Miteko sa arummwa 26:1-32
26 Agripa aamweerela Paulo: “Vano, munnaakhuleliwa wuuluma weera mwiisaakihe.” Nto, Paulo aahookola ntata ni aapatxera wuuluma iisaakihaka:
2 “Mwene Agripa, kiri oohakalala mwaha wookhala ohoolo wanyu weera kiisaakihe woohima sa itthu sootheene ayuda enkootheraaya,
3 mwaha wooweera nyuwo moosuwela sookhovelela sootheene ni ohiiwanana okhanle variyari va ayuda. Tivawonto kinoovekelaakani weera mukiiwe moopixa murima.
4 “Mweekhaikhai, woohima sa ekumi kaaraakano ovinyera emiravo aka, variyari va nloko naka ni oYerusalemu, ayuda ootheene
5 ekisuwenle ovinyera khalayi ene aasuwela nnene weera miyo kaari nfarisi, ntoko munsuwelaanyu, ettiini ela ennatthara vantxipale malamulo waapwaha* ayuda akina; awo yatthuna vale, pooti ohelela onamoona itthu iya kinuulumaaka.
6 Mene olelo va, kinoothorihiwaru, mwaha wa yooweherera Muluku aalaihenraawe makholo ahu.
7 Aani, ti yooweherera ene yeeyo mahimo ahu 12 enwehereraaya okwanela, envarelaka muteko Muluku othana ni ohiyu voohihiyerereya. Amwene, ti mwaha wa yooweherera ene yeela kinootheriwaaka* ni ayuda.
8 “Mwaha wa heeni munoonaanyu oxupa ororomela weera Muluku onimwaavinyereriha atthu ookhwa?
9 Miyo, kannaroromela weera kannatthuneya ovarela muteko itthu sootheene weera kinvirikanyihe Yesu, muNazareti.
10 Ni ti yeeyo, kaapankaaka oYerusalemu. Kivarelaka muteko owera kaavahinwaaka ni asitokweene aanamakeya; kaahaatthukiha oororomeleya* antxipale; ni emaara yeeyo yaalamuliwaaya wiiviwa, miyo kannaakhulela wiiviwa waya.
11 Isinakooka sootheene, kaaphwanyaakamo, ikwaha sintxipale kannaattaruxa ni yootthuna weera ehiye ororomela waya. Woona weera nkaakhweñye waanyoonyeriwasa awo, miyo kannaattharatthara mpaka mittetthe soorakamelana ni esidade.
12 “Ni yaari ni yootthuna ene yeela miyo kaarowaaka oDamasku, kaakhulelinweene ni kivahinweene owera ni asitokweene aanamakeya.
13 Amwene, keettaka mmuseweni kirowaka oDamasku ewoora ya 12, kaahoona waara waakhuma wiirimu, waara iwo waari wootepaxa opwaha nsuwa, waakimwaleela miyo* ni atthu yeetta vakhiviru vaka mukwaha ni miyo.
14 Ootheene hiyo naamorela vathi, vano kaahiiwa nsu nimoha nikeerelaka nnuulumo na eheberi: ‘Saulo, Saulo, mwaha wa heeni munkittharattharaanyu? Nyuwo munimweera wiivoreya vaavo munwanaanyu ni miyo.’*
15 Miyo kaakoha: ‘Nyuwo taani apwiya?’ Ni Apwiya awo yaakaakhula: ‘Miyo Yesu, yoowo mummuttharatthara anyu.
16 Mene vano, ovinye ni weemele. Kohookhumelela weera koothanle weera okhale murumeyi aka ni namoona a itthu wonnaawe ni itthu kinkelaaka owoonihera woohima sa miyo.
17 Ni miyo kinkela owaakiha wa atthu ala ni wa maloko kinkelaaka woorumiha
18 weera mwaahule maitho aya, ni mwaavinxe veepiphini mwaaroihaka voowaara ni mwaavinxaka mmatatani mwa Satana mwaaroihaka wa Muluku, hiiho Muluku onimwaalevelela soottheka saya weera yaakhele yoohiyeriwa aya variyari va atthu ale oothanliwa oowaara enkiroromela miyo.’
19 “Vano, mwene Agripa, miyo kaahiiwelela* yoowooniheriwa ele ya wiirimu konnaaka,
20 mene woopatxerani, kaaronwe wa atthu yaakhala oDamasku, avinyaka kaahaalaleera atthu oYerusalemu ni mittetthe sootheene sa oYudeya, nave-tho wa amalapo, kaalaleeraka mitthenka weera yannatthuneya orukunuxa murima weera emukokhoreleke* Muluku, evaraka miteko sinoonihera ottharuwa.
21 Waari mwaha ene yoola ayuda yaakivanraaya mutemplu enatthuna okiiva.
22 Menento, woona weera Muluku onnakikhavihera, mpaka olelo kinnavirelela waalaleera akhaanini ni asitokotoko, ni nkinhima itthu sihikhanle iye Maprofeta ni Mose yaahimmaaya weera samweereya:
23 weera Kristu aamuhaaxiwa ni, ntoko oopatxera ovinyererihiwa mwa alipa ookhwa, aamwaalaleera waara atthu a nloko nna ni atthu a maloko makina.”
24 Paulo nlelo ariki wuuluma iisaakihaka, Festo aahuuluma ni nsu noowiiwanyeya: “Paulo, onkhwa anepa! Osuwela waa onnaweeriha okhala namukhwa-anepa!”
25 Menento Paulo, aahaakhula: “Hooye Oottittimiheya Festo, miyo nkinkhwa anepa, mene masu kinuulumaaka teekhaikhai ni kinuuluma kuupuwelaka nnene.
26 Mweekhaikhai, miyo kinnaroromela weera mwene kinuulumaakano mootaphuwa itthu iya, oosuwela nnene sene itthu iya, miyo kinnaroromela weera khiyaavo mwa itthu iya kuulummaaka ohiiwalaawe nnene mwaha wooweera khiyaavo mwa itthu iya seereñye mmwiitihoni.
27 Nyuwo mwene Agripa, munnaroromela etthu enhimaaya Maprofeta? Miyo koosuwela weera munnaroromela.”
28 Menento, Agripa aamweerela Paulo: “Mwa etempu vakhaaniini mwaamukeeriha okhala mukristu.”
29 Vano, Paulo aahaakhula: “Kinnanvekela Muluku weera mwa etempu vakhaaniini naari yintxipale, khaiyene nyuwo paahi Oottittimiheya, mene-tho wa atthu ootheene enkiwiriyana olelo va ekhale ntoko miyo, mene khaiyene etthukinweene ni ikorenti iya kitthukelinwaaka.”
30 Moottharelana, mwene, kovernatore, Berenisi ni asilopwana yaakilanthi ni awo, yaaheemela.
31 Ni, ekhumaka, yannuuluma yaaworu yeeraka: “Mulopwana ola khapanke etthu ophwanenlaiye wiiviwa naari otthukiwa.”
32 Vano, Agripa aamweerela Festo: “Mulopwana ola ahaavekenle orowa wa Sesare, aamutaphuliwa.”
