Miteko sa arummwa 16:1-40
16 Vano, Paulo aaphiya oDerbe ni oListra. Iwo aakhala mutthareli mmoha iitthaniwa Timotiyu, ameyawe yaari muthiyana mmoha muyuda oororomela, mene apapawe yaari mukereku,
2 ni asinna a oListra ni wIkoniyu, yannamuuluma nnene Timotiyu.
3 Paulo annatthuna vantxipale omukuxa Timotiyu weera eettekeno vamoha mmukwahani mwawe, ni aamwiinela mwaha wa ayuda a muttetthe ole, woona weera atthu ootheene yaasuwela weera apapawe yaari mukereku.
4 Emaara Paulo vamoha ni atthu aaraaweno yeettaaya yeele eri esidade, yannaaleela asinna eri esidade eyo yoothanla epakinwe ni arummwa ni asitokweene a oYerusalemu, weera yeetteleke yoothanla eyo.
5 Vano, atthu a mmulokoni yannatepa olipihiwa nroromelo naya, ni nenne nri nihiku, atthu yannaatxeerereya.
6 Avinyaka, awo yaavira oFrisia ni mittetthe sa wAgalata, woona weera munepa wootteela waahaakhoottihera olaleya masu a Muluku eprovinsiya ya wAsia.
7 Opwaha mwa yeeyo, ephiyakaru oMisia, yaaheerera orowa oBitinia, mene munepa wa Yesu khawaawaakhulenle orowa iwo.*
8 Yaavira oMisia enarowa oTrowade.
9 Ohiyu, Paulo aakhalano yoowooniheriwa: mmasedonia mmoha eemenleene ni amutxonttelaka: “Nwe oMasedonia, ni munikhavihere.”
10 Paulo akhalakanoru yoowooniheriwa ele, naaheerera orowa oMasedonia nuupuwelaka weera Muluku aaniitthanenle oMasedonia weera naalaleere mitthenka sooreera atthu a weiwo.
11 Vano, oTrowade nanwela paarku nrowaka oSamotrasiya, mene, nihiku naattharelana, naarowa oNeapoli.
12 Nikhumaka iwo, naarowa oFilipe esidade etokweene ya muttetthe wa oMasedonia, yaalamuleliwa ni aroma ni naakhala esidade eyo mahiku vakhaaniini.
13 Nihiku na esaabadu, naakhumela vaate va esidade nnarowa muxerexere mwa mooloko, weiwo naawehereraahu weera namphwanya nipuro noopaka nivekelo. Naakilaathi nnapatxera otthekula woohima sa masu a Muluku ni asithiyana yaathukumanne nipuro nne.
14 Mmoha a asithiyana awo iiwa masu ale: iitthaniwa Lidia, aari namatumiha a ikuwo sooxeera, a esidade ya oTiyatira ni annamukokhorela Muluku. Ni Yehova* aahula murima awe weera iiwexexe ele Paulo aahimaawe.
15 Apatisiwakaru owo vamoha ni atthu oowannyawe, owo aanivekela eeraka: “Muupuwelaka* weera miyo kinnamuroromela Yehova,* nwe mukhaleke owannyaka.” Ni annyesereriha orowa iwo.
16 Nihiku nimoha, nrowaka nipuro na nivekelo, aahoowa okumana ni hiyo kaporo mmoha muthiyana aarino munepa woonanara, aani, demooniyu aatthoma itthu saakela weereya muhoolo. Kaporo ola annaawiniha vantxipale asipwiya awe mwaha woohima itthu saakela weereya muhoolo.
17 Mene musimwali ola annamutthara Paulo ni hiyo, ni annakhuwela eeraka: “Asilopwana ala akaporo a Muluku Namusulu ni enoolaleerani ephiro ya ovuluwa.”
18 Musimwali ole aapaka eyo mahiku mantxipale. Nto Paulo aakhulumuwa oweha etthu ele, aarukunuwa ni aaheerela munepa woonanara:* “Kinnoolamulani mwa nsina na Yesu Kristu mmuhiye musimwali ola.” Munepa ole waakhuma moowaakuveya.
19 Esuwelakaru weera moota aya woowina woomala, asipwiya a musimwali ole yanvara Paulo ni Sila ni yaahaapurulela mapuro oowaattiwa* a esidade mpaka ohoolo wa asitokweene.
