Esera 9:1-15

  • Baiseraele ba nyala batho ba ditšhaba tse dingwe (1-4)

  • Thapelo ya ga Esera (5-15)

9  Mme fela fa dilo tseno di sena go dirwa, dikgosana di ne tsa nkatamela mme tsa re: “Batho ba Iseraele le baperesiti le Balefi ga ba a ikgaoganya le ditšhaba tsa mafatshe a mangwe le mekgwa ya tsone e e makgapha,+ e leng mekgwa ya Bakanana, Bahite, Baperise, Bajebuse, Baamone, Bamoabe, Baegepeto+ le Baamore.+  Ba tsere bangwe ba bomorwadiabone gore e nne basadi ba bone le gore e nne basadi ba bomorwaabone.+ Jaanong bone, e leng losika lo lo boitshepo,+ ba tlhakane le ditšhaba tsa mafatshe a mangwe.+ Dikgosana le balaodi ke bone ba ba ntseng ba di goga kwa pele mo ditirong tseno tsa go sa ikanyege.”  E rile fela fa ke utlwa seno, ke ne ka gagoganya diaparo tsa me mme ka kumola moriri mongwe wa tlhogo ya me le ditedu tsa me, mme ke ne ka nna fa fatshe ke gakgametse thata.  Foo mongwe le mongwe yo o neng a boifa* mafoko a Modimo wa Iseraele o ne a tla kwa go nna ka ntlha ya ditiro tsa go sa ikanyege tsa batho ba ba neng ba boile kwa botshwarwa, fa ke ne ke ntse fa fatshe ke gakgametse thata go fitlha ka nako ya setlhabelo sa dijo tsa ditlhaka se se ntshiwang maitseboa.+  Mme ka nako ya setlhabelo sa dijo tsa ditlhaka se se ntshiwang maitseboa,+ morago ga gore ke ikokobetse ka tsela eno, ke ne ka ema ka diaparo tsa me tse di gagogantsweng, mme ke ne ka khubama ke bo ke otlololela diatla tsa me kwa go Jehofa, Modimo wa me.  Mme ke ne ka re: “Ao tlhe Modimo wa me, ke tlhabilwe ke ditlhong e bile ke swabile mo ke sa kgoneng go tsholeletsa sefatlhego sa me kwa go wena, tlhe Modimo wa me, ka gonne maleo a rona a ntsifetse a fitlha kwa godimo ga ditlhogo tsa rona le molato wa rona o mogolo o fitlha kwa magodimong.+  Go tloga mo metlheng ya borraaronamogolo go fitlha mo motlheng ono molato wa rona o nnile mogolo;+ mme ka ntlha ya maleo a re a dirileng, rona, dikgosi tsa rona le baperesiti ba rona re ne ra tsenngwa mo seatleng sa dikgosi tsa mafatshe a mangwe, re ne ra bolawa ka tšhaka,+ ra isiwa botshwarwa,+ ra gapelwa dithoto tsa rona+ ra bo ra tlhabisiwa ditlhong, jaaka go ntse gompieno.+  Mme jaanong Jehofa, Modimo wa rona o re bontshitse kutlwelobotlhoko ka nakwana ka go letla gore go nne le ba ba falolang le ka go re naya botshabelo jo bo sireletsegileng mo lefelong la gagwe le le boitshepo,+ go dira gore matlho a rona a phatsime le go dira gore re ikhutse mo bokgobeng go le gonnye, wena Modimo wa rona.  Gonne le fa gone re le makgoba,+ Modimo wa rona ga a ka a re tlogela fela re le makgoba; mme o re bontshitse lorato lo lo sa kgaotseng fa pele ga dikgosi tsa Peresia,+ gore re nne le maatla gape mme re age ntlo ya Modimo wa rona+ le go tsosolosa matlotla a yone le go re naya lobota lwa maje* mo Juda le mo Jerusalema. 10  “Mme jaanong tlhe Modimo wa rona, re tla reng morago ga seno? Gonne re tlogetse ditaelo tsa gago, 11  tse o neng wa re naya tsone o dirisa batlhanka ba gago ba e leng baporofeti o re: ‘Lefatshe le lo yang go nna kwa go lone ke lefatshe le le seng phepa ka gonne batho ba ditšhaba tseo ga ba phepa, ka ntlha ya gore ba le tladitse ka mekgwa ya bone e e makgapha gotlhe fela.+ 12  Ka jalo, lo se ka lwa tsaya bomorwadialona lwa ba nyadisa bomorwaabone kgotsa lwa letla gore bomorwadiabone ba nyalwe ke bomorwaalona;+ e bile ga lo a tshwanela go ba thusa gore ba tshele ka kagiso le gore ba atlege,+ gore lo tle lo nonofe mme lo je molemo wa lefatshe le gore lo le rue gore bomorwaalona ba tle ba nne mo go lone ka bosakhutleng.’ 13  Mme fa re sena go diragalelwa ke dilo tseno tsotlhe ka ntlha ya ditiro tsa rona tse di bosula le molato wa rona o mogolo, wena Modimo wa rona, ga o a ka wa re otlhaela maleo a rona+ mme o ne wa letla gore rona ba re leng fano re falole.+ 14  A re tshwanetse go tlola ditaelo tsa gago gape, re bo re dira kgolagano ya lenyalo* le ditšhaba tse di dirang dilo tseno tse di makgapha?+ A ga o kitla o re galefela mo o tla re fedisang gotlhelele, o sa tlogele ope yo o salang kgotsa yo o falolang? 15  Ao tlhe Jehofa, Modimo wa Iseraele, o tshiamo,+ ka gonne ke rona masalela a a falotseng mo letsatsing leno. Ke rona bano fa pele ga gago re le molato, ka gonne ga go kgonege go ema fa pele ga gago ka ntlha ya seno.”+

Dintlha Tse di Kwa Tlase

Seheb., “yo o neng a roromisiwa ke.”
Kgotsa “lobota lwa tshireletso.”
Kgotsa “re nyalelana.”