Miteko sa arummwa 9:1-43
9 Saulo, yoowo nlelo aawoopopiha ni aarino yootthuna yoowiiva atthareli Aapwiya, aarowa wa mutokweene aanamakeya.
2 Ni aavekela ikaarta soowoonihera asitokweene a musinakooka a oDamasku weera aaphwanya vale atthu ootheene, alopwana naari athiyana yaatthara Ephiro ya Yesu, aatthuke ni aaroihe oYerusalemu.
3 Ariki weetta hiihaale ekwaha awe, aattamelaka oDamasku, mootutuxera, waakhumelela waara waakhuma wiirimu ommwaleelaka yoowo,
4 ni owo aamoorela vathi ni aahiiwa nsu naamweerela: “Saulo, Saulo, mwaha wa heeni munkittharattharaanyu?”
5 Ni owo aakoha: “Nyuwo taani Apwiya?” Owo aahaakhula: “Miyo Yesu, yoowo mummuttharattharaanyu.
6 Vano nvinye, murowe* osidade, ni iwo munooleeliwa etthu yoopaka.”
7 Ni asilopwana yeetta mukwaha vamoha nuuwo yaaheemela owummaleene owanoni, mweekhaikhai, awo yaahiiwa nsu nno mene khayaawenre omoona mutthu.
8 Saulo aavinya vathi, ni, nnaamweera aawenre ohula maitho, khaawera woona etthu. Nto, atthu aaraaweno yaamukuxa envarelaka ntata mpaka oDamasku.
9 Ni mpuwa mwa mahiku mararu, khaawera woona etthu, khaatxiiye naari khaawunre etthu.
10 Odamasku, aakhala mutthareli mmoha iitthaniwa Ananiya, ni Apwiya yaahuuluma nuuwo moorweela mwa yoowooniheriwa: “Ananiya!” Owo aahaakhula: “Miyo kiri va, Apwiya.”
11 Apwiya yaamweerela: “Mwiireherere ni murowe ephiro ya* moono Woolopwana. Empa ya Yuda, mwamwaasaase mulopwana oniitthaniwa Saulo, a oTarso, woona weera, vaava nnuulumaahu va, owo onoovekela,
12 ni, moowooniheriwani, aamoona mulopwana mmoha iitthaniwa Ananiya, avolowaka ni amwiiyaatheraka matata awe owo weera atthikele woona.”
13 Menento, Ananiya aahaakhula: “Apwiya, koowiiwa atthu antxipale emuulumaka mulopwana owo ni itthu sintxipale soonanara aapakenlaawe atthareli anyu oYerusalemu.
14 Ni oDamasku nno, owo oovahiwa owera ni asitokweene aanamakeya weera aatthuke* atthu ootheene enromola nsina nanyu.”
15 Menento, Apwiya yaamweerela: “Murowe, mwaha wooweera mulopwana owo koomuthanla weera aalaleere atthu nsina naka, a maloko ootheene waahela mpuwa mamwene ni ana a Israeli.
16 Woona weera miyo kinoomoonihera itthu sootheene onkelaawe ohaawa mwaha wa nsina naka.”
17 Vano, Ananiya aarowa, ni aavolowa mpaani, ni aamwiiyaathera matata Saulo, ni aamweerela: “Munna Saulo, Apwiya Yesu yookhumelenleni mmuseweni nwaaka, erookirumiha weera mutthikele woona ni musareye munepa wootteela.”
18 Moowaakuveya yaamora mmaithoni mwawe etthu yaalikana ni makampa, ni owo aatthikela woona. Vano, owo aavinya ni aarowa opatisiwa,
19 aahootxa ni aalipa mmakhuvani.
Saulo aakhala mahiku vakhaaniini ni atthareli a oDamasku,
20 ni moohipisa, aapatxera olaleya musinakooka woohima sa Yesu, weera Yesu aari Mwaana a Muluku.
21 Mene atthu ootheene yaamwiiwa, yannakhala oovalavela, ni yanneera: “Mulopwana ola, khaiyene ti yoola oYerusalemu, aattharatthara moowumma murima ale yaaromola nsina nno? Khaiyene owiiye nno ni yootthuna weera aatthuke* atthareli ni waaroiha wa asitokweene aanamakeya?”
22 Menento Saulo, annavirelela okhala oolipa ni annaahiya ayuda yaakhala oDamasku oovalavele ene, mwaha wooweera annoonihera nnene weera Yesu aari Kristu.
