Miteko sa arummwa 24:1-27
24 Evirakaru mahiku 5, namakeya mutokweene Ananiya aarowa areene vamoha ni asitokweene akina aayuda ni namwaakiha* mmoha oniitthaniwa Tertulo, ni awosa yaamukaxari* Paulo wa kovernatore.
2 Tertulo avahiwakaru masu weera uulume, owo aapatxera omoothera Paulo ohoolo wa kovernatore Felexi, eeraka:
“Mwaha wa Nyuwo Oottittimiheya, ninnakhala a murettele ni mwaha wa olamulela wanyu ni miruku, elapo ela ennakela vahoolo;
3 Oottittimiheya Felexi, etempu yootheene ni mapuro ootheene, ninnasuwela itthu nyuwo mumpakaanyu nave ninnaxukurela vantxipale.
4 Mene, weera nihikuxe etempu anyu yintxipale, kinvekela weera, mooreerani mwanyu murima, muniiwe moowaakuveya.
5 Hiyo nohoona weera mulopwana ola onnakumihera onyakulihana ni onnaweeriha ayuda ootheene enkhala elapo yootheene waavirikanyiha anamalamulela, ni owo muhooleli aanazareti.
6 Nave-tho aaheerera onanariha etemplu; tivanto ninvanraahu.
7 * ——
8 Oottittimiheya, mwamukoha vale, munimoona weera sootheene ninhimaahu ikhaikhai.”
9 Nave-tho, ayuda yaakhavihera ehimaka weera itthu sootheene sihimmwale ikhaikhai.
10 Kovernatore avahakaru esinaale ni muru weera Paulo uulume, Paulo aahaakhula:
“Noosuwela weera okhuma khalayi mpaka olelo, nyuwo muri mphuki a muloko ola, tivanto kinhakalalaaka wiisaakiha ohoolo wanyu.
11 Ntoko Nyuwo Oottittimiheya munoonaanyu mwaneenaanyu, kirowakaru oYerusalemu weera kamukokhorele Muluku khevinre mahiku 12.
12 Awosa khekiphwannye kinyakulihanaka ni mutthu mutemplu, naari waasesera atthu musinakooka naari nipuro nikina na esidade.
13 Etempu ene yeela, awosa khenwera owooniherani mathowa enoonihera weera itthu enkootheraaya ti seekhaikhai.
14 Mene, kinnaakhulela weera: miyo kinnamukokhorela Muluku a makholo aka ntoko namatthara a ephiro ya Apwiya, yeeyo awo eniitthanaaya ettiini, kinnaroromela ele enhimaaya Nlamulo ni Soolepa sa Maprofeta.
15 Miyo kookhalano yooweherera wa Muluku, yooweherera ene yeeyo atthu ala eraayano-tho, weera eneekhale evinyerero ya anaxariya ni oohixariya.
16 Tivawonto, kiniilipiheraaka weera etempu yootheene kikhaleno yoosuweliha ya murima yooreera ohoolo wa Muluku ni wa atthu.
17 Sivirakaru iyaakha sintxipale, kaarowa oYerusalemu kiwiihaka musurukhu* weera kaakhavihere atthu a nloko naka ni onvaha makeya Muluku.
18 Emaara kaarehereraaka itthu iya, awosa yaakiphwanya mutemplu, kireene ootteela ene ni kihikhanle ni muloko mutokotoko wa atthu naari nkaatannyera onyakulihana. Menento, mutemplu mmo yaakhala ayuda akina yaari a eprovinsiya ya wAsia
19 waari weera atthu awo aakhalano etthu yoophwanela okoothera, saano ereene va yuulumaka oohoolo wanyu.
20 Naari asilopwana ala ari va, ehime etthu heeni yoonanara ekiphwannyaayano emaara kaathorihiwaaka oSineetriyu.
21 Ehikhanle paahi masu yaawo miyo kuulummaaka emaara kaaraaka variyari vaya keeraka: ‘Mwaha wa ovinyererihiwa wa alipa ookhwa olelo va kinthorihiwaaka ohoolo wanyu!’”
22 Menento, woona weera Felexi aasuwela nnene sene woohima sa Ephiro ya Apwiya, aahintaka mulattu ole, eeraka: “Awa vale muhooleli aanakhotto Lisiya, kinoohima yoothanlaaka woohima sa mwaha ola.”
23 Muhoolo mwaya, owo aamulamula muhooleli aanakhotto weera Paulo avirelele otthukiwa, ni envahe otaphuwa, aakhulelaka weera atthu ekosoopeke sootthuna sawe.
24 Evinreene mahiku vakhaaniini, Felexi aahoowa vamoha ni amwaarawe, Drusila yaawo yaari muyuda; ni aaruma wiitthaniwa Paulo weera amwiiwe uulumaka woohima sa soororomela sawe woohima sa Yesu Kristu.
25 Menento, emaara Paulo aapatxenraawe wuuluma woohima sa exariya, wiihiiha ni othoriha onwa, Felexi aahoova ni aaheera: “Wa viinaano va, pooti muroweke, kakhalano eparakha veeli, kinooruma weera mwiitthaniwe, weera nwe-tho.”
26 Etempu emoharu, owo annatthuna vamurimani vawe weera Paulo anvahe musurukhu, nto mwaha wa yeeyo, annaruma weera iitthaniwe ikwaha sintxipale ni annatthekula nuuwo.
27 Sivirakaru iyaakha piili, Felexi aarantteliwa ni Ponsiyo Festo; nto, woona weera Felexi aatthuna waahakalaliha ayuda, aamuhiya Paulo mukateya.
Footnotes
^ Naari: “Advogado.”
^ Naari: “yaamoothera.”
^ Naari: “soovaha sa mahala.” Nwehe masu oowiiwanyeihiwa.
