Miteko sa arummwa 20:1-38
20 Etempu waavukunwaaya munyakunyaku, Paulo aaruma weera yiitthaniwe atthareli, aalipihakaru ni aalaxerakaru awosa, aarowa oMasedonia.
2 Paulo aaheetteetta mittetthe sootheene iye sa oMasedonia ni aahaaleela atthareli masu mantxipale oolipiha. Avinyaka, aaphiya oGresia.
3 Paulo aakhala weiwe minyeeri miraru, mene, woona weera ayuda yaavaanela weera emwiive etempu aahalelaawe onwela paarku arooka wAsiria, owo aalakela otthika aviraka oMasedonia.
4 Owo aahooliwa ni Sopatro mwaana a Piro, a oBereya; Aristarko ni Sekundo, yaawo yaari a oTesalonika; Gaio aari oDerbe; Timotiyu vamoha ni Tikhiko ni Trofimo yaari a eprovinsiya ya wAsia.
5 Asilopwana ala yaahoola ni enaniweherera oTrowade.
6 Vano, hiyo nanwela paarku oFilipo, emalakaru efeesta ya Mpaasika, ni, evirakaru mahiku 5 naahaaphwanya awo oTrowade, niviriha weiwo esemana emoha.*
7 Nihiku noopatxera na esemana, emaara naathukumannaahu weera ntxe, Paulo aapatxera wuuluma mwaha ni atthu yaari vale, woona weera waxa vale, ampwaha. Nto, aavirelela opaka mwaha ole mpaka ohiyu eriyari,
8 esaala ele ya osulu naathukumannaahu, saakhala mithuko* sintxipale.
9 Mmiravo mmoha iitthaniwa Eutiko, aakilanthi vaxanelani sanvola ikhove, nlelo Paulo ariki wuuluma ni, mmiravo owo sanvola ikhove sintxipale, nto aamorela vathi akhumaka empa ya osulu. Emaara aatthimakelinwaawe, aaphwanyinwe akhwiiyeene.
10 Mene, Paulo akhuruwelakaru vathi, aahuurama, aamukhupaarela mmiravo ole ni aaheera: “Muhixupeye,* mmiravo ola mukumi.”
11 Vano, Paulo aatthikela empa ya osulu, aakuxa yootxa* anapatxera otxa. Nto owo aavirelela wuuluma etempu yintxipale, mpaka oxa, avinyaka aapwaha.
12 Moottharelana, atthu yaamukuxa mmiravo ole areene mukumi ehakalanleene.
13 Hiyo naahoola, nnavira neettaka munaviyuni mpaka wAso, mene Paulo entte vathi, yaari esidade ene yeeyo naakelaahu omwaakhela Paulo munaviyuni, ntoko owo aanivekenlaawe.
14 Aniphwanyakaru wAso, hiyo naamwaakhela munaviyuni ni naarowa oMitilene.
15 Vaxaakaru, nanwela naviyu ni naaphiya waattamela oKhiyo. Nihiku nanaaveeli, naaphiya oSamo, ni nihiku nanaararu, naaphiya oMileto.
16 Paulo aalakela oheemela wEfeso, weera ahipise eprovinsiya ya wAsia, mwaha wooweera aatthuna ophiya moowaakuveya oYerusalemu, wawereya nihiku na Efeesta ya Pentekoste.
17 Menento, Paulo areene oMileto aaruma wiitthaniwa asitokweene a muloko a wEfeso.
18 Ephiyakaru, Paulo aaweerelasa: “Nyuwosa moosuwela moota miyo kaakhalaaka variyari vanyu, ovinya nihiku noopatxera kiphiñyaaka eprovinsiya ya wAsia:
19 moowiiyeviha, miyo kohaavarela muteko Apwiya ntoko kaporo, kinlaka ni kihaawaka mwaha wa ayuda yaatthuna okiiva.
20 Miyo, moohookhuwani etthu, kohoolaleerani itthu seera sookhavihereni, kooxuttihakani ohoolo wa atthu ni empa ni empa.
21 Mene miyo kohaalaleera atthu ootheene moomalela waahela mpuwa ayuda ni akereku weera yannatthuneya orukunuxa murima ni omukokhorela Muluku ni omuroromela Pwiya ahu Yesu.
22 Mene vano, keettihiwaka ni munepa wootteela, kinrowa oYerusalemu, nnaamweera kihisuwenle etthu enkela okeereela wuuwu.
23 Etthu kinsuwelaaka ti yooweera, yeele eri esidade munepa wootteela onnakileela veeli-veeli ele enkela okeereela ntoko otthukiwa ni oviriha maxupo.
24 Nnaamweera vareene hiiho, khaiyene kinoona weera ekumi aka ti yootthuneyaxa;* mene etthu eri yootthuneyaxa ti yooweera kimalihe etthu kintthuneyaaka opaka ni muteko kivahinwaaka ni Apwiya Yesu: muteko owo olaleya moomalela mitthenka sooreera woohima sa mahala matokweene a* Muluku.
25 “Vano, koosuwela weera khaavo mutthu a nyuwo kimulalenraaka Omwene, aneera akoone veeli.
26 Tivanto, nyuwosa munnahelela onamoona nihiku nna na olelo, wakhala weera mutthu onookhwa, miyo nkaanoono nthowa,
27 woona weera nkihiñye woolaleerani yootthuna ya Muluku.*
28 Mwiikosoope mwaneene anyu ni mukosoope muloko, mwaha wooweera munepa wootteela wohoothanlani weera mukhale asitokweene enhoolela ni mweettiheke muloko wa Muluku, yoowo owo othummaawe ni ephome ya Mwanawe.
29 Koosuwela weera kapwaha vale enoovolowa variyari vanyu akusupa ooluwa ni awo khenkela okosoopaka iputtiputthi mwa nsivelo,
30 ni variyari vanyu enookhumelela atthu enkela ovirikanyihaka ekhaikhai, ni yootthuna weera yaahapuxe atthareli weera yaatthareke.
31 Tivanto, mukhale oowehaweha ni muupuweleleke weera mpuwa mwa iyaakha tthaaru, othana ni ohiyu, nkihiñye woovahani miruku mutthu ti mutthu a nyuwo, kimorihaka maithori.
32 Vano, miyo kinnoovahererani mmatatani mwa Muluku ni mwa masu a oreera murima otokweene wa Muluku, masu awo enkela woolipihani ni woovahani yoohiyeriwa vamoha ni ootheene yaale oothanliwa.
33 Miyo nkininlele eparatha, ewooru, naari ikuwo sa mutthu.
34 Nyuwosa moosuwela weera koovara muteko ni matata aka weera kiphwanye itthu saakithowa ni saathowa asikhwaaka.*
35 Mwa itthu sootheene, miyo koowooniherani ni miteko saka moota muneeraanyu mwaakhavihereke ale entthuneya okhaviheriwa, ni nyuwo muupuweleke masu Apwiya Yesu, yaawo eneera: ‘Ovaha ti wootepa ohakalaliha opwaha waakhela.’”
36 Aamalinhaawe wuuluma itthu iya, aakokhora vamoha naawo ni aavekela.
37 Ootheene yaapatxera winla vantxipale; vano, yaamukhupaarela Paulo ni yampexari,
38 awo yaariipiwa murima otepaxa wene mwaha wa masu owo aalenlaawe weera khayaakela otthikela omoona veeli. Avinyaka yaamuhoola orowa onwela naviyu.
