Miteko sa arummwa 25:1-27
25 Evinreene mahiku mararu, Festo aphiñyeene eprovinsiya ya oYudeya ni opatxera olamulela, aakhuma oKesareya arowaka oYerusalemu.
2 Ni asitokweene aanamakeya ni asilopwana oottittimiheya aayuda yaamuleela mwaha wa Paulo. Yaapatxera onvekela Festo moonyeserera
3 weera arume owiihiwa Paulo mpaka oYerusalemu. Mene awo yampaka palano oomwiipithela mmuseweni weera emwiive.
4 Mwa yeeyo, Festo aawaakhula aweerelaka weera wannatthuneya Paulo ovirelela otthukiwa oKesareya ni weera Festo aamutthikela moohipisa oKesareya.
5 “Vano”, owo aaweerela, “murowe vamoha ni miyo ahooleli akina a nyuwo, weiwo yahime etthu yoonanara opankaawe mulopwana owo, waari weera oopaka etthu yoonanara”.
6 Evirakaru mahiku 8 naari 10 areene variyari vaya, owo aarowa oKesareya ni nihiku naattharelana, owo aakilaathi nipuro suulummwa milattu* ni aaruma weera awiihiwe Paulo.
7 Paulo aphiyakaru nipuro suulummwa milattu,* ayuda yaakhumme oYerusalemu yaamurukurera, emootheraka itthu sintxipale soowoopiha, seiyo yahaaweraaya woonihera weera saari seekhaikhai.
8 Menento, Paulo aahaakhula iisaakihaka eeraka: “Miyo nkitthekenle Nlamulo na ayuda, na mutemplu naari na Sesare.”
9 Festo, atthunaka waahakalaliha ayuda, aamwaakhula Paulo amweerelaka: “Muntthuna orowa oYerusalemu ni othorihiwa woohima sa itthu iya ohoolo waka, wuuwu?”
10 Paulo aamweerela: “Miyo kiri nipuro nnuulummwa milattu* na Sesare mwemmo kintthuneyaaka othorihiwamo. Miyo nkaatthekenle ayuda, ntoko nyuwo musuwenlaanyu nnene sene.
11 Miyo kaareene nakrime ni kaapankeene etthu kimphwanelaaka wiiviwa, nkinkhootta okhwa; mene, waareene weera itthu enkootheraaya asilopwana ala ti soowootha, khaavo orino owera* wookinnyerera wa awo mwaha wootxontteliwa. Miyo kintthuna okela wa Sesare!”
12 Vano, Festo uulumakaru ni anamiruku, aamwaakhula Paulo: “Woona weera nvekenle othorihiwa ni Sesare, munrowa othorihiwa ni Sesare.”
13 Evirakaru mahiku vakhaaniini, mwene Agripa ni Berenisi, yaaphiya oKesareya weera yamuulumihe Festo.
14 Woona weera yanviriha mahiku mantxipale ereene weiwo, Festo aamuleela mwene mwaha wa Paulo eeraka:
“Ookhala mulopwana mmoha Felexi omuhiñyaawe atthukinweene;
15 emaara kaaraaka oYerusalemu, asitokweene aanamakeya ni asitokweene aayuda yaakiwiihera mitthenka woohima sa Paulo ni yaavekela weera owo atthukiwe.
16 Miyo kaawaakhula weera nlamulo na aroma khannaakhulela otthukiwa mutthu orinono mulattu ahinaayeene okumana ni atthu oraaweno mulattu weera akhaleno eparakha yoowiisaakiha woohima sa itthu onootheriwaawe.
17 Nihiku naattharelana, ephiyakaru atthu aaraaweno mulattu,* moowaakuveya kaakilaathi nipuro nuulummwa milattu* ni kaaruma weera awiihiwe mulopwana owo.
18 Atthu ale yaamoothera* yeemenlaaya weera yuulume, khayuulumme* naari etthu emoha yoonanara kuupuwelaaka weera oopaka.
19 Awosa yaanyakulihana woohima sa ettiini aya ni woohima sa mulopwana mmoha oniitthaniwa Yesu, yoowo okhwiiye, ni Paulo onnyesereraawe ohima weera owo ori mukumi.
20 Kihisuwelaka moota woowuuluma mwaha aya ola woonyakulihana, kaamukoha Paulo waari weera annatthuna orowa oYerusalemu weera athorihiwe weiwo woohima sa nyaha iya.
21 Menento, Paulo avekelakaru ovirelela okhala ootthukiweene awehereraka yoothanla ya Augusto,* kaalamula weera akhale mukateya mpaka vaavo miyo keeraaka kimurumihe wa Sesare.”
22 Vano, Agripa aamweerela Festo: “Miyo kinnatthuna omwiiwa mulopwana owo mwaneene aka.” Festo aamweerela: “Omaalo munoomwiiwa.”
23 Nihiku naatharelana, Agripa ni Berenisi yaaphiya ni ovuwa otokweene ni yaavolowa nipuro nuulummwa milattu vamoha ni anamahoolela aanakhotto ni asilopwana oottittimihiwa a esidade. Festo alamulakaru weera awiihiwe Paulo, owo aawiihiwa.
24 Festo aaheera: “Mwene Agripa ni atthu ootheene muri va, munwehe mulopwana ola yoowo ayuda ootheene ovinyera oYerusalemu ni nno, enkivekelaaya ekhuwelaka yeeraka, owo khamphwanela okhala mukumi.
25 Miyo kaahoonelela weera owo khaapanke etthu yaaphwanela wiiviwa. Tivawonto, emaara aavekenlaawe othorihiwa ni Augusto, kaalakela omurumiha weiwo.
26 Menento, nkaanoono etthu yoowaalepela Apwiyaka woohima sa mulopwana ola. Tivawonto kinwiihalaaka ohoolo wa asipwiya, otepaxa wene Nyuwo Oottittimiheya mwene Agripa, weera mwamukohakoha vale, kikhaleno etthu yoolepa.
27 Kinoona weera khaiyene ti wa miruku omurumiha mutthu ootthukiwa wa Sesare mutthu ahihimmeene mulattu awe.”
Footnotes
^ Naari: “otripunaale.”
^ Naari: “otripunaale.”
^ Naari: “otripunaale.”
^ Naari: “edireitu.”
^ Naari: “yaamoothera.”
^ Naari: “mutripunaale.”
^ Naari: “aaraaweno mulattu.”
^ Naari: “khiyaamoothenre.”
^ Nna khaiyene nsina na mutthu. Mene nsina noottittimiha aavahiwaawe namalamulela a oRoma.
