Miteko sa arummwa 28:1-31
28 Nivuluwakaru, noonelenlaahu* weera eyiiliya* ele yiitthaniwa Malta.
2 Atthu a eyiiliya* ele yanreerela murima vantxipale. Yaanaakhela ootheene hiyo ni yaanipattihera mooro woona weera yaamurupa epula ni wannariira.
3 Paulo aathukumanya nivisi na ikhuuni ni, ahelakaru ikhuuni iye vamooroni, nto mwaha wooviha, yaakhuma evili enanvitikelela vantatani vawe.
4 Yoonakaru enowa envitikelenleene vantatani, atthu a nipuro nne yaapatxera wuuluma yaaworu yeeraka: “Mweekhaikhai, mulopwana ola namwiiva; nnaamweera avulunweene mphareya, Exariya* khemwaakhulenle ovirelela okhala mukumi.”
5 Menento, Paulo aatathela enowa ele vamooroni ni eyo khayaamweerinhe etthu.
6 Nto, yaaweherera weera aamwiipa naari okhwa moowaakuveya. Ewehererakaru etempu yintxipale ni yoonakaru weera itthu yuupuwelaaya weera saamweereya khasaamweerenle, yaatxentxa wuupuwela waya ni yaapatxera weera owo muluku.
7 Waattamela vale, saakhala imatta sa mutokweene a eyiiliya* ele iitthaniwa Publiyu; owo, ooniheraka owaakhela aletto, aanaakhela owannyawe mpuwa mwa mahiku mararu.
8 Yaaheereya weera apapawe Publiyu yaari vakaamani evoreiwaka efeepere ni mmirimani. Vano, Paulo aarowa waaweha ni aavekela awiiyaatheraka matata awe ni aahaalamiha.
9 Aalamihakaru, atthu a eyiiliya ele yaavoreiwa yaapatxera omwaasaasa ni awo-tho annaalamiha.
10 Opwaha mwa yeeyo, awo yanttittimiha enivahaka soovaha sintxipale ni, emaara naahalelaahu okhuma iwe, awo yaanivaha soovaha sootheene naahaawelaahu.
11 Sivirakaru minyeeri miraru, naavinya ninwenleene naviyu iitthaniwa “Anamwane a Zeu”. Naviyu owo aari a wAlexandriya ni aaviriha eyiita yootheene areene eyiiliya ele.
12 Naaphiya oSirakusa ni naakhala iwo mahiku mararu.
13 Nikhumakaru iwo, naavirelela weetta mukwaha ahu ni naaphiya oRegio. Nivirakaru nihiku nimoha, yaapatxera woopa epheyo yaakhuma ohitto, ni nihiku nanaaveeli, naaphiya oPuteyoli.
14 Weiwo naahaaphwanya asinna akina yaanivekenle* weera nikhale naawo mpuwa mwa esemana emoha.* Avinyaka naakela oRoma.
15 Asinna a oRoma yiiwakaru mitthenka woohima sa hiyo, yaarowa Eparaasa ya Apiyu ni impa tthaaru weera ekumane ni hiyo. Paulo awoonakaru asinna, aalipa vantxipale ni aamuxukurela Muluku.
16 Niphiyakaru oRoma, Paulo aahaakhuleliwa weera akhaleke meekhaawe, ni nakhotto mmoha anwehereraka.
17 Evirakaru mahiku mararu, Paulo aahaawopa asilopwana oottittimihiwa aayuda. Ethukumanakaru, owo aaweerela: “Asinna, nnaamweera miyo kahaatthekenle atthu naari sookhovelela sa makholo ahu, miyo kaatthukiwa oYerusalemu ni kaahinnyereriwa mmatatani mwa aroma.
18 Ekikohakohakaru, yaahoona weera kannaphwanela otaphuliwa woona weera khayaakiphwannyeno nthowa noophwanela wiiviwa.
19 Menento, woona weera ayuda khayaatthunne, kaahoona okhala wamiruku ovekela weera kathorihiwe ni Sesare, khaiyene mwaha wooweera kaarookhalano mulattu woowaahimano* atthu a nloko naka.
20 Mwaha ene ti yoola kivekenlaaka weera kuulume ni nyuwosa, woona weera mwaha wa yooweherera ya ana a israeli kitthukinwaaka ni ikorenti iya.”
21 Ayuda yaamweerela: “Hiyo khanaakhenle ekaarta enkhuma oYudeya woohima sa nyuwo naari khaavo munna a wuuwu owiiye onleela naari ohima etthu yoonanara woohima sa nyuwo.
22 Mene nnoona weera ti wooreera owiiwani nyuwo mwaneene anyu muhimaka ele munuupuwelaanyu. Mwaha wooweera, etthu nsuwenlaahu ti yeele enhimmwa woohima sa ettiini ela, mapuro ootheene.”
23 Vano, yaahiiwanana nuuwo weera ekumane nihiku nikina, nihiku naavaanelinwe yaarowa yaatxeereranneene nipuro aakhalaawe. Ovinyera oxeexelo mpakana ohiyu, Paulo aahaaleela itthu sintxipale, ni aahelela onamoona woomalela woohima sa Omwene wa Muluku, eereraka waaroromeliha awo woohima sa sooxuttiha sa Yesu, moovarihana ni Nlamulo na Mose ni na Maprofeta.
24 Atthu akina yaaroromela itthu iye Paulo aahimaawe; ni akina yannakhootta ororomela.
25 Nto, woona weera khayiiwanana yaaworu, yaapatxera opwaha, ni Paulo aahuuluma masu ala mamoha:
“Munepa wootteela moorweela mwa profeta Yesaya, waahuuluma waahimaka makholo anyu:
26 Murowe wa atthu ala ni mwaweerele: “Nyuwo muneereke wiiwa mene khamunkela osuwela etthu entaphulelaaya; muneereke woona, mene khamunkela osuwela etthu entaphulelaaya ele munoonaanyu.
27 Mirima sa atthu ala ti soowuuma, awo aattiyela maaru aya ni aaputiha maitho aya weera ehooneke ni maitho aya naari ehiiweke ni maaru aya,* weera ehittharuwe erukunuxaka murima aya weera kaavuluxe.
28 Vanonto, musuwele weera ovuluxa nno wa Muluku aarumiheliwa atthu a maloko makina,* ni moohihovela awo enimwiiwelela.”
29 * ——
30 Mwa iyaakha piili soomalela sene, Paulo aakhala empa ele aakhalaawe,* mooreera murima owo annawaakhela atthu ootheene yaaweela omuxekura,
31 aalaleeraka woohima sa Omwene wa Muluku, ni aaxuttihaka woohima sa Apwiya Yesu Kristu, moolipa murima, ahikhoottiheriwaka.
Footnotes
^ Naari: “naasuwenlaahu.”
^ Naari: “etxirupa.”
^ Naari: “etxirupa.”
^ Ni Ekereku: Díke, apaale onhimmwa muluku a exariya oowinlela ikukuttula, naari enhimmwa exariya pahi.
^ Naari: “etxirupa.”
^ Naari: “yaaninyeserenre.”
^ Ni Ekereku: “mahiku 7.”
^ Naari: “woowaakaxarino.”
^ Yanniiwa ni maaru aya mene khayaavarela muteko ele yiiwaaya.
^ Naari: “ehikhanle ayuda.”
^ Naari: “aalukaraawe.”
