Miteko sa arummwa 5:1-42
5 Menento mulopwana mmoha iitthaniwa Ananiya, vamoha ni amwaarawe, Safira, yaatumiha ematta aya.
2 Owo vamoha ni amwaarawe, yaavitha musurukhu mukina. Aakuxa musurukhu waahanle anarowa owinnya arummwa.
3 Mene Pedru, aamweerela: “Ananiya, mwaha wa heeni mmwaakhulenlaanyu Satana woowookani, oweerihani woototha munepa wootteela, nvukulaka musurukhu mutuminhaanyu ematta?
4 Ematta muhinaaye otumiha khaiyene yaari yawinyu? Ni mutumihakaru, musurukhu ene khaiyene waari wawinyu? Ni eheeni eweerinheni opaka etthu ntoko yeela? Nyuwo khanwootonthe atthu, mene mmootonthe Muluku.”
5 Ananiya iiwakaru masu ala, aamora ni aahookhwa. Ni atthu ootheene yiiwale eyo, yaahoova vantxipale.
6 Vano, yaahoowa amiravo enanvitikelela ni ekuwo. Moottharelana yaamukumihera vaate enarowa onvitha.
7 Sivirakaru iwoora tthaaru, amwaarawe-tho yaahoowa, ehisuwelaka etthu yeereñye.
8 Pedru aahaakoha: “Mukileele: Musurukhu ene ti yoola nyuwo ni aiyanyu mutumihenraanyu ematta?” Awo yaahaakhula: “Aani, ti yoola.”
9 Vano, Pedru aaweerela: “Mwaha wa heeni nyuwo ni aiyanyu, nvaanenlaanyu woototha munepa wa Yehova?* Manaani aatthu ale yaavinthe aiyanyu eri vamulako, ni awo enimookuxani vawo yookumiherakani vaate.”
10 Moohipisa aamorela vakhiviru vawe anakhwa. Amiravo ale evolowakaru yamphwannye akhwiiyeene, moottharelana yaamukumihera vaate ni enarowa onvittha waattamela aiyawe yaavithinwaayawo.
11 Vano, muloko wootheene ni atthu yiiwale yuulummwaka woohima sa eyo, yaahoova vantxipale.
12 Opwaha mwa yeeyo, arummwa, yannavirelela ovara miteko ni miiriira variyari va atthu; ni atthu ootheene yannathukumana nipuro na Nipithela na Salomoni.
13 Mene atthu akina yannoova otakanserana naawo, nto muloko wa atthu wuuluma itthu sooreera woohima sa awo.
14 Opwaha mwa yeeyo, alopwana ni athiyana antxipale, yannaaroromela Apwiya, ni yannatakanserana naawo.*
15 Aretta yannakumiheriwa vaate, musewe mutokweene ni yannaataleliwa mmaakani ni mminlini, weera Pedru aaviraka enaamukhalaru eruku awe mano, yaatave akina a yaawo.
16 Ni sannawa-tho miloko mitokotoko sa atthu sa isidade soowaattamela oYerusalemu, yaawiihaka aretta yaarino minepa soonanara ni ootheene awo, yannalamihiwa.
17 Mene mutokweene aanamakeya ni atthu ootheene yaari nuuwo yaari a ettiini ya asaduki, esareñyeene nrima, awosa yaaheemela.
18 Vano, yaahaavara* arummwa, enaaroiha mukateya.
19 Mene ohiyu ene yoole, nlaika na Yehova* naahula milako sa okateya nnaakumihera vaate, ni naaweerela:
20 “Murowe, mwiisooneihe mutemplu, ni mwavirelele waalaleera atthu mitthenka sootheene sa ekumi.”
21 Yiiwakaru masu ala, yaavolowa mutemplu oriki oxa, ni enapatxera oxuttiha.
Aphiyakaru mutokweene aanamakeya ni ale yaari nuuwo, yaawiitthana atthu ootheene yeerela eparte eSineetriyu ni asitokweene a ana a Israeli, ni yaaruma weera eroweliwe arummwa mukateya.
