Miteko sa arummwa 23:1-35
23 Paulo aawehexexaka atthu yaathukumanne oSineetriyu, aaheera: “Asinna, Muluku oosuwela weera yoosuwelihaaka ya murima, ennakaakhulela ohima weera nkipanke etthu yoonanara mpaka olelo.”
2 Nto mwaha wa yeeyo, namakeya mutokweene Ananiya, aaruma weera atthu yaamwaattamenle Paulo emmane owanoni.
3 Vano, Paulo aamweerela: “Muluku onimoomanani nyuwo namootha, nyuwo mukilanthi weera mukithorihe moovarihana ni Nlamulo, mene etempu emoharu munnatupha Nlamulo murumaka weera kimaniwe?”
4 Atthu yaakilanthi oSineetriyu iwe yaamukoha: “Nyuwo munanveeha namakeya mutokweene a Muluku?”
5 Paulo aahaakhula: “Asinna, miyo nkaasuwela weera owo namakeya mutokweene. Woona weera yoolempwa weera: ‘Ohimuulumele masu oonanara mutokweene a muloko aa.’”
6 Paulo asuwelaka weera eparte emoha ya atthu ale yaathukumanne yaari asaduki, ni akina yaari afarisi, Paulo aahuuluma ni nsu noowiiwanyeya muSineetriyu, eeraka: “Asinna, miyo nfarisi mwaana aafarisi. Ni ti mwaha wa yooweherera ya ovinyererihiwa wa atthu ookhwa, kinthorihiwaaka.”
7 Ahimakaru eyo, waakhumelela ovaanyihana variyari va afarisi ni asaduki. Ni atthu yaathukumanne yaakawanyeya.
8 Woona weera asaduki khenaakhulela weera, wookhala ovinyererihiwa wa atthu ookhwa, naari aakhala malaika naari munepa, mene afarisi, ennaakhulela itthu sootheene iya.
9 Nto, waakhumelela onyakulihana, ni alipa oolepa akina yaatthara afarisi yaaheemela enavaanyihana enyoonyinweene yeeraka: “Khannoona etthu yoonanara wa mulopwana ola; ankhanto waari weera munepa naari nlaika nrimuuluma nuuwo . . .”
10 Nto onyakulihana iwo waatepa, nto mwaha wa yeeyo, muhooleli aanakhotto oovaka weera Paulo aamwiiviwa naawosa, aahaaruma anakhotto weera erowe, ni yamukumihe variyari vayasa, ni emukuxere okwartelo.
11 Menento, ohiyu ene yoole, Apwiya yaamukhumelela, ni yaaheera: “Mulipe murima! Hiiha ntoko mukikhalenlaanyu onamoona woomalela oYerusalemu, munookikhalela-tho onamoona miyo oRoma.
12 Vaxaakaru, ayuda yaavaanela ni yammana natiri yiilaphaka weera khayaakela otxa naari owura etthu ehinaaye omwiiva Paulo.
13 Yaari alopwana oopwahaka 40 yaawo yammanne natiri owo.
14 Asilopwana awo yaarowa wa asitokweene aanamakeya ni wa asitokweene aayuda, ni yaaweerela: “Hiyo nommana natiri, nlaphaka weera khaninkela otxa etthu nihinaaye omwiiva Paulo.
15 Vanonto, nyuwosa vamoha ni eSineetriyu, mmweerele muhooleli aanakhotto weera anwiihe Paulo, mooniheraka ntoko muntthuna osuwela itthu sintxipale woohima sa mwaha awe. Menento, ahinaaye owaattamelani, hiyo ninrowa okhala oolikaneene weera nimwiive.”
16 Menento, musulwaawe Paulo aamusuwela palano ole yampakaaya; ni aavolowa okwartelo anamuleela itthu sootheene Paulo.
17 Vano, Paulo aamwiitthana mmoha aahooleli aanakhotto ni aaheera: “Mmukuxe mmiravo ola ni mmuhoole wa muhooleli aanakhotto woona weera mmiravo ola ookhalano etthu yoomuleela muhooleli owo.”
18 Vano, owo aamukuxera wa muhooleli aanakhotto ni aaheera: “Mulipa ootthukiwa Paulo ookiitthana ni ookivekela weera koowiihereni mmiravo ola, mwaha wooweera ookhalano etthu yoowooleelani.”
19 Vano, muhooleli ole aanakhotto anvarela ntata mmiravo ole, ni aamuroiha weephiini anamukoha: “Eheeni muntthunaanyu okileela?
20 Owo aahaakhula: “Ayuda eroovaanela weera yoovekeleni nyuwo weera omaalo Paulo arowe oSineetriyu, ekhalaka ntoko entthuna osuwela itthu sintxipale woohima sa mwaha awe.
21 Mene, muhaahiye yoowokakani woona weera atthu entthuna omwiipithela Paulo aapwaha 40, ni awo ammana natiri weera khenkela otxa naari owura ehinaaye omwiiva. Awosa eri oolikaneene, ewehereraka weera mwaakhulele yoovekelaaya.”
22 Vano, muhooleli ole aanakhotto aamuleela mmiravo ole eeraka: “Muhimuleele mutthu mukina weera mookileela etthu ela.” Avinyaka vaavo aamuhiya apwahaka.”
23 Nto, muhooleli ole aahaawopa ahooleli eeli aanakhotto ni aaheera: “Mwaathukumanye anakhotto 200, anakavalu 70 ni anamavaka 200, weera erowe oKesareya ewoora ya 21.
24 Nave-tho, mmureherere kavalu weera Paulo anwele weera aphiye moovareleleya wa kovernatore Felexi.”
25 Ni owo aalepa ekaarta yeeyo yeera:
26 “Isalaamu! Kinlepa ti miyo Klaudio Lisia, koolepelakani Nyuwo Oottittimiheya, kovernatore Felexi.
27 Mulopwana ola aavariwa ni ayuda ni owo aahanle vakhaaniini wiiviwa naawo mene miyo kaahoowa moowaakuveya ni anakhotto aka ni naamwaakiha, mwaha wooweera kaasuwela weera owo aari ooRoma.
28 Vano, kitthunaka osuwela nthowa nene naaweeriha awo omoothera, kaamuroiha oSineetriyuni waya.
29 Kaahoonelela weera awo yaamoothera woohima sa Nlamulo naya, mene khaaphwanyinweno nthowa naari nimoha naaphwanela owo wiiviwa naari otthukiwa.
30 Menento, woona weera kaaleeliwa weera awo entthuna omwiiva, tiva koorumihenlaakani mulopwana owo Nyuwo Oottittimiheya, ni kinnoovekelani weera ehime* ohoolo wanyu etthu emmootheraaya.”
31 Nto, moovarihana ni nlamulo yaakhenlaaya ni muhooleli aanakhotto, anakhotto ale yanvara Paulo enamuroiha wAntipatride noohiyu.
32 Nihiku naattharelana, yaahaahiya anakavalu evirelelaka omuhoola Paulo ni anakhotto yaatthikela okwartelo.
33 Anakavalu ale yaaphiya oKesareya, nave-tho yaahinnyerera ekaarta vamoha ni Paulo.
34 Vano, kovernatore aasoma ekaarta ele ni aakoha weera Paulo aari a eprovinsiya heeni; ni aaleeliwa weera aari a oSilisia.
35 Vano kovernatore aamuleela Paulo eeraka: “Kinoowiriyana nnene mwaha anyu wootheene yaphiya vale atthu ale enwootherani.” Vano owo aaruma weera Paulo awehawehiweke ni makwaarta owannyawe* Herodi
