Miteko sa arummwa 13:1-52
13 Muloko wAntiyokiya, yaakhala maprofeta ni alipa ooxuttiha nlamulo, atthu ene masina aya taala: Barnaba; Simeyoni, yoowo iitthaniwa Namaripa; Lusio, a oKirene; Manayani, yoowo aasomme vamoha ni mwene Herodi; ni Saulo.
2 Nlelo eriki onvarela muteko Yehova* ni omutthuka ramasaani, munepa wootteela waaheera: “Mukimwalamwalihere Barnaba ni Saulo weera evareke muteko kiwiitthanenlaaka.”
3 Vano, emutthukakaru ramasaani ni opaka mavekelo, yaamwiiyaatthera matata Saulo ni Barnaba ni yaahaahiya epwahaka.
4 Vano, asilopwana ale erummwaleene ni munepa wootteela, yaarowa oSeleusia ni iwo yanwela paarku enarowa oKipro.
5 Etempu yaaphiñyaaya oSalamina, yaapatxera olaleya masu a Muluku musinakooka mwa ayuda. Yohani-tho aari vamoha ni yaawo, ntoko namakhavihera.
6 Yeetteettakaru eyiiliya* yootheene mpaka oPofo, yamphwanya muyuda mmoha iitthaniwa Baryesu, aari mukhwiri ni profeta oowootha.
7 Owo aari ni kovernatore* Sergio Paulo, mulopwana a miruku. Owo aamwiitthana Barnaba ni Saulo, woona weera annatthuna vantxipale wiiwa masu a Muluku.
8 Vano, mukhwiri Elima, (woona weera ti yeeyo nintaphulelaaya nsina nawe) aapatxera waavirikanyiha awo, atthunaka otteettheiha nroromelo na kovernatore.
9 Vano, Saulo yoowo-tho oniitthaniwa Paulo, asareñyeene munepa wootteela, anwehexexa,
10 ni aaheera: “Nyuwo mulopwana oosareya itthu soonanara nave nyuwo mwaana a Diabo, mwiittani a itthu sootheene sooreera, neereke nyuwo khamunrowa ohiya onanariha iphiro sa xariya sa Yehova?*
11 Nwiriyane: Yehova* onimoottaruxani, ni nyuwo khamunkela woonaka, ni khamunkela woona waara wa nsuwa mwa etempu vakhaaniini.” Ni moohipisa, owo aahoona etthu yaalikana ni etthapwe ni aapatxera woona epiphi, nto mwaha wa yeeyo, aapatxera weetta amwaasaasaka mutthu eera anvarele ntata weera amweettiheke.
12 Vaavo kovernatore onnaawe etthu yeereñye, aatikhiniheya vantxipale ni moota Yehova* aaxuttihaawe ni aakhala mutthareli.
13 Paulo ni atthu yaari vamoha nuuwo yanwela paarku erowaka oPofo, ni yaaphiya oPerje, oPanfiliya. Mene Yohani, aahaahiya anatthikela oYerusalemu.
14 Menento, awo yaavirelela weetta ekwaha ekhumaka oPerje ni yaaphiya wAntiyokiya, oPisidia. Vano, nihiku na esaabadu yaavolowa musinakooka enakilaathi.
15 Nsommwakaru Nlamulo ni soolepa sa Maprofeta, asitokweene yaahoolela musinakooka yaamweerela Paulo ni Barnaba weera: “Asinna, mwaareeneno masu oowaalipiha atthu, muulumeke.”
16 Vano, Paulo aaheemela, anaavaha esinaale ni matata, ni aaheera:
“Atthwaala, ana a israeli ni atthu ootheene mummoova Muluku, mukiwiriyane!
17 Muluku aatthu ala, Muluku a Israeli, aahaathanla makholo ahu; ni aahaavuwiha atthu emaara yaakhalaaya wExipitu ntoko anamawa ni aahaakumiha weiwo ni ikuru sawe.
18 Mwa iyaakha 40 owo aahaapixera murima onikareni.*
19 Owo aanyaanya maloko 7 yaakhala oKanani ni elapo eyo aahaavaha ana a Israeli ntoko yoohiyeriwa aya.
20 Itthu sootheene iya seereñye mpuwa mwa iyaakha 450.
“Noovira etempu eyo, aahaavaha aphuki yaawo yaaweettiha mpaka etempu ya profeta Samuweli.
21 Avinyaka, awosa yanvekela mwene, ni Muluku aahaavaha Sauli, mwaana Akixi a nihimo na Benjamini, yoowo aalamulenle mpuwa mwa iyaakha 40.
22 Avinyaka, owo aamwaakha omwene Sauli anamukhaliha Davidi mwene. Yoowo aamukhalenlaawe* onamoona eeraka: ‘Komphwanya Davidi mwaana a Yese yoowo onhakalaliha murima aka; owo onoopaka itthu sootheene kintthunaaka.’
23 Moovarihana ni yoolaihera awe, Muluku onwiiha wa ana a Israeli nvuluxa, Yesu, moorweela mwa osuulu* wa Davidi.
24 Ahinaayeene owa Yesu, Yohani aahaalaleera atthu ootheene a wIsraeli opatiso yoowo waathoonyera orukunuxa murima.
25 Mene, Yohani ariki omaliha muteko awe, aaheera: ‘Nyuwosa munuupuwela weera miyo taani? Miyo khaiyene ti yoowo olaiherinwe. Mweekhaikhai, noovinya miyo, onimoowa yoowo kihiphwanenlaaka otaphula mikhoyi sa isantaaliya sawe.’
26 “Atthwaala, asinna, osuulu wa emusi ya Abrahamu ni atthu ootheene a nyuwo emmoova Muluku, mitthenka iya soovuluxa ekumi nirumihelinwe hiyo.
