Miteko sa arummwa 4:1-37
4 Pedru ni Yohani nlelo eriki wuuluma ni atthu, yaaphiya anamakeya, ahooleli a mutemplu ni asaduki.
2 Awo yaanyoonyiwa mwaha wooweera arummwa yaaxuttiha atthu ni elaleyaka woohikhuwa etthu woohima sa ovinyererihiwa wa Yesu mookhwaani.
3 Nto, yanvara* Pedru ni Yohani, nto woona weera waahiila, yaahaawalela mukateya mpaka wooxa waya.*
4 Atthu antxipale yiiwale ele yaalaleyaaya, yaahaaroromela ni nummero na atthu yaaroromenle naaphiya alopwana 5.000.
5 Oxaakaru, anamalamulela, ahooleli aayuda ni alipa oolepa yaathukumana oYerusalemu,
6 vamoha ni Ana, yoowo aari mutokweene aanamakeya, Kaifa, Yohani, Alixandre ni atthu ootheene yeerela eparte emusi ya mutokweene aanamakeya.
7 Yaamweemexa Pedru ni Yohani variyari vaya enapatxera waakoha yeeraka: “Ikuru heeni sookhavihenreni weera nwere opaka itthu iya, naari mpanke ni nsina nawani?”
8 Vano, Pedru asareñyeene munepa wootteela, aaweerelasa:
“Ahooleli aatthu ni ahooleli aayuda,
9 olelo va niitthaninweene weera nikohiwe woohima sa etthu yooreera nimpakenlaahu mulopwana oorakala, ni waari weera muntthuna osuwela taani omulaminhe mulopwana owo,
10 nyuwo atthu a wIsraeli, musuwele weera mulopwana ola olamihinwe mwa nsina na Yesu Kristu, muNazareti, yoowo nyuwo mmwiivalaanyu vamwirini, mene Muluku onvinyereriha mookhwaani. Nto, ti moorweela mwa yoowo, mulopwana ola oraawe ohoolo wanyu alamihinweene.
11 Yesu ola, ‘nluku nyuwo anamateka empa muramunsaanyu, nikhalihinwe nluku noolipiha empa’.
12 Opwaha mwa yeeyo, khokhanle ovuluwa moorweela mwa mutthu mukina, mwaha wooweera khanaavo nsina nikina elapo ya vathi ovahinwaawe mutthu nikhanlaahu oovuluxiwano.”
13 Emaara yonnaaya olipa murima wa Pedru ni Yohani, awo yaatikhiniheya naawo woona weera yaari atthu piswa ni oohisoma.* Ni yaahoonelela weera Pedru ni Yohani yaaheetta ni* Yesu.
14 Nto awosa khayaawenre omwaakhula etthu Pedru ni Yohani woona weera mulopwana ole aalamihinwe aari vaavale.
15 Vano, yaaweerela weera ekhume oSineetriyu, ni yaahala yaaworu ekohanaka woohima sa mwaha ole;
16 yeeraka: “Vanonto, ninkela waatekela eheeni asilopwana ala? Mweekhaikhai awo aapaka mwiiriira yoowo osuwelinwe ni atthu ootheene enkhala oYerusalemu, ni hiyo khaninwera ovaanya eyo.
17 Vanto weera eyo ehimwaramwareyexa variyari va muloko, nrowe niwoopopihe weera awo ehitthikele-tho wuuluma ni mutthu woohima sa nsina nno.”
18 Nto mwaha wa yeeyo, yaawiitthana ni yaahaalamula weera ehuulume-tho naari ehixuttihe woohima sa nsina na Yesu.
19 Vano, Pedru ni Yohani yaawaakhula yeeraka: “Mphimelele nnene sene yaareene etthu yaxariya vamaithoni va Muluku, owiiwelelani nyuwo ohiya omwiiwelela Muluku.
20 Wa hiyo, khaninhiya wuuluma itthu nonnaahu ni niiwalaahu.”
21 Nto etthikelakaru owoopopiha, yaahaataphula mwaha wooweera khayaaphwannye nthowa noowaathorihelano, nave-tho mwaha wa atthu. Mwaha wooweera atthu ootheene yannanvuwiha Muluku, mwaha wa etthu yeereñye.
22 Opwaha mwa yeeyo, mulopwana ole aalamihinwe mwa miiriira, aarino iyaakha soopwahaka 40.
23 Etaphuliwakaru, yaarowa okumana ni atthareli akina ni yaahaaleela ele asitokweene aanamakeya ni asitokweene aayuda, yaalenlaaya.
24 Yiiwakaru eyo, moowiiwanana yanvuwiha Muluku moowiiwanyeya yeeraka:
“Pwiya Ooweraxa, nyuwo mpattunxe erimu, elapo ya vathi, ephareya ni itthu sootheene siri mmo,
25 ti nyuwo muulumme moorweela mwa munepa wootteela nnikholo nahu Davidi, kaporo anyu: ‘Mwaha wa heeni atthu a maloko enyoonyinwaaya, ni atthu ephimelenlaaya itthu soohikhala muteko?
26 Mamwene a elapo ya vathi eri oolikaneene, ni anamalamulela aathukumana nipuro nimoha weera ewane ni Yehova,* ni ole omuthanliyaawe,*
27 mweekhaikhai, Herodi ni Ponsio Pilatu, yaathukumanne esidade ene yeela ni amalapo, ni atthu a wIsraeli weera ewane ni murumeyi anyu Yesu yoowo mmuthanliyaanyu,
28 awo yaapaka yeeyo nyuwo mwaalakenlaanyu mwa ikuru sanyu, ni otthuna wanyu khalayi weera yeereye.
29 Vanonto, khoo Yehova,* nwehexexeke soowoopopiha saya ni mwaavahe akaporo anyu olipa murima weera evireleleke olaleya masu anyu moolipa murima,
30 etempu emoharu yeeyo, munnavarela muteko ikuru sanyu weera mwaalamiheke atthu ni munnapaka miiriira ni miteko sootikhiniha nvarelaka muteko nsina na kaporo anyu oowera, Yesu.”
31 Emalihakaru ovekela,* nipuro nne awo yaathukumannaaya naattikinyeya. Nave ootheene ale yaasareya munepa wootteela, ni yaapatxera olaleya masu a Muluku moolipa murima.
32 Ohiya eyo, muloko mutokotoko wa atthu waaroromenle, waahiiraana murima mmoha, ni khaavo a yaawo aahima weera itthu aaraaweno saari sawawe, mene yannakawana itthu sootheene yaaraayano.
33 Ni mwa ikuru, arummwa yannavirelela ohelela onamoona woohima sa ovinyererihiwa wa Apwiya Yesu, ni ootheene mwa ikharari yannareelihiwa vantxipale.
34 Mweekhaikhai, khaavo a yaawo aaviriha maxupo oothoiwa, mwaha wooweera ootheene ale yaakhanleno imatta ni impa, yannatumiha ni yannawiiha musurukhu ene,
35 yannaavaherera arummwa. Ni arummwa, yannamukawela yoole ori mutthu moovarihana ni soothoiwa sawe.
36 Aapaka etthu emoharu Yosefe, yoowo arummwa yaamwiitthanaaya Barnaba (entaphulela “mwaana a nimaaliho”) aari mulevi, elapo awe yaari oKipro,
37 aakhalano ematta, aatumiha ni musurukhu ene anaroiha owinnyerera arummwa.
