Moreri 4:1-16

  • Kgatelelo e botlhoko go feta loso (1-3)

  • Kafa tiro e tshwanetseng go tsewa ka gone (4-6)

  • Botlhokwa jwa go nna le tsala (7-12)

    • Ba babedi ba botoka go na le a le mongwe (9)

  • Botshelo jwa mmusi e ka nna lefela (13-16)

4  Gape ke ne ka ela tlhoko ditiro tsotlhe tsa kgatelelo tse di dirwang mo lefatsheng.* Ke ne ka bona dikeledi tsa ba ba gatelelwang, mme go ne go se na ope yo o ba gomotsang.+ E bile ba ba ba gatelelang ba ne ba na le maatla, mme go ne go se na ope yo o ba gomotsang.  Ka jalo, ke ne ka lemoga gore batho ba ba neng ba setse ba sule ba botoka go na le batho ba ba neng ba sa ntse ba tshela.+  Mme yo a iseng a tsholwe o botoka mo go bone ka bobedi,+ ka gonne ga a ise a bone ditiro tse di ngomolang pelo tse di dirwang mo lefatsheng.*+  Mme ke ne ka bona matsapa a magolo* le tiro ya botswerere tse di nnang gone fa batho ba gaisana;+ seno le sone ke lefela, ke go lelekisa phefo.  Sematla se phutha diatla, mme ka go dira jalo se a ipolaya.*+  Go ikhutsa go se kae go botoka go na le go dira tiro e ntsi ya bonatla* le go lelekisa phefo.+  Ke ne ka ela tlhoko sekai se sengwe sa lefela mo lefatsheng:*  Go na le motho yo o nnang a le nosi, yo o se nang tsala; ga a na morwa kgotsa morwarraagwe, mme o nna a bereka ka thata. Matlho a gagwe ga a ke a kgotsofadiwa ke dikhumo.+ Mme gone, a o a tle a ipotse gore, ‘Ke berekela mang ka thata jaana e bile ke eng fa ke sa itumela’?+ Seno le sone ke lefela e bile ke tiro e e ngomolang pelo.+  Ba babedi ba botoka go na le a le mongwe+ ka gonne ba na le maduo a a molemo* a tiro ya bone ya bonatla. 10  Gonne fa mongwe wa bone a wa, yo mongwe a ka kgona go thusa molekane wa gagwe. Mme go tla diragala eng ka motho yo o wang a le esi mme go se na yo o mo thusang go ema? 11  Mo godimo ga moo, fa ba babedi ba robala mmogo, ba tla thuthafala, mme yo o esi a ka thuthafala jang? 12  E bile mongwe a ka fekeetsa motho yo o esi, mme ba babedi ba ka kgona go mo fenya. Mme mogala o o menaganeng seraro ga o ka ke wa kgaolwa ka bonako.* 13  Ngwana yo o humanegileng mme a le botlhale o botoka go na le kgosi e e tsofetseng mme e le sematla,+ e e sa tlholeng e na le tlhaloganyo ya go ikobela tlhagiso.+ 14  Gonne o* ne a tswa mo kgolegelong gore a nne kgosi,+ le fa gone a ne a tshotswe a humanegile fa go ne go busa kgosi ele e e tsofetseng.+ 15  Ke ne ka ela tlhoko botlhe ba ba tshelang ba ba tsamayatsamayang mo lefatsheng,* mmogo le se se diragalelang motlhatlhami yo mmotlana yo o tsayang maemo a yo mongwe. 16  Le fa gone go na le batho ba ba mo emang nôkeng ka metlha, ba ba tlang moragonyana ga ba kitla ba mo itumelela.+ Seno le sone ke lefela, ke go lelekisa phefo.

Dintlha Tse di Kwa Tlase

Seheb., “ka fa tlase ga letsatsi.”
Seheb., “ka fa tlase ga letsatsi.”
Kgotsa “tiro ya bonatla.”
Seheb., “mme se ja nama ya sone.”
Seheb., “Boikhutso jo bo tletseng seatla bo botoka go na le tiro ya bonatla e e tletseng seatla gabedi.”
Seheb., “ka fa tlase ga letsatsi.”
Kgotsa “le melemo e mentsi.”
Kgotsa “motlhofo.”
Go ka tswa go tewa ngwana yo o botlhale yono.
Seheb., “ka fa tlase ga letsatsi.”