Miteko sa arummwa 18:1-28
18 Avinyaka vaavo, Paulo aakhuma wAtena anarowa oKorinto.
2 Iwo, amphwanya muyuda iitthaniwa Akila ni amwaarawe Prisila, yoowo aari a elapo ya oPontu. Owo aamweera ophiyaru oKorinto akhumaka wItaliya, woona weera mwene Klaudio aavaha nlamulo nooweera ayuda ootheene ekhume oRoma. Nto Paulo aarowa waaxekura
3 ni, woona weera awosa yaavara muteko mmoha-moharu Paulo aavaraawe, woopaka itenta,* Paulo aakhala owannyaya evaraka muteko owo.
4 Ni isaabadu sootheene, owo annapaka mwaha* musinakooka ni annaweeriha ayuda ni akereku waakhulela ele aahimaawe.
5 Vaavo Sila ni Timotiyu yaaphiñyaaya ekhumaka oMasedonia, Paulo aapatxera okhalela nthiti muteko woolaleera masu a Muluku, aalaleeraka* ayuda ni ooniheraka weera Yesu aari Kristu.
6 Nto, woona weera yannavirelela onvirikanyiha ni onveeha, Paulo aatatha ntthupi na ikuwo sawe, ni aaweerela: “Miyo nkaanoono mulattu wa etthu enkela oweereelani. Ovinya viinaano va mpaka muhoolo, kinkela waalaleeraka atthu a maloko makina.
7 Vano, owo aakhuma iwo* ni aarowa owannyawe mulopwana mmoha iitthaniwa Tisio Justo, yoowo aamukokhorela Muluku, ni empa awe yaari waattamela osinakooka.
8 Vano, Krispo muhooleli a musinakooka, aahaaroromela* Apwiya vamoha ni atthu ootheene a etthoko awe. Ni antxipale a oKorinto yiiwale masu a Muluku, yaapatxera ororomela ni yaapatisiwa.
9 Opwaha mwa yeeyo, ohiyu, Paulo aakhalano yoowooniheriwa ni aawiiwa Apwiya emweerelaka: “Muhoove etthu, mene nvirelele olaleya* ni muhimaale,
10 mwaha wooweera miyo kiri ni nyuwo ni khaavo oneera oovareeni weera oopakeleni etthu yoonanara. Woona weera atthu antxipale a esidade ela enoorowa okiroromela.”
11 Mwa yeeyo, owo aakhala iwo eyaakha emoha ni minyeeri 6, axuttihaka masu a Muluku variyari vaya.
12 Etempu Galio aaraawe kovernatore* a wAkhaya, ayuda yaalaihana, yanvara Paulo ni yaamuroiha otripunaale,*
13 yeeraka: “Mulopwana ola onnaaxuttiha atthu omukokhorela Muluku moovirikanyiha nlamulo.”
14 Menento, etempu Paulo aatthunaawe olokolola, Galio aaweerela ayuda: “Nyuwo ayuda, wakhala weera mulopwana ola oopaka etthu yoonanara naari envirikanyiha nlamulo, nto miyo kinimoowiriyanani nnene.
15 Mene waari weera munvaanyihana woohima sa muulumo, masina ni malamulo anyu, muhikivoleihere, eyo ti yawinyu. Nkintthuna okhala mphuki a itthu sene seiya.”
16 Vano, Galio aawoomolasa otripunaale.*
17 Nto, yanvara Sostene muhooleli a osinakooka, ni yaapatxera ommana vaavale wuulummwa milattu. Mene Galio, khaatthuna wiivoleihera itthu iyo.
18 Avirihakaru mahiku mantxipale areene oKorinto, Paulo aahaalaxera asinna ni anwela paarku anarowa wAsiria, ahooliwaka ni Prisila ni Akila. OKenkhereya, Paulo aamettha maihi awe, woona weera ammana natiri.
19 Vano, ephiyakaru wEfeso, aamuhiya Akila ni Prisila weiwo. Mene owo aavolowa musinakooka anaakhavihera ayuda wiiwexexa Soolepa.
20 Nnaamweera ayuda yanvekenle weera akhale weiwo etempu yintxipale, owo khaakhulenle,
21 mene aahaalaxera ni aaweerela: “Yehova* atthuna vale kinootthikela wenno veeli.” Vano, owo anwela paarku wEfeso
22 anarowa oKesareya. Areene weiwo, aarowa* oxekura muloko ni woottharelana aarowa wAntiyokiya.
23 Avirihakaru mahiku vakhaaniini wAntiyokiya aarowa ni aaheetteetta muttetthe wootheene wAgalata ni oFrisia, aalipihaka atthareli ootheene.
24 Menento, muyuda mmoha iitthaniwa Apolo aayarinwe elapo ya wAlexandriya, aaphiya wEfeso. Owo aari mulopwana aawera wuuluma ni aasuwela nnene Soolepa.
25 Mulopwana ola aaxuttihiwa iphiro sa Yehova* ni akhaviheriwaka ni munepa wootteela, annuuluma ni annaxuttiha nnene woohima sa Yesu, nnaamweera aasuwenle paahi opatiso wa Yohani.
26 Moolipa murima, owo aapatxera wuuluma musinakooka. Vano, Prisila ni Akila emwiiwakaru, yaamwiitthanela weephiini ni yaamwiiwanyeiha nnene iphiro sa Muluku.
27 Opwaha mwa yeeyo, woona weera owo aatthuna orowa wAkhaya, asinna yaahaalepela atthareli a wAkhaya weera emwaakhele mooreera murima* owo. Aphiyakaru, aahaakhavihera atthu antxipale yaaroromenle mwaha wa oreera murima otokweene wa Muluku.
28 Nto Apolo annuuluma mwa nthiti variyari va atthu ni annoonihera weera sooxuttiha sa ayuda saari sa ethiru, ni annavarela muteko Soolepa weera awoonihere weera Yesu aari Kristu.
Footnotes
^ Naari: “mikottha, ihema.”
^ Naari: “annaakhavihera wiiwexexa Soolepa.”
^ Naari: “aahelelaka onamoona.”
^ Eyo tiiyo, aakhuma musinakooka.
^ Naari: “aakhala mutthareli.”
^ Naari: “wuuluma.”
^ Kovernatore a eprovinsiya emoha ya oroma. Nwehe masu oowiiwanyeihiwa.
^ Otripunaale nipuro nnuulummwa milattu.
^ Naari: “nipuro nnuulummwa milattu.”
^ Woonaru, oYerusalemu.
^ Naari: “ni matata meeli.”
