Miteko sa arummwa 12:1-25
12 Etempu ene yeele, mwene Herodi aapatxera waahasula atthu akina a mmulokoni.
2 Owo aahaaruma anakhotto awe weera emwiive Yakobe, munnawe Yohani ni ekatana.
3 Oonakaru weera eyo yannaasivela ayuda, aahaaruma anakhotto awe-tho weera envare Pedru. (Eyo yeereñye mahiku a Ipaawu soohiheliwa Efaramenta.)
4 Owo anvariha ni aamutthukiha mukateya, awinnyereraka anakhotto a ikhurupu ixexe seiyo saaranttelana, yeele eri ekhurupu yaarino anakhotto axexe, aapanke eyo ni yootthuna weera amuthorihe ohoolo wa atthu avira Mpaasika.
5 Pedru areene mukateya, muloko wannanvekelela woohihiyerereya.
6 Weeriwaka weera omaalo Herodi onkelaawe omuthoriha Pedru ohoolo wa atthu, ohiyu ene yoowo, Pedru eera areene ni makwaarta meeli, atthukinweene ni ekorenti, nave, yaakhala makwaarta makina yaawehaweha mulako wa okateya.
7 Mootutuxera, nlaika na Yehova* naakhumelela, ni nipuro nne* Pedru aaraawevo waahaaravo. Nno nanvara Pedru mpararini ni nanvinxa nimweerelaka: “Nvinye moowaakuveya!” Emaara ene yeeyo, ikorenti aatthukinwaaweno mmatatani saamora.
8 Nlaika naamweerela: “Nware ikuwo sanyu ni isantaaliya.” Pedru aapaka eyo. Avinyaka nlaika nne, naamweerela: “Nware maleya anyu a vasulu* ni mukitthareke.”
9 Vano, Pedru aakhuma anamutthara, mene khaasuwela weera etthu ele yeereya moorweela mwa nlaika, yaari ekhaikhai. Owo uupuwela weera aamuloha.*
10 Yaavira va makwaarta yaaweherera mulako woopatxera, nave-tho yaahaavira yaaweherera mulako wanaaveeli ni yaaphiya mulako mutokweene wa eyuuma waaroiha osidade. Mulako owo waahuleya meekhaaya. Ekhumakaru, yaatthara mphiro mmoha ni mootutuxera nlaika nne naamuhiya Pedru.
11 Pedru oonelelakaru weera ele yeereya yaari ekhaikhai, aaheera: “Vanonto moohihovela, miyo koosuwela weera Yehova* oorumiha nlaika ni nookivuluxa mmatatani mwa Herodi ni mwa itthu sootheene soonanara muloko wa ayuda waawehereraaya weera saamukeereela.”
12 Pedru iiwexexakaru eyo, aarowa owannyawe Maria, ameyawe Yohani yoowo onsuweliwa okhala Marko, weiwo atthareli antxipale yaathukumannaayawo evekelaka.
13 Emaara Pedru aamannaawe, mulako murumeyi mmoha muthiyana iitthaniwa Rode, aarowa omoona taani aamana mulako.
14 Murumeyi ole asuwelakaru weera naari nsu na Pedru, aatteeliwa murima ahinhula mulako, anatthikela waaleela atthu weera Pedru ori vamulako.*
15 Yaamweerela: “Nyuwo munkhwa anepa.” Menento owo annanyeserera weera aahima ekhaikhai. Ni awosa yanneera: “Nno nlaika na Pedru.”
16 Menento, Pedru aavirelela omana nsele, ehulakaru mulako, yaamoona Pedru ni yaatikhiniheya vantxipale.
17 Vano, Pedru aahaavaha esinaale* ni ntata awooniheraka weera emaale, ni aahaaleela moota Yehova* aamukuminhaawe okateya ni aaweerela: “Mwamuleele itthu iya Yakobe ni asinna.” Vano, owo aakhuma nipuro nne anarowa nipuro nikina.
18 Vaxaakaru, waakhala munyakunyaku variyari va anakhotto, yaawo yaakohana woohima sa eheeni yeereñye ni Pedru.
19 Herodi aamwaasaasa nnene sene Pedru, nto woona weera khamphwannye, aahaakohakoha makwaarta ni aaruma weera yathorihiwe. Avinyaka, Herodi aakhuma oYudeya anarowa oKesareya, ni aaviriha mahiku vakhaaniini areene weiwo.
20 Herodi aahaanyoonyeriwa atthu a oTiro ni a oSidoni. Ni moowiiraana, awo yaarowa wa Herodi. Emwaakhulelihakaru Blasto yoowo aari mutokweene a empa ya mwene, yanvekela weera aakhavihere okhalano murettele ni mwene, mwaha wooweera muttetthe aya waaroromela yootxa yaakhuma elapo aalamulelaawe Herodi.
21 Nihiku tinno, Herodi aawara ikuwo sa omwene, aakilaathi nipuro nuulummwa milattu ni aapatxera wuuluma ohoolo wa atthu.
22 Vano, atthu yaathukumanne vale, yaapatxera okhuwela yeeraka: “Nno nsu na muluku, khaiyene na mutthu!”
23 Woona weera Herodi khanvuwinhe Muluku, moowaakuveya, nlaika na Yehova* nanvulaliha. Nto owo asareñyeene minyunku saamukhuura, aahookhwa.
24 Masu a Yehova* yannavirelela omwaramwareya ni atthu antxipale yannakhala atthareli.
25 Vaavo Barnaba ni Saulo, yaamalinhaaya muteko woowaakhavihera asinna oYerusalemu, yaatthika ni yaamukuxa Yohani yoowo aasuweliwa-tho okhala Marko.
