Miteko sa arummwa 3:1-26
3 Pedru ni Yohani yeera erowaka otemplu ovekela, ewoora ya 15,
2 emaara ene yeele, eera ateexinweene mulopwana mmoha aayarinwe oorakaleene. Mahiku ootheene owo annahiiwa waattamela vamulako wa etemplu, yoowo wiitthaniwa Mulako Wooreera, weera aavekeleke eximola* atthu yaavolowa mutemplu.
3 Amoonakaru Pedru ni Yohani evolowaka mutemplu, owo aahaavekela eximola.
4 Vano, Pedru ni Yohani yanwehexexa, ni Pedru aamweerela: “Nkaniwehani.”
5 Menento, owo aahaawehexexasa, awehereraka waakhela etthu.
6 Vano, Pedru aamweerela: “Miyo, nkaanoono eparatha naari ewooru, mene miyo kinoovaheeni ele kiraakano. Mwa nsina na Yesu Kristu muNazareti, mweette!”
7 Nto Pedru anvara ni ntata nawe noolopwana ni aamweemexa. Moohipisa manaani awe ni ikosa sawe saalipa,
8 aatupha ni aaheemela, ni aapatxera weetta anavolowa mutemplu naawo, eettaka, atuphaka ni anvuwihaka Muluku.
9 Ni atthu ootheene yaamoona eettaka ni anvuwihaka Muluku.
10 Ni awosa yaamusuwela weera mulopwana ole aari yoole aakilaathi Vamulako Wooreera wa etemplu awehereraka waakhela eximola. Nto yaatikhiniheya ni etthu yaamweerenle mulopwana ole.
11 Nlelo mulopwana ole anvarenleene Pedru ni Yohani, muloko wa atthu ootheene waatikhiniheya vantxipale ni waatthimaka onakela okumana nuuwo nipuro niitthaniwa Nipithela na Salomoni.
12 Vaavo Pedru onnaawe eyo, aaheerela muloko: “Nyuwo ana a Israeli, mwaha wa heeni mutikhiniheñyaanyu niiyo, ni mwaha wa heeni munniwehaanyu hiyo ntoko nimulaminhe ni ikuru sahu naari mwaha wooweera nnanvarela muteko Muluku ni murima ahu wootheene?
13 Muluku a Abrahamu, a Isaki ni a Yakobe, Muluku a makholo ahu, tonvuwinhe Yesu Kristu murumeyi awe, yoowo nyuwosa mmwinnyerenraanyu ni mmukhonttaanyu ohoolo wa Pilatu, nnaamweera Pilatu aalakenle omutaphula.
14 Aani, mulopwana yoole axariya nyuwosa mmukhonttaanyu, ni munavekela weera ataphuliwe mulopwana yoowo aari nakrime,
15 hiiho nyuwosa moomwiiva Muhooleli Mutokweene onvaha ekumi. Mene Muluku onvinyereriha mwa alipa ookhwa, ni hiyo anamoona a etthu eyo.
16 Ni ti moorweela mwa nsina nawe, ni nroromelo nraahuno ni nsina nawe, mulopwana ola mummoonaanyu ni mmusuwenlaanyu olammaawe. Mwaha wa omuroromela wahu Yesu, woomweeriha mulopwana ola okhala nnene sene ohoolo wa atthu ootheene nyuwo.
17 Vano asinna, miyo koosuwela weera mpanke itthu iya mwaha woohisuwela wanyu, hiihaale ntoko ahooleli anyu.
18 Mene mwa moota ene yoola, yookwanela ele Muluku aahimmaawe moorweela mwa maprofeta ootheene: Kristu, aamuhaawa.
19 “Vanonto, muttharuwe, muhiye opaka soottheka weera soottheka sanyu sileveleliwe, weera Yehova* oowiihereni mahiku a murettele,
20 owo anaamurumihe Yesu Kristu, yoowo oothanlenlaaweni.
21 Owo anaakhale wiirimu mpaka etempu yaalaiherinwe orehereriwa itthu sootheene, seiyo Muluku aahimmaawe moorweela mwa maprofeta awe akhalayi.
22 Mweekhaikhai, Mose enre: ‘Yehova,* Muluku anyu, onoomukumihera variyari va asinninyu profeta oolikana ni miyo. Mwiiweleleke itthu sootheene owo onkelaawe wooleelani.
23 Aani, ole ohinkela omwiiwelela profeta owo, onoonyaanyiwa ni Muluku variyari va muloko awe.’
24 Ni ovinyera Samuweli, ni maprofeta ootheene, yaahima-tho mahiku ene yaala.
25 Maprofeta awo, aahima nivarihano Muluku opankaawe ni makholo anyu. Nivarihano nno ninnoohelani-tho mpuwa, woona weera Muluku aamulaihera Abrahamu weera: ‘Mwaha wa osuulu* anyu, maloko ootheene a elapo ya vathi enrowa oreelihiwa.’
26 Muluku anvinyererihakaru murumeyi awe oororomeleya, aamuruma weera apatxere wooreelihani nyuwo, weera muttharuwe soopaka sanyu soonanara.”
