Miteko sa arummwa 15:1-41

PLAY

Onyakulihana waakhumelenle wAntiyokiya woohima sa wiineliwa (1, 2)
Mwaha ole onnaroihiwa oYerusalemu (3-5)
Asitokweene ni arummwa ennathukumana weera yuulume mwaha ole (6-21)
Ekaarta ya Mukuttula Woolamulela (22-29)
- Okhootta ephome (28, 29)
Muloko onnalipihiwa moorweela mwa ikaarta (30-35)
Omwalamwala wa Paulo ni Barnaba (36-41)

15 Atthareli akina ekhumaka oYudeya yaaphiya wAntiyokiya ni yaapatxera waaxuttiha asinna yeeraka: “Mwaahiineliwaru moovarihana ni nlamulo na Mose, khamunvuluwa.” ² Paulo ni Barnaba evaanyihanakaru ni atthareli ale, yaalakela weera Paulo vamoha ni Barnaba ni atthu akina erowe oYerusalemu weera wuulummwe mwaha ole ni arummwa vamoha ni asitokweene. ³ Vano, asinna a mmulokoni yaahaahoola vakhaaniini. Nto Paulo ni Barnaba vamoha ni atthareli akina ale, yaarowa oFenisia ni oSamariya yaaleelaka asinna moota atthu a mulaponi yaapatxenraaya omukokhorela Muluku, ni asinna awo ootheene yannahakalala vantxipale. ⁴ Ephiyakaru oYerusalemu, yaahaakheliwa mooreera murima mmulokoni, ni arummwa ni asitokweene, ni yaahaaleela itthu sintxipale Muluku aapankaawe aavarelaka muteko awo. ⁵ Menento, atthu ale khalayi yaatthara sooxuttiha sa afarisi ni vano yaari atthareli, yaavinya mapuro yaakilanthaaya, ni yaaheera: “Onnatthuneya weera asilopwana awo yiineliwe ni waaruma weera etthareke Nlamulo na Mose.” ⁶ Nto, arummwa ni asitokweene, yaathukumana weera yuulume mwaha ole. ⁷ Evaanyihanakaru vantxipale, Pedru aaheemela ni aaweerela: “Asinna, moosuwela weera, ovinya mahiku oopatxera Muluku ookithanla variyari vanyu weera kaaleele mitthenka sooreera atthu a maloko makina* weera yiiwe mitthenka sooreera ni eroromele. ⁸ Ni Muluku yoowo osuwenle mirima sa atthu, ohoonihera weera onnawaakhulela awo aavahaka munepa wootteela ntoko hiihaale aanivanhaawe hiyo. ⁹ Muluku khanipanke moovirikana naawo, mene ooreeriha murima aya mwaha woororomela waya. ¹⁰ Vanonto, mwaha wa heeni nyuwosa, mummweereraanyu Muluku mwaakapattihaka atthareli awo muritti yoowo makholo ahu ni hiyo nihiwenraahu oteexa? ¹¹ Ohiya eyo, hiyo* ninnarororomela weera ninkela ovuluxiwa moorweela mwa ikharari sa Apwiya Yesu, nave-tho awo ennaroromela etthu emoharu.” ¹² Nto mwaha wa yeeyo, ekhurupu yootheene yaamaala ni yaapatxera omwiiwelela Barnaba ni Paulo ehimaka miteko ni miiriira sintxipale Muluku aapankaawe wa amalapo moorweela mwa yaawo. ¹³ Emalihakaru wuuluma, Yakobe aapatxera wuuluma eeraka: “Asinna, mukiiwe. ¹⁴ Simeyoni onleela weera vano Muluku onnawaakhulela amalapo* weera awo-tho ethanliwe variyari va atthu ale ehikhanle ayuda, yaawo enrowa wiitthaneliwa nsina Nawe. ¹⁵ Masu ala ennavarihana ni soolempwa sa Maprofeta sineera: ¹⁶ ‘Vahoolo vaya, kinootthika ni kinaateke-tho empa* ya Davidi emonre, kinootthikihera-tho vamathalani* vaya ni kinooreherera, ¹⁷ weera ale enrowa ohala emukokhoreleke Yehova* vamoha ni atthu a maloko ootheene, atthu yaawo enkela wiitthaneliwaka nsina naka. Ti miyo Yehova* kinhima, ni ti yoomi kimpaka itthu iya, ¹⁸ seiyo sisuwelinwe ovinya khalayi.’ ¹⁹ Tivawonto, kinuupuwela weera* nihaakumihere maxupo atthu ala ehikhanle ayuda emmukokhorela Muluku, ²⁰ mene naalepele naaleelaka weera, ekhootteke itthu ivahererinwe amiluku a ethiru, okonihana woohireerela,* okhuura inama soohihitiwa* ni ephome. ²¹ Woona weera, ovinya khalayi, masu eri mu nlamuloni na Mose ennalaleiwa yeele eri esidade mwaha wooweera ennasommwa masu awo moowiiwanyeya musinakooka, yeele eri esaabadu.” ²² Vano, arummwa ni asitokweene vamoha ni muloko, yaalakela waarumiha wAntiyokiya asilopwana yaathanlalaaya variyari vaya, vamoha* ni Paulo ni Barnaba; nave-tho yaamurumiha Yuda yoowo iitthaniwa Barsaba ni Sila, yaawo yaahoolela asinna. ²³ Awo yaalepa ekaarta ni yaahaavaherera yaawo, ekaarta eyo yeera ha: “Arummwa ni asitokweene ni asinninyu, ennoorumihelani isalaamu nyuwo asinna muhikhanle ayuda munkhala wAntiyokiya, wAsiria ni oSilisia. ²⁴ Hiyo nohiiwa weera aakhala atthu akina ekhumme variyari vahu ni ahookumiherani maxupo mantxipale ni itthu ehimmaaya, ni aheerera onanariha nroromelo nanyu. Mene hiyo khanaarumme ohima itthu iyo. ²⁵ Tivawonto, moowiiraana* nlakenlaahu woorumihelani nyuwosa asilopwana naathanliyaahu vamoha ni oosiveleyaahu Barnaba ni Paulo, ²⁶ asilopwana ala aaleva ekumi aya mwaha wa nsina na Apwiya Yesu Kristu. ²⁷ Tivanto noorumihenlaahuni Yuda ni Sila, weera ooleeleni itthu* woohima sa mwaha ene yoowo. ²⁸ Nikhaviheriwaka ni munepa wootteela, nohoona weera khavanreerela wookapattihani miritti mikina sihikhanle itthu iya sootthuneya: ²⁹ nvirelele okhootta itthu ivahererinwe amiluku a ethiru, ephome, inama soohihitiwa* ni okonihana woohireerela.* Nyuwosa mwakhootta itthu sene seiya, munookhalano ekumi yooreera. Muhale nnene!” ³⁰ Vano, awo elaxerakaru, yaarowa wAntiyokiya, yaahaathukumanya atthareli antxipale ni yaahaavaherera ekaarta. ³¹ Atthareli ale emalakaru osoma ekaarta yaakhenlaaya, yaahakalala mwaha wa masu ale oolipiha yiiwalaaya. ³² Woona weera Yuda ni Sila yaari maprofeta, yaahaalipiha asinna ni masu mantxipale. ³³ Emalakaru etempu vakhaaniini ereene weiwo, asinna yaahaalaxera, nto yaahaarumiha otthikela oYerusalemu, wa ale yaarumme. ³⁴ * —— ³⁵ Mene, Paulo ni Barnaba yaahala wAntiyokiya exuttihaka ni elaleyaka mitthenka sooreera sa Yehova,* vamoha ni atthareli* akina. ³⁶ Evirakaru mahiku vakhaaniini, Paulo aamweerela Barnaba: “Vano,* nrowe ntthikele ni naaxekure asinna a isidade seiye nlalenraahu masu a Yehova weera nawoone moota eraaya. ³⁷ Mene Barnaba aatthuna omukuxa Yohani, yoowo iitthaniwa Marko. ³⁸ Menento, Paulo khaakhulela weera Marko owo arowe vamoha naawo, woona weera aahaahiya oPanfiliya, ni khaahonle orowa ovara muteko woolaleera. ³⁹ Nto, Paulo ni Barnaba yaanyakulihana* vantxipale, nto mwaha wa yeeyo, yaamwalamwala. Barnaba anamukuxa Marko anwela paarku anarowano oKipro. ⁴⁰ Paulo aamukuxa Sila anarowano vamoha, asinna yanvekela Yehova* weera amoonihere Paulo oreera wawe murima. ⁴¹ Paulo aavira wAsiria ni oSilisia alipihaka miloko.