Miteko sa arummwa 7:1-60

PLAY

Mwaha wa Estefano ohoolo wa eSineetriyu (1-53)
- Etempu ya makholo ahu (2-16)
- Ohoolela wa Mose; elataratho ya ana a Israeli (17-43)
- Muluku khankhala empa yoopakiwa ni atthu (44-50)
Wiiviwa wa Estefano (54-60)

7 Vano, namakeya mutokweene aamukoha Estefano eeraka: “Eyo ekhaikhai?” ² Estefano aahaakhula eeraka: “Asinna ni nyuwo asitiithi, mukiwiriyane! Muluku oovuwa aamukhumelela nikholo nahu Abrahamu emaara owo aakhalaawe oMesopotamia, ahinaayeene orowa okhala oHarani, ³ ni aamweerela: ‘Muhiye elapo anyu vamoha ni amusi anyu, murowe elapo yeeyo kiwoonihenraakani.’ ⁴ Owo aakhuma elapo ya akaldeya, anarowa okhala oHarani. Areene weiwo, apapawe ekhwaakaru, Muluku aaheeriha weera athaamele elapo ela nyuwo munkhalaanyu olelo va. ⁵ Menento, Muluku khanvanhe yoohiyeriwa Abrahamu, naari yoonyikalavo ni nnaani nawe, mene ammanenle natiri weera aamwaavaha elapo ele ntoko yoohiyeriwa osuulu* awe, nnaamweera Abrahamu ahaakhanleno anamwane. ⁶ Opwaha mwa yeeyo, Muluku aamweerenle weera, osuulu awe waakela okhala anamawa a elapo ekina, ni atthu a elapo eyo yaamwaapaka akaporo ni waahasula* mpuwa mwa iyaakha 400. ⁷ Muluku enre ‘ni miyo kinoorowa othoriha elapo eyo eneera yaakhalihe* akaporo, muhoolo mwaya enookhuma elapo eyo, weera ekikokhoreleke elapo ela’. ⁸ “Muluku aapaka nivarihano noowiinela Abrahamu, ni Abrahamu aamuyara Isaki, ni aamwiinela nihiku na na 8, Isaki aamuyara* Yakobe ni Yakobe aayara makholo* ahu 12. ⁹ Ni anamwane akina a Yakobe, yaamukhalela nrima Yosefe, ni yaahaatumihera atthu a wExipitu. Mene Muluku, aari ni Yosefe, ¹⁰ ni owo anvuluxa mahooxo awe ootheene ni anvaha miruku. Ni Muluku aaheeriha weera Farawo, mwene a wExipitu amureerele murima Yosefe. Ni Farawo aamuthanla weera alamuleleke elapo yootheene ya wExipitu, ni vaate vawe. ¹¹ Avinyaka, yaakhumelela etala elapo yootheene ya wExipitu ni oKanani, aani, waari ohaawa otokweene, mpaka makholo ahu khayoona yootxa. ¹² Mene, Yakobe aahiiwa weeriwaka weera wExipitu, yookhala yootxa. Ni aahaarumiha iwo makholo ahu* ekwaha yoopatxera. ¹³ Ekwaha yanaaveeli, Yosefe aahiisuweliha wa asinnawe, ni Farawo aasuwela emusi awe Yosefe. ¹⁴ Vano, Yosefe aaruma weera iitthaniwe Yakobe apapawe, ni amusi awe ootheene, ni atthu ene yaakenle wExipitu yaari 75. ¹⁵ Vano, Yakobe aarowa wExipitu ni ti weiwo aakhwenlaawewo, vamoha ni makholo ahu. ¹⁶ Awo yaaroihiwa oSikemi, ni yaavithiwa mmahiyeni Abrahamu aathummaawe ni anamwane Amori oSikemi, ni musurukhu wa eparatha. ¹⁷ “Emaara saattamelaaya okwanela itthu Muluku aamulaihenraawe Abrahamu, muloko wa ana a israeli wannatepa wunnuwa ni waatxeerereya wExipitu. ¹⁸ Menento, aakhumelela mwene mukina a wExipitu yoowo ahaamusuwenle Yosefe. ¹⁹ Mwene owo ni woototha wawe, aarukunuwela muloko ahu ni annaahasula asitiithi ahu, aanyesererihaka waahiya anamwane aya weera ehikhale akumi. ²⁰ Etempu ene yeele, aayariwa Mose, ni owo aari ooreera.