Miteko sa arummwa 19:1-41
19 Apolo nlelo areene oKorinto, Paulo aavira mittetthe soorakamela ephareya ni aaphiya wEfeso. Iwo, aahaaphwanya atthareli akina
2 ni Paulo aahaakoha: “Mukhalakanoru nroromelo* mohaakhela munepa wootteela?” Awosa yaamwaakhula: “Khanintale wiiwa weera wookhala munepa wootteela.”
3 Paulo aahaakoha: “Mpatisinwe ni opatiso heeni?” Awosa yaahaakhula: “Ni opatiso wa Yohani.”
4 Paulo aaweerela: “Opatiso wa Yohani waari opatiso waathoonyera orukunuxa murima, ni Yohani annaweerela atthu weera emuroromeleke ole aakela owa ottuli wawe, eyo tiiyo, Yesu.”
5 Yiiwakaru eyo, awosa yaarowa opatisiwa mwa nsina na Apwiya Yesu.
6 Ni, vaavo Paulo aawiiyaathenraawe matata, awo yaahaakhela munepa wootteela, ni yaapatxera wuuluma muulumo ni oprofetisari.
7 Yaari alopwana 12.
8 Mwa minyeeri miraru, Paulo aarowa musinakooka ni aahuuluma moolipa murima, apakaka nyaha eereraka oweeriha atthu ororomela Omwene wa Muluku.
9 Mwa yeeyo, woona weera atthu akina yannuumiha murima aya ni khayaatthuna ororomela ni yannuuluma moohireerela Ephiro ya Apwiya ohoolo wa muloko wa atthu, nto Paulo aahaahiya atthu awo ni aahaamwalamwaxa atthareli ni atthu awo; nenne nri nihiku, annapaka nyaha eskola ya oTiranu.
10 Eyo yaaheereya iyaakha piili, mpaka atthu ootheene yaakhala eprovinsiya ya wAsia, waahela mpuwa ayuda ni akereku, yaahiiwa masu Aapwiya.
11 Ni Muluku annapaka miteko sootikhiniha moorweela mwa Paulo,
12 mpaka yaaphiyera okuxa itthu sa Paulo enaaroihela atthu yaavoreiwa ni awo yannalama ni minepa soonanara sannaahiya.
13 Menento, ayuda akina yeetteetta nipuro nnipuro, yoomolaka minepa soonanara, yaaheerera woomola mwa nsina na Apwiya Yesu minepa soonanara saavanre atthu, awo yannahima yeeraka: “Mwa nsina na Yesu, yoowo Paulo ommulaleyaawe, kinnoolamulani weera mukhume.”
14 Anamwane 7 anamakeya mmoha aayuda iitthaniwa Sikewa yannapaka eyo.
15 Menento, munepa woonanara waawaakhula, oweerelaka: “Miyo koomusuwela Yesu ni koomusuwela Paulo. Vanonto nyuwosa taani?”
16 Nto mwaha wa yeeyo, mulopwana ole aavarinwe ni munepa woonanara aahiivonyera wa yaawo, ni aahaavara ootheene aya, nto yaatthawa empa ele ehiwanre ni evulanleene.
17 Etthu ele yeereñye, yaahiiwa atthu ootheene, waahela mpuwa ayuda ni akereku yaakhala wEfeso; ni atthu ootheene yannoova ni nsina na Apwiya Yesu nannavirelela ovuwihiwa.
18 Antxipale yaaroromenle yannawa enahima ohoolo wa atthu ootheene itthu yaapakaaya.
19 Mweekhaikhai, atthu antxipale a yaawo yaapaka maxitta khalayi, yaawiiha iliivuru saya enahisa ohoolo wa atthu ootheene. Ekontarelakaru musurukhu ene wa iliivuru iyo saahisinwe, yaahoona weera waaphiyera iparatha 50.000.
20 Vano, masu a Yehova* yannavirelela omwaramwareya ni yannaavoleela atthu mwa ikuru.
21 Seereyakaru itthu iya, Paulo aalakela weera, avira vale oMasedonia ni wAkhaya, aamurowa oYerusalemu. Owo aaheera: “Karowa vale oYerusalemu, kinoorowa-tho oRoma.”
22 Vano, owo aahaarumiha anamakhaviheraawe eeli orowa oMasedonia, Timotiyu ni Erasto, mene owo aavirelela okhala mahiku vakhaaniini eprovinsiya ya wAsia.