23 Vano, evirakaru mahiku mantxipale, ayuda yaalaihana weera emwiive.
24 Mwa yeeyo, Saulo aamusuwela palano owo. Awosa-tho, yannaweha-weha milako, othana ni ohiyu, ni yootthuna weera emwiive.
25 Moottharelana, atthareli awe, yaamuhela mmuttankani enamukuruxela vaxanelani ya exiri, noohiyu.
26 Aphiyakaru oYerusalemu, owo aaheerera wiitakansera ni atthareli, menento ootheene yannamoova, mwaha wooweera khayaaroromela weera owo aari mutthareli.
27 Vano, Barnaba aahoowa omukuxa ni anamuroiha wa arummwa. Ni owo, aahaaleela moota Saulo aawonnaawe Apwiya mmuseweni, moota Apwiya yuulummaaya nuuwo ni moota aalaleñyaawe moolipa murima nsina na Yesu oDamasku.
28 Avinyaka, Saulo aavirelela okhala naawo ni anneetta* mootaphuwa oYerusalemu, ni annalaleya moolipa murima nsina na Apwiya.
29 Owo annuuluma ni annavaanyihana ni ayuda yuuluma ekereku, menento awo yanneerera omwiiva.
30 Mene asinna yoonelelakaru eyo, yaamukuxa mpaka oKesareya, ni yaamurumiha oTarso.
31 Vano, atthareli a muloko wootheene wa oYudeya, oGalileya ni wa oSamariya, yaakhalano murettele ni olipihiwa. Ni mwaha woomoova Yehova* ni olipihiwa ni munepa wootteela, yannaatxeerereya.
32 Woona weera Pedru anneetteetta muttetthe wootheene, owo aarowa waaxekura asinna oororomeleya yaakhala oLida.
33 Weiwo yamphwanya mulopwana mmoha iitthaniwa Eneya, yoowo aavirinhe iyaakha 8 ahivinyaka vakaamani mwaha wooweera aari oorakala.
34 Pedru aamwerela: “Eneya, Yesu Kristu onnoolamihani. Nvinye ni mureherere ekaama anyu.” Owo aavinya moowaakuveya.
35 Emaara atthu ootheene yaakhala oLida ni oSaroni yaamonnaaya, yaakhala atthareli Aapwiya.
36 Muttetthe wa oYope, aakhala mutthareli mmoha muthiyana iitthaniwa Tabita, nenno nintaphulela Dorka.* Owo annapaka itthu sintxipale sooreera ni annaakhavihera alipa oohaawa.
37 Mahiku ene yaale, owo aavoreiwa ni aahookhwa. Murutthu awe waarapihiwa onarowa ohiiwa nipuro na* empa ya osulu.
38 Woona weera muttetthe wa oLida waarimwaattamela muttetthe wa oYope, weiwo Pedru aaraawewo. Esuwelaka weera Pedru aari esidade ele, atthareli yaahaarumiha asilopwana eeli ni masu ooweera: “Txontte, nwe nno moowaakuveya.”
39 Nto mwaha wa yeeyo, Pedru aahiireherera anarowa vamoha naawo. Aphiyakaru, aakuxeriwa esaala ya nipuro na osulu na empa, ni asinaamukhweli ootheene yaamurukurera. Awo yanninla ni yannamoonihera ikuwo* Dorka aattotthenlaawe areene mukumi.
40 Pedru aavekela weera atthu ootheene ekhumele vaate ni akokhoraka, aavekela, avinyaka aaweha murutthu ni aaheera: “Tabita, nvinye!” Dorka aahula maitho, amoonakaru Pedru, aakilaathi.
41 Anvarelaka ntata owo anvinxa, aawiitthana atthareli ni asinaamukhweli asithiyana, ni aawoonihera Tabita mukumi.
42 Atthu ootheene a esidade ya oYope yaasuwela eyo, ni antxipale yaakhala atthareli Aapwiya.
43 Ni Pedru aakhala mahiku mantxipale oYope, vaate va mulopwana mmoha naxapala iitthaniwa Simoni.
Footnotes
^ Naari: “nvolowe.”
^ Naari: “eniitthaniwa.”
^ Naari: “aatthuke ni ekorenti.”
^ Naari: “aatthuke ni ekorenti.”
^ Ni Ekereku: “annavolowa ni annakhuma.”
^ Nsina nna nooweera Tabita ni eramaiku ni ekereku nri Dorka nrinono yootaphulela emoharu yooweera “Naahe.”
^ Naari: “esaala ya.”
^ Naari: “soowara savasulu, yaaphitaanyalaaya.”
