Miteko sa arummwa 2:1-47
2 Vano, nihiku na eFeesta ya Pentekoste, atthareli ootheene yaathukumana nipuro nimoha.
2 Mootutuxera, waahiiwanyeya onyakhula waakhuma wiirimu, waalikana ni epheyo yoowuupa ni waasareya empa yootheene ele yaakilanthaayamo.
3 Ni awosa yaapatxera woona etthu yaalikana ni malumi a mooro, ni malumi awo yaamwaramwareya ni yaamweemelela mutthu ti mutthu a yaawo;
4 ni ootheene yaasareya munepa wootteela ni yaapatxera wuuluma muulumo makina moovarihana ni munepa wootteela waavahaaya weera yuulume.
5 Etempu ene yeele, yaari oYerusalemu ayuda ootheene yaamukokhorela Muluku yaakhuma maloko ootheene a elapo ya vathi.
6 Vano, niiwanyeyakaru nsu nne, waathukumana muloko mutokotoko wa atthu ni waatikhiniheya owiiwakaru atthareli weera awo yuuluma muulumo awo yuulumaaya.
7 Mweekhaikhai, yaatikhiniheya ni yaaheera: “Alasa ootheene enuulumasa va, khaiyene aGalileya?
8 Vanonto, onwereya moota heeni mutthu ti mutthu a hiyo va, wiiwa nuulumo oyarelinwaawe?
9 Variyari vahu aakhalavo aparti, amedi ni aelamiti, atthu enkhala oMesopotamia, oYudeya ni oKapadosia, oPontu ni a eprovinsiya ya wAsia,
10 a oFrisia ni oPanfiliya, wExipitu mittetthe sa oLibia soowaattamela oKirene ni aakhala atthu ennixekura a oRoma ni aakhala ayuda ni ale ehintthara sooxuttiha sa ayuda,
11 akreta ni arabia-tho. Noowiiwa yuulumaka nnuulumo nahu itthu sootikhiniha sa Muluku.”
12 Aani, atthu ootheene yaatikhiniheya ni yaavalavela ni yanneerelana mukina ni mukhwaawe: “Etthu ela entaphulela eheeni?”
13 Menento atthu akina yannaaramusa yeeraka: “Awosa eroohapaliwa.”
14 Nto Pedru aaheemela vamoha ni arummwa 11, ni aahuuluma ni atthu ni nsu noowiiwanyeya eeraka: “Atthu a oYudeya, ni atthu ootheene nyuwo munkhala oYerusalemu, mwiiwe nnene masu aka:
15 Mweekhaikhai, atthu ala khehapalinwe ntoko nyuwo munuupuwelaanyu, woona weera nlelo oxeexelo.*
16 Moovirikana ni eyo munuupuwelaanyu, ela eneereya va ti yeeyo yaahimmwale ni profeta Yoweli:
17 ‘“Mahiku oomalihera”, Muluku enre, “kinaavahe* munepa aka wa atthu a mukhalelo wootheene, anamwane anyu asilopwana ni anamwane anyu asithiyana eni eprofetisari, amiravo anyu enoone soowooniheriwa ni atthu oowuuluvala eneelohe sooloha,
18 mpaka akaporo aka asilopwana ni akaporo aka asithiyana kinimwaavaha munepa aka mahiku ene yaawo ni awo eni eprofetisari.
19 Kinaapake miiriira wiirimu ni ithoonyero elapo ya vathi: ephome, mooro ni mahutte a mwiixi.
20 Nsuwa nnootatuxiwa epiphi ni mweeri onaatatuxiwe okhala ephome, nihinaaye owa nihiku ntokweene noovuwa na Yehova.*
21 Ni ootheene ale envekela eromolaka nsina na Yehova,* enoovuluxiwa.’”
22 “Atthu a wIsraeli, mwiiwe masu aka: Yesu muNazareti, mulopwana Muluku omuthanliyaawe ohoolo wanyu, omwaakhulenlaawe variyari vanyu apakaka miiriira ni miteko sootikhiniha ni ithoonyero anvarelaka muteko owo, ntoko nyuwosa musuwenlaanyu.
23 Muluku aalakela ni aasuwela vahinaaye* weera Yesu anvahereriwa, woona weera oovahereriwa. Ni monvaherera mmatatani mwa atthu oonanara murima, nyuwo moomukhomela vamwiirini ni moomwiiva.
24 Vano Muluku onvinyereriha owo mookhwaani, anvinyererihaka woona weera khawaareerela ovirelela okhala mookhwaani.
25 Woona weera Davidi, onnamuhima owo eeraka: ‘Etempu yootheene Yehova* ori mmuupuweloni mwaka, woona weera owo ori moono aka woolopwana weera kihittikinyiwe.