27 Tthiri atthu a oYerusalemu ni anamahoolelaaya yaamukhootta muhooleli owo, nto, emaara awosa yaamuthorihaaya, yaakwanihera masu elempwale ni Maprofeta, yaawo ensommwa ni nsu noowiiwanyeya isaabadu sootheene.
28 Nnaamweera awosa yahamphwannyeno nthowa noophwanela wiiviwa, yanvekela Pilatu weera emwiive.
29 Vano, ekwaniherakaru itthu sootheene saalempwale woohima sa yoowo, yanvinxa vamwirini ni yaarowa onvitha omahiye.
30 Ni Muluku anvinyerereriha mwa alipa ookhwa,
31 mahiku mantxipale Yesu aahaakhumelela ale aakhummaaweno oGalileya erowaka oYerusalemu. Nto atthareli awo ennahelela onamoona ohoolo wa atthu.
32 “Menento hiyo nnoolaleerani mitthenka sooreera woohima sa yoolaihera yaapakelinwaaya makholo ahu.
33 Mene Muluku ookwanihera ele anlaihenraawe hiyo anamwane, anvinyererihaka Yesu, ntoko elempwalaaya va nsalmu: ‘Nyuwo mwanaka; olelo miyo kookhala atiithi anyu.’
34 Muluku anvinyereriha mookhwaani nave khankela okhwa naari erutthu awe khenkela wuntta, Muluku aahima weera eyo ekhaikhai ahimaka ha: ‘Kinkela owooniherani nsivelo noororomeleya kaamulaihenraaka Davidi.’
35 Tivawonto nsalmu nikina ninhimaaya weera: ‘Nyuwo khamwaakhulela ohiya murutthu wa murumeyi anyu oororomeleya wunttaka mmahiye.’
36 Mwa etempu awe, Davidi anvarela muteko Muluku ntoko Muluku aatthunelaawe,* Davidi aahookhwa owo aavithiwa vamoha ni makholo ahu ni murutthu awe wohuntta.
37 Nto ole Muluku onvinyererinhaawe murutthu awe khawunttale.
38 Vanonto asinna musuwele weera ti moorweela mwa mulopwana owo Muluku onkelaawe olevelela soottheka sanyu,
39 nlamulo na Mose khaniwenre wookhalihani anaxariya, mene mwaha wa okhwa wa mulopwana ola, Muluku onimwaawiiha atthu ootheene anroromelo weera ekhale anaxariya.
40 Nto, mwiikosoope weera ehookhumeleleni ele elempwale muliivuruni mwa Maprofeta:
41 ‘Moone, nyuwo ooveeha ni nwehe muteko miyo kinvaraaka etempu anyu ela, nyuwo khamunkela ororomela muteko nnaamweera muleeliwaka nnene sene, mene nyuwo munootikhiniheya vantxipale ni olakaseya.’”
42 Emaara Paulo ni Barnaba yaakhumaaya, atthu yaahaatxonttelela weera esaabadu yaattharelana yatthikele-tho wuuluma nyaha sene seiye.
43 Simalakaru mithukumano osinakooka, ayuda antxipale ni atthu yaavolonwe ettiini ya ayuda yaawo yaamukokhorela Muluku, yaamutthara Paulo ni Barnaba, ni emaara yeeyo Paulo ni Barnaba yuulumaaya naawosa, yannaavekela weera evirelele okhala mooreerani murima mwa Muluku.
44 Esaabadu yaattharelana, atthu antxipale a esidade, yaathukumana weera yiiwe masu a Yehova.*
45 Emaara ayuda yonnaaya muloko mutokotoko wa atthu, yaasareya nrima enapatxera onveeha Muluku evaanyihaka ele Paulo aahimaawe.
46 Vano, moolipa murima Paulo ni Barnaba yaahaaleela ayuda moohoova etthu yeeraka: “Wannatthuneya opatxera woolaleerani nyuwo masu a Muluku, menento woona weera mookhootta okhalano ekumi yoohimala, hiyo ninkela waalaleeraka ale ehikhanle ayuda.*
47 Woona weera Yehova* oonivaha nlamulo eeraka: ‘Miyo kohoothanlani weera mukhale muthuko wa amalapo ni weera mulaleye ovuluwa mpaka okhwipi wa elapo.’”
48 Atthu a maloko makina* yiiwakaru eyo, yaahakalala vantxipale enavuwiha masu a Yehova,* nto mwaha wa yeeyo, ootheene ale yaarino murima wooreera weera yaakhele ekumi yoohimala, yaaroromela.
49 Opwaha mwa yeeyo, masu a Yehova* yannalaleeriwa muttetthe wootheene ole.
50 Mene, ayuda yaahaasesera* asithiyana oottittimiheya yaamoova Muluku waahela mpuwa asilopwana oottittimiheya a esidade ele; weera emuttharatthareke Paulo ni Barnaba ni yaawoomola mmuttettheni mwaya.
51 Vanonto Paulo ni Barnaba yaatatha ntthupi na mmanaanini mwaya, yooniheraka weera atthu awo aalaleeriwa ni yaarowa wIkoniyu.
52 Ni atthareli yannavirelela okhala ootteeliwa* murima ni oosareya munepa wootteela.
Footnotes
^ Naari: “etxirupa.”
^ Kovernatore a oRoma a eprovinsiya emoha. Nwehe masu oowiiwanyeihiwa.
^ Nwehe masu oowiiwanyeihiwa.
^ Naari: “aamuhelenlaawe.”
^ Ni Ekereku: “mmiso.”
^ Naari: “moororomeleya.”
^ Naari: “amalapo, maloko makina.”
^ Naari: “yahaakhanle ayuda.”
^ Naari: “yaahaawoka.”
^ Naari: “oohakalala.”
