Miteko sa arummwa 21:1-40
21 Nimwalamwalakaru naawo ni onwela naviyu, naarowa oKosi. Nihiku naattharelana, naarowa oRodi, ni naavinyenre weiwo nrowaka oPatara.
2 Nimphwanyakaru naviyu aakela oFenisia, nanwela nnapwaha.
3 Noonakaru eyiiliya* ya oKipro, naavira moono woothiyana, naaheetta nnaviyu a wAsiria, nto naviyu owo aaheemela oTiro, weiwo aarowaawe okuruxa miritti.
4 Naawaasaasa atthareli ni naahaaphwanya, ni naavirelela okhala weiwo mpuwa mwa esemana emoha.* Mwa yeeyo, moorweela mwa munepa woottela, atthareli ale yannamuleela Paulo veeli-veeli weera ahirowe oYerusalemu.
5 Vano, emalakaru mahiku ahu, naakhuma nnavirelela weetta mukwaha ahu; ni atthareli ootheene, waahela mpuwa athiyana ni anamwane, yaanihoola mpaka vaate va esidade. Niphiyakaru ophareya, naakokhora nnavekela
6 ni naalaxerana mukina ni mukhwaawe. Avinyaka, naawela munaviyuni ni awosa yaatthikela owaani.
7 Nimalihakaru ekwaha ahu, nikhumaka oTiro mpaka ophiya oPtolemaida; naawuulumiha asinna ni naakhala iwo naawo nihiku nimoha.
8 Vaxaakaru* naavinya nnarowa oKesareya; niphiyakaru iwo, naarowa owannyawe Filipe, namalaleya, yoowo aari mmoha aasilopwana 7, ni naakhala vamoha nuuwo.
9 Mulopwana ola aakhalano anamwane asithiyana 4 oohitheliwa* yaawo yaaprofetisari.
10 Nimalakaru iwo mahiku mantxipale, profeta mmoha iitthaniwa Agabo aahoowa akhumaka oYudeya.
11 Owo aahoowa okumana ni hiyo, ni aamukuxa sintu a Paulo, anatthuka metto sawe ni matata awe, ni aaheera: “Onhimaaya munepa wootteela tiila: ‘Mwaneene sintu ola onootthukiwa hiiha ni ayuda oYerusalemu, ni awo enonvaherera mmatatani mwa atthu a maloko makina.’”*
12 Niiwakaru eyo, hiyo ni atthu yaari vawo, naapatxera omutxonttela Paulo weera ahirowe oYerusalemu.”
13 Vano, Paulo aahaakhula: “Eheeni mumpakaanyu, mwinlaka ni mweereraka otteettheiha murima aka?* Muroromeleke weera miyo kiri oolikana ene ohiya paahi weera katthukiwe, mene-tho weera kakhwe oYerusalemu mwaha wa nsina na Apwiya Yesu.”
14 Woona weera khanaawenre omweeriha otxentxa etthu aalakenlaawe opaka, naahiya omunyesereriha* ni naaheera: “Yeereye yootthuna ya Yehova.”*
15 Evirakaru mahiku ale, hiyo naahiireherera ni naapatxera weetta ekwaha nrowaka oYerusalemu.
16 Atthareli akina a oKesareya yaarowa vamoha ni hiyo, ni awo, yaanikuxera vaate va Menasoni, a oKipro, yoowo aari mmoha aatthareli oopatxera, ni naaphiyera owannyawe.
17 Niphiyakaru oYerusalemu, asinna yaanaakhela moohakalala.
18 Nihiku naattharelana, Paulo vamoha ni hiyo naarowa okumana ni Yakobe ni asitokweene ootheene a mmulokoni yaari vaavo.
19 Paulo aawuulumiha ni aahaaleela itthu sootheene Muluku aapankaawe variyari vaatthu a maloko makina* moorweela mwa muteko woolaleera owo aavanraawe.
20 Yiiwakaru eyo, awo yaapatxera onvuwiha Muluku, mene yaamweerela: “Munna, nyuwo moosuwela weera ayuda antxipale aakhala atthareli,* ni weera ootheene awo khehiñye wiilipihera otthara Nlamulo.
21 Menento, awosa ahiiwa yeeriwaka weera nyuwo munnaaxuttiha ayuda ootheene enkhala ilapo sa maloko makina* weera ehiyeke weettela Nlamulo na Mose, ni weera-tho munnaakhoottihera owiinela anamwane aya ni otthara sookhovelela sa ayuda.
22 Vanonto, ninkela opaka eheeni woohima sa mwaha ene yoowo? Moohihovela, awosa enoosuwela weera nyuwo moophiya.
23 Vano, mpake etthu ninkelaahu wooleelani: Aakhala va asilopwana 4 yaawo emmanenle natiri Muluku.*
24 Mwaakuxe asilopwana awo, mwiitteelihe vamoha naawo, avinyaka mulive itthu sootheene seera sihaaweleye, weera awo emetthe maihi aya. Mwapaka eyo, atthu ootheene enoosuwela weera itthu sootheene sinhimmwa woohima sa nyuwo khaiyene ti seekhaikhai, ni munimoonihera weera mookhalano mukhalelo wooreera ni munniiwelela Nlamulo.
