Moreri 2:1-26
2 Foo ke ne ka bua jaana mo pelong ya me: “A ko ke leke go ijesa monate,* gore ke bone gore go tla nna le molemo ofe.” Mme seo le sone e ne e le lefela.
2 Ke ne ka re: “Go tshega ke botsenwa.”
Gape ke ne ka ipotsa gore go ijesa monate* go na le mosola wa eng.
3 Ke ne ka swetsa ka gore ke batlisise gore go ijesa monate ka go nwa beine+ thata go na le molemo ofe, mme gone ke ne ke sa latlhegelwa ke tlhaloganyo; Ke ne ka bo ka dira dilo tsa boeleele gore ke bone gore ke molemo ofe o batho ba nang le one mo nakong e khutshwane ya botshelo jwa bone mo lefatsheng.
4 Ke ne ka dira ditiro tse dikgolo.+ Ke ne ka ikagela matlo;+ Ke ne ka ijalela masimo a morara.*+
5 Ke ne ka itirela ditshingwana le diparaka, mme ka jala mo go tsone ditlhare tsa maungo tsa mefuta yotlhe.
6 Ke ne ka itirela matamo, gore ke nosetse ditlhatshana tse di sa ntseng di gola tse di mo dikgweng tsa me.
7 Ke ne ka nna le batlhanka le malata,+ e bile ke ne ka nna le batlhanka ba ba tsholetsweng mo ntlong ya me.* Gape ke ne ka nna le leruo le lentsi, metlhape le matsomane a le mantsi,+ go feta botlhe ba ba neng ba nna teng pele ga me mo Jerusalema.
8 Ke ne ka ikokoanyetsa selefera le gauta,+ matlotlo a* dikgosi le a diporofense.+ Ke ne ka ikokoanyetsa baopedi ba banna le ba basadi, mmogo le se se itumedisang bomorwa batho fela thata: mosadi, ke raya basadi ba bantsi.*
9 Ka jalo, ke ne ka nna mogolo ka bo ka feta ope fela yo o kileng a nna teng pele ga me mo Jerusalema.+ Mme ke ne ka tswelela ke le botlhale.
10 Ga ke a ka ka itima sepe se ke neng ke se eletsa.*+ Ga ke a ka ka thibela pelo ya me go ijesa monate* wa mofuta ope fela, ka gonne pelo ya me e ne e itumelela tiro ya me yotlhe ya bonatla, mme seno e ne e le tuelo* ya tiro yotlhe ya me ya bonatla.+
11 Le fa go ntse jalo, fa ke ne ke leba ditiro tse diatla tsa me di di dirileng le tiro yotlhe ya bonatla e ke neng ke dirile ka natla gore ke e wetse,+ ke ne ka lemoga gore sengwe le sengwe e ne e le lefela,+ e le go lelekisa phefo; go ne go se na sepe se se mosola* mo lefatsheng.*+
12 Go tswa foo, ke ne ka ela tlhoko botlhale le botsenwa le boeleele.+ (Gonne ke eng se motho yo o tlang morago ga kgosi a ka se dirang? A ka dira fela se se setseng se dirilwe.)
13 Mme ke ne ka lemoga gore botlhale bo mosola go feta boeleele,+ fela jaaka lesedi le le mosola go feta lefifi.
14 Motho yo o botlhale o bona sentle tsela e a tshwanetseng go tsamaya ka yone;*+ mme sematla se tsamaya mo lefifing.+ Gape ke ne ka lemoga gore go na le phelelo e e tshwanang e e ba welang botlhe.+
15 Foo ke ne ka bua jaana mo pelong ya me: “Se se diragalelang sematla le nna se tla ntiragalela.”+ Mme jaanong, ke solegetswe molemo ke eng ka go nna botlhale thata? Ka jalo, ke ne ka bua jaana mo pelong ya me: “Seno le sone ke lefela.”
