Miteko sa arummwa 22:1-30
22 “Asinna, ni asitiithi, nwiriyane etthu kinkelaaka ohima viinaano va weera kiisaakihe.”
2 Vano, emwiiwakaru weera uuluma naawo nnuulumo na eheberi, awo yaatepa omaala. Vano, Paulo aaheera:
3 “Miyo muyuda, kiyarinwe esidade ya oTarso wa oSilisia, miyo kixuttihinwe esidade ene yeela, ni Gamaliyeli. Ni owo aakixuttiha weera kitthareke nnene sene itthu sootheene siri mu Nlamuloni mwa Mose, ni omukokhorela Muluku ni murima wootheene, ntoko nyuwo muneeraanyu olelo va.
4 Miyo kannaattharatthara atthareli Aapwiya* mpaka owiiva, kaatthukaka ni waaroiha okateya, kihipwatthaka waari weera alopwana naari athiyana;
5 namakeya mutokweene ni ekhurupu yootheene ya asitokweene aayuda ennahelela onamoona mwaha ola. Mpaka awo yaakivaherera ikaarta yaarumihelaka asinna a oDamasku, weera kaawiihe atthareli ootthukiweene mpaka oYerusalemu weera ettaruxiwe.
6 “Mene, keeraka weetta hiihaale mukwahaaka, ewoora ya 12, kaattamelaka oDamasku, mootutuxera waakhumelela waara waakhuma wiirimu okimwaleelaka,
7 ni miyo kaamoorela vathi, ni kaahiiwa nsu nikeerelaka: ‘Saulo, Saulo, mwaha wa heeni munkittharattharaanyu?’
8 Miyo kaahaakhula: ‘Nyuwo taani Apwiya?’ Ni owo aakaakhula: ‘Miyo Yesu, muNazareti, yoowo mummuttharattharaanyu.’
9 Ni asilopwana yaari ni miyo yaahoona waara iwe, mene khayiiwale nsu na ole uuluma ni miyo.
10 Nto miyo kaahaakoha: ‘Apwiya kipake eheeni?’ Ni Apwiya yaakaakhula: ‘Nvinye, murowe oDamasku, ni weiwo munooleeliwa itthu sootheene muthanlelinwaanyu weera nvare.’
11 nto, woona weera miyo nkaawera woona etthu mwaha woowaara waakimwalenle, kaaphiya oDamasku kivarelinweene matata ni asilopwana ale yaari ni miyo.
12 “Weiwo, aakhala mulopwana mmoha iitthaniwa Ananiya, aamoova* Muluku moovarihana ni Nlamulo, yoowo ayuda ootheene yaakhala nipuro nne yaamuttittimihaaya,
13 aahoowa okaasa. Aakaattamela ni aaheera: ‘Munna Saulo, mutthikele woona!’ Ni etempu ene yeele miyo kaatthikela woona ni kaamoona owo.
14 Owo aaheera: ‘Muluku a makholo ahu ohoothanlani weera musuwele yootthuna awe, weera mmoone naxariya, weera mwiiwe masu enkhuma mmwaanoni mwawe,
15 mwaha wooweera munrowa okhala namoona awe, ohoolo wa atthu ootheene, wa itthu monnaanyu ni mwiiwalaanyu.
16 Vano, mwaha wa heeni mumpisaanyu? Nvinye, murowe mwapatisiwe, Muluku onimoolevelelani soottheka sanyu woona weera munnaromola nsina na Yesu.’
17 “Menento, kitthikelakaru oYerusalemu, emaara kooniherinwaaka yoowooniheriwa miyo kaari mutemplu kivekelaka
18 ni kaawoona Apwiya ekeerelaka: ‘Moowaakuveya mukhume oYerusalemu, woona weera atthu awo khenkela waakhulela onamoona munkelaanyu okihelelaka miyo.’
19 Vano, miyo kaaheera: ‘Apwiya, awosa aasuwela nnene weera yeele eri esinakooka, miyo kannaavara ni waawaxula ale yoororomelani nyuwo.
20 Ni emaara iiviwaawe Estefano mutthareli anyu, miyo kaari vaavo kaakhulelaka wiiviwa wawe, ni ti yoomi kaavarenle ikuwo.’*
21 Mwa yeeyo, owo aakeerela: ‘Murowe, mwaha wooweera miyo kinimoorumihani wa maloko oorakamela’”
22 Awosa yanwiriyana mpaka wuuluma masu awo. Avinyaka yaakhuwela yeeraka: “Mmwiive mulopwana owo, woona weera khaphwanenle okhala mukumi!”
23 Woona weera atthu ale yannakhuwela, yannavonya maleya aya ni yannavonyera etthaya musulu,
24 muhooleli aanakhotto aaruma weera akuxiwe Paulo aroihiwe mpuwa mwa ekwartelo ni aaruma weera akohakohiwe awaxuliwaka, weera ahime weera muhooleli aanakhotto asuwele etthu heeni yaaweeriha atthu ale okhuwela ni Paulo moota ene yoole.
25 Menento, emutthukakaru weera yanwaxule, Paulo aamukoha muhooleli aanakhotto aari vale, eeraka: “Nlamulo ninnawaakhulelani onwaxula mutthu a oRoma, ahithorihinwe?”
26 Nakhotto ole* aarowa wa muhooleli aanakhotto ni aamukoha eeraka: “Apwiya muntthuna ompakela eheeni mulopwana ola? Owo murooma!”
27 Vanonto muhooleli ole aanakhotto aamwaattamela Paulo ni anamweerela: “Nkakileelani, nyuwo murooma?” Owo aamwaakhula: “Aani.”
28 Vano, muhooleli ole aanakhotto aamweerela: “Miyo kilinve musurukhu muntxipale weera kikhale murooma.” Nto Paulo aaheera: “Miyo-nto kirooyariwano.”
29 Mwa yeeyo, asilopwana ale yaahalenle vakhaaniini omukohakoha ni ommana, yaamuhiya moowaakuveya. Ni muhooleli ole asuwelakaru weera ole aamutthunkaawe aari murooma, aahoova vantxipale.
30 Vano, nihiku naattharelana, muhooleli ole aanakhotto atthunaka osuwela etthu yaaweeriha ayuda omoothera Paulo, aamutaphula ni aaruma weera asitokweene aanamakeya ni atthu ootheene yeerela eparte eSineetriyu, ethukumane. Anwiiha Paulo ni aamweemexa variyari vaya.
