Miteko sa arummwa 10:1-48

  • Yoowooniheriwa ya Kornelio (1-8)

  • Yoowooniheriwa ya Pedru woohima sa inama Muluku otteelinhaawe (9-16)

  • Pedru onnamuxekura Kornelio (17-33)

  • Pedru onnaalaleera atthu yahaakhanle ayuda mitthenka sooreera (34-43)

    • “Muluku khaanoono nthalu” (34, 35)

  • Atthu ehikhanle ayuda ennaakhela munepa wootteela ni ennapatisiwa (44-48)

10  OKesareya aakhala mulopwana mmoha nsina nawe naari Kornelio, mutokweene mmoha a ekhurupu ya anakhotto* yiitthaniwa Italia.* 2  Owo aari mulopwana aamukokhorela ni aamoova Muluku vamoha ni atthu ootheene a vatthokoni vawe. Annaakhavihera vantxipale* atthu oohaawa yaari variyari va atthu, ni annanvekela Muluku voohihiyerereya. 3  Nihiku nimoha, ewoora yeettelaka 15, Kornelio aahoona nnene nlaika nimoha na Muluku mwa yoowooniheriwa awe, nimwaattamelaka ni neeraka: “Kornelio!” 4  Oovaka, Kornelio aawehexexa nlaika nne ni aaheerela: “Eheeni Apwiya?” Nno naamweerela: “Mavekelo anyu ni nikhavihero munaavahaanyu alipa oohaawa noophiya wiirimu, ni iyo soheeriha weera muupuweliwe ni Muluku. 5  Vanonto, mwaarumihe viinaano va asilopwana oYope, weera yanwiihe mulopwana oniitthaniwa Simoni, onsuweliwa okhala Pedru. 6  Mulopwana owo, olukamenle vaate va Simoni naxapala, orino empa muxerexere mwa ephareya.” 7  Nlaika nne nuuluma ni Kornelio nipwahakaru, owo aawiitthana arumeyi awe eeli ni nakhotto awe mmoha yoowo aamoova Muluku, 8  aahaaleela itthu sootheene ni aahaarumiha oYope. 9  Nihiku naattharelana, eriki weetta ekwaha aya ni yaattamelaka osidade, Pedru aawela vasulu va empa* ewoora yeettelaka 12. 10  Vanonto, owo aavoliwa vantxipale etala ni annatthuna otxa. Emaara yaarehereriwaaya yootxa, owo aahoona yoowooniheriwa; 11  aahoona erimu ehuleñyeene ni etthu etokotoko yoolikana ni elensoole ya eliinyu yankiyeene mwa iparte saya ixexe ekhuruwelaka elapo ya vathi. 12  Ni valensooleni vawo, yaakhalavo asinama a itiipu sootheene* eneetta ni meetto mixexe, oowiipurula ni apalame a wiirimu. 13  Vano, nsu nimoha naamweerela: “Pedru, nvinye mwiive ni mukhuure!” 14  Nto Pedru aahaakhula”: “Hooye Apwiya, miyo nkikhanle oopaka eyo, miyo nkinakhuure itthu soonyala naari sa mwiikho.” 15  Ni nsu nne naatthikela-tho wuuluma nuuwo, ekwaha yanaaveeli neeraka: “Muhiye wiitthana sa mwiikho itthu Muluku otteelinhaawe.” 16  Etthu ele yaaheereya ekwaha yanaararu, ni moowaakuveya elensoole ele yaahuukululiwa enaroihiwa wiirimu. 17  Pedru aari oovalavela, iikohaka eheeni yaataphulelaaya yoowooniheriwa ele onnaawe. Ariki wuupuwela hiihaale, asilopwana yaarumihinwe ni Kornelio yaakoha woowiini waari owannyawe Simoni, ni yaaheemela vamulako. 18  Awosa yaamwiitthana mwaneene vaate enamukoha waari weera Simoni yoowo onsuweliwa okhala Pedru, olukamenle weiwo. 19  Pedru nlelo eera uupuwelaka woohima sa yoowooniheriwa onnaawe, vaavo munepa wootteela waamweerenlaaya: “Mwiiwe, aakhala alopwana araaru enwaasani. 20  Nvinye, mukhuruwe ni mwaatthare awo muhuupuwenle veeli, mwaha wooweera ti miyo kaaruminhe.” 21  Mwa yeeyo, Pedru aakhuruwa anarowa okumana ni asilopwana ale ni aaweerela: “Miyo kiri va, ti yoomi munkaasaanyu. Munkaasera heeni?” 22  Yaamweerela: “Kornelio, mutokweene aanakhotto, mulopwana yoowo axariya ni ommoova Muluku, yoowo nloko nootheene na ayuda nnuulumaaya nnene woohima sa yoowo, orimwaakhela miruku sinkhuma wa Muluku moorweela mwa nlaika, weera awiitthaneleni nyuwo apwiya owannyawe, ni yootthuna weera awiiweeni etthu mukhanlaanyu oohima.” 23  Vano, Pedru aahaawopa ovolowa ni aahaavaha nipuro noolukamela. Vaxaakaru, Pedru aahaatthara, ni asinna akina a oYope yaarowa vamoha nuuwo. 24  Nivinreene nihiku nimoha, Pedru aaphiya oKesareya. Kornelio, eera anwehereraka, ni owo aahaathukumanya amusi awe ni asinthamwene awe oororomeleya. 