-abat. Oo, malilipay gud kita kon makita na naton an aton namatay nga mga hinigugma nga nabanhaw. Urusahon gud ito! Hi Jesus nagsiring: “Maabot an oras nga an ngatanan, nga aadto ha mga lubnganan, makakabati han iya tingog. Ngan . . . man-gugowa.” (Juan 5:28, 29) Waray ha aton nakakita hin sugad hito nga hitabo; sigurado nga usa ito han pinakamaopay ha “mga butang nga diri nakikita.”

16. (a) Kay ano nga kinahanglan madasigon nga ig-istorya naton an mga bendisyon ha tidaraon? (b) Ano an ginsiring ni Pablo basi dasigon an mga Kristiano ha Korinto?

¹⁶ Oo, makalilipay gud an tidaraon han ngatanan nga nagpapabilin nga matinumanon kan Jehova hinin makuri  nga mga panahon! Bisan kon diri pa naton naieksperyensyahan ito nga mga bendisyon, an pirme paghunahuna hito mabulig ha aton nga magpokus ha kon ano gud an importante ngan diri magpaulang ha mga butang hini nga kalibotan. (Luk. 21:34; 1 Tim. 6:17-19) Durante han pagsingba han pamilya, ha pakiistorya ha kabugtoan, ngan ha pakighisgot ha aton mga Bible study ngan mga interesado, madasigon nga ig-istorya naton an aton makalilipay nga paglaom. Mabulig ini ha aton nga matipigan nga matin-aw ha aton hunahuna ngan kasingkasing ini nga paglaom. Ito gud an ginbuhat ni apostol Pablo han iya gindasig an iya mga igkasi-Kristiano. Ginbuligan niya hira nga hunahunaon an mga mahitatabo ha kataposan han Usa ka Yukot ka Tuig nga Pagmando ni Kristo. Hunahunaa an bug-os nga kahulogan han ginsiring ni Pablo ha 1 Korinto 15:24, 25, 28.—Basaha.

17, 18. (a) Ha ano nga paagi hi Jehova “an ngatanan ha ngatanan” ha tinikangan han kasaysayan han tawo? (b) Ano an bubuhaton ni Jesus basi maibalik an kamurayawan ngan pagkaurosa?

¹⁷ Waray na mas maopay pa nga pagsaysay han magigin kinabuhi ha kataposan han usa ka yukot ka tuig kay han mga pulong nga “basi nga an Dios magin an ngatanan ha ngatanan.” Ano an iginpapasabot hito? Hinumdumi an kahimtang hadto ha Eden han an hingpit nga mga tawo nga hira Adan ngan Eva bahin pa han mamurayawon ngan nagkakaurosa nga pamilya ni Jehova ha bug-os nga uniberso. Hi Jehova, an Soberano han Uniberso, direkta nga nagmando ha ngatanan nga iya linarang, ha mga anghel ngan ha mga tawo. Nakakaistorya nira hi Jehova, nakakagsingba ha iya, ngan nakakakarawat han iya bendisyon. Hiya “an ngatanan ha ngatanan.”

¹⁸ Nawara iton murayaw nga relasyon han gin-impluwensyahan ni Satanas an mga tawo nga magrebelde kan Jehova. Kondi tikang han 1914, an Mesianiko nga Ginhadian padayon nga naghihimo hin mga paagi basi maibalik ito nga kamurayawan ngan pagkaurosa. (Efe. 1:9, 10) Durante han Usa ka Yukot ka Tuig nga Pagmando, an makalilipay nga mga butang nga “diri nakikita” matutuman na. Katapos, maabot “an kataposan,” karuyag sidngon, an kataposan han Usa ka Yukot ka Tuig nga Pagmando ni Kristo. Ano an mahitatabo hito nga panahon? Bisan kon an “ngatanan nga kagamhanan . . . ha langit ngan ha tuna” iginhatag kan Jesus, diri hiya ambisyoso. Diri niya karuyag agawon an posisyon ni Jehova. Mapainubsanon nga ‘itutubyan niya an ginhadian ngadto ha Dios nga Amay.’ Oo, pirme niya ginagamit an iya espesyal nga katungdanan ngan awtoridad para “ha himaya han Dios.”—Mat. 28:18; Fil. 2:9-11.

19, 20. (a) Paonan-o ipapakita han ngatanan nga sakop han Ginhadian nga ginkakarawat nira an pagkasoberano ni Jehova? (b) Ano nga makalilipay nga mga butang an aton mapapahimulsan ha tidaraon?

¹⁹ Hito nga panahon, hingpit na an mga sakop han Ginhadian dinhi ha tuna. Susundon nira an susbaranan ni Jesus ngan mapainubsanon ngan malipayon nga kikilalahon an pagkasoberano ni Jehova. Magkakaada hira higayon nga ipakita nga karuyag nira buhaton ito pinaagi han paglampos ha ultimo nga pagsari. (Pah. 20:7-10) Katapos hito, an ngatanan nga rebelde—mga tawo ngan mga anghel—bubungkagon na ha kadayonan. Makalilipay gud ito nga panahon! An pamilya ni Jehova ha bug-os nga uniberso malipayon nga magdadayaw ha iya. Ngan hi Jehova magigin “an ngatanan ha ngatanan.”—Basaha an Salmo 99:1-3.

²⁰ An makalilipay ba nga mga butang nga bubuhaton han Ginhadian ha tidaraon magpapagios ha imo nga isentro an imo atensyon ngan pangalimbasog ha pagbuhat han kaburut-on han Dios? Sisiguruhon mo ba nga diri ka maisimang han buwa nga paglaom ngan pagliaw nga igintatanyag han kalibotan ni Satanas? Paparig-unon mo ba an imo determinasyon nga sumuporta ngan dumapig ha pagkasoberano ni Jehova? Hinaot makita ha imo mga buhat nga ito an imo karuyag buhaton ha waray kataposan. Pinaagi hito makakapribilehiyo ka nga magpahimulos hin kamurayawan ngan kahuraan ha usa ka yukot ka tuig—ngan ha kadayonan!