Miteko sa arummwa 1:1-26
1 Nyuwo Teofilo, sooweereya soopatxera koolepenlaakani, miyo kaahoolepelani itthu sootheene Yesu aapatxenraawe opaka ni oxuttiha,
2 mpaka nihiku nene nenno aakuxinwaawe akelihiwaka wiirimu, noomala waavaha miruku arummwa aathanliyaawe moorweela mwa munepa wootteela.
3 Ahaawakaru vantxipale, aahiisoonihera wa yaawo* moorweela mwa mathowa mantxipale oororomeleya weera owo aari mukumi. Aahooniwa naawo mahiku 40 ni aahuuluma woohima sa Omwene wa Muluku.
4 Aathukumannaawe naawo, owo aawooperera weera: “Muhikhume oYerusalemu, mene nvireleleke oweherera ele Atiithi elaihenraaya, ntoko koolenlaakani;
5 mweekhaikhai, Yohani aapatisa ni maahi, mene mpuwa mwa mahiku vakhaaniini, nyuwosa munkela opatisiwa ni munepa wootteela.”
6 Vano, yaathukumannaaya, awosa yaamukoha Yesu yeeraka: “Apwiya, viinaano vaava muneeraanyu mutthikihere omwene wIsraeli?”
7 Yesu aaweerela: “Tiithi a wiirimu, moovarihana ni yootthuna awe* oothanla etempu ni mahiku, mene osuwela mahiku awo khaiyene muteko anyu.
8 Mene, mwaakhela vale munepa wootteela, munimwaakhela owera ni munookhala anamoona aka oYerusalemu, oYudeya wootheene ni oSamariya, ni mpaka omalenle elapo.”*
9 Noomala ohima itthu iya, atthareli nlelo enwehaka, owo aakuxiwa aroihiwaka wiirimu. Ni nihutte naamukhuneela, awosa yaahiya omoona.
10 Eriki onwehexexa hiihaale awelaka wiirimu, mootutuxera yaahaakhumelela asilopwana eeli yaawanre ikuwo sootteela,
11 ni yaaweerela: “Nyuwo asilopwana a oGalileya, mwaha wa heeni mweemenlaanyu va nwehexexaka wiirimu? Yesu ene yoola okuxinwe variyari vanyu aroihiwaka wiirimu, onkela otthika moota ene yoowo mmonnaanyu akelaka wiirimu.”
12 Mene, awosa yaatthikela oYerusalemu, ekhumaka omwaako sa Oliveira yoowo waattamenle oYerusalemu, orakamelana wene mwaako owo ni oYerusalemu, wannaakhuleliwa weetta nihiku na esaabadu.
13 Ephiyakaru, yaarowa esaala ya osulu weiwo yaaphiyenraayawo. Aakhalawo weiwo Pedru ni Yohani, Yakobe ni Andreya, Filipe ni Tome, Bartolomewu ni Matewus, Yakobe mwaana a Alfeyo, Simoni, Nanthiti, ni Yuda mwaana a Yakobe.
14 Moowiiwanana, yannavirelela opaka mavekelo, vamoha ni athiyana akina, omuhela mpuwa Maria ameyawe Yesu ni asinnawe.
15 Mahiku ene yaale, Pedru aaheemela variyari va asinna (nipuro nno yaakhalavo atthu oophiyeraka 120), ni aaheera:
16 “Asinna, moorweela mwa munepa wootteela, Davidi aahima eprofesiya yaamuhima Yuda. Nto, wannatthuneya weera ekwanele eprofesiya eyo, ni Yuda aakhala muhooleli a asilopwana yanvare Yesu.
17 Owo aari mmoha a hiyo, ni aathanliwa weera avareke muteko ni hiyo.
18 (Mulopwana owo aathuma ematta ni musurukhu woohixariya ni, amoraka aahoolinhe muru, erutthu awe yaaphuleya,* ni marupo awe ootheene yaakhumela vaate.
19 Atthu ootheene yaakhala oYerusalemu yaasuwela eyo, nto mwaha wa yeeyo, ni nuulumo naya ematta ele yaavaha nsina na Hakeldama, eyo tiiyo, Ematta ya Ephome.)
20 Woona weera yoolempwa muliivuruni mwa Nsalmu weera: “Empa aya ekhale yoohimakiwa, nave-tho ahikhale mutthu mukina aneera akhale mmo: ‘Ni mutthu mukina avahiwe ovara muteko wa otokweene awe.’
21 Tivawonto, onnatthuneya weera nimuthanle mutthu mmoha oneera amuranttele, mutthu owo, akhaleke mmoha aari ni hiyo etempu yootheene Apwiya Yesu yaaraaya ni hiyo evaraka miteko saya
22 (ovinya etempu Yesu aapatisinwaawe ni Yohani, mpaka nihiku aakuxinwaawe variyari vahu aroihiwaka wiirimu), ontthuneya aheleleke onamoona ni hiyo ovinyererihiwa wawe.”
23 Nto mwaha wa yeeyo, yaahaathanla asilopwana eeli: Yosefe, iitthaniwa Barsaba, nave-tho aasuweliwa okhala Naxariya, ni Matiya.
24 Avinyaka yaavekela yeeraka: “Khoo Yehova,* nyuwo musuwenle mirima sa atthu ootheene, vanonto, wa asilopwana ala eeli, munisuwelihe taani mmuthanliyaanyu,
25 weera avareke muteko ni weera akhale murummwa, muteko yoowo Yuda ohiñyaawe anatthara ephiro awe.”
26 Vano, yaahaasaasa eparakha weera yoone taani wa asilopwana ale eeli, eera athanliwe, ni eparakha yammorela Matiya, vano, owo aakhala* vamoha ni arummwa ale 11.