25  Pedru avolowakaru, Kornelio aarowa okumana nuuwo, anakokhora ohoolo wawe ni anamuttittimiha. 26  Mene, Pedru aamweemexa eeraka: “Nvinye! Miyo-tho mutthu paahi.” 27  Emaara aatthekulaawe ni Kornelio, aavolowa ni aahaaphwanya atthu antxipale ethukumanneene. 28  Owo aaweerela: “Nyuwosa moosuwela weera nlamulo khaninwaakhulela ayuda okhala vamoha naari omwaattamela mutthu ori mmalapo.* Menento, Muluku ookoonihera weera kihimwiitthaneke naari mutthu mmoha mano oonyala naari amwiikho. 29  Tivawonto, kiitthaniwakaru, miyo nkuupuwenle veeli. Vanonto, mukileele mwaha wa heeni mukiitthannaanyu?” 30  Kornelio aamwaakhula: “Mwa mahiku maxexe evinre muttuli, miyo keera kivekelaka owaani ewoora ene siiyeela ya 15, vaavo aakikhumelenlaawe mulopwana aawanre ikuwo sootxerimela;* 31  Owo aaheera: ‘Mavekelo anyu ni nikhavihero munaavahaanyu alipa oohaawa, noophiya wiirimu, ni iyo soheeriha weera muupuweliwe ni Muluku. 32  Vanonto, mwaarumihe asilopwana viinaano va oYope, weera yanwiihe mulopwana oniitthaniwa Simoni onsuweliwa okhala Pedru. Mulopwana owo olukamenle vaate va Simoni naxapala orino empa muxerexere mwa ephareya. 33  Nto kaahaaruma atthu moowaakuveya owiitthanani, mooreera murima nyuwo mohoowa mpaka nno. Vano hiyo nri oothukumana ohoolo wa Muluku weera niiwe itthu sootheene Yehova* oorummaaweni ohima.” 34  Nto, Pedru aapatxera wuuluma ni aaheera: “Vano kinniiwexexa nnene sene weera Muluku khaanoono nthalu, 35  mene, onnawaakhulela atthu a maloko ootheene emmoova ni empaka itthu sooreera. 36  Moorweela mwa Yesu Kristu, Muluku aahaarumihela anamwane a Israeli mitthenka sooreera ni sa murettele, Kristu ori Pwiya aatthu ootheene. 37  Nyuwosa moosuwela mwaha heeni wuulummwa oYudeya wootheene, opatxeraka oGalileya, Yohani alaleyakaru opatiso: 38  woohima sa Yesu, yoowo aari oNazareti, yoowo Muluku omuthanliyaawe ni munepa wootteela ni owera; owo aaheetta mittetthe sootheene avaraka miteko sooreera ni aalamihaka ootheene ale yaahasuliwa ni Diabo, mwaha wooweera Muluku aari nuuwo. 39  Hiyo anamoona a itthu sootheene Yesu opankaawe elapo ya ayuda ni oYerusalemu. Mene awo aamwiiva emukhomelaka vamwirini. 40  Muluku anvinyereriha nihiku nanaararu ni aahaakhulela weera ooniwe ni atthu, 41  khaiyene wa atthu ootheene, mene wa anamoona ethanlinwe varaatxiru ni Muluku, hiyo, naatxiiye ni naawunre vamoha avinyererihiwakaru mookhwaani. 42  Owo-tho, aavaha nlamulo weera naalaleere atthu ni nihelele onamoona woomalela weera owo othanlinwe ni Muluku weera akhale mphuki aatthu akumi ni ookhwa. 43  Ti yoowo maprofeta ootheene emmuhelelaaya onamoona, yeeraka weera ootheene ole anaamwiiwelele owo, onaaleveleliwe soottheka mwaha wa nsina nawe.” 44  Pedru nlelo ariki wuuluma itthu iya, munepa wootteela waahaakhuruwela* atthu ootheene yiiwa masu a Muluku. 45  Mpaka oororomeleya yaawiiye vamoha ni Pedru yaatikhiniheya, mwaha wooweera yoovaha ya munepa wootteela* yannavahiwa-tho atthu a maloko ootheene mahala ene. 46  Woona weera awo yaawiiwa yuulumaka muulumo ni envuwihaka Muluku. Nto mwaha wa yeeyo, Pedru aaheera: 47  “Atthu ala ahaakhela munepa wootteela ntoko hiyo naakhenlaahu. Vanonto, neereke ookhala oneera awere owootxeeliha weera epatisiwe ni maahi?” 48  Vano, Pedru aaruma weera atthu ale yapatisiwe mwa nsina na Yesu Kristu. Ni awosa yanvekela Pedru weera akhale vamoha ni yaawo mpuwa mwa mahiku vakhaaniini.

Footnotes

^ Naari: “namahoolela a ekhurupu ya anakhotto 100.
^ Yaari ekhurupu ya anakhotto a oRoma yaakhala anakhotto 600.
^ Naari: “Annaavaha soovaha sa mahala.” Nwehe masu oowiiwanyeihiwa.
^ Eyo tiiyo, Pedru aawela vasulu va empa weera avekele.
^ Naari: “amoota-moota.”
^ Naari: “a nloko nikina.”
^ Naari: “soowaara.”
^ Munwehe Ap. A5.
^ Naari: “yaahaakhela.”
^ Naari: “ya mahala.”

Copyrights for this publication