22 Vanonto makwaarta* ephiyakaru mukateya khiyaaphwannye. Ni awosa yaatthika enarowa ohima yeeraka:
23 “Niphiyakaru okateya, niphwannye milako sootheene siwalinweene ni silipihinweene, ni makwaarta yeemenleene vamulako, mene nihulakaru khanimphwannye mutthu mpuwa.”
24 Yiiwakaru eyo, mutokweene a mutemplu ni asitokweene aanamakeya, yaavalavela, ni yiikohaka woohima sa eheeni yeera yeereye woottharelana,
25 nto aaphiya mutthu ni anaweerela: “Asilopwana ale mwaawalenlaanyu mukateya, awosa eri otemplu, yaaxuttihaka atthu!”
26 Vano, mutokweene a mutemplu ni makwaarta awe, yaahaarowela mooreera murima, mwaha wooweera yannoova ovonyiwa maluku ni atthu.
27 Vano, awosa yaahaawiiha enaahiya variyari va eSineetriyu. Ni mutokweene aanamakeya, aahaakoha-koha.
28 Nohoolamulani weera muhixuttiheke nvarelaka muteko nsina nna, vanonto nkawehani! Moomusariha Yerusalemu ootheene ola ni sooxuttiha sanyu, ni muntthuna weera ephome ya mulopwana owo enimorele hiyo.”
29 Pedru ni arummwa akina yaahaakhula: “Hiyo nintthuneya omwiiwelela Muluku ntoko namalamulela, ohiya atthu.
30 Muluku a makholo ahu, onvinyereriha Yesu, yoowo nyuwo mmwiivalaanyu mmuthomeyaka vamwirini.
31 Muluku onvuwiha moono awe woolopwana ntoko Muhooleli Mutokweene ni Nvuluxa, weera ana a Israeli erukunuxe murima ni eleveleliwe soottheka saya.
32 Ni hiyo ninnahelela onamoona itthu iya, ni munepa wootteela, yoowo Muluku aavanhaawe ale emmwiiwelela ntoko namalamulela, ninnahelela-tho onamoona itthu iya.”
33 Yiiwakaru eyo, yaanyoonyiwa vantxipale enatthuna owiivasa.
34 Nto aaheemela mmoha a eSineetriyu aari nfarisi iitthaniwa Gamaliyeli, yoowo aari muhusiha a Nlamulo ni aattittimihiwa ni atthu ootheene, ni aaruma weera arummwa ale ekumiheriwe vaate mwa etempu vakhaaniini.
35 Vano, aaheera: “A israeli, mwiikosoope ni etthu munkelaanyu waapakela asilopwana ala.
36 Mwa ntakihero, mwa etempu ya muttuli aakhumelela Teuda, yoowo iihima okhala mutokweene ni atthu oophiyeraka 400, yannamutthara. Mene owo aahiiviwa, ni atthu ootheene yaamutthara yaamwaramwareya, ni ipalano saya saaphwateya.
37 Avinyaka, mahiku a namalepela, aakhumelela Yuda muGalileya, ni atthu antxipale yaamutthara. Mulopwana owo-tho ohookhwa, ni atthu ootheene yaamutthara yaamwaramwareya.
38 Tivanto, moovarihana ni etthu kihimmaaka, kinnooleelani weera muhiivoleihere nyaha sa asilopwana ala; mwaahiye ni murettele. Vanonto waari weera palano ola taatthu, onoomala;
39 mene waari weera ta Muluku, nyuwo khamunwera ommaliha. Mwiikosoope, oweharu nyuwo munwana ni Muluku.”
40 Nto mwaha wa yeeyo yaahaakhulela miruku sawe. Ni yaaruma wiitthaniwa arummwa ni yaawaxulakaru,* yaahaalamula weera ehiye wuuluma mwa nsina na Yesu, ni yaahaataphula.
41 Vano, awosa yaakhuma oSineetriyu ehakalanleene mwaha wooweera yaahoona okhala eparakha ohaawa mwaha wa nsina na Yesu.
42 Ni mahiku ootheene mutemplu, ni empa ni empa, yannavirelela olaleya ni oxuttiha mitthenka sooreera woohima sa Yesu Kristu.
