Moreri 7:1-29
7 Leina le le molemo* le botoka go feta leokwane le le molemo,+ le letsatsi la loso le botoka go feta letsatsi le motho a tsholwang ka lone.
2 Go botoka go ya kwa ntlong ya khutsafalo go na le go ya kwa ntlong ya mokete,+ ka gonne seo ke bokhutlo jwa mongwe le mongwe, mme ba ba tshelang ba tshwanetse go akanya thata ka seo.
3 Go botoka go tshwenyega go na le go tshega,+ ka gonne fa sefatlhego se tlhontse se dira gore pelo e nne botoka.+
4 Batho ba ba botlhale ba ba mo ntlong ya khutsafalo ba akanya thata ka botshelo le ka loso. Mme sematla se nna se akantse ka go ja monate.*+
5 Go botoka go reetsa kgalemelo ya motho yo o botlhale+ go na le go reetsa pina ya dieleele.
6 Gonne fela jaaka modumo o o dirwang ke mmitlwa fa o sha ka fa tlase ga pitsa, setshego sa seeleele+ se ntse fela jalo; seno le sone ke lefela.
7 Mme kgatelelo e ka dira gore motho yo o botlhale a itshware jaaka setsenwa, e bile pipamolomo e dira gore pelo e nne bosula.+
8 Bokhutlo jwa kgang bo botoka go na le tshimologo ya yone. Go botoka go nna pelotelele go na le go nna mabela.+
9 O se ka wa kgopisega ka bonako,*+ ka gonne go kgopisega go nna mo sehubeng sa dieleele.*+
10 O se ka wa bua o re, “Ke ka ntlha yang fa malatsi a pele a ne a le botoka go na le a gone jaanong?” ka gonne motho yo o botlhale a ka se botse potso eo.+
11 Botlhale mmogo le boswa ke selo se se molemo e bile bo solegela molemo ba ba bonang lesedi la letsatsi.*
12 Gonne botlhale ke tshireletso+ fela jaaka madi e le tshireletso,+ mme molemo wa kitso le botlhale ke gore di boloka botshelo jwa mong wa tsone.+
13 Ela tlhoko tiro ya Modimo wa boammaaruri, gonne ke mang yo o ka kgonang go tlhamalatsa se a se sokamisitseng?+
14 Mo letsatsing le le molemo, akanya ka molemo wa lone,+ mme mo letsatsing la matshwenyego* ela tlhoko gore Modimo o dirile letsatsi leno fela jaaka lele,+ ke gone ka moo batho ba sa itseng* se se tla ba diragalelang mo nakong e e tlang.+
15 Fa ke ntse ke tshela botshelo jwa me jwa lefela+ ke bone sengwe le sengwe, go tloga ka mosiami yo o swang a sa ntse a le mosha mme a siame+ go fitlha ka modirabosula yo o tshelang lobaka lo loleele mme gone a le bosula.+
16 O se ka wa siama ka tsela e e feteletseng,+ kgotsa wa itshupa o le botlhale ka tsela e e feteletseng.+ Ke ka ntlha yang fa o tshwanetse go itlisetsa tshenyego?+
17 O se ka wa nna bosula ka tsela e e feteletseng, kgotsa wa nna seeleele.+ Ke ka ntlha yang fa o tshwanetse go swa o sa ntse o le mosha?+
18 Go molemo gore o reetse ditlhagiso tseno ka bobedi mme o se ka wa itlhokomolosa e nngwe;+ gonne motho yo o boifang Modimo o tla di reetsa tsoopedi.
19 Botlhale bo dira gore motho yo o botlhale a nne maatla thata go gaisa banna ba ba nonofileng ba le lesome ba ba mo motseng.+
20 Gonne ga go na motho yo o siameng mo lefatsheng yo o nnang a dira molemo mme a sa leofe.+
21 Gape, o se ka wa isa lefoko lengwe le lengwe le batho ba le buang kwa pelong;+ go seng jalo, o ka nna wa utlwa motlhanka wa gago a go hutsa;
22 gonne o itse sentle mo pelong ya gago gore le wena o hutsitse ba bangwe gantsi.+
23 Ke ne ka leka tseno tsotlhe ka botlhale, mme ka re: “Ke tla nna botlhale.” Mme ke ne ke sa kgone go bo fitlhelela.
24 Se se nnileng teng ga se kgone go fitlhelelwa e bile se boteng thata. Ke mang yo o ka se tlhaloganyang?+
25 Ke ne ka kaela pelo ya me gore e itse, e senke e bo e batlisise botlhale le lebaka la go bo dilo di direga, le gore ke tlhaloganye gore bosula ke bomatla le boeleele ke botsenwa.+
26 Foo ke ne ka lemoga seno: Mosadi yo o tshwanang le letlowa la motsomi o bogalaka thata go feta loso, pelo ya gagwe e tshwana le matlowa a a gogwang e bile diatla tsa gagwe di tshwana le dikeetane tsa kgolegelo. Motho yo o itumedisang Modimo wa boammaaruri o tla falola mo mosading yoo,+ mme mosadi yoo o tshwara moleofi.+
27 Mophuthi+ a re, “Bona, seno ke se ke se fitlheletseng. Ke ne ka batlisisa dilo ka go latelana gore ke fitlhe mo tshwetsong e ke e dirileng,
28 mme se ke neng ka nna ke se batla, ga ke ise ke se bone. Mo bathong ba le sekete, ke ne ka bona monna a le mongwe yo o siameng, mme ga ke ise ke bone mosadi yo o siameng mo go bone.
29 Ke ne ka bona seno fela: Modimo wa boammaaruri o dirile batho ba siame,+ mme ba ne ba senka maano a le mantsi.”+
Dintlha Tse di Kwa Tlase
^ Kgotsa “Tsela e e molemo e motho a itsegeng ka yone.” Seheb., “Leina.”
^ Kgotsa “ka go itlosa bodutu.”
^ Kgotsa gongwe “ke letshwao la seeleele.”
^ Seheb., “wa itlhaganelela go kgopisega mo moyeng wa gago.”
^ Go tewa ba ba tshelang.
^ Kgotsa “ba sa lemogeng.”
^ Kgotsa “masetlapelo.”
