Miteko sa arummwa 14:1-28
14 Wikoniyu, Paulo ni Barnaba yaavolowa musinakooka mwa ayuda ni yaahuuluma nnene mpaka muloko mutokotoko wa atthu waaroromela, waahela mpuwa ayuda ni akereku,
2 menento, ayuda yahaaroromenle, yaahaasesera amalapo weera ewiitteke asinna.
3 Nipuro nne, Paulo ni Barnaba ekhaviheriwaka ni Yehova;* yaaviriha etempu yintxipale elaleyaka moolipa murima; ni Muluku annoonihera weera aari ni yaawo, ahelelaka onamoona oreera wawe murima,* aavahaka awo owera woovara miteko sootikhiniha ni miiriira.
4 Menento, muloko wa esidade ele waakawanyeya: akina yaattharaka ayuda ni akina yaattharaka arummwa.
5 Vano, atthu a maloko makina, vamoha ni ayuda ni ahooleli aya, yaathanla waahasula ni waavonya maluku.
6 Esuwelakaru* eyo, yaatthawela oListra ni oDerbe, esidade ya oLikawoniya ni mittetthe soowaattamela.
7 Weiwo, yaavirelela olaleya mitthenka sooreera.
8 Olistra, aakhala mulopwana mmoha oorakala manaani;* owo aari oorakala ovinyera eyareliwo, khaatonko weetta. Aarookilaathi,
9 amwiiwelelaka Paulo uulumaka. Paulo anwehexexaka mulopwana ole ni amoonakaru weera annaroromela weera aamulamihiwa,
10 aahuuluma moowiiwanyeya eeraka: “Mweemele.” Vano, mulopwana ole aatupha eemela anapatxera weetta.
11 Atthu yoonakaru ele Paulo aapankaawe, yaakhuwela nnuulumo na elikawoniya yeeraka: “Miluku soonikhuruwela hiyo ntoko atthu!”
12 Awo yaapatxera omwiitthanela Barnaba nsina na Zeu ni Paulo nsina na Herme, woona weera ti yoowo uuluma vantxipale.
13 Vano, namakeya a muluku Zeu, yoowo etemplu awe yaari waattamela vamulako va esidade, aakuxa imompe vamoha ni ifuloore* mpaka vamulako, ni aatthuna onvaha makeya vamoha ni muloko.
14 Vaavo, murummwa Paulo ni Barnaba yaasuwenlaaya eyo, yaapera soowara saya, yaatthimakela variyari va atthu ni yaakhuwela:
15 “Atthwaala, mwaha wa heeni mumpakaanyu ela? Hiyo-tho atthu ntoko nyuwo ni nookhalano sootteettheya imoha-moharu ntoko sawinyu. Ni nnoolaleerani mitthenka sooreera weera muhiye okokhorela miluku iya sa ethiru weera mmukokhoreleke Muluku mukumi, opattunxe erimu, elapo ya vathi, ephareya ni itthu sootheene siri mmo.
16 Khalayi, owo aahaakhulela weera maloko yeetteleke iphiro saya,
17 nnaamweera aahimme hiiho, owo khaahiñye wiihelela onamoona wa mwaneene awe, awooniheraka oreera murima aavahaka epula ni oruwera vantxipale, aahaavaha yootxa yintxipale ni aahaatteeliha murima.”
18 Nnaamweera yaahima itthu iya, arummwa ale, waahaaxupa vantxipale waahiiha atthu ale weera ehaavahe makeya.
19 Mene, yaaphiya ayuda a wAntiyokiya ni a wIkoniyu yaawo yaasesenre muloko waatthu. Vano, yanvonya maluku Paulo ni yampurulela vaate va esidade, yuupuwelaka weera ohookhwa.
20 Menento etempu atthareli yaamurukurenraaya, owo aavinya anavolowa osidade. Nihiku naattharelana, owo aavinya vamoha ni Barnaba enarowa oDerbe.
21 Elaleerakaru mitthenka sooreera esidade ele ni yaapakakaru atthareli antxipale, yaatthikela oListra, wIkoniyu ni wAntiyokiya.
22 Weiwo, yaahaalipiha atthareli ewoopereraka weera evirelele olipiha nroromelo naya ni yaaweerela: “Weera nivolowe Moomweneni wa Muluku, nintthuneya oviriha maxupo mantxipale.”
23 Opwaha mwa yeeyo, yoole ori muloko yaahaathanla asitokweene a mmulokoni, epakaka mavekelo ni emutthukaka ramasaani, ni yaawinnyerera mmatatani mwa Yehova* yoowo yaamuroromelaaya.
24 Moottharelana, yaavira oPisidia, yaaphiya oPanfiliya.
25 Ni, elaleyakaru mitthenka sa Muluku oPerge, yaarowa* wAtaliya.
26 Yanwela paarku enarowa wAntiyokiya, weiwo asinna yanvekenlaayawo Muluku weera amoonihere Paulo ni Barnaba oreera wawe murima* weera ewere ovara muteko, yoowo vano yaamalinhaaya.
27 Ephiyakaru ni ethukumanakaru ni muloko, yaahima itthu sintxipale Muluku aapankaawe aavarelaka muteko awo ni moota Muluku aahulenlaawe mulako amalapo* weera ekhale oororomeleya.
28 Nto yaakhala ni atthareli etempu yintxipale.
