Miteko sa arummwa 27:1-44
27 Woona weera waathanliwa weera naarowa wItaliya, Paulo vamoha ni atthu akina yaatthukinwe vamoha nuuwo, yaahinnyereriwa mmatatani mwa mutokweene aanakhotto iitthaniwa Julio, a eparte ya anakhotto yiitthaniwa Augusto.
2 Nanwela naviyu a wAdramitiyu, yoowo aahalela vakhaaniini orowa iportu sa muxerexere mwa ephareya ya eprovinsiya ya wAsia ni naapatxera weetta mukwaha ahu; Aristarko, a oTesalonika a eprovinsiya ya oMasedonia, aari vamoha ni hiyo.
3 Nihiku naattharelana, hiyo naaphiya oSidoni; woona weera Julio annamukosoopa mooreera murima Paulo, aahaakhulela weera Paulo aaxekureke asinthamwene awe ni weera akhaviheriweke ni yaawo.
4 Avinyaka vaavo, naavinya nnarowa eyiiliya* ya oKipro, mwaha wooweera epheyo yaanikeliha weiwo.
5 Vano, naalapuwa ephareya yoowiixa ya oSilisia ni ya oPanfiliya, ni naaphiya eportu* ya oMira, muttetthe wa oLisiya.
6 Weiwo, mutokweene aanakhotto amphwanya naviyu a wAlexandriya yoowo aakela wItaliya, ni aaniweliha naviyu owo.
7 Nivirihakaru mahiku mantxipale neettaka vakhaani-vakhaani, naaphiya oKnido ni maxupo. Menento woona weera epheyo kheyaanikhavihera ovirelela weetta moono ene yoole, nto naarowa oKreta waattamela oSalmone.
8 Ni, naaheetta muxerexere mwa ephareya ni maxupo, ni naaphiya nipuro nniitthaniwa iportu* sooreera yeeyo eri waattamela esidade ya oLiseiya.
9 Woona weera yaavira mahiku mantxipale ni wannoopiha weetta ni naviyu, mwaha wooweera nihiku na ramasaani* naavira. Vano, Paulo aahaavaha miruku eeraka:
10 “Atthwaala, kinoona weera mukwaha ola onoonanara ni inooyeleeliwa itthu sintxipale, ohiya mirittiru ni naviyu, mene-tho ikumi sahu.”
11 Menento, muhooleli aanakhotto ohiya wiiwelela etthu Paulo aahimaawe, aakenle omwiiwelela mwaneene naviyu ni ole aamweettiha.
12 Woona weera eportu* ele khayaareerela oviriha weiwo eyiita, atthu antxipale yaahoona weera waari wa miruku ovinyawo iwe, weera yoone waari weera wanwereya ophiya oFeniki, eportu* yeeyo ya oKreta, eportu eyo, wanwereya mutthu orowa ota naari ohitto; ni nipuro nno, yanwera oviriha eyiita.
13 Epheyo yaakhuma ohitto yoopakaru, yuupuwela weera ele yaavaanenlaaya yoophiya oFiniki yanwereya. Avinyaka, yaamutaphula ankora ni yaarowa oKreta, yeettaka muxerexere mwa ephareya.
14 Mene, evirakaru etempu vakhaaniini, yaakhumelela epheyo yoowuupa yaakhuma oyiiliya,* epheyo eyo eniitthaniwa eurokiloni,*
15 vano, epheyo eyo yoowuupa yaapatxera omukakha naviyu, mwaha woowuupa epheyo, hiyo naahiya omweettiha naviyu. Nniihiya neettihiwaka ni epheyo.
16 Naavira muxerere mwa eyiiliya* ekhaanini eniitthaniwa Kauda; nnaamweera vareene hiiho, khanaawera omukosoopa paarku.*
17 Enwelihakaru paarku ole mukhaanini, yaapatxera omulipiha naviyu, emutthukaka ni mikoyi. Vano, yoovaka weera naviyu amphara veehaavani oSirte,* yaahuukulula iveela, nto, mwaha wa yeeyo, naviyu aapatxera weettihiwa ni epheyo.
18 Woona weera epheyo yannanimana ni ikuru, nihiku naattharelana, atthu yaapatxera orihela itthu mphareya.
19 Ni nihiku nanaararu, awo yaarihela itthu ikina sa naviyu mphareya, ni matata aya.
20 Mwa mahiku mantxipale, nsuwa ni ithenyeeri khasooneya, ni epheyo yannanimana ni ikuru. Nto, yooweherera ahu yootheene naaraahuno weera nanvuluwa yaapatxera omala.
21 Evinreene etempu yintxipale ehitxiiye etthu, Paulo aaheemela variyari vaya ni aaheera: “Athwaala, mwaatthanre miruku saka iye soohikhuma oKreta, khamwaakela ohaawa naari khamwaakela oyeleela itthu.
22 Menento, nnaamweera vareene hiiho, kinnawoopererani etempu ela weera mulipe murima, woona weera khaavo a nyuwo oneera akhwe, mene naviyu onkela ophwateya.*
23 Ohiyu ovinre, nlaika na Muluku yoowo kimmukokhorelaaka ni kinanvarelaaka muteko naakikhumelela,
24 ni naaheera: ‘Muhoove Paulo. Nyuwo muntthuneya okumana ni Sesare. Opwaha mwa yeeyo, Muluku onimweeriha weera nyuwo ni atthu ootheene eri munaviyuni ni nyuwo ekhale akumi.’
