Miteko sa arummwa 11:1-30
11 Vano, arummwa ni asinna yaari oYudeya yaahiiwa weeriwaka weera atthu a maloko makina* yaahaakhulela-tho masu a Muluku.
2 Vano, Pedru aphiyakaru oYerusalemu, atthu ale yaatthuna weera atthu a maloko makina yiineliweke, yaapatxera omuthoriha,*
3 yeeraka: “Nyuwo moovolowa empa ya atthu oohiineliwa ni munatxa ni awo.”
4 Nto mwaha wa yeeyo, Pedru aapatxera waaleela nnene itthu moota seettalaaya:
5 “Miyo kaari esidade ya oYope kivekelaka, vano, mwa yoowooniheriwa, kaahoona etthu etokotoko yaalikana ni elensoole ya eliinyu ekhuruwaka wiirimu, yankiyeene mwa iparte ixexe, ni eyo yaahoowa mpaka kaaraakavo.
6 Kaawehexexa mpuwa mwaya eyo, ni kaawoona asinama ametto mixexe a elapo ela ya vathi, amutuphini, eniipurula ni apalame a wiirimu.
7 Nave-tho kaahiiwa nsu nikeerelaka: ‘Pedru nvinye, mwiive ni mukhuure!’
8 Mene miyo kaahaakhula: ‘Hooye Apwiya, nkikhanle oopaka eyo, miyo nkinakhuure itthu soonyala naari sa mwiikho.’
9 Nsu nne naakhuma wiirimu naatthikela-tho wuuluma ni miyo neeraka: ‘Muhiye wiitthana itthu sa mwiikho itthu Muluku otteelinhaawe.’
10 Etthu ele yaaheereya-tho mwa ekwaha yanaararu, avinyaka itthu sootheene saahuukululiwa inatthikiheriwa wiirimu.
11 Opwaha mwa yeeyo, emaara ene yeele yaaphiya asilopwana araru yaakhuma oKesareya ekaasaka miyo, ni yaaphiya empa hiyo naaraahu.
12 Vano, munepa wootteela waakeerela miyo weera kihuupuwenle veeli, kirowe ni asilopwana awo, nave-tho asinna ala 6 yaahoowa* vamoha ni miyo, ni hiyo naavolowa mpaani mwa Kornelio.
13 “Kornelio anleela weera onne nlaika niwaaka owannyawe ni nimweerelaka: ‘Waarumihe asilopwana oYope ni waarume omwiitthana Simoni yoowo onsuweliwa okhala Pedru.
14 Owo onimooleelani itthu sikhanle soowoovuluxani nyuwo vamoha ni atthu ootheene a vatthokoni vanyu.
15 Kipatxerakaru wuuluma, munepa wootteela waahaakhuruwela* atthu awo ntoko hiihaale waanikhuruwenlaaya* hiyo woopatxerani,
16 nto mwaha wa yeeyo, kaahuupuwelela masu Apwiya yuulummaaya; awo yeera: Yohani aapatisa ni maahi, mene nyuwo munrowa opatisiwa ni munepa wootteela.
17 Vanonto, Muluku aavanheene mahala* mamoharu yaawo onivanhaawe hiyo-tho nnaaroromela Apwiya Yesu Kristu, miyo taani weera kimukhoottihere* Muluku opaka etthu ontthunaawe?”
18 Yiiwakaru itthu iya, yaahiya omuthoriha* ni yanvuwiha Muluku yeeraka: “Vano Muluku ohaavaha eparakha atthu a maloko makina* weera erukunuxe murima weera ekhaleno ekumi yoohimala.”
19 Atthu ale yaamwaramwareñye mwaha woowiiviwa Estefano, yaatthawela oFenisia, oKipro ni wAntiyokiya, menento mitthenka sooreera yaalaleera ayuda paahi.
20 Menento, atthu akina variyari va yaawo yaari oKipro ni oKirene, yaarowa wAntiyokiya ni yaapatxera wuuluma ni atthu yuuluma nuulumo na ekereku, elaleyaka mitthenka sooreera sa Apwiya Yesu.
21 Ni Yehova* annaakhavihera, ni antxipale yaakhala oororomeleya ni yaakhala atthareli Aapwiya.
22 Mitthenka woohima sa ayuda ale saaphiya mpaka muloko wa oYerusalemu, vano, awo yaamurumiha Barnaba wAntiyokiya.
23 Barnaba aphiyakaru wAntiyokiya aahoona mahala a Muluku, aahakalala ni aapatxera waalipiha atthu ootheene weera evireleleke okhala oororomeleya mwa Apwiya ni murima wootheene,
24 Barnaba aari mulopwana ooreera murima oosareya munepa wootteela ni anroromelo, ni muloko mutokotoko wa atthu waahaaroromela Apwiya.
25 Vano, owo aattimula arowaka oTarso weera amwaasaase nnene sene Saulo.
26 Barnaba amphwanyakaru Saulo aamukuxa arowakano wAntiyokiya. Vano, mpuwa mwa eyaakha emoha awosa yaathukumana ni muloko wa weiwo ni yaaxuttiha muloko mutokotoko wa atthu. Waari wAntiyokiya, atthareli ekhaviheriwaka ni Muluku yaapatxenraaya wiitthaniwa makristu.
27 Mahiku ene yaale, maprofeta makina yaakhuma oYerusalemu enarowa wAntiyokiya.
28 Mmoha a yaawo, iitthaniwa Agabo, aaheemela ni akhaviheriwaka ni munepa wootteela, aahima weera yaamukhala etala elapo yootheene. Mweekhaikhai, etala eyo yaakhumelenle etempu aalamulelaawe Klaudio.
29 Vano, atthareli yaalakela waakhavihera asinna yaakhala oYudeya, moovarihana ni ele mutthu ti mutthu aaweraawe.
30 Yaapaka eyo, yaarumihelaka soovaha saya asitokweene a muloko moorweela mwa Barnaba ni Saulo.
