Miteko sa arummwa 17:1-34
17 Vano, Paulo ni Sila yaavira wAnfipolis ni wApoloniya, ni yaaphiya oTesalonika, weiwo yaaraayawo esinakooka ya ayuda.
2 Ni Paulo moovarihana ni yookhovelela awe, aavolowa ni aahuuluma naawosa, ni aaviriha isaabadu tthaaru uulumaka naawo woohima sa Soolepa weera awiiwexexihe:
3 annaataphulela, ni anniiwanyeiha moovarihana ni ele yaalempwale, wannatthuneya weera Kristu ahaawe ni avinyererihiwe mookhwaani. Paulo annahima eeraka: “Kristu owo, Yesu. Yoowo miyo kinoolaleeraakani.”
4 Atthu akina a yaawo yaaroromela ni yaakhala vamoha ni Paulo ni Sila, ni akereku antxipale yaamukokhorela Muluku yaapaka etthu emoharu, waahela mpuwa athiyana antxipale oottittimiheya, yaaroromela.*
5 Mwa yeeyo, ayuda yaasareya nrima. Nto, yaahaathukumanya asilopwana oowuuma murima yaasa weetteettasa mapuro oowaattiwa,* awo yaakumihera munyakunyaku osidade. Ni yaaphiya vaate va Yasoni, emwaasaka Paulo ni Sila, weera empurulele vaate, yaaraayavo atthu antxipale.
6 Woona weera khayamphwannye Paulo ni Sila, yampurula Yasoni ni asinna akina mpaka wa asitokweene a esidade ele ekhuwelaka: “Asilopwana ale entannyera munyakunyaku mapuro ootheene, eri wenno, ala eri va,
7 ni Yasoni towaakhenle owannyawe. Ni atthu ootheene ala empaka itthu moovirikanyiha malamulo a Sesare yeeraka, ookhala mwene mukina oneeriwa Yesu.”
8 Yiiwakaru itthu iya, muloko wa atthu ni asitokweene a esidade ele yaatuthuwa.
9 Vano, eliviwakaru musurukhu wa Yasoni ni wa asinna akina, yaahaataphula.
10 Wiilakaru, asinna yaamurumiha Paulo ni Sila weera erowe oBereya. Ephiyakaru wu, yaavolowa musinakooka mwa ayuda.
11 Vano ayuda a oBereya yannatthuna oxuttera vantxipale waapwaha atthu a oTesalonika, woona weera atthu a oBereya yannatthuna vantxipale waakhela masu a Muluku, ni nenne nri nihiku awo yannathokorora nnene sene Soolempwa, weera yoone waari weera itthu sootheene yiiwalaaya saari sa ekhaikhai.
12 Vanonto antxipale a yaawo yaaroromela, waahela mpuwa asithiyana oottittimiheya yuuluma ekereku ni alopwana akina-tho.
13 Vano, ayuda a oTesalonika esuwelakaru weera Paulo aari oBereya alaleyaka-tho masu a Muluku, yaarowa iwo weera yatannyere munyakunyaku variyari va muloko mutokotoko wa atthu.
14 Vano, asinna moowaakuveya yaamutthawihera Paulo muxerexere mwa ephareya, mene Sila ni Timotiyu yaahanle weiwe.
15 Atthu yaamuhoola Paulo, yaamuhoola mpaka wAtena avinyaka yaatthika, Paulo aavahakaru miruku weera yamuleele Sila ni Timotiyu weera yakumane ni Paulo moohipisa.
16 Emaara Paulo anwehereraawe Sila ni Timotiyu wAtena, owo aanyoonyiwa vantxipale mwaha woowoona weera esidade ele yaasareya amiluku.
17 Vano, aapatxera waaxuttiha ayuda musinakooka waahela mpuwa atthu akina yaamukokhorela Muluku, nenne nri nihiku annaaxuttiha atthu mapuro oowaattiwa,* aweerihaka wuupuwelela etthu aahimaawe.