* Owo aahuuwa vaate va apapawe mpuwa mwa minyeeri 3. ²¹ Mene ahiiwakaru,* mwaana mwaamuthiyana a Farawo, aamukuxa anarowa omuhuwa ntoko mwanawe. ²² Mene Mose aaxuttihiwa osuwela wootheene wa wExipitu. Mweekhaikhai, owo annuuluma ni owera ni annapaka itthu sintxipale. ²³ Vano, akwanihakaru iyaakha 40, owo aalakela* orowa waaxekura* asinnawe ana a israeli. ²⁴ Oonakaru weera muxipitu mmoha annamukosoopa moohixariya munnawe, owo aamwaakiha amwinlelaka ikukuttula ni amwiivaka muxipitu ole. ²⁵ Owo uupuwela weera asinnawe yaamwiiwexexa weera Muluku aamweera waavuluxa moorweela mwa yoowo, mene awo khayiiwexenxe eyo. ²⁶ Nihiku naattharelana, owo aarowa iwo anaaphwanya eriki owana ni aaheerera owaakiha eeraka: ‘Atthwaala, nyuwosa muri asinna. Mwaha wa heeni munhasulanaanyu mukina ni mukhwaawe?’ ²⁷ Mwa yeeyo, ole aamuhasula mukhwaawe aamukakha Mose amweerelaka: ‘Taani oothanliyeni okhala muhooleli ahu ni mphuki ahu? ²⁸ Neereke muntthuna-tho okiiva ntoko hiihaale mwaamwiivalaanyu muxipitu ole osilo?’ ²⁹ Iiwakaru masu ala, Mose aatthawa anarowa okhala ntoko namawa elapo ya oMidiya, weiwo aayanraawe anamwane eeli. ³⁰ “Sivirakaru iyaakha 40, nlaika nimoha naamukhumelela onikareni* wa omwaako Sinayi, moorweela mwa mwiri wa mwiiwa waavarela. ³¹ Mose oonakaru mwiri ole ovarelaka, owo aatikhiniheya. Vaavo aattamelaawe weera oonexexe nnene aahiiwa nsu na Yehova* neeraka: ³² ‘Miyo, Muluku a makholo anyu, Muluku a Abrahamu, a Isaki, ni a Yakobe.’ Ni Mose aapatxera othukumela ni ohitthuna-tho oweha veeli. ³³ Yehova* aamweerela: ‘Orule isantaaliya mmanaanini mwaa, woona weera nipuro onnyikalaawe ti nootteela. ³⁴ Mweekhaikhai, miyo kohooona ohasuliwa wa muloko aka ori wExipitu, kohiiwa wiikhupanyera waya, kohoowa weera kaavuluxe. Vano, kinimoorumihani wExipitu.’ ³⁵ Menento Mose ene ti yoole awosa yaamukhonttaaya yeeraka: ‘Taani oothanliyeni okhala muhooleli ahu, ni mphuki ahu?’ Ti yoowo Muluku aamurummaawe moorweela mwa nlaika naamukhumelenle vamwirini wa mwiiwa. ³⁶ Mose owo aahaahoolela aakumihaka wExipitu, apakaka ithoonyero ni miiriira wExipitu, ephareya Yooxeera ni onikareni* mpuwa mwa iyaakha 40. ³⁷ Mose ene ti yoola aalenle ana a Israeli weera: ‘Muluku onoomukumihera variyari va asinninyu profeta oolikana ni miyo.’ ³⁸ Owo aari ni ana a Israeli onikareni, owo aari ni nlaika nuulumme nuuwo omwaako Sinayi vamoha ni makholo ahu. Owo aahaakhela masu makumi a Muluku weera anileele. ³⁹ Mene makholo ahu yaakhootta omwiiwelela ni yaamukhootta, vamurimani vaya yaatthikela wExipitu, ⁴⁰ ni yaamweerela Arao: ‘Munipakele amiluku weera enihooleleke, woona weera khanisuwenle etthu emweerenle Mose yoowo onikuminhe elapo ya wExipitu.’ ⁴¹ Hiiho, mahiku ene yaale, yampaka muluku eethiru a emompe exaana, ni yanvaha makeya muluku owo eethiru, ni yaapatxera ohakalala ni etthu yaapankaaya. ⁴² Tivanto, Muluku aahaarera ettuli* weera ekokhoreleke nsuwa, mweeri ni ithenyeeri sa wiirimu ntoko hiihaale elempwalaaya ni Maprofeta: ‘Nyuwo atthu a wIsraeli, mookiwiihera amakeya iyaakha iya 40 mweettaanyu onikareni?* ⁴³ Hooye, nyuwo moheemexa etenta ya* Molokhi ni elataratho ya muluku Refani, ilataratho seiyo mwaapankaanyu weera mukokhoreleke. Tivanto, kinimooroihani woorakamawo opwaha oBabilonia.’ ⁴⁴ Makholo ahu yaakhalano etenta ya* Onamoona onikareni, moovarihana ni ele Muluku aamulenlaawe Mose weera apake moovarihana ni ele onnaawe. ⁴⁵ Muhoolo mwaya, anamwane a makholo ahu vamoha ni Yehoxuwa, yaakuxa etenta eyo* enaroiha elapo ya atthu akina yaawo Muluku aawoomonlaawe ohoolo wa makholo ahu. Etenta eyo yaakhala* weiwo mpaka mahiku a Davidi. ⁴⁶ Ni owo aaphwanya mahala vamaithoni va Muluku ni aavekela weera akhaleno eparakha yompakela empa Muluku a Yakobe. ⁴⁷ Mene aari Salomoni aapanke empa eyo. ⁴⁸ Mene Namusulu khankhala empa yoopakiwa ni atthu,* ntoko onhimaawe profeta: ⁴⁹ ‘“Wiirimu ehitxe aka, ni elapo ya vathi kiniiyaathi manaani aka, empa ya moota heeni muneeraanyu mukipakele?” Ohimme Yehova.* “Nipuro heeni kineeraaka kimake? ⁵⁰ Khaiyene ti miyo kipanke itthu sootheene iya?”” ⁵¹ “Atthu oohiiwelela murino murima woowuuma ni maaru oowaleya,* nyuwosa munnakhootta wiiwelela munepa wootteela ntoko yenraaya makholo anyu, nyuwo-tho munnapaka etthu emoha-moharu. ⁵² Profeta heeni makholo anyu ehimutthara-tthanraaya? Aani, awo aawiiva maprofeta yaale yaahima owa wa naxariya, yoowo nyuwo munvarinhaanyu ni omwiiva. ⁵³ Nyuwosa mwaahaakhela Nlamulo moorweela mwa malaika, mene khamwaatthanre.” ⁵⁴ Yiiwakaru itthu iya, yaanyoonyiwa ni yaapatxera okhuuriha maino aya enwehexexaka. ⁵⁵ Mene owo asareñyeene munepa woottela, aaweha wiirimu ni aahoona ovuwa wa Muluku, ni Yesu eemenleene moono woolopwana wa Muluku, ⁵⁶ ni owo aaheera: “Kinnoona erimu ehuleñyeene ni Mwaana a Mutthu eemenleene moono woolopwana wa Muluku.” ⁵⁷ Awo yaakhuwela mpaka naakotelaayavo nsu naya, ni yaattiya maaru ni matata aya, ni ootheene yaamutthimakela ekelaka onvara. ⁵⁸ Avinyaka awosa yaamukumihera vaate va esidade enapatxera onvonya maluku. Anamoona oowootha yaakuxa maleya aaphitaanyalaawe enakela omuhiyera mmiravo mmoha iitthaniwa Saulo. ⁵⁹ Emaara yanvonyaaya maluku, Estefano aatxonttela eeraka: “Apwiya Yesu, mwaakhelele ekumi aka.” ⁶⁰ Akokhorakaru aakhuwela ni mmilo awe wootheene: “Yehova,* muhaavahe mulattu mwaha wa yoottheka ela.” Ahimakaru masu ala, owo aahookhwa.