25 Vanonto, atthwaala mulipe murima, miyo kinnamuroromela Muluku, weera itthu sootheene okilenlaawe sinkela weereya hiiho.
26 Menento, nintthuneya oriheliwa muxerexere mwa eyiiliya.”*
27 Evirakaru mahiku 14, othana ni ohiyu nimaniwaka ni epheyo ephareya ya wAdriya, ohiyu eriyari, atthu yaamweettiha naviyu yaapatxera wuupuwela weera yaahaattamela etthaya.
28 Vano, yaarinka wiixa waya ni yaahoona weera waari wa imeetru 36.* Nto, yaaheetta-tho vakhaaniini ni yaarinka veeli, ni yaahoona weera wiixa waya waari wa imeetru 27.*
29 Woona weera yannoova weera naviyu ammana vamalukuni, yaahaavonyera ankora axexe ottuli wa naviyu, yinlelaka weera waaxiiye.
30 Menento, atthu yaamweettiha naviyu yaaheerera otthawa munaviyuni ni yaahaakuruxela apaarku akhaanini mphareya ekhalaka ntoko yaatthuna waavonyera ankora ohoolo wa naviyu,
31 Paulo aamweerela muhooleli aanakhotto vamoha ni anakhotto: “Asilopwana ala yavinyarusa munaviyuni mu, nyuwosa khamunkela ovuluwa.”
32 Vano, anakhotto yaathikila mikhoyi sa paarku mukhaaniini ni yaamuhiya amorelaka mmaahini.
33 Oyaaka nooxa,* Paulo aawooperera atthu ootheene weera etxe etthu, eeraka: “Olelo nihiku na 14 nyuwosa nwehereraka, ni mpaka vano khamutxiiyeru etthu.
34 Tivawonto kinoovahaakani miruku weera mutxe; eyo enimookhaviherani, woona weera khaavo a nyuwo oneera ayeleele naari niihi nawe nimoha mano.”
35 Ahimakaru eyo, owo aakuxa epaawu, ananvekela Muluku ohoolo wa atthu ootheene, aakawanya ni aapatxera otxa.
36 Mwa yeeyo, atthu ootheene yaalipa murima ni yaapatxera otxa-tho.
37 Munaviyuni mmwe, naari atthu 276.
38 Etxaakaru mpaka ovona, yaavukula miritti munaviyuni, envonyeraka tiriku mphareya.
39 Waaxiiyaaya, atthu ale yaamweettiha paarku, khayaasuwela nipuro yaaraaya, mene yaahoona nipuro noohiixa na ephareya, nto yaatthuna omweemexa naviyu weiwo, wakhala weera wanwereya.
40 Nto, yaathikila mikhoyi sa ankora enaahiya emorelaka mphareya, ni etempu emoharu yeeyo, yaataphula mikhoyi sa ileemi. Ethapurulakaru eveela ya ohoolo, yaavirelela weetta, erooka ophareya.
41 Nto naviyu ole aaphiya nipuro saaraayavo mihaava sintxipale aaphara vaavo; ohoolo wa naviyu waaphara, ohinattikinyeyaru, mene ottuli wa naviyu wannamaniwa ni mutekuteku wa ephareya, ni paarku aapatxera onyaanyeya.
42 Menento, anakhotto yaalakela owiiva atthu ootheene yaatthukinwe weera ahikhale eera atthawe.
43 Nto, muhooleli aanakhotto aari ni yootthuna weera anvuluxe Paulo, ni aawootxeeliha anakhotto ale omukwanihera palano aya ole. Ni aalamula weera ale yaawera orapela etuphele mmaahini weera erowe yaphwanye etthaya
44 ni ale yahaawera yaatthareke ottuli: akina ewenleene itthaapwa ni akina ipetaasu sa naviyu. Nto mwaha wa yeeyo, ootheene yaaphwanya etthaya* ni yaavuluwa.
Footnotes
^ Naari: “etxirupa.”
^ Eportu nipuro eneemelaayavo anaviyu.
^ Eportu nipuro eneemelaayavo anaviyu.
^ Eyo tiiyo, ramasaani a Nihiku a Soolivela soottheka, aapakiwa mweeri wa tisri, mweeri yaapatxeraaya eyiita ni ephareya yannakhala ni mutekuteku.
^ Eportu nipuro eneemelaayavo anaviyu.
^ Eportu nipuro eneemelaayavo anaviyu.
^ Naari: “etxirupa.”
^ Eyo tiiyo, epheyo ya ota.
^ Naari: “etxirupa.”
^ Paarku onhimwa va, paarku mukhaanini onvareliwa muteko yakhumelela erisa mphareya, ni onnavareliwa muteko yoowo weera ekumihiweke atthu mmaahini.
^ Nwehe masu oowiiwanyeihiwa.
^ Naari: “oyeleeliwa, onanara.”
^ Naari: “etxirupa.”
^ Naari: “Okelaka nooxa.”
^ Naari: “yaaphiya omokoni.”