18 Mene atthu akina yaawo yaatthara sooxuttiha sa Epikorewu ni Estoiku, yaavaanyihana ni Paulo. Akina yaahima weera: “Mulopwana ola oowuulumaxa onhima heeni?” Akina yeera: “Ola onkhala ntoko onxuttiha itthu sa amiluku a elapo ekina.” Yaahima itthu iya mwaha wooweera Paulo aalaleya mitthenka sooreera woohima sa Yesu ni ovinyererihiwa.
19 Mwa yeeyo, yaamukuxa Paulo enamuroiha wArkabo, ni yaamukoha yeeraka: “Mookhala onleela sooxuttiha iya inyowani nyuwo munxuttihaanyu?
20 Mwaha wooweera munxuttiha itthu nihisuwenlaahu nnene ni nintthuna osuwela etthu entaphulelaaya sooxuttiha iyo.”
21 Atthu ootheene a wAtena ni ale yaaweela oxekura, yaahivaraka etthu,* wannaasivela wuuluma naari wiiwa itthu inyowani.
22 Vano, Paulo aaheemela variyari va Areopago ni aaheera:
“Atthu a wAtena, mwa itthu sootheene miyo kinnoona weera nyuwo atthu munvarexexa ettiini waapwaha atthu akina.”
23 Mwa ntakihero, emaara kaawehexexaaka itthu munkokhorelaanyu, komphwanya altaari ereenevo yoolepa yaahima: ‘Ookhala Muluku oohisuweliwa’. Muluku ene yoowo nyuwo mummukokhorelaanyu muhimusuwenle, ti yoowo miyo kinoolaleeraakani.
24 Muluku opattunxe elapo ni itthu sootheene sirimomo, ni Owo Pwiya a wiirimu ni a elapo ya vathi, ni khonkhala itemplu sootekiwa ni matata aatthu,
25 naari khanweherera okhaviheriwa ni atthu, woona weera khemmuthowa etthu, woona weera owo onnaavaha atthu ootheene ekumi, iphumu ni itthu sootheene.
26 Muluku ampanke mutthu mmoha paahi, nto moorweela mwa yoowo, sookhumelela miloko sootheene sa atthu sinkhala elapo yootheene, ni ti yoowo ohelenle etempu ni mwiilaano mwemmo atthu emphwanelaaya omakamo,
27 Muluku ontthuna weera atthu emwaasaaseke, yaapapeleke ni emphwanye, woona weera owo ori vakhiviru va mutthu ori poothe a hiyo.
28 Woona weera moorweela mwa yoowo nookhalano ekumi, nookhala ni ninneetta, ntoko enhimaaya anamalepa anyu yeeraka: ‘Hiyo-tho anamwane* awe.’
29 “Vanonto, woona weera hiyo anamwane a Muluku, nihuupuweleke weera Muluku onoolikana ni ewooru, eparatha, nluku naari etthu ekina epakinwe ni matata aatthu moovarihana ni muupuwelo aya.
30 Ekhaikhai weera khalayi Muluku aahaahiya atthu epakaka itthu iya mwaha wa ohisuwela waya; menento viinaano va, owo onnaaleela atthu ootheene enkhala mapuro ootheene weera erukunuxe murima.
31 Mwaha wooweera Muluku oothanla nihiku onkelaawe waathoriha atthu a elapo ya vathi ni exariya, moorweela mwa mulopwana mmoha omuthanliyaawe. Ni owo onvinyereriha mulopwana owo weera awoonihere atthu ootheene weera nihiku nno, nnoophiya.”
32 Emwiiwakaru weera owo annuuluma woohima sa ovinyererihiwa wa alipa ookhwa, akina yaapatxera omutheya, mene akina yeera: “Nnootthika ewoora ekina weera niwiiwekeni muulumaka woohima sa etthu eyo.”
33 Mwa yeeyo, Paulo aavinyavo,
34 mene atthu akina, yaatakanserana ni Paulo ni yaaroromela. Mpuwa mwa yaawo, aakhalavo Dionisio, yoowo aari mphuki a etripunaale ya Areopago, ni muthiyana mmoha iitthaniwa Damaris, ni yaakhala atthu akina.