16 Gonne ga go na ope yo o nnang a gopolwa ka bosakhutleng, e ka tswa e le motho yo o botlhale kgotsa yo o sematla.+ Mo malatsing a a tlang, mongwe le mongwe o tla bo a lebetswe. Mme yo o botlhale o tla swa jang? Fela jaaka sematla.+
17 Ka jalo, ke ne ka simolola go tlhoa botshelo,+ ka gonne go ne go lebega sengwe le sengwe se se dirwang mo lefatsheng* se ngomola pelo, gonne sengwe le sengwe e ne e le lefela,+ e le go lelekisa phefo.+
18 Ke ne ka simolola go tlhoa sotlhe se ke dirileng ka natla gore ke nne le sone mo lefatsheng,*+ ka gonne ke tshwanelwa ke go se tlogelela motho yo o tlang morago ga me.+
19 Mme ke mang yo o itseng gore a o tla nna botlhale kgotsa seeleele?+ Le fa go ntse jalo, o tla laola dilo tsotlhe tse ke dirisitseng maatla a me le botlhale jwa me gore ke nne le tsone mo lefatsheng.* Seno le sone ke lefela.
20 Ka jalo, pelo ya me e ne ya simolola go hutsafalela tiro yotlhe ya bonatla e ke neng ke e dirile ka natla mo lefatsheng.*
21 Gonne motho a ka nna a bereka ka natla, a kaelwa ke botlhale le kitso le bokgoni, le fa go ntse jalo, sengwe le sengwe* sa gagwe o tshwanelwa ke go se tlogelela motho yo o sa dirang ka natla.+ Seno le sone ke lefela le masetlapelo a magolo.
22 Tota motho o boelwa ke eng mo tirong yotlhe ya gagwe ya bonatla le keletso e e mo tlhotlheletsang* gore a dire ka natla mo lefatsheng?*+
23 Gonne tiro ya gagwe e mo tlisetsa botlhoko le go ngomoga pelo botshelo jotlhe jwa gagwe,+ tota e bile le bosigo pelo ya gagwe ga e ikhutse.+ Seno le sone ke lefela.
24 Ga go na sepe se se botoka fa e se gore motho a je, a nwe a bo a itumelele* tiro ya gagwe ya bonatla.+ Ke lemogile gore seno le sone se tswa mo seatleng sa Modimo wa boammaaruri,+
25 gonne ke mang yo o jang le yo o nwang botoka go na le nna?+
26 Modimo wa boammaaruri o naya motho yo o mo itumedisang botlhale le kitso le boitumelo,+ mme o naya moleofi tiro ya go phutha le go kokoanya e le fela gore a neye motho yo o mo itumedisang.+ Seno le sone ke lefela, ke go lelekisa phefo.
Dintlha Tse di Kwa Tlase
^ Kgotsa “go itumela.”
^ Kgotsa “go itumela.”
^ Kgotsa “diterebe; moretlwa.”
^ Seheb., “le barwa ba mo ntlong.”
^ Kgotsa “thoto ya.”
^ Kgotsa, “mohumagadi, ee, bahumagadi.”
^ Kgotsa “kabelo.”
^ Kgotsa “go itumela.”
^ Seheb., “se matlho a me a neng a se kopa.”
^ Kgotsa “se se solegelang molemo.”
^ Seheb., “ka fa tlase ga letsatsi.”
^ Seheb., “matlho a gagwe a mo tlhogong ya gagwe.”
^ Seheb., “ka fa tlase ga letsatsi.”
^ Seheb., “ka fa tlase ga letsatsi.”
^ Seheb., “ka fa tlase ga letsatsi.”
^ Seheb., “ka fa tlase ga letsatsi.”
^ Seheb., “kabelo.”
^ Seheb., “le go kgaratlha ga pelo ya gagwe.”
^ Seheb., “ka fa tlase ga letsatsi.”
^ Kgotsa “a bone molemo wa.”