25 Woohima sa atthu* oororomela eri maloko makina, nohaalepela ni nohaarumihela yoothanlaahu weera ehiye okhuura inama sooveleeliwa amiluku, ephome, inama soohihitiwa* ni okonihana woohireerela.”*
26 Vano, nihiku naattharelana, Paulo aahaakuxa asilopwana ale ni aahiitteeliha vamoha naawo. Avinyaka, owo aarowa mutemplu ohima nihiku neeraaya nikwanele mahiku oowiitteeliha weera namakeya anvahe makeya a kata mulopwana nihiku nene nenno.
27 Ehalelaka omala mahiku 7 ale oowiitteeliha, ayuda yaakhala wAsia emoonakaru Paulo mutemplu, yaasesera muloko wa atthu ni yanvara,
28 ekhuwelaka: “Atthu a wIsraeli, munikhavihere! Mulopwana ola ti yoola onaaxuttiha atthu a mapuro ootheene itthu sinvirikanyiha nlamulo na nloko nahu, Nlamulo ni nipuro nna. Opwaha mwa yeeyo, owo ohaawiiha akereku mutemplu ni oonanariha nipuro nna nootteela.”
29 Yaahima eyo, mwaha wooweera yaamoona Paulo osidade areene ni Trofimo a wEfeso, nto yuupuwela weera owo aamukuxera mutemplu.
30 Nto esidade ele yaanyakuleleya ni atthu antxipale yaahoowa etthimakaka, enanvara Paulo enampurulela vaate va etemplu, ni, moowaakuveya, milako saawaliwa.
31 Nlelo eriki weerera omwiiva, muhooleli aanakhotto aahaakhela mitthenka sooweera esidade yootheene ya oYerusalemu eri ni munyakunyaku.
32 Moowaakuveya, owo aahaathukumanya anakhotto ni ahooleli aanakhotto, ni aarowa otthimakaka mpaka waaraayawo munyakunyaku.* Atthu emoonakaru muhooleli aanakhotto ni anakhotto, yaahiya ommana Paulo.
33 Vano, muhooleli ole aamwaattamela, anvara ni aaruma weera atthukiwe ni ikorenti* piili. Avinyaka aahaakoha atthu, mulopwana ola taani ni opanke eheeni?
34 Mwa yeeyo, atthu akina a muloko ole mutokotoko wa atthu yannakhuwela ehimaka etthu ekina, ni akina yannakhuwela ehimaka etthu ekina. Vano, woona weera khaawera osuwela etthu yaatannyenre munyakunyaku ole mwaha woonyakula atthu, aaruma weera Paulo aroihiwe okwartelo.
35 Emaara yaaphiñyaaya vaskatani weera yaphiye okwartelo, owo aateexiwa ni anakhotto mwaha wooweera atthu yaatthuna ommana,
36 woona weera waakhala muloko mutokotoko wa atthu waamutthara okhuwelaka, weeraka: “Mmwiive!”
37 Ahalelaka ovoloihiwa mpuwa mwa ekwartelo, Paulo aamukoha muhooleli aanakhotto: “Kinnaakhuleliwa wooleelani etthu? Muhooleli aanakhotto, aamukoha amweerelaka ha: “Munnawera wuuluma ekereku?
38 Nyuwo khaiyene muxipitu yoole aaweerinhe atthu ovirikanyiha nlamulo etempu yamuttuli ni aakunxe anamwiiva 4.000 aaroihaka onikareni?”*
39 Paulo aahaakhula: “Mweekhaikhai, miyo muyuda, a esidade ya oTarso, esidade yootthuneya ya oSilisia. Vano, txontte mukaakhulele weera kuulume ni atthu ala.”
40 Emaara muhooleli aanakhotto aamwaakhulenlaawe Paulo wuuluma, Paulo eemenleene vaskatani, aahaavaha atthu esinaale ni ntata, nto atthu yaamaala, vano owo aahuuluma ni atthu ale ni nuulumo na eheberi, eeraka:
Footnotes
^ Naari: “etxirupa.”
^ Naari: “mahiku 7.”
^ Naari: “Nihiku naattharelana.”
^ Naari: “oohipatxeriwa.”
^ Naari: “amalapo, oohikhala ayuda.”
^ Naari: “okihiiha opaka etthu kilakenlaaka opaka.”
^ Ni Ekereku: “naamaala.”
^ Naari: “amalapo, ehikhanle ayuda.”
^ Naari: “oororomela.”
^ Naari: “amalapo, atthu ehikhanle ayuda.”
^ Naari: “entthuneya omutaphula natiri emmanenlaaya Muluku.”
^ Naari: “atthareli.”
^ “Inama siniiviwa sihikumihinwe ephome.” Okumihiwa ephome onhimmwa va, onhimmwa ohihitiwa sireene ikumi.
^ Nwehe masu oowiiwanyeihiwa.
^ Naari: “muloko wa atthu.”
^ Naari: “onyooro.”
^ Nwehe masu oowiiwanyihiwa.
