Miteko sa arummwa 6:1-15
6 Mahiku ene yaale, nummero na atthareli nriki waatxeerereya, ayuda yuuluma ekereku yaapatxera waakhupanya ayuda yuuluma eheeberi, mwaha wooweera asithiyana aya asinaamukhweli yuuluma ekereku, khayaavahiwa yootxa* ya nihiku ti nihiku.
2 Vano, arummwa ale 12 yaathukumanya muloko wa atthareli ni yaaheerela: “Khaiyene ti wooreerela weera nihiye olaleya masu a Muluku, weera nikaweke yootxa.
3 Tivanto asinna, mwaathanle asilopwana 7 variyari vanyu erino mukhalelo wooreera, oosareya munepa ni a miruku, ni hiyo nimmwaathanlela weera evareke muteko owo.
4 Menento hiyo ninkela wiilipiheraka opaka mavekelo ni olaleya masu.”
5 Vano, etthu ele yaahimmaaya arummwa yaahaasivela atthareli ootheene, ni yaamuthanla Estefano, mulopwana yoowo aarino nroromelo noolipa ni aasareñye munepa wootteela, nave-tho yaamuthanla Filipe, Prokoro, Nikanore, Timoni, Parmena, ni Nikolawu, oohusera a wAntiyokiya.
6 Vano asilopwana ale yaaroihiwa wa arummwa, evekelakaru, yaawiiyaathera matata ethoonyiheraka weera ahaathanla.
7 Vano, masu a Muluku, yannavirelela omwaramwareya, ni nummero na atthareli nannaatxeerereya vantxipale oYerusalemu, nave-tho anamakeya antxipale yannakhala ni nroromelo.
8 Estefano asareñyeene mahala a Muluku ni owera, annapaka miteko ni miiriira variyari va atthu.
9 Vano, asilopwana akina a esinakooka yiitthaniwa akaporo ootaphuliwa vamoha ni atthu akina oKirene, a wAlexandriya ni atthu akina oSilisia ni a wAsia yaawa enavaanyihana ni Estefano.
10 Menento khayaawenre onvirikanyiha mwaha wa miruku ni munepa wootteela yoowo waamukhavihera olokolola.
11 Mwaha wa yeeyo, yaahaasesera atthu weephiini yeeraka: “Hiyo noomwiiwa owo anveehaka Mose ni Muluku.”
12 Awosa yaahaasesera atthu, asitokweene aayuda, ni alipa oolepa, weera yanvare ni omuroiha oSineetriyu.
13 Weiwo, yaahaawiiha anamoona oowootha yaawo yenre: “Mulopwana ola onnavirelela wuulumela itthu soonanara nipuro nna nootteela, ni Nlamulo.
14 Mwa ntakihero, hiyo noomwiiwa ahimaka weera Yesu, muNazareti, onoonyaanya nipuro nna ni onootxentxa sookhovelela Mose onilenlaawe.”
15 Ni emaara atthu ootheene yaakilanthi oSineetriyu yanwenhaaya, yaahoona weera owiitho wawe wannaara ntoko nlaika.
Footnotes
^ Naari: “yoovaha.”