20 Yaahaaroiha wa asitokweene a esidade ni yaaheera: “Asilopwana ala enookumihera munyakunyaku esidade ahu. Ni alasa ayuda
21 ni ennaxuttiha sookhovelela nihintthuniheriwaahu* hiyo aroma waakhulela naari opaka.”
22 Ni muloko wootheene wa atthu waahaarukunuwela. Nto, asitokweene a esidade yaahaarula ikuwo saya ni yaaruma weera yeepetthiwe ni mirepettho.
23 Yaamanakaru vantxipale, yaahaaroiha okateya ni yanvekela kwaarta weera aawehaweheke nnene sene.
24 Avahiwakaru nlamulo nna, aahaaroiha mpuwa mwa ekateya ni aahaatthuka metto saya vakhukuluni.
25 Menento, ohiyu eriyari Paulo ni Sila yeera evekelaka ni envuwihaka Muluku ni itxipo, ni atthu yaatthukinwe yannawiiwa.
26 Mootutuxera, waakhumelela ottikinyeya otokweene wa etthaya mpaka ottikinyeya aliserse a ekateya. Etempu ene yeele, milako sootheene sa okateya saahuleya ni ikorenti sa* atthu ootheene yaatthukinwe saataphuwa.*
27 Kwaarta a okateya avinyakaru aahoona weera milako sa mukateya saahuleya, nto aathulula ekatana awe, antthuna wiisiiva uupuwelaka weera atthu yaatthukinwe aatthawa.
28 Mene Paulo, aakhuwela eeraka: “Hooye muhiisiive woona weera ootheene hiyo nri va!”
29 Vano, owo aavekela weera awiiheriwe muthuko, aavolowa atthimakaka athukumelaka ni aakokhora ohoolo wa Paulo ni Sila.
30 Owo aahaakuxa anaakumihera vaate ni aahaakoha: “Asitokweene kipakeke eheeni weera kivuluxiwe?”
31 Awosa yaamwaakhula: “Mwaaroromele Apwiya Yesu, mweera haawo munoovuluwa nyuwo vamoha ni atthu a vatthokoni vanyu.”
32 Yaamulaleera owo masu a Yehova* vamoha ni atthu ootheene a vatthokoni vawe.
33 Ewoora ya ohiyu ene yoole, owo aamukuxa Paulo ni Sila anarowa orapiha makhwatta aya. Vano, moohipisa, owo vamoha ni atthu ootheene a vatthokoni vawe yaapatisiwa.
34 Owo aahaaroiha owannyawe ni aahaavaha yootxa, ni owo vamoha ni atthu a etthoko awe yaahakalala vantxipale mwaha woomuroromela Muluku.
35 Vaxaakaru, asitokweene a esidade yaahaarumiha arumeyi weera yamuleele kwaarta weera: “Aataphule asilopwana ale.”
36 Kwaarta aamuleela masu ala Paulo ni aaheera: “Asitokweene a esidade aalamulela weera nyuwosa ooweeli mutaphuliwe. Vanonto mukhumeke ni murooke ni murettele.”
37 Menento Paulo, aaweerelasa: “Nnaamweera nreene aroma, awosa aaniwaxula vaatthuni ehinithorinhe* ni aaniwalela mukateya. Nto vano ennitaphula musiirini? Hooye! Ewe awo asineene aya enikumihe.”
38 Makwaarta yaahaaleela asitokweene a esidade masu ale. Awosa yaahoova vantxipale esuwelakaru weera asilopwana ale yaari aroma.
39 Vano, asitokweene a esidade yaarowa okumana ni Paulo ni Sila, ni yaahaavekela weera yaalevelele, avinyaka, yaahaakuxa mpaka vaate va esidade, ni yaahaavekela weera ekhume esidade ele.
40 Mwa yeeyo, Paulo ni Sila etaphuliwakaru* yaarowa owannyawe Lidia. Ewoonakaru asinna, yaahaalipiha vantxipale. Avinyaka yaakhuma esidade ele.
Footnotes
^ Naari: “opaka eyo.”
^ Naari: “Moonaka.”
^ Munepa onhimmwa va, onhimmwa munepa wanvanre muthiyana ole wootthoma itthu saakela weereya muhoolo.
^ Mapuro sintumihiwaayavo naari sinthummwaayavo itthu nave-tho sinnapakiwa mithukumano mapuro ene yaawo.
^ Naari: “nihinaakhuleliwaahu.”
^ Naari: “onyooro wa.”
^ Naari: “saakwaseya.”
^ Naari: “ehitthanre nlamulo.”
^ Naari: “ekhumakaru okateya.”
