Miteko sa arummwa 8:1-40
8 Saulo, aahaakhulela wiiviwa wa Estefano.
Okhuma nihiku nne, waapatxera ottharatthariwa muloko wa oYerusalemu, ni atthu ootheene yaamwaramwareleya mittetthe sa oYudeya ni oSamariya, yaahanle atthareli paahi.
2 Vano, alopwana yaamukokhorela Muluku yaamukuxa Estefano enarowa onvitha, ni yaamwinlela vantxipale.
3 Menento, Saulo aapatxera ottharatthara miloko. Ni avolowaka empa ni empa, annaapurulela vaate alopwana ni athiyana aaroihaka okateya.
4 Mene, atthareli ale yaamwaramwareñye, yannalaleya mitthenka sooreera sa masu a Muluku mittetthe yaatthawenlaaya.
5 Filipe aakela esidade* ya oSamariya, ni aapatxera waalaleera atthu a weiwo woohima sa Kristu.
6 Vano, muloko mutokotoko wa atthu, wannareya maaru* ele Filipe aahimaawe yanniiwelela ni yannoona miiriira owo aapakaawe.
7 Atthu antxipale yaakhanleno minepa soonanara, ni iyo sannakhuwela ni sannaahiya atthu awo. Opwaha mwa yeeyo, atthu antxipale yaari oorakala ni ootuthunya, yaalamihiwa.
8 Nto mwaha wa yeeyo, esidade ele atthu yaatteeliwa murima vantxipale.
9 Ni esidade ele, aakhala mulopwana mmoha iitthaniwa Simoni, yoowo okhuma khalayi, aapaka maxitta. Ni aahaatikhiniha atthu a oSamariya, mwaha woowiihima okhala mutokweene.
10 Atthu ootheene ovinyera anamwane mpaka asitokweene, yannamwiiwelela ehimaka weera: “Owera otokotoko wa Muluku, ori ni mulopwana ola.”
11 Yannamwiiwelela mwaha wooweera ovinyera khalayi annaatikhiniha ni maxitta aapakaawe.
12 Nnaamweera vareene hiiho, yaamuroromela Filipe emaara yeeyo aalalenraawe mitthenka sooreera woohima sa Omwene wa Muluku, ni nsina na Yesu Kristu. Nave alopwana ni athiyana yaapatisiwa.
13 Simoni-tho aakhalano nroromelo,* apatisiwakaru, aavirelela okhala ni Filipe. Ni annatikhina miteko ni miiriira sootikhiniha Filipe aapakaawe.
14 Vaavo arummwa yaari oYerusalemu yiiwalaaya weera atthu a oSamariya yaahaakhulela masu a Muluku, yaahaarumihela Pedru ni Yohani,
15 ni awosa yaarowa oSamariya, yaahaavekelela atthu a oSamariya iwo weera yaakhele munepa wootteela.
16 Okhala weera nlelo khaavo a yaawo aakhenle munepa wootteela, menento awo yaarimweera opatisiwa paahi mwa nsina na Apwiya Yesu.
17 Vano awosa yaawiiyaathera matata, ni awo yaapatxera waakhela munepa wootteela.
18 Vaavo Simoni onnaawe weera atthu yaakhela munepa wootteela mwaha woowiiyaatheriwa matata ni arummwa, owo aahaavaha musurukhu,
19 eeraka: “Mukivahe miyo-tho owera iwo, weera ootheene ole kineeraaka kimwiiyaathere matata aka, aakheleke munepa wootteela.”
20 Menento, Pedru aamweerela: “Eparatha anyu, yuntte ni nyuwo, mwaha wooweera mohuupuwela weera mwaamwaakhela yoovaha ya Muluku* mutxentxanihaka ni musurukhu.
21 Nyuwo khamumphwanela ovara muteko ola vamoha ni hiyo, mwaha wooweera murima anyu khaiyene wa exariya vamaithoni va Muluku.
22 Tivawonto, mutxentxe muupuwelo anyu owo woonanara, mmutxonttele Yehova* weera wawereya alevelele soowuupuwela soonanara sa murima anyu,
23 ni miyo kinoona weera nyuwo mwa murette woohapala, ni mwa kaporo a ohixariya.”
24 Simoni aawaakhula aweerelaka: “Munvekele Yehova* mwaha wa miyo, weera ehikhale etthu mwa seiya muhimmaanyu eneera ekeereele.”
25 Nto, emalihakaru ohelela onamoona woomalela ni wuuluma masu a Yehova,* yaatthikela oYerusalemu elaleyaka mitthenka sooreera mittetthe sa asamariya.
26 Menento nlaika na Yehova* naamweerela Filipe: “Mwiireherere, murowe ohitto ephiro yeeyo enrowa oYerusalemu mpaka oGaza.” (ela ephiro ya onikareni.)
27 Mwa yeeyo, owo aahiireherera, aavinya* ni amphwanya mulopwana mmoha* yoowo aari mutokweene a ekuvernu ya pwiyamwene Kandasi a wEtiyopiya, owo-tho annakosoopa muhakhu wa pwiyamwene. Mulopwana owo, aakenle oYerusalemu weera amukokhorele Muluku,
28 emaara aatthikaawe, akilantheene mukaaroni mwawe, annasoma ni nsu noowiiwanyeya eroolu ya profeta Yesaya.
29 Moottharelana munepa wootteela waamweerela Filipe: “Murowe, ni mwaattamele ekaaro eyo.”
30 Filipe aatthimakela ekaaro ele eemela vakhiviru vaya anamwiiwa mulopwana ole asomaka eroolu ya profeta Yesaya ni nsu noowiiwanyeya. Nto Filipe aamukoha: “Munniiwexexa etthu munsomaanyu?”
31 Owo aamwaakhula: “Mweekhaikhai, kinkela wiiwexexa hayi ahikhanle mutthu onkitaphulela?” Ni anvekela Filipe weera awele mukaaroni ni akilaathi vamoha nuuwo.
32 Yoolepa owo aasomaawe ni masu oowiiwanyeya, tiila: “Ntoko mwaaputtiputthi onroihiwa wiiviwa, ni ntoko mwaaputtiputthi ohoolo wa ole ommettha, owo khahunle eyano awe.
33 Moowuulihihiwani mwawe muru, owo khathorihinwe mwa exariya. Taani onkela osuwela nloko onkhumaawe? Nto ekumi awe enkela omalihiwa valaponi.”
34 Vano, mulopwana ole aamweerela Filipe: “Txontte, mukileele: Profeta heeni onhimmwa va? Oniihima mwaneene naari ommuhima mutthu mukina?”
35 Filipe aapatxera wuuluma, ni moovarihana ni Yoolepa ele, aamulaleera mitthenka sooreera woohima sa Yesu.
36 Evirelelaka weetta mmuseweni, yaaphiya nipuro naari maahi, vano mulopwana ole aamweerela Filipe: “Nkoonani, maahi ala va! Eheeni enkootxeeliha miyo opatisiwa?”
37 * ——
38 Mulopwana ole aaheemexa ekaaro ele, Filipe vamoha nuuwo yaakhuruwa enakela mmaahini; ni Filipe ampatisa.
39 Ekhumakaru mmaahini, moowaakuveya munepa wootteela wa Yehova* wanvenxa Filipe nipuro nne. Mene mulopwana ole khaamonne-tho Filipe, mene aavirelela weetta mukwaha awe ahakalanleene vantxipale.
40 Filipe aarowa wAzoto, ni emaara aaviraawe muttetthe owo, annalaleya mitthenka sooreera isidade sootheene mpaka ophiya oKesareya.