23 Etempu ene yeele, waakhumelela onyakulihana otokotoko mwaha wa Ephiro ya Apwiya.
24 Mulopwana mmoha iitthaniwa Demetrio, aavara muteko woopaka itemplu ikhaanini sa iparatha alikanxeraka etemplu ya muluku iitthaniwa Artemide, nto owo, ni anamuteko awe yannaphwanya musurukhu muntxipale.
25 Owo aahaathukumanya ale aavaraaweno muteko vamoha ni atthu akina yaavara muteko mmoharu yoole, ni aaweerela: “Atthwaala, nyuwosa moosuwela weera hiyo nimphwanya musurukhu mwaha wa muteko ene yoola.
26 Vano, munnoona ni munniiwa weera wEfeso, naari keere, eprovinsiya yootheene ya wAsia weerinwe weera mulopwana mmoha oniitthaniwa Paulo oheeriha weera muloko mutokotoko wa atthu otxentxe moonelo aya, aweerelaka weera amiluku empakiwa ni matata aatthu khaiyene amiluku eekhaikhai.
27 Vano, khaiyene paahi woopinhe omuyeleela nakoso ahu, mene-tho etemplu ya muluku ahu mutokweene muthiyana Artemide enrowa wooniwaka ohikhala mwiitti ni onoophwateya ovuwa wawe muluku ola onkokhoreliwa ni atthu ootheene a eprovinsiya ya wAsia ni atthu ootheene a mulaponi.”
28 Asilopwana ale yiiwakaru eyo, yaanyoonyiwa vantxipale ni yaapatxera okhuwela yeeraka: “Mutokweene Artemide muluku a wEfeso!”
29 Vano, munyakunyaku waamwaramwareya esidade yootheene ele ni atthu ootheene yaatthimaka enarowa oteyaatruni, empurulaka Gaio ni Aristarko yaawo yaari a oMasedonia ni yaari asinthamwene awe Paulo eettaaweno mukwaha.
30 Paulo aatthuna okela oteyaatruni weera iisoonihere wa atthuni, mene atthareli yaamukhoottihera opaka eyo.
31 Mpaka atthu yaareherera ifeesta ni axooku, yaamureerela murima Paulo, yaamurumihela mitthenka emutxonttelaka weera ahirowe oteyaatruni.
32 Vano, muloko ole waathukumanne vale, khawiiwanana: mukina aakhuwela ahimaka etthu ekina ni mukina aakhuwela ahimaka etthu ekina, ni antxipale yaari vale khayaasuwela mwaha wa heeni yaathukumannaaya vale.
33 Nto, atthu akina yaari variyari va muloko, yanvaha miruku Alixandre weera ahime etthu, yoowo ayuda yaamukakhenlaaya ohoolo wa atthu, Alixandre aavaha esinaale ni ntata atthunaka wiisaakiha ohoolo wa atthu.
34 Vano, atthu ale esuwelakaru weera owo aari muyuda, yaapatxera okhuwela ni nsu nimoha mpuwa mwa iwoora piili yeeraka: “Mutokweene Artemide muluku a wEfeso!”
35 Vano, muhooleli* a esidade amaalihakaru muloko, aaheera: “Nyuwo atthu a wEfeso, mutthu heeni ohisuwenle weera esidade ya wEfeso erinono etemplu ya muluku mutokweene Artemide ni elataratho yeeyo emonre wiirimu?
36 Nto, woona weera itthu iya khasinvaanyihaniwa, nvirelele okhala oomaala ni muhipakeke itthu moohuupuwela.
37 Nyuwosa murimwaawiiha asilopwana ala va, ehikhanle anamwiiya a mutemplu naari khenanveeha muluku ahu muthiyana.*
38 Vanonto, waareene weera Demetrio ni atthu onvaraaweno muteko aakhalano mulattu ni mutthu, aakhala mahiku etripunaale* enthukumanaaya ni aakhala makovernatore;* nto awo eroihaneke mapuro ene yaawo.
39 Mene, mwa atthunaka etthu ekina opwaha ela, mwaha owo ontthuneya weera wuulummwe va muthukumanoni woowaakhuleliwa ni atthu.
40 Mwaha wooweera, pooti weeriwa weera ti hiyo ntannyenre onyakulihana* nno okhumelenle olelo, ni khiyaavo mathowa nikhanlaahu oohima enoonihera etthu ekumihenre munyakunyaku ola.”
41 Ni, uulumakaru hiiha, aahaamwara atthu.