26 Tivawonto, murima aka waahakalanlaaya ni kuulummaaka moohakalala vantxipale, ni kinrowa okhalaka ni yooweherera;
27 mwaha wooweera khamunkihiya Mmahiye, naari khamwaakhulela ohiya murutthu wa murumeyi anyu oororomeleya wunttaka mmahiye.*
28 Mookisuweliha ephiro ya ekumi, ni munookihakalaliha ohoolo wanyu.’
29 “Asinna, mukaakhulele wooleelani woohookhuwani woohima sa nikholo nahu Davidi: owo ohookhwa ni oovithiwa, ni mahiye awe eri variyari va hiyo mpaka olelo.
30 Woona weera aari profeta, ni owo aasuwela weera Muluku, aamuroromeliha weera mmoha a osuulu awe aamukilaathi veehitxeni* vawe,
31 owo aasuwela vahinaaye ovinyererihiwa wa Kristu, ni aahuuluma woohima sa eyo weera owo khaakela ohiiwa Mmahiye,* ni weera murutthu awe, khawaakela wuntta.
32 Muluku onvinyereriha Yesu owo, ni ootheene hiyo anamoona a etthu eyo.
33 Woona weera owo oovahiwa otokweene moono woolopwana wa Muluku, ni ohaakhela munepa wootteela waalaiherinwe ni Tiithi, ti yoowo oovanheni* ela nyuwo munoonaanyu ni muniiwaanyu.
34 Mene Davidi, kharonwe wiirimu, nto owo enre: ‘Yehova,* ooweerela Apwiya aka: “Mukilaathi moono aka woolopwana,
35 mpaka miyo waavonyera vathi vamanaani anyu, amwiittani anyu.”’
36 Vano, atthu ootheene a wIsraeli, eroromele weera Muluku oomukhaliha Yesu yoowo nyuwo mmwiivalaanyu vamwirini, Pwiya ni Kristu.”
37 Yiiwakaru masu ala, atthu ale waahaariipa murima vantxipale, ni yaamukoha Pedru ni arummwa akina yeeraka: “Asinna, nipakeke eheeni?”
38 Pedru aawaakhula aweerelaka: “Murukunuxe murima, ni mutthu ti mutthu a nyuwo apatisiwe mwa nsina na Yesu Kristu, weera soottheka sanyu sileveleliwe ni munaakhele yoovaha* ya munepa wootteela.
39 Woona weera yoolaihera ela ti yawinyu ni ya anamwane anyu, ni atthu ootheene yaale enkhala ottayi wene, aani, yaawo ootheene Yehova* Muluku ahu aneeraawe awiitthanele.”
40 Ni Pedru annahelela onamoona woomalela ni annawooperera ni masu makina eeraka: “Nvuluxiwe mwa atthu ala oowuuma murima.”
41 Vano, atthu yaakhulenle ni murima wootheene masu a Pedru, yaapatisiwa. Ni nihiku nne atthu oophiyeraka 3.000, yaatakanserana naawo.
42 Khayaahiyerera oxuttera sooxuttiha sa arummwa, yanniiwanana mukina ni mukhwaawe, yannatxa vamoha ni yannavirelela ovekela.
43 Mweekhaikhai, atthu ootheene yannoova ni arummwa yaapatxera opaka sootikhiniha ni miiriira sintxipale.
44 Ootheene yaamuroromenle Yesu, yaathukumana vamoha ni yannakawana sootheene yaaraayano;
45 yannatumiha imatta saya ni itthu saya, ni musurukhu ene yoowo yannakawana ni mutthu ti mutthu moovarihana ni soothoiwa sawe.
46 Nihiku ti nihiku yannathukumana empa ya Muluku, ni yootthuna emoha yannatxa vamoha impa soovirikana, ni yannakawana yootxa moohakalala ni murima wootheene,
47 awosa yannanvuwiha Muluku, nave atthu yannasiveliwa naawosa. Nenne nri nihiku Yehova* annaavuluxa atthu, nto awo yannakhala arumeyi awe.
Footnotes
^ Eyo tiiyo, ewoora ya 9.
^ Naari: “kinaamwaramware.”
^ Naari: “varaatxiru.”
^ Naari: “Hades.” Nwehe masu oowiiwanyeihiwa.
^ Naari: “vakaterani”.
^ Naari: “Hades.” Nwehe masu oowiiwanyeihiwa.
^ Naari: “oomwaramwarenleni.”
^ Naari: “yoovaha ya mahala.